Jix yakꞌ jowal naj Abiam yetoj naj Jeroboam. 3 Jaꞌ naj Abiam tuꞌ, iꞌbꞌil oc 400,000 ebꞌ soldado caw jelan yakꞌon jowal yu naj. Jal pax naj Jeroboam xin, iꞌbꞌil cꞌal pax oc 800,000 soldado sicꞌbꞌil el yin jowal. 4 Jaꞌ tituꞌ jix yakꞌ jowal ebꞌ bꞌey txꞌotxꞌ tzalquiltaj txꞌotxꞌ yul yet Efraín. Jix atoj naj Abiam bꞌey sjolom wonan Semaraim. Jaꞌ tituꞌ jix awi eytej, jix yalon jaxca tiꞌ: Jaach Jeroboam, yetoj je masanil jex Israel ey jex ecꞌ yetoj, abꞌwej: 5 ¿Tumi man je yotaj oj tol jaꞌ Jehová cu Diosal jaon Israel jon tiꞌ, jaꞌ jix aon can oc jun opiso tiꞌ yul skꞌabꞌ naj rey David, cꞌal tet ebꞌ yicꞌaal yin junelne, cꞌal yin jun swa kꞌane tol cꞌam chi skeꞌ sqꞌuexlei? 6 Jaxa naj Jeroboam scꞌaal Nabat, yakꞌomal servil Salomón, jix spacꞌoc naj yin syaawil chi ijbꞌani. 7 Jix yaon oc sbꞌa naj yetoj wan winaj pena snaꞌbꞌal, jix yakꞌon jowal ebꞌ yin naj Roboam scꞌaal Salomón. Yu cꞌal tol achꞌe winaj to, cꞌamto wal snaꞌbꞌal, yuxan ma skeꞌ stecꞌbꞌan sbꞌa naj sattaj ebꞌ. 8 Jaꞌ tinaniꞌ, chim la je naꞌ tol oj skeꞌ je yakꞌon jowal kin jaon yicꞌaal jon David tiꞌ, yutol jaꞌ Jehová akꞌnen jun opiso tiꞌ yul cu kꞌabꞌ jon. Yu cꞌal mi tol ecꞌal je sbꞌisil, catuꞌ iꞌbꞌil oc jun oro yechel wacax jix swaꞌne naj Jeroboam, yet chi oc je diosaloj. 9 Ilaꞌ tol jix je yujte el ebꞌ ẍejabꞌ Jehová, jaꞌton ebꞌ yicꞌaal Aarón, yetoj cꞌal ebꞌ Levita, jaxa ebꞌ yakꞌomal xaambꞌal jix je yaoc yul je yet, jaxca sbꞌeybꞌal wanxa nación. Yal cꞌal mactxequel chi jul yetoj junoj noꞌ achꞌe wacax, cꞌal jujcꞌonoj noꞌ meꞌ, jaꞌ jun tuꞌ jix je yaoc yin yakꞌomaloj xaambꞌal tet wan comon dios, jaꞌ wan tuꞌ man Dios oj ebꞌ. 10 Jal jon pax jaon tiꞌ, cꞌam cꞌal bꞌey chi cu bꞌejcan Jehová cu Diosal. Jaꞌ ebꞌ yakꞌomal xaambꞌal yeoc sattaj Jehová, jaꞌton ebꞌ yicꞌaal Aarón, jaxa ebꞌ chi colwa yetoj ebꞌ, jaꞌton ebꞌ Levita. 11 Jaꞌton ebꞌ tiꞌ chi akꞌon xaambꞌal, cꞌal incienso chi akꞌle tzꞌaꞌ sattaj Jehová yet junjun skꞌinibꞌal, cꞌal yet junjun yeycꞌualil; chi yaon cꞌal pax ey ixim pan ebꞌ yibꞌan jun meẍa tol asan Dios ey yet, catuꞌ chi yaon cꞌal pax oc skꞌakꞌal tzejtebꞌal ebꞌ yibꞌan jun yet tzejtebꞌal oro cꞌal eloj yet junjun yeycꞌualil. Jaon tiꞌ chi cu jije jaxca tzet chi yal Jehová cu Diosal; jal jex jaex tiꞌ, tuxa jix je bꞌejcanoj. 12 Otajnewej eloj, tol jaꞌ Dios chi cu ijbꞌani; jal ebꞌ ẍejabꞌ Naj, listo xa yeoc ebꞌ yet chi xuon chꞌen trompeta ebꞌ yet chi oc jowal je yetoj jaex tiꞌ. Yuxan jaex Israel jex tiꞌ, manche je yakꞌ jowal yin Jehová cu Diosal yetoj ebꞌ cu mam icham, yutol man oj eyqꞌuey Naj je yu, ẍi naj Abiam tet ebꞌ.

13 Jaxa naj Jeroboam tuꞌ xin, tuxa jix yal naj tet ebꞌ yet scaabꞌ tujan soldado, tol chi sjoymone oc sbꞌa ebꞌ yin ebꞌ soldado yet Judá, jaxa junxa bꞌulan ebꞌ soldado yet Jeroboam, jix cancan bꞌey sattaj ebꞌ yet Judá tuꞌ. 14 Jaꞌ yet jix yilontoj ebꞌ yet Judá tuꞌ yintaj, tol lalanxa yapni oc ebꞌ soldado sattaj ebꞌ. Queytuꞌ jix yun yaon el yaw ebꞌ tet Jehová, jix xuon strompeta ebꞌ yakꞌomal xaambꞌal. 15 Jaꞌ yet jix a yaw ebꞌ yet Judá tuꞌ, jaꞌ Jehová jix akꞌon eyqꞌuey ebꞌ soldado yet Jeroboam tuꞌ, jaꞌton masanil ebꞌ yet Israelal jix eyqꞌuey sattaj Abiam yetoj cꞌal ebꞌ yet Judá. 16 Queytuꞌ jix yun yela ebꞌ Israel tuꞌ sattaj ebꞌ yet Judá, yutol jaꞌ Jehová jix aon oc ebꞌ yul skꞌabꞌ ebꞌ. 17 Caw ecꞌal ánima jix smakꞌ cam naj Abiam yetoj ebꞌ soldado tuꞌ. Ey 500,000 ebꞌ soldado Israel jix cam yu ebꞌ, jaꞌton ebꞌ soldado sicꞌbꞌil el yu naj Jeroboam. 18 Yu jun tuꞌ, caw yeynajil xacꞌal jix yute sbꞌa ebꞌ Israel yet jun tiempoal tuꞌ, jal ebꞌ yet Judá xin, caw jix eyqꞌuey jowal yu ebꞌ, yutol jix yaoc Jehová ebꞌ yipoj scꞌul, jaꞌton sDiosal smam icham ebꞌ.

19 Jix ujtele Jeroboam tuꞌ yu naj Abiam, catuꞌ jix yiꞌon can ecꞌ jayebꞌ conobꞌ naj Abiam tuꞌ, jaꞌton: Betel, Jesaná cꞌal Efraín, yetoj cꞌal yaldeail. 20 Jaꞌ naj Jeroboam tuꞌ, ma xa yiꞌ yip yopiso yet iquisto ecꞌ naj Abiam. Jaꞌ Jehová jix iꞌon el skꞌinal naj Jeroboam tuꞌ, queytuꞌ jix yun scami. 21 Queytuꞌ jix yun yiꞌon yip yopiso naj Abiam. Ey 14 yistil naj; ey 22 scꞌaal yetoj 16 scutzꞌin. 22 Jaꞌ jantaj to skꞌaneal naj Abiam tuꞌ cꞌal jantaj tzet jix yun naj, jatuꞌ tzꞌibꞌebꞌilcan bꞌey yul an juun jix stzꞌibꞌe can Idó, naj ẍejabꞌ Dios.