Jix Eyqꞌuey Conobꞌ Judá Yu Naj Sisac
12
Jaꞌ yet jix yiꞌon yip yopiso naj Roboam tuꞌ, caw jix smeyne xacꞌal sbꞌa naj, jix sbꞌejoncan sjijen ẍejbꞌanil Jehová yetoj masanil ebꞌ yet conobꞌ. 2 Yutol pit jix yute sbꞌa ebꞌ tet Jehová, yuxan jaꞌ yet joebꞌxa abꞌil yoc naj Roboam yin reyal, jaꞌ naj Sisac sreyal Egipto jix apni oc yakꞌon jowal yin Jerusalén. 3 Jix apni oc yetoj 1,200 carruaje yet jowal, yetoj 60,000 ebꞌ soldado eyoc yibꞌan che, yetoj junxa miman bꞌulan ebꞌ soldado cꞌamxa chi bꞌischai. Jix tit ebꞌ a Libio, ebꞌ a Suquienos, cꞌal ebꞌ a Etiopía jix tit yetoj bꞌey Egipto. 4 Jix eyqꞌuey wan conobꞌ eyoc smuroal bꞌey Judá yu naj, masantaꞌcꞌal jix apni oc ebꞌ bꞌey Jerusalén.5 Jix lawi tuꞌ, jix apni oc naj ẍejabꞌ Dios chi yij Semaías sattaj naj rey Roboam, yetoj ebꞌ yaaw yeoc xol ebꞌ a Judá tuꞌ, jaꞌton ebꞌ jix syambꞌa oc sbꞌa bꞌey Jerusalén, ebꞌ tol elnaj a sattaj naj Sisac, jix yalon jaxca tiꞌ:
—Jaꞌ Jehová jix alon jaxca tiꞌ: Yutol jix jin je bꞌejcanoj, yuxan jain jix jex waoc yul skꞌabꞌ naj rey Sisac, ẍi Jehová, ẍi naj Semaías.
6 Jaꞌ ebꞌ yaaw yeoc xol conobꞌ yetoj naj rey tuꞌ, yeynajil xacꞌal jix yute sbꞌa ebꞌ, catuꞌ jix yotajne el ebꞌ tol jix oc spital ebꞌ sattaj Jehová, jix yalon ebꞌ jaxca tiꞌ:
—Caw smoo queytuꞌ chi cu utele yu Jehová, ẍi ebꞌ.
7 Jaꞌ yet jix yilon Jehová tol yeynajil xacꞌal chi yute sbꞌa ebꞌ, jix yalon Dios tet naj Semaías jaxca tiꞌ: Yutol yeynajil jix yute snaꞌon sbꞌa scꞌul ebꞌ, yuxan man oj wakꞌ qꞌueyel ebꞌ, tol oj jin colel ebꞌ, manxa oj jin kꞌanbꞌalne naj Sisac yin wiꞌon el sjowal jin cꞌul yin conobꞌ Jerusalén tiꞌ. 8 Asan xin, oj can cꞌaltaꞌ ebꞌ yul skꞌabꞌ naj Sisac tuꞌ, yet watxꞌ oj naꞌcha el yu ebꞌ, tol txꞌoj yel yet chin yakꞌon servil ebꞌ, txꞌoj cꞌal pax yel yintaj yet chi akꞌle servil ebꞌ sreyal nacionlaj, ẍi Jehová.
9 Queytuꞌ jix yun yapni oc naj Sisac sreyal Egipto yu yakꞌon jowal yin conobꞌ Jerusalén. Jix yiꞌon ecꞌ masanil bꞌeomal cꞌuan bꞌey templo, cꞌal bꞌey spalacio naj rey. Masanil jix yiꞌeltej naj, jix yiꞌon cꞌal pax toj wan chꞌen majbꞌal sat julbꞌal oro cꞌal eloj, wan waꞌnebꞌil can yu naj rey Salomón. 10 Jaxa yetoj chꞌen bronce jix swaꞌne wan majbꞌal sat julbꞌal naj Roboam sqꞌuexeloj wan chꞌen oro cꞌal eloj, jix yaon oc steynemal naj bꞌey chi octoj ebꞌ bꞌey stiꞌ spalacio naj rey. 11 Junjuntaj cꞌal el yet chi too naj rey bꞌey stemplo Jehová, chi yiꞌontoj wan majbꞌal sat julbꞌal tuꞌ naj. Jaxa yet chi pax tej ebꞌ, catuꞌ chi yiꞌon pax tej ebꞌ bꞌey scuartel junelxa. 12 Yutol jix yaoc sbꞌa naj Roboam yul skꞌabꞌ Jehová, yuxan jix oc tucan sjowal scꞌul Jehová yibꞌan naj. Ma xa qꞌueyle el masanil ebꞌ conobꞌ yu Jehová, yuxan watxꞌ jix yun scancan wan tzetyetal ey bꞌey Judá.
13 Jaꞌ yet jix yiꞌon yip yopiso naj Roboam yin reyal junelxa bꞌey Jerusalén tuꞌ, ey 41 abꞌil skꞌinal yet jix ẍaꞌon el yich yakꞌon reyal; 17 abꞌil jix yakꞌ reyal bꞌey Jerusalén, jaꞌton jun conobꞌ tuꞌ sicꞌbꞌil el yu Jehová xol ebꞌ yicꞌaal Israel yet chi caey ecꞌ tituꞌ. Jaꞌ xutx naj Roboam tuꞌ, chi yij Naamá, a conobꞌ Amón ix. 14 Caw pena sbꞌeybꞌal naj Roboam tuꞌ, yutol ma yaoc yin scꞌul sjijen tzet chi yal Jehová.
15 Jaꞌ skꞌaneal naj Roboam yet yichbꞌanil cꞌal yet slawubꞌal, yetoj cꞌal slistail ebꞌ yuninal, jatuꞌ tzꞌibꞌebꞌilcan yul an juun yet naj Semaías cꞌal yet Idó, ebꞌ ẍejabꞌ Dios.