3 Jaꞌ Jehová jix oc cꞌal yetoj naj Josafat, yutol laan jix yute sbꞌeybꞌal jaxca jix yute sbꞌeybꞌal naj rey David yet sbꞌabꞌelal, jaꞌton smam icham. Manaj sbꞌeybꞌal wan chi akꞌon servil jun yechel Baal jix sbꞌeybꞌalne, 4 yutol jaꞌ sDiosal yetoj smam icham jaꞌ jix yakꞌ servil, jix sjije wan chejbꞌanile. Cꞌam cꞌal bꞌey jix oc tzajan yintaj sbꞌeybꞌal ebꞌ conobꞌ Israel. 5 Yuxan jix colwa Jehová yetoj, watxꞌ cꞌal jix yun yeloc yin yopiso. Masanil ebꞌ a Judá jix yakꞌ saꞌbꞌeal ebꞌ tet, yuxan caw jix a can sbꞌeomal naj, yel xacꞌal jix bꞌinale yin yopiso. 6 Yin masanil scꞌul jix oc tzajan yintaj cuybꞌanile jix yakꞌ Jehová, jix yiꞌon cꞌal pax el wan yet xaambꞌal bꞌey chi oc ebꞌ ánima yin eyilal bꞌey wan wonan naat eyaoj, cꞌal masanil wan yechel Aserá.

7 Oxebꞌxa abꞌil yoc naj yin reyal, jix ẍejontoj wan ebꞌ mimej yaaw yeocoj, jaꞌton: Ben-hail, Abdías, Zacarías, Natanael, cꞌal Micaías yet chi too cuyle ebꞌ ánima yu ebꞌ bꞌey chi apni slawubꞌal yakꞌon yaawil. 8 Jix too cꞌal pax wan ebꞌ Levita yetoj ebꞌ, jaꞌton ebꞌ tiꞌ: Semaías, Netanías, Zebadías, Asael, Semiramot, Jonatán, Adonías, Tobías, cꞌal Tobadonías. Jaꞌjun cꞌal pax ebꞌ yakꞌomal xaambꞌal tiꞌ yetoj ebꞌ, jaꞌton: Elisamá cꞌal Joram. 9 Jix chejletoj ebꞌ tuꞌ yetoj an yuunal sley Jehová, yet chi too cuyle ebꞌ ánima bꞌey masanil conobꞌlaj yul yet Judá yu ebꞌ.

10 Yu tuꞌ xin, jaꞌ masanil wan nacionlaj ey scawilal Judá tuꞌ, caw ey xiwcꞌulal ebꞌ tet Jehová, ma xa yakꞌ jowal ebꞌ yin naj Josafat. 11 Jaxa jix yunne, tol ey ebꞌ Filisteo jix yiꞌtej saꞌbꞌeal, cꞌal chꞌen plata yin stoolabꞌal tet naj Josafat tuꞌ. Quey cꞌal pax tuꞌ ebꞌ Árabe, jix yiꞌtej 7,700 noꞌ meꞌ ebꞌ; jacꞌalaꞌ quey cꞌal pax tuꞌ sbꞌisil noꞌ chiw jix yiꞌtej ebꞌ tet naj.

12 Queytuꞌ jix yun yiꞌon yip yopiso naj Josafat. Jix swaꞌne a smuroal wan conobꞌlaj eyoc yul yet Judá. 13 Cꞌamxa chi alcha jantaj loꞌbꞌe cꞌuan yu bꞌey wan conobꞌ tuꞌ. Ey cꞌal pax ebꞌ soldado caw wal jelan yin jowal eyecꞌ bꞌey Jerusalén. 14 Jaꞌ slistail ebꞌ soldado tiꞌ, jatacꞌalaꞌ yicꞌaal junjun ebꞌ: Jaꞌ naj Adná, yaaw yeoc yin jun 300,000 ebꞌ soldado tol jelan yakꞌon jowal xol ebꞌ yicꞌaal Judá. 15 Jaxa naj Johanán, yaaw yeoc yin jun 280,000 ebꞌ soldado. 16 Jaxa naj Amasías, scꞌaal Zicrí; jaꞌ jun tuꞌ jix el wal yin scꞌul yaon oc sbꞌa yin yakꞌon servil Jehová, jaꞌ naj yaaw yeoc yin jun 200,000 ebꞌ soldado caw wal jelan.

17 Jaxa naj Eliadá yaaw yeoc xol ebꞌ soldado yicꞌaal Benjamín, jaꞌton naj caw jelan yakꞌon jowal yetoj 200,000 soldado, iꞌbꞌil oc sjulbꞌal ebꞌ, yetoj cꞌal pax chꞌen majbꞌal sat julbꞌal. 18 Jaxa naj Jozabad yaaw yeoc yin jun 180,000 soldado lista xacꞌal ye smitxꞌkꞌabꞌ ebꞌ yin jowal.

19 Jaꞌ masanil ebꞌ tuꞌ, eyoc yalan yopiso naj rey, jaxa ebꞌ soldado eyoc bꞌey wanxa conobꞌlaj eyoc smuroal yul yet Judá, cꞌam ebꞌ eyoc sbꞌisiloj ebꞌ tuꞌ.