Yalnaj Naj Elías Tol Manxa Oj Yakꞌ Nabꞌ
17
Ey jun ẍejabꞌ Dios chi yij Elías, a conobꞌ Tisbé yul yet Galaad. Jaꞌ naj jix alon tet naj rey Ahab jaxca tiꞌ: Jain tiꞌ ẍejabꞌ jin Jehová cu Diosal jaon Israel jon tiꞌ, sattaj wal Jehová chi walon ey jaach, tol ey jayebꞌ abꞌil manxa oj yakꞌ nabꞌ, tam wal niꞌojxa yal akꞌbꞌal oj eyoj, masantaꞌcꞌal jain oj wal junelxa, ẍi naj.a2 Jix lawi tuꞌ jix yalon Jehová tet naj jaxca tiꞌ: 3 Elan titiꞌ catuꞌ chi too ja wewbꞌa el ja bꞌa bꞌey stiꞌ jaꞌ jaꞌ Querit, jaꞌ chi apni oc bꞌey jaꞌ Jordán, yetcꞌulal bꞌey chi aol cꞌu. 4 Jaꞌ jun jaꞌ tuꞌ oj ja wuqꞌue, jain xa oj wal tet noꞌ joo, jaꞌ noꞌ oj too akꞌon ja loꞌbꞌe, ẍi Jehová tet naj.
5 Jix sjije naj Elías tzet jix yal Jehová, jix too yewbꞌa el sbꞌa naj bꞌey stiꞌ jaꞌ Querit bꞌey sattaj eltoj jaꞌ Jordán. 6 Junjun cꞌal skꞌinibꞌal junjun cꞌal yeycꞌualil chi yiꞌtoj sloꞌbꞌe cꞌal chiꞌbꞌe noꞌ joo tuꞌ tet naj, jaxa jun yaliẍ jaꞌ tuꞌ chi yucꞌ naj. 7 Ey jun cꞌual xin, jix aapnoj stiempoal yet jix tantoj jaꞌ jaꞌ tuꞌ, yutol cꞌamxa chi yakꞌ nabꞌ bꞌey jun nación tuꞌ.
Naj Elías Yetoj Ix Ix Camnajxa Yichamil A Conobꞌ Sarepta
8 Jix lawi tuꞌ jix yalon Jehová tet naj Elías jaxca tiꞌ: 9 Elan titiꞌ catuꞌ chach too bꞌey conobꞌ Sarepta bꞌey yul yet Sidón, jaꞌ tituꞌ chach caey junoj tiempoal. Tuxa jix wal tet jun ix ix camnajxa yichamil, jaꞌ ix oj akꞌon ja loꞌbꞌe, ẍi Jehová tet naj.
10 Jix el Elías tituꞌ xin, catuꞌ jix too naj bꞌey Sarepta. Jaꞌ yet jix apni oc naj stiꞌlaj conobꞌ tuꞌ, jix yilontoj jun ix ix camnajxa yichamil tol lalan syambꞌan siꞌ ix. Jix awteletej ix yu naj, jix yalon naj tet ix:
—Chi kꞌan wal yu diosalil ey jaach tol cha wakꞌ junoj vaso jaꞌ wuqꞌue, ẍi naj tet ix.
11 Yutol lalanxa stoo ix yiꞌontej jaꞌ jaꞌ tuꞌ, jix yalon pax naj tet ix junelxa:
—Chin kꞌan wal yu diosalil ey jaach tol cha wakꞌ junoj pan jin loꞌ, ẍi naj tet ix.
12 Jix takꞌwi ix tet naj jaxca tiꞌ:
—Sattaj wal Jehová ja Diosal chi waloni, tol cꞌamxa niꞌoj ixim pan waꞌnebꞌil wu an. Junxane chꞌan bꞌetxan ixim jarina yaanebꞌil can ecꞌ wu yul jun jin xi, yetoj chꞌan niꞌanxa aceite yul jun jin ẍalu. Tinaniꞌ chi jul jin yambꞌa caabꞌoj jin siꞌ titiꞌ, catuꞌ oj jin waꞌnen chꞌan junojxa pan oj jin loꞌ yetoj naj wuneꞌ, kꞌuxan xacꞌal oj cu loꞌ ixim jon catuꞌ chi lawi eloj, jaxa kechbꞌanen cu cam tuꞌ jon, ẍi ix tet naj.
13 Jix yalon naj Elías tet ix jaxca tiꞌ:
—Cꞌam chach xiwi, asiꞌ, catuꞌ cha waꞌne ja pan jaxca ja walon tuꞌ, asan xin, bꞌabꞌel cha waꞌne junoj wet chin loꞌ yin eymanil, cha bꞌol xol stzakꞌakꞌ, catuꞌ cha wiꞌontej ey jin, catuꞌ chi too ja waꞌnen ja wet oj ja loꞌ yetoj naj ja wuneꞌ tuꞌ. 14 Yutol jix yal Jehová cu Diosal jaon Israel jon tiꞌ, tol man oj lawoj niꞌan ixim ja jarina eeytoj yul xi tuꞌ cꞌal niꞌanxa aceite eeytoj yul ja ẍalu tuꞌ, masantaꞌcꞌal yet oj yakꞌon nabꞌ junelxa yu Dios, ẍi naj tet ix.
15 Jix lawi tuꞌ xin, jix too ix swaꞌnen jaxca yalon naj Elías tuꞌ. Masanil yul tiempoal wail tuꞌ, jix low cꞌal naj, cꞌal ix ix, yetoj cꞌal naj yaliẍ unin tuꞌ. 16 Cꞌam cꞌal chi lawi jun bꞌetxan ixim jarina tuꞌ cꞌal niꞌan aceite tuꞌ, jaxca jix yun yalon Jehová tet naj Elías.
17 Jix ecꞌ cꞌaltoj jayebꞌ cꞌual xin, jix yaꞌbꞌi ey jun yuneꞌ ix ix tuꞌ, caw jow jix yute jun syaꞌilal tuꞌ; jix cꞌamxa cꞌal naj unin tuꞌ. 18 Jix yalon ix tet naj Elías jaxca tiꞌ:
—¿Tzet to wal ye xin, jaach ẍejabꞌ Dios? ¿Tumi yu ja wakꞌon jin naꞌtej jin penail sattaj Jehová, yuxan jix cam jun wuneꞌ tiꞌ? ¿Tumi yu jun tuꞌ yuxan jix jaach jul titiꞌ? ẍi ix tet naj.
19 —Jix yalon naj Elías tet ix jaxca tiꞌ: Iꞌtej naj ja wuneꞌ tuꞌ titiꞌ, ẍi naj.
Jix yiꞌon ecꞌ naj jun yaliẍ unin tuꞌ tet ix, catuꞌ jix yiꞌon atoj naj bꞌey yul scuarto bꞌey ey sposada, jix stelbꞌan ey bꞌey sat xꞌat. 20 Eyman jix a yaw naj tet Jehová jix yalon jaxca tiꞌ: Jaach Jehová, ¿tumi cha watej cuscꞌulal yibꞌan jun ix ix jix akꞌon jin posada tiꞌ, yuxan jix jul scamichal jun yuneꞌ ix tiꞌ? ẍi naj.
21 Jix lawi tuꞌ, oxel jix ey noan naj yibꞌan naj unin tuꞌ, catuꞌ jix a pax yaw yin ipeal tet Jehová, jix yalon jaxca tiꞌ: Jaach Jehová, jaach jin Diosal, chin kꞌan ey jaach tol cha wakꞌ iquisbꞌoj a naj yaliẍ unin tiꞌ, ẍi naj yin xa.
22 Jix yabꞌen Jehová tzet jix yal naj Elías tuꞌ, catuꞌ jix jul scꞌul naj unin tuꞌ junelxa. 23 Eyman jix yiꞌeytej naj Elías bꞌey bꞌabꞌel piso bꞌey eyecꞌ ix xutx naj unin tuꞌ, catuꞌ jix yaontoj naj tet ix junelxa, jix yalon jaxca tiꞌ:
—Ilaꞌla, tuxa jix jul scꞌul naj ja wuneꞌ tiꞌ, ẍi naj tet ix.
24 Jix yalon ix tet naj Elías jaxca tiꞌ:
—Jaꞌ tinaniꞌ chi waoc yin jin cꞌul tol yel ẍejabꞌ jaach Jehová Dios, jaꞌton Naj jix akꞌon jun wuneꞌ tiꞌ, catuꞌ yin cꞌal sjichanil chi yun ja kꞌanabꞌi, ẍi ix tet naj.