16
Jix lawi tuꞌ xin, jix kꞌanabꞌ Jehová tet naj Jehú, scꞌaal Hananí, jix yalon wan kꞌane tet naj Baasá jaxca tiꞌ: 2 Jain jix jaach jin sicꞌ can el xol ebꞌ ánima cꞌam niꞌoj yeloc apnoj. Jix jaach waon oc yin yaawilal xol jin conobꞌ Israel. Jaxa pax ja bꞌeybꞌal jaach tiꞌ, laan ja bꞌeybꞌal yetoj naj Jeroboam. Jaach jix ja wijbꞌatoj ebꞌ jin conobꞌ tiꞌ yin spenail. Jaꞌ yu ja penail tuꞌ, yuxan chi txꞌemchatej sjowal jin cꞌul. 3 Yu tuꞌ xin jaach Baasá, oj jaach wakꞌ qꞌueyle el yetoj masanil ebꞌ ja wicꞌaal. Queytuꞌ oj jex wute jaxca jix wute naj Jeroboam, scꞌaal Nabat. 4 Yal cꞌal mactxequel ebꞌ ja wican oj cam bꞌey yul-laj conobꞌ, jaꞌ noꞌ txꞌiꞌ oj chiꞌontoj smimanil ebꞌ, jaxa ebꞌ oj cam xol-laj teꞌ, jaꞌ noꞌ miij oj chiꞌontoj smimanil ebꞌ, ẍi Jehová, ẍi naj Jehú tuꞌ.5 Jaꞌ wanojxa skꞌaneal naj Baasá cꞌal tzet jix yunne, jatuꞌ tzꞌibꞌebꞌilcan ey yul an juun bꞌey ey can ey skꞌaneal ebꞌ sreyal Israel. 6 Jaꞌ yet jix cam naj Baasá, jaꞌ bꞌey conobꞌ Tirsá jix mujle smimanil naj, jaxa jun scꞌaal chi yij Ela, jaꞌ jix oc can sqꞌuexeloj yin reyal.
7 Jix yalon Jehová tet jun ẍejabꞌ chi yij Jehú scꞌaal Hananí jaxca tiꞌ: Jaꞌ yu jantaj syaꞌilal oj jul yibꞌan naj Baasá yetoj ebꞌ yicꞌaal cꞌal ebꞌ yican, yutol jix xꞌemtej sjowal scꞌul Jehová naj Baasá yu masanil spenail jix yunne, jaxca tzet jix yun naj Jeroboam. Jix jul pax syaꞌilal yibꞌan naj yutol pilan jix qꞌueyle el masanil ebꞌ yicꞌaal Jeroboam yu naj.
Jix Oc Naj Ela Yetoj Cꞌal Naj Zimrí Yin Reyal Bꞌey Israel
8 Jaꞌ yet 26 abꞌil xa yoc naj Asá yin reyal bꞌey Judá, catuꞌ jix ẍaꞌon el yich naj Ela, scꞌaal Baasá yakꞌon reyal bꞌey Israel cꞌal bꞌey conobꞌ Tirsá. Caabꞌ abꞌil jix yakꞌ reyal naj. 9 Jaꞌ naj Zimrí tuꞌ, yaaw yeoc naj yin nan tujan ebꞌ soldado chi iꞌon ecꞌ carruaje yet jowal, jaꞌ jun tuꞌ jix pakꞌoc yin naj Ela. Ey jun cꞌual eyecꞌ naj Ela bꞌey Tirsá, bꞌey sna naj Arsá, jaꞌton naj eyoc yilomal mulnail tituꞌ, jix ucꞌwi an masantaꞌcꞌal jix qꞌueyel scꞌul naj yu an. 10 Eyman jix apni oc naj Zimrí scꞌatan naj, jix smakꞌon camoj, jaxa jix oc can sqꞌuexeloj yin reyal. Jix yun jun tiꞌ yet 27 abꞌil xa yoc naj Asá yin reyal bꞌey Judá.
11 Jaꞌ yet lalanto wal yoc naj Zimrí yin reyal, jix cꞌoli smakꞌle cam masanil ebꞌ yicꞌaal naj Baasá yu naj. Cꞌamxa junoj ebꞌ winaj jix can yin yiquisal, cꞌamxa junoj yican tam wal junojxa swatxꞌil ánima jix cancanoj. 12 Queytuꞌ jix yun slawi masanil ebꞌ yicꞌaal naj Baasá, jix eloc jaxca wal jix yun yalon Jehová tet naj Jehú yin naj Baasá. 13 Yu cꞌal jantaj spenail naj Baasá yetoj cꞌal yet scꞌaal chi yij Ela, tol jix ijbꞌaletoj ebꞌ Israel yet chi yiꞌon ey sbꞌa ebꞌ tet wan comon dios, yuxan caw jix tit sjowal scꞌul Jehová yibꞌan ebꞌ.
14 Jaꞌ wanojxa skꞌaneal naj Ela cꞌal tzet jix yunne, jatuꞌ tzꞌibꞌebꞌilcan ey yul an juun bꞌey ey can ey skꞌaneal ebꞌ sreyal Israel.
15 Jaꞌ yet 27 abꞌil xa yoc naj Asá yin reyal bꞌey Judá, jix ẍaꞌon el yich yakꞌon reyal naj Zimrí bꞌey conobꞌ Tirsá, asanne jujebꞌ cꞌual jix yakꞌ reyal naj. Jaꞌ yet jun cꞌual tuꞌ jatuꞌ ey ebꞌ soldado yet Israel yakꞌon jowal bꞌey conobꞌ Guibetón yul yet ebꞌ Filisteo. 16 Jaꞌ yet jix yabꞌen masanil ebꞌ soldado eyecꞌ bꞌey lalan yakꞌon jowal ebꞌ tuꞌ, yutol jix makꞌle cam naj rey yu naj Zimrí, yuxan jix ale oc naj Omrí yin reyal yu ebꞌ, jaꞌton syaawil ebꞌ soldado Israel. 17 Queytuꞌ jix yun sbꞌejon naj Omrí yakꞌon jowal yetoj ebꞌ soldado bꞌey Guibetón, jaxa yin conobꞌ Tirsá jix oc ian yakꞌon jowal ebꞌ.
18 Jaꞌ yet jix yilon naj Zimrí tol tuxa chi eyqꞌuey jun conobꞌ tuꞌ, jix octoj naj yul spalacio, jix yaon oc skꞌakꞌal jun na tuꞌ, queytuꞌ jix yun scam xacꞌal naj yul spalacio tuꞌ. 19 Jix yun jaxca tuꞌ, yu cꞌal spenail jix yaoc sattaj Jehová, laan cꞌal spenail jaxca naj Jeroboam, tol jix yijbꞌatoj ebꞌ yet Israelal yin spenail.
20 Jaꞌ wanojxa skꞌaneal naj Zimrí cꞌal tzet jix snaꞌ yin naj Ela, jatuꞌ tzꞌibꞌebꞌilcan ey yul an juun bꞌey ey can ey skꞌaneal ebꞌ sreyal Israel.
Jix Oc Naj Omrí Yin Reyal Bꞌey Israel
21 Caabꞌ poꞌoan jix yutetoj sbꞌa ebꞌ conobꞌ Israel: Ey jun tujan jix yoche tol jaꞌ naj Tibní scꞌaal Ginat, chi oc yin reyal, jal junxa tujan ebꞌ chi yoche tol jaꞌ naj Omrí chi oc yin reyal. 22 Jaxa jix yun xin, jaꞌ ebꞌ eyoc yetoj naj Omrí caw jelan ebꞌ yintaj ebꞌ eyoc yetoj naj Tibní, yuxan jix makꞌle cam naj Tibní tuꞌ, jaxa naj Omrí jix oc can yin reyal.
23 Jaꞌ yet 31 abꞌil xa yoc naj Asá yin reyal bꞌey Judá, catuꞌ jix oc naj Omrí yin reyal bꞌey Israel; 12 abꞌil jix yakꞌ reyal, wajebꞌ abꞌil bꞌey conobꞌ Tirsá, wajebꞌ abꞌil bꞌey conobꞌ Samaria. 24 Jix lawi tuꞌ, catuꞌ jix smanon txꞌotxꞌ stzalanil Samaria tet naj Sémer yin nan scaabꞌ quintal chꞌen tumin plata, jaꞌ tituꞌ jix swaꞌne a jun conobꞌ, jix yakꞌon yij sbꞌi Samaria, yutol jaꞌ mactxequel ey yet jun txꞌotxꞌ tuꞌ yet peyxa, jaꞌton naj chi yij Sémer.
25 Jaꞌ tzet jix el sbꞌeybꞌalne naj Omrí tuꞌ, caw wal pena sattaj Jehová, yel xacꞌal ecꞌbꞌan spenail yintaj ebꞌ rey jix ecꞌle yet yalantoj. 26 Jix sbꞌeybꞌalne cꞌal spenail jix yun naj Jeroboam scꞌaal Nabat, tol jix yijbꞌatoj ebꞌ Israel yin yoc ebꞌ yin eyilal tet wan comon dios, yuxan jix xꞌemtej sjowal scꞌul Jehová yibꞌan ebꞌ.
27 Jaꞌ wanojxa skꞌaneal naj Omrí cꞌal tzet jix yunne, jatuꞌ tzꞌibꞌebꞌilcan ey yul an juun bꞌey ey can ey skꞌaneal ebꞌ sreyal Israel. 28 Jaꞌ yet jix cami, jaꞌ bꞌey Samaria jix mujlei, jaxa jun scꞌaal chi yij Ahab jix oc can yin reyal sqꞌuexeloj.
Jix Oc Naj Ahab Yin Reyal Bꞌey Israel
29 Eyxa 38 abꞌil yoc naj Asá yin reyal bꞌey Judá, catuꞌ jix ẍaꞌon el yich yakꞌon reyal naj Ahab bꞌey Israel scꞌaal naj Omrí. 30 Ey 22 abꞌil jix yakꞌ reyal bꞌey conobꞌ Samaria tuꞌ. Man watxꞌoj jix yute sbꞌa naj sattaj Jehová, caw wal yel xacꞌal pena jix yute sbꞌa yintaj wanxa ebꞌ rey jix oc yet yalantoj. 31 Ecꞌbꞌan xacꞌal spenail jix el yunen tet naj Jeroboam scꞌaal Nabat. Caw pena jix yute sbꞌa yet jix oc ix Jezabel yistiloj, ix scutzꞌin naj Et-baal, sreyal conobꞌ Sidonio, jix oc naj yin eyilal tet jun comon dios chi yij Baal yetoj yistil tuꞌ. 32 Jix swaꞌne a jun templo yetoj jun yet xaambꞌal sattaj jun comon dios chi yij Baal bꞌey conobꞌ Samaria. 33 Jix swaꞌne cꞌal pax a jun yechel dios chi yij Aserá. Yel xacꞌal miman jix yun xꞌemontej sjowal scꞌul Jehová, Naj sDiosal Israel, yintaj wanxa ebꞌ sreyal Israel yet yalantoj.
34 Jaꞌ yet eyoc naj Ahab tuꞌ yin reyal, ey jun winaj chi yij sbꞌi Hiel a conobꞌ Betel, jaꞌ naj tiꞌ jix scaꞌ waꞌne conobꞌ Jericó. Jaꞌ yet jix ey cimientoal yich smuroal conobꞌ tuꞌ, jix camtoj jun sbꞌabꞌel scꞌaal chi yij Abiram, jaxa yet jix octoj spuertail jun conobꞌ tuꞌ, jix cam cꞌal pax jun cꞌaal stzunan xa chi yij Segub. Jix eloc jaxca jix yun yalon can naj Josué scꞌaal Nun, yu Jehová.