Ocnaj Naj Abiam Yin Reyal Bꞌey Judá
15
Jaꞌ yet 18 abꞌil xa yoc naj Jeroboam scꞌaal Nabat yin reyal bꞌey Israel, catuꞌ jix oc naj Abiam yin reyal bꞌey Judá. 2 Oxebꞌ abꞌil jix yakꞌ reyal naj bꞌey Jerusalén. Jaꞌ ix xutx naj chi yij sbꞌi Maacá, scutzꞌin naj Absalón ix. 3 Jaꞌ naj Abiam tuꞌ jix sbꞌeybꞌalne pax spenail jaxca jix yute sbꞌa smam. Yel xacꞌal pena tzet jix el yunen sattaj Jehová. Ma cꞌal sjije niꞌoj tzet jix yal Jehová, jaxca jix yun sjijen naj rey David, jaꞌton smam icham. 4 Yu cꞌal tol ey scamcꞌulal Jehová yin naj rey David, yuxan ma tancan el yicꞌaal. Jix to oc can yicꞌaal tuꞌ yin reyal bꞌey Jerusalén, jix scolon cꞌal el jun conobꞌ tuꞌ, 5 yutol jaꞌ naj rey David caw wal watxꞌ jix yute sbꞌa sattaj Jehová, yutol ma cꞌal yiꞌel sbꞌa yin tzetyetal jix yal Jehová tet, asan cꞌal jun spenail jix oc yin naj Urías, Hitita.6-7 Jix oc cꞌal jowal snan xol naj Roboam yetoj naj Jeroboam, jaꞌton yet iquisto ecꞌ naj Roboam tuꞌ, jix oc cꞌal pax jowal xol naj Abiam yetoj Jeroboam. Jaꞌ jantaj to skꞌaneal naj Abiam tiꞌ, yu masanil tzet jix yunne, jatuꞌ tzꞌibꞌebꞌilcan ey yul an juun bꞌey ey can ey skꞌaneal ebꞌ sreyal Judá. 8 Jaꞌ yet jix cam naj Abiam, jix muji naj bꞌey sconobꞌ David. Jix lawi tuꞌ jaxa jun scꞌaal chi yij Asá jix oc can yin reyal.
Ocnaj Naj Asá Yin Reyal Bꞌey Judá
9 Jaꞌ naj Asá jix ẍaꞌel yich yakꞌon reyal bꞌey Judá yet 20 abꞌil yoc naj Jeroboam yin reyal bꞌey Israel. 10 Ey 41 abꞌil jix yakꞌ reyal naj bꞌey Jerusalén, Maacá yoc sbꞌi xutx ixnam jaꞌton scutzꞌin naj Absalón.
11 Jaꞌ tzet jix yun naj rey Asá tuꞌ caw watxꞌ sattaj Jehová, jaxca wal jix yun naj rey David, jaꞌton smam icham. 12 Jix yujte el masanil wan winaj bꞌey yul nación tuꞌ, ebꞌ tol chi yun amulal yetoj yet winajil bꞌey chi oc eyilal, jix yiꞌon el masanil wan echele jix swaꞌne ebꞌ yichmam. 13 Jix yiꞌon cꞌal pax el smimanbꞌilal ix Maacá, jaꞌton xutx ixnam yutol jix yakꞌ waꞌxoj jun echele chi yij Aserá tol caw yaabꞌetaj yu Jehová. Jix yuchey jun echele naj tuꞌ, jix yakꞌon tzꞌaꞌ naj bꞌey stiꞌ jaꞌ jaꞌ chi yij Cedrón. 14 Caxcꞌal ma yiꞌel masanil wanxa niẍtej snail bꞌey chi oc ebꞌ ánima yin eyilal tet sdiosal bꞌey tzalquiltaj, caw watxꞌ cꞌal jix yute snaꞌbꞌal naj sattaj Jehová yin masanil skꞌinal. 15 Jix yaon cꞌal pax octoj chꞌen oro cꞌal chꞌen plata cꞌal wan mitxꞌkꞌabꞌe jix yakꞌ yetoj smam tet Jehová bꞌey yul templo.
Junxane jix Yute Snaꞌbꞌal Naj Asá Yetoj Naj Ben-adad
16 Ey cꞌal jowal snan xol naj rey Asá yetoj naj Baasá sreyal Israel. 17 Jaꞌ yet jix too naj Baasá yakꞌon jowal yin Judá, jix oc ian naj swaꞌne a scuartel bꞌey conobꞌ Ramá, yet chi smajchen el bꞌe naj yet watxꞌ cꞌamxa mactxequel chi skeꞌ yapni oc bꞌey Judá. 18 Yu jun tuꞌ, yuxan jix iꞌle eltej masanil chꞌen oro cꞌal chꞌen plata ey bꞌey yul stemplo Jehová yu naj rey Asá, cꞌal bꞌey spalacio naj. Jix ẍejon ebꞌ tol ey yopiso yetoj, yet chi too yakꞌon can chꞌen ebꞌ tet naj Ben-adad sreyal Siria. Jaꞌ jun tuꞌ scꞌaal Tabrimón, yitxiquin naj Hezión, eyoc yin reyal bꞌey conobꞌ Damasco. Jaꞌ yetoj wan tumin tuꞌ, jix yaontoj jun an carta naj, jix yalontoj jaxca tiꞌ: 19 Cu waꞌne junoj cu wa kꞌane, jaxca jix yun ebꞌ kichmam. Ti chi watoj chꞌen oro cꞌal chꞌen plata yin jin saꞌbꞌealoj ey jaach. Akꞌ lawoj ja wa kꞌane yetoj naj Baasá, sreyal Israel tuꞌ, queytuꞌ oj yun sbꞌejon yakꞌon jowal naj win, ẍi toj naj yin jun carta tuꞌ. 20 Jix ẍaꞌ scꞌul naj Ben-adad tzetyetal jix yal naj rey Asá tuꞌ, yuxan jix ẍejtoj soldado ebꞌ yakꞌon jowal yin conobꞌ Israel, catuꞌ jix eyqꞌuey masanil wan conobꞌ tiꞌ, jaꞌton: Iión, Dan, Abel-bet-maacá, yetoj masanil Quinéret yetoj cꞌal masanil yul yet Neftalí. 21 Jaꞌ yet jix yabꞌen naj Baasá jaxca tuꞌ, jix sbꞌejon naj swaꞌnen a conobꞌ Ramá, catuꞌ jix meltzotoj naj bꞌey conobꞌ Tirsá. 22 Jix lawi tuꞌ, jix yambꞌale oc masanil ebꞌ winaj a Judá yu naj rey Asá, cꞌamxa junoj tol ma apnoj ocoj, jix yiꞌontoj ebꞌ tzettaj yetal ey bꞌey Ramá, chꞌen chꞌen, yetoj cꞌal teꞌ teꞌ lalan yaon oc naj Baasá yin swaꞌxubꞌaloj a conobꞌ tuꞌ. Jaxa yetoj wan tuꞌ jix swaꞌne a scuartel naj rey Asá bꞌey conobꞌ Guebá yul yet Benjamín, cꞌal bꞌey conobꞌ Mizpá.
Scamichal Naj Rey Asá
23 Jaꞌ jantaj to skꞌaneal naj rey Asá, cꞌal sjelanil, yetoj masanil tzet jix yunne, cꞌal wan conobꞌ jix swaꞌne aoj, jatuꞌ tzꞌibꞌebꞌilcan yul an juun bꞌey ey can ey skꞌaneal ebꞌ sreyal Judá.
Jaꞌ yet caw icham winajxa naj rey Asá tuꞌ, jix yaꞌbꞌi ey naj, jaꞌ yin yajan naj jix oc jun syaꞌilal tuꞌ. 24 Jaꞌ yet jix cam naj, jaꞌ bꞌey mujan ebꞌ yichmam bꞌey sconobꞌ David, jatuꞌ jix muji naj.
Jix lawi tuꞌ jix oc can jun scꞌaal chi yij Josafat sqꞌuexeloj yin reyal.
Ocnaj Naj Nadab Yin Reyal Bꞌey Israel
25 Eyxa caabꞌ abꞌil yoc naj Asá yin reyal bꞌey Judá, catuꞌ jix ẍaꞌon el yich yoc naj Nadab scꞌaal Jeroboam yakꞌon reyal bꞌey Israel, caabꞌ abꞌil jix yakꞌ reyal naj. 26 Caw pena tzet jix el sbꞌeybꞌalne naj sattaj Jehová, jaxca jix yun smam, tol jaꞌ naj jix ijbꞌantoj ebꞌ yet conobꞌ Israel yin spenail. 27 Jaxa pax naj Baasá scꞌaal Ahías, titnaj yin yicꞌaal Isacar, jaꞌ jix pacꞌoc yin naj Nadab, jix makꞌle cam naj bꞌey Guibetón yu yet jix yakꞌon jowal ebꞌ. Jaꞌ jun tuꞌ sconobꞌ ebꞌ Filisteo joybꞌil a yu naj Nadab yetoj masanil ebꞌ soldado yet Israel.
28 Jaꞌ yet yox abꞌil xa yoc naj Asá yin reyal bꞌey Judá, jaꞌ yet tuꞌ jix makꞌle cam naj Nadab yu Baasá, jaxa jix oc can sqꞌuexeloj yin reyal. 29 Jaꞌ yet jix oc naj yin reyal, jix makꞌle cam masanil ebꞌ yicꞌaal can naj Jeroboam yu naj, jaxca wal jix yun yalon naj Ahías, jun ẍejabꞌ Jehová bꞌey conobꞌ Siló. Junelne jix yakꞌ lawoj naj Baasá tuꞌ masanil, cꞌamxa junoj jix can yin yiquisal. 30 Queyton tuꞌ jix yun ẍaꞌon spajtzebꞌal naj Jeroboam yu spenail jix yaocoj. Jaꞌ jix txꞌemontej sjowal scꞌul Jehová yutol jix yijbꞌatoj ebꞌ yet Israelal yet jix oc spenail ebꞌ sattaj Dios.
31 Jaꞌ wanojxa skꞌaneal naj Nadab cꞌal masanil tzet jix yunne, jatuꞌ tzꞌibꞌebꞌilcan ey bꞌey yul an juun yet skꞌaneal ebꞌ sreyal Israel.
32 Jaꞌ naj rey Asá yetoj naj Baasá sreyal Israel jix yakꞌ cꞌal jowal ebꞌ.
Ocnaj Naj Baasá Yin Reyal Bꞌey Israel
33 Jaꞌ yet oxebꞌxa abꞌil yoc naj Asá yin reyal bꞌey Judá, jaꞌ yet tuꞌ jix ẍaꞌon el yich naj Baasá scꞌaal Ahías yakꞌon reyal bꞌey conobꞌ Tirsá yibꞌan masanil Israel. Ey 24 abꞌil jix yakꞌ reyal. 34 Jaꞌ sbꞌeybꞌal naj Baasá tuꞌ caw pena sattaj Jehová, jix yaoc spenail jaxca jix yun naj Jeroboam, tol jix ijbꞌaletoj ebꞌ Israel yin spenail yu naj.