Jaꞌ jun ẍejabꞌ Dios chi yij Azarías scꞌaal Obed, jix oc Yespíritu Dios yin, 2 yuxan jix eltoj chaꞌle apnoj naj Asá yu naj, jix yalon tet jaxca tiꞌ: Jaach Asá, abꞌ tzet oj wal ey jaach, cꞌal masanil jex wet conobꞌ a Judá, cꞌal jex yicꞌaal Benjamín: Jaꞌton Jehová eyoc je yetoj, ta tol cꞌam cꞌal che yiꞌel je bꞌa yintaj Naj. Ta asan tet Naj chex txali, yel oj takꞌwoj cꞌal Naj ey jex, ta tol oj je yintajne can pax el tzet chi yalaꞌ, oj jex bꞌejle cꞌal pax can yu. 3 Jaꞌ cu conobꞌ tiꞌ yet yalantoj, mimanxa tiempo tol manxa eyoj oc Dios ketoj, cꞌamxa ebꞌ yakꞌomal xaambꞌal chi cuywa cu xol, cꞌamxa cuybꞌanile chi al-le ey jon. 4 Jaxa yet jix jul syaꞌilal kibꞌan, catuꞌ jix kaon oc cu bꞌa yul skꞌabꞌ Jehová cu Diosal, catuꞌ jix cu col-le el yu Naj. 5 Jaꞌ yet cꞌamto chi kaoc cu bꞌa yul skꞌabꞌ Jehová yet jun tiempoal tuꞌ, cꞌamxa xacꞌal tzalacꞌulal yecꞌ junoj mactxequel chi ecꞌabꞌi, cꞌamxa chi txeclo a junoj ey yopiso xol masanil cu nación. 6 Ey ebꞌ ánima jix yakꞌ qꞌueyle el sbꞌa, ey cꞌal pax wan nación, cꞌal wan conobꞌ jix qꞌueyle el yu wanxa conobꞌ, yutol jaꞌ Dios jix akꞌon somcha scꞌul ebꞌ yu mimej syaꞌilal. 7 Jal jex jaex tiꞌ xin, tecꞌan cꞌal che yute je bꞌa, cꞌam ojabꞌ che yakꞌ caabꞌcꞌulal, yutol jaꞌ Jehová oj pajtzen je mulnail tiꞌ, ẍi Azarías tet ebꞌ.