Jix Yal Naj Ahías Tol Oj Eyqꞌuey Naj Jeroboam
14
Jaꞌ yet jun tiempoal tuꞌ, jix yaꞌbꞌi ey jun scꞌaal naj Jeroboam chi yij Abías. 2 Jix yalon naj Jeroboam tet yistil jaxca tiꞌ:—Jaꞌ tinaniꞌ asiꞌ, catuꞌ cha qꞌuexon el ja bꞌa, yet watxꞌ man oj jaach naꞌcha eloj ta tol wistil jaach an. Catuꞌ chach too bꞌey conobꞌ Siló. Jaꞌ tituꞌ caan naj Ahías, jaꞌton jun ẍejabꞌ Dios, jaꞌ jix aloni tol jain chin oc can yin reyal bꞌey jun conobꞌ tiꞌ. 3 Iꞌtoj laonebꞌoj ixim wocꞌox pan yetoj junoj ẍalu yal noꞌ yal awcabꞌ. Asiꞌ il naj, yet watxꞌ oj skeꞌ yalon naj ey jaach tzet oj yun naj unin tiꞌ, ẍi naj Jeroboam tet yistil tuꞌ.
4 Queytuꞌ jix yute sbꞌa ix. Jix sqꞌuexel sbꞌa ix, catuꞌ jix too ix bꞌey conobꞌ Siló, jix apni oc ix bꞌey sna naj Ahías. Jaꞌ naj Ahías tuꞌ ma naꞌcha el mactxequel jun ix tuꞌ yu naj, yutol cꞌamxa chi skeꞌ yilwani yutol ichamxa naj. 5 Jaꞌ Jehová xax alon tet naj Ahías tol oj apnoj oc ix yistil Jeroboam tuꞌ skꞌanlen yuneꞌ tol yaꞌey tuꞌ. Jix al-le tet naj yu Jehová yu tzet oj yute takꞌwoj sbꞌa naj tet ix ix tuꞌ, jix akꞌle yotajne eloj tol jix sqꞌuexel sbꞌa ix yistil naj Jeroboam tuꞌ.
6 Jaꞌ yet jix yabꞌen naj Ahías sbꞌilwi yey yajan ix yet jix apni oc ix bꞌey stiꞌ puerta, jix yalon naj jaxca tiꞌ:
—Ocan, jaach yistil Jeroboam, ¿tzet yuxan jix ja qꞌuexel ja pichil? Tuxa jix al-le ey jin tol caw cuscꞌulal oj wal ey jaach. 7 Yu jun tuꞌ, meltzaantoj al tet naj ja wichamil Jeroboam tuꞌ, tol jaꞌ Jehová cu Diosal jaon Israel jon tiꞌ, jaꞌ jix alon ey jin: Jain jix jaach jin sicꞌ eltej xol ebꞌ conobꞌ tiꞌ, jix jaach waon oc yin yaawilal xol jin conobꞌ Israel. 8 Jain jix wiꞌecꞌ yopiso ebꞌ yicꞌaal David, catuꞌ jix wakꞌon ey jaach, man pax laan oj jix ja wute ja bꞌa jaxca naj jin chejabꞌ David. Yutol jaꞌ David tuꞌ caw jix sjije jin chejbꞌanil yetoj masanil scꞌul, jaꞌ masanil tzet jix yunne watxꞌ cꞌal yul jin sat. 9 Jaach tiꞌ yel xacꞌal pena tzet cha waꞌne yintaj ebꞌ jix ecꞌle yin reyal yet cꞌamto chach oqui. Jaach tiꞌ caw wal cha txꞌemtej sjowal jin cꞌul, jix ja waꞌne wan chꞌen chꞌen echele ja diosaloj, jix jin ja wintajne can eloj. 10 Yu jun tuꞌ, yuxan oj watej syaꞌilal yibꞌan ebꞌ ja wicꞌaal. Oj wakꞌ cam masanil ebꞌ winaj xol ebꞌ ja wicꞌaal bꞌey Israel tiꞌ caxcꞌal yakꞌomal servil ma yet sbꞌa, cꞌamxa junoj oj wakꞌcanoj. Qꞌuisisi wal oj wute ebꞌ ja wicꞌaal tuꞌ, jaxca xacꞌal chi yun sqꞌuisle a stzaꞌ noꞌ noꞌ. 11 Jaꞌ ebꞌ ja wican oj cam yul conobꞌ, jaꞌ noꞌ txꞌiꞌ oj chiꞌontoj smimanil ebꞌ. Jaxa ebꞌ oj cam bꞌey xol-laj teꞌ, jaꞌ noꞌ miij oj chiꞌontoj smimanil ebꞌ, yutol jain caw Jehová jin chi walaꞌ.
12 Jal jaach pax jaach tiꞌ, asiꞌ paxantoj bꞌey ja na. Kꞌuxan wal ja wapni oc linan bꞌey stiꞌ conobꞌ tuꞌ, jaxa scam naj unin tuꞌ. 13 Jaxa masanil ebꞌ Israel oj cus ebꞌ yu jun unin tuꞌ, oj smujon ebꞌ, yutol asanne jun yicꞌaal naj Jeroboam oj mujle tuꞌ, yutol asanne jun tuꞌ watxꞌ wal sattaj Jehová cu Diosal xol ebꞌ yicꞌaal Jeroboam tuꞌ. 14 Yet cu sattajto tuꞌ, oj yaon oc Jehová junojxa rey cu xol tiꞌ. Jaꞌ oj akꞌon lawoj el masanil ebꞌ yicꞌaal naj Jeroboam tuꞌ. 15 Oj cu tzicoꞌtanele jaon Israel jon tiꞌ yu Jehová jaxca chi yun stzicoꞌtanele teꞌ aa yu jaꞌ jaꞌ. Oj cu iꞌle el bꞌey jun txꞌotxꞌ manxa jantajoj swatxꞌil jix akꞌle tet ebꞌ kichmam, oj cu kꞌojle cantoj ecꞌtoj skꞌaxepal ecꞌtoj jaꞌ Éufrates, yutol jix cu waꞌne wan yechel comon dios chi yij Astarté. Jaꞌton yu wan tuꞌ jix txꞌemontej sjowal scꞌul Jehová kibꞌan. 16 Jaꞌ Naj oj cu aon oc yul skꞌabꞌ junxa nación yu cꞌal spenail naj Jeroboam jix yaocoj, tol jaꞌ jix ijbꞌan ebꞌ ket conobꞌ tiꞌ yin spenail, ẍi naj Ahías.
17 Jix lawi tuꞌ, jix meltzotoj ix yistil naj Jeroboam tuꞌ, jix apni oc ix bꞌey conobꞌ Tirsá. Kꞌuxan wal yoctoj ix bꞌey yul stiꞌ na tuꞌ, catuꞌ jix cam naj unin tuꞌ. 18 Masanil ebꞌ Israel eyecꞌ tituꞌ jix okꞌ ebꞌ yu naj unin tuꞌ, jix bꞌet smujon can ebꞌ, jaxca jix yun yalon Jehová tet jun ẍejabꞌ chi yij Ahías.
19 Jaꞌ wanxa skꞌaneal naj rey Jeroboam, jaxca yet jix yakꞌon jowal, cꞌal wanxa tzet jix yun yul stiempoal, jatuꞌ tzꞌibꞌebꞌilcan yul an libro bꞌey ey can skꞌaneal ebꞌ sreyal Israel. 20 Jaꞌ naj Jeroboam tuꞌ, 22 abꞌil jix oc naj yin reyal, jaxa yet jix camtoj naj, ey jun scꞌaal chi yij Nadab jix oc can sqꞌuexeloj yin reyal.
Ocnaj Naj Roboam Yin Reyal Bꞌey Judá
21 Jaꞌ bꞌey Judá jix yakꞌ reyal naj Roboam scꞌaal Salomón. Ey 41 abꞌil skꞌinal yet jix oc naj yin reyal, 17 abꞌil jix yakꞌ reyal naj bꞌey Jerusalén, jaꞌton wal jun conobꞌ tuꞌ jix sicꞌ el Jehová xol masanil ebꞌ yicꞌaal Israel yet chi eecꞌal ecꞌ stemplo tituꞌ. Jaꞌ ix xutx naj Roboam tuꞌ, Naamá sbꞌi ix, a conobꞌ Amonita ix.
22 Jaꞌ naj Roboam tiꞌ yetoj ebꞌ caan bꞌey Judá, caw pena sbꞌeybꞌal ebꞌ sattaj Jehová. Yel xacꞌal ecꞌbꞌan spenail ebꞌ jix yaoc yintaj yichmam, yuxan caw jix xꞌemtej sjowal scꞌul Jehová ebꞌ yibꞌan, 23 yutol jix swaꞌne a snail bꞌey chi oc ebꞌ yin eyilal bꞌey wonanlaj, cꞌal swaꞌnen a chꞌen chꞌen cꞌal teꞌ teꞌ yet Aserá bꞌey tzalquiltaj cꞌal bꞌey yichlaj teꞌ teꞌ yaax xaj. 24 Ey cꞌal pax ebꞌ winaj jix yun amulal yetoj yet winajil cꞌal yoc ebꞌ yin eyilal tet sdiosal. Jix sbꞌeybꞌalne masanil bꞌeybꞌale tol caw yaabꞌetaj xacꞌal, jaxca sbꞌeybꞌal ebꞌ txꞌoj conobꞌal, ebꞌ jix iꞌle el yu Jehová sattaj ebꞌ Israel tuꞌ.
25 Jaꞌ yet joebꞌ abꞌil xa yoc naj Roboam tuꞌ yin reyal, jaꞌ naj Sisac sreyal Egipto jix jul yakꞌ jowal yin Jerusalén. 26 Jix yiꞌon ecꞌ masanil bꞌeomal ey bꞌey stemplo Jehová, cꞌal masanil bꞌeomal ey bꞌey sna naj rey. Jix yiꞌon cꞌal pax toj wan majbꞌal sat julbꞌal tol oro cꞌal eloj, wan waꞌnebꞌil yu naj rey Salomón. 27 Jaxa chꞌen bronce jix swaꞌne naj Roboam sqꞌuexeloj wan oro majbꞌal sat julbꞌal tuꞌ, catuꞌ jix ale can oc ebꞌ soldado steynemaloj stiꞌ na tuꞌ yu naj. 28 Junjuntaj cꞌal el chi too naj rey bꞌey stemplo Jehová, jaꞌ ebꞌ soldado chi teynen tituꞌ chi yiꞌtoj chꞌen majbꞌal julbꞌal ebꞌ tituꞌ, chi lawi tuꞌ, catuꞌ chi meltzo pax ebꞌ yetoj chꞌen junelxa.
29 Jaꞌ wanojxa skꞌaneal tzet jix yun naj Roboam tuꞌ, jatuꞌ tzꞌibꞌebꞌilcan ey bꞌey yul an juun bꞌey tzꞌibꞌebꞌilcan ey skꞌaneal masanil ebꞌ sreyal Judá.