2 Masanil cꞌal tzet jix yun naj Asá tuꞌ, watxꞌ cꞌal, yutol jichan cꞌal sbꞌeybꞌal naj sattaj Jehová sDiosal. 3 Jix yiꞌel masanil wan yet xaambꞌal yet comon sdiosal ebꞌ txꞌoj conobꞌal, yetoj cꞌal wan pat waꞌnebꞌil a bꞌey wan wonan naat eyaoj. Jix smakꞌon poꞌo wan chꞌen chꞌen yaꞌ yili yu ebꞌ ánima, jix stzokꞌon a jun teꞌ yechel comon dios chi yij Aserá. 4 Jix yalon cꞌal pax tet ebꞌ yet Judá, tol chi yaoc sbꞌa ebꞌ yul skꞌabꞌ Jehová, jaꞌton sDiosal smam icham ebꞌ. Sowalil tol chi sjije scuybꞌanil cꞌal ẍejbꞌanil Jehová ebꞌ. 5 Jix yalon naj Asá tol chi iꞌle el wan pat na bꞌey chi oc eyilal tet wan comon dios bꞌey wonanlaj yul yet Judá, cꞌal wan sneetal bꞌey chi tzꞌaꞌ incienso. Jaꞌ yet eyoc naj yin reyal, cꞌam cꞌal jowal jix oc yul sconobꞌ tuꞌ.

6 Jaꞌ Jehová jix akꞌon watxꞌcꞌulal xol ebꞌ yet jun tiempoal tuꞌ, caw tzalacꞌulal xacꞌal yeoc jun nación tuꞌ. Cꞌamxa cꞌal bꞌey jix yakꞌ jowal ebꞌ, yutol jaꞌ Jehová jix yakꞌ swatxꞌcꞌulal tet ebꞌ, yu jun tuꞌ, yuxan jix swaꞌne a smuroal wan conobꞌ naj rey Asá bꞌey Judá. 7 Jix yalon naj tet masanil ebꞌ ánima a Judá jaxca tiꞌ: Cu waꞌnewej a wan conobꞌ tiꞌ, cu waꞌnewej pax oc smuroal yinlaj, cu waꞌnewej pax a bꞌey chi steyne ebꞌ soldado yibꞌan smuroal tiꞌ, jaꞌ chꞌen hierro chi oc yuloj spuertail. Yajbꞌan eyecꞌ jun nación tiꞌ yul cu kꞌabꞌ, yutol jijem jon tet Jehová cu Diosal. Jaꞌ jix akꞌon watxꞌcꞌulal ey jon yetoj masanil ebꞌ caan ecꞌ cu cawilal tiꞌ, ẍi naj. Yu jun tuꞌ, watxꞌ xacꞌal jix yun yiꞌon sbꞌa jun mulnail tuꞌ.

8 Jaꞌ naj Asá tuꞌ, ey 300,000 ebꞌ soldado naj; ey pax smajbꞌal sat julbꞌal ebꞌ, ey cꞌal pax slanza ebꞌ. Ey pax 280,000 ebꞌ yet Benjamín. Jaꞌ ebꞌ tuꞌ ey cꞌal pax smajbꞌal sat julbꞌal ebꞌ, yetoj cꞌal slanza ebꞌ. Jaꞌ masanil ebꞌ soldado tuꞌ, caw jelan yakꞌon jowal ebꞌ. 9 Jix tit naj Zérah sreyal Etiopía yakꞌ jowal yin ebꞌ, yetoj jun 1,000,000 ebꞌ soldado, yetoj 300 carruaje yet jowal, jix jul ebꞌ bꞌey Maresá. 10 Jix eltoj naj rey Asá tuꞌ yakꞌ jowal yetoj, jix ẍaꞌle sbꞌa yetoj bꞌey sjobꞌeal yet Sefata, bꞌey scawilal Maresá. 11 Jix yalon sbꞌa naj Asá tet Jehová sDiosal, jix yaloni: Jaach Jehová jin Diosal, jaach tiꞌ laan cꞌal chi yun ja colwa yetoj mactxequel ecꞌal bꞌisil, yetoj cꞌal mactxequel cꞌam txꞌial sbꞌisil. Yu tuꞌ xin, jaach jin Diosal, colwaan ketoj jon. Ilaꞌ tol asanne jaach ey jaach oc yipoj cu cꞌul, yuxan yin wal ja bꞌi chi kakꞌon jowal yetoj jun miman bꞌulan ebꞌ soldado tiꞌ. Jaach tiꞌ, cu Diosal jaach, txꞌoxel ja wipal yil ebꞌ ánima tiꞌ, yet watxꞌ cꞌam mactxequel chi skeꞌ stecꞌbꞌan sbꞌa ja sattaj, ẍi naj rey Asá yin xa.

12 Yu jun tuꞌ, jix colwa Jehová yetoj naj Asá, yetoj cꞌal yin ebꞌ yet Judá; jix eyqꞌuey ebꞌ Etiopía yu ebꞌ, jix ela ebꞌ tuꞌ tet ebꞌ. 13 Jix too tzajan naj Asá yetoj soldado yintaj ebꞌ, masantaꞌcꞌal jix michꞌcha ebꞌ bꞌey Guerar. Caw ecꞌal ebꞌ Etiopía jix eyqꞌuey yu ebꞌ, ma xacꞌal skeꞌ stecꞌbꞌan sbꞌa ebꞌ sattaj Jehová, cꞌal sattaj ebꞌ soldado. Queytuꞌ jix yun yiꞌon can oc naj Asá jantaj tzetyetal ey tet wan scajat ebꞌ tuꞌ. 14 Jix lawi tuꞌ, jix yakꞌon jowal ebꞌ yin masanil wan yaliẍ conobꞌ ey scawilal conobꞌ Guerar, jix eyqꞌuey wan conobꞌ tuꞌ yu ebꞌ, yutol jix ale oc xiwcꞌulal yin ebꞌ yu Jehová. Masanil wan conobꞌlaj tuꞌ, jix yuch can lawoj ebꞌ a Judá, jix yiꞌontej masanil mimej bꞌeomal ebꞌ tituꞌ. 15 Jix oc cꞌal pax ebꞌ bꞌey yaman ecꞌ noꞌ jobꞌbꞌeal noꞌ, jantaj noꞌ meꞌ, cꞌal noꞌ camello jix yiꞌtej ebꞌ yet jix meltzotej ebꞌ bꞌey Jerusalén.