Swa Kꞌane Naj Asá Yetoj Naj Ben-adad
16
Jaꞌ yet 36 abꞌil xa yoc naj Asá yin reyal, jix tit naj Baasá sreyal Israel yakꞌon jowal yin Judá. Ian xacꞌal jix scaꞌ swaꞌne oc smuroal conobꞌ Ramá, yet chi smajchen el bꞌe naj, yet watxꞌ cꞌamxa mactxequel chi skeꞌ yoctoj yul yet Judá, tam wal yeltoj. 2 Yuxan jix iꞌle eltej masanil chꞌen oro cꞌal chꞌen plata bꞌey stemplo Jehová yu naj rey Asá, cꞌal bꞌey spalacio, catuꞌ jix yaontoj tet naj Ben-adad, sreyal Siria, jatuꞌ caan bꞌey conobꞌ Damasco. Catuꞌ jix yalon cꞌal pax toj jaxca tiꞌ: 3 Cu waꞌne yeoc junoj cu wa kꞌane ja wetoj, jaxca jix yute sbꞌa ebꞌ naj cu mam. Jaꞌ titiꞌ chi watoj chꞌen oro cꞌal chꞌen plata ey jaach. Akꞌ lawoj ey ja wa kꞌane yetoj naj Baasá sreyal Israel tuꞌ, yet watxꞌ chi sbꞌej yakꞌon jowal naj win, ẍi toj naj Asá tuꞌ.4 Jix ẍaꞌ scꞌul naj rey Ben-adad tzetyetal jix yal naj rey Asá tuꞌ, yuxan jix ẍejtoj ebꞌ soldado yetoj syaawil ebꞌ, yet chi too yakꞌ jowal ebꞌ yul-laj wan conobꞌ ey yul yet Israel. Queytuꞌ jix yun yeyqꞌuey conobꞌ Iión, conobꞌ Dan, conobꞌ Abel-maim, yetoj cꞌal masanil conobꞌlaj ey yul yet Neftalí bꞌey chi cꞌubꞌale oc loꞌbꞌe. 5 Jaꞌ yet jix al-le jun tiꞌ tet naj Baasá, jix sbꞌejoncan swaꞌnen a conobꞌ Ramá, catuꞌ jix too naj scolon el snación. 6 Queytuꞌ jix yun yiꞌontoj naj rey Asá masanil ebꞌ yet Judá tuꞌ yetoj, jix bꞌet yiꞌontej chꞌen chꞌen cꞌal teꞌ teꞌ jix syambꞌa oc naj Baasá yu swaꞌnen a conobꞌ Ramá yaloni; jaxa yetoj wan tuꞌ jix swaꞌne a conobꞌ Guebá, cꞌal Mizpá.
7 Jaꞌ yet jun tiempoal tuꞌ, jaꞌ jun ẍejabꞌ Dios chi yij Hananí jix apni oc scꞌatan naj rey Asá, jix yalon tet jaxca tiꞌ: Yu cꞌal tol jaꞌ naj sreyal Siria jix ja waoc yipoj ja cꞌul, catuꞌ manaj Jehová cu Diosal, yu jun tuꞌ, yuxan jix yiꞌel sbꞌa ebꞌ soldado yul ja kꞌabꞌ. 8 ¿Tumi ma ja wil xin, tol jaꞌ ebꞌ Etíope cꞌal ebꞌ Libio, manxa jantajoj soldado jix syambꞌa oc bꞌulan ebꞌ, ecꞌal pax scarruaje yet jowal ebꞌ, miman cꞌal pax soldado eyoc yibꞌan che? Jaxa jix yunne, jaꞌ Jehová jix aon oc ebꞌ yul ja kꞌabꞌ, yutol jaꞌ eyoc yipoj ja cꞌul. 9 Jaꞌ Jehová chi yil masanil tzetyetal chi ecꞌtoj bꞌey yul yibꞌankꞌinal tiꞌ, chi yakꞌ stecꞌanil ebꞌ tol chi yaoc yin scꞌul sicꞌlebꞌil. Jaxa jun tzet jix ja wun tinaniꞌ, laan wal jaxca chi yun junoj tol cꞌam snaꞌbꞌal; yuxan jaꞌ tinaniꞌ cꞌal yet oj bꞌey cꞌaltoj, jowal cꞌal oj ja wilaꞌ, ẍi tet naj.
10 Jaxa naj rey Asá jix tit sjowal scꞌul yin jun ẍejabꞌ Dios tuꞌ, jix ale octoj yul preso yu naj. Jacꞌalaꞌ, jaꞌ yet jun tiempoal tuꞌ, caw jix etex jaywanoj ebꞌ bꞌey yul conobꞌ tuꞌ yu naj.
Scamichal Naj Rey Asá
11 Jaꞌ skꞌaneal naj rey Asá, yet tax cꞌal yichbꞌanil, masantaꞌcꞌal slawubꞌal, jatuꞌ tzꞌibꞌebꞌilcan bꞌey yul an juun bꞌey ey can ey skꞌaneal ebꞌ sreyal Judá, cꞌal ebꞌ sreyal Israel. 12 Jaꞌ yet 39 abꞌil xa yoc naj yin reyal, jix oc jun yaꞌbꞌil caw jow yin yajan naj, ma xacꞌal snaꞌ sbꞌa scꞌul yu jun syaꞌilal tuꞌ, ma yaoc sbꞌa yul skꞌabꞌ Jehová, asanne bꞌey ebꞌ anwam jix too yakꞌ antem sbꞌa naj. 13 Jaꞌ yet jix tzꞌajna 41 abꞌil yoc naj yin reyal, jix cami, 14 jix mujle naj yu ebꞌ bꞌey jun smujbꞌanil camom jix yakꞌ waꞌnele bꞌey sconobꞌ David. Caw miman perfume jix yaoc ebꞌ yibꞌan sbꞌatxlubꞌal smimanil, yetoj masanil tujan ambꞌal tol sukꞌukꞌi xacꞌal yoc sabꞌ; caw watxꞌ xacꞌal jix yute ey ebꞌ. Jix lawi tuꞌ, jix yaon oc jun miman kꞌakꞌ ebꞌ yu xꞌoxon el ebꞌ tol miman yeloc apnoj yul sat ebꞌ.