Jaꞌ yet tuꞌ, caw wal jow yakꞌon wail bꞌey conobꞌ Samaria, 3 catuꞌ jix awtele naj Abdías yu naj Ahab, jaꞌton naj eyoc yin yilomaloj masanil mulnail. Jaꞌ naj tuꞌ chi oc yin eyilal tet Jehová yin masanil scꞌul. 4 Jaꞌ yet cꞌamto chi yunen el jun tuꞌ, yet jix makꞌle cam ebꞌ ẍejabꞌ Dios yu ix Jezabel ix yistil naj rey Ahab, ey 100 ebꞌ naj jix col-le yu naj Abdías tuꞌ. Jix poꞌole ecꞌ ebꞌ yu naj, yin cincuentataj jix yute spoꞌon ecꞌoj. Jix too ewbꞌale el ebꞌ yu naj bꞌey yul caabꞌ chꞌen nachꞌen, catuꞌ jix bꞌet akꞌle tzet jix sloꞌ ebꞌ cꞌal tzet jix yucꞌ ebꞌ yet jun tiempoal tuꞌ yu naj. 5 Jix yalon naj rey Ahab tet naj Abdías jaxca tiꞌ:

—Titan, catuꞌ chi too cu bꞌeytzen masanil yul nación tiꞌ, ta eyto bꞌey ey jaꞌ jaꞌ, cꞌal kiloni ta eyto bꞌey chi chaꞌlo sloꞌbꞌe noꞌ cu che tiꞌ ku, yet watxꞌ cꞌam chi cu can yin tol cꞌamxa cu che, ẍi naj tet Abdías.

6 Yu tuꞌ xin, jix spoꞌon ecꞌ sbꞌa ebꞌ naj; txꞌoj bꞌey jix too naj Ahab, txꞌoj bꞌey jix too cꞌal pax naj Abdías. 7 Jaꞌ yet eyoc naj Abdías tuꞌ yul bꞌe, catuꞌ jix elol naj Elías bꞌey yul bꞌe. Eyman jix naꞌcha el naj Elías yu naj Abdías, jix ey noan naj jix yalon jaxca tiꞌ:

—¿Jaach Elías, tumi jaach tiꞌ ẍejabꞌ jaach Dios? ẍi naj Abdías tet naj.

8 —Jaꞌ jain toni. Asiꞌ, al tet naj rey Ahab tol ey jin ecꞌ titiꞌ, ẍi naj Elías.

9 Jix takꞌwi naj Abdías tet naj jaxca tiꞌ:

—¿Tzet wal jin penail yuxan chin ja waoc yul skꞌabꞌ naj Ahab, yet chin makꞌle cam yu naj? 10 Yin sbꞌi Jehová cu Diosal tol iquis, chi wal ey jaach tol jix aletoj ja seyomal yul-laj masanil nación yu naj jin yaawil tuꞌ. Jaꞌ yet jix yalon ebꞌ rey tol cꞌam chach ilcha bꞌey yul snación ebꞌ tuꞌ, jix yalon naj yaaw tuꞌ tol chi yakꞌ stiꞌ ebꞌ tol yel cꞌam chach ilcha oc bꞌey snación ebꞌ tuꞌ. 11 Jaxa pax tinaniꞌ chin ja chejon wal tet naj rey tuꞌ tol ey jaach ecꞌ titiꞌ. 12 Jaxa tala chi yunne, asanne mi chin el ja cꞌatan tinaniꞌ, catuꞌ oj mi jul Yespíritu Dios jaach jul yiꞌontoj, txequel bꞌeytuꞌ oj jaach apnoj, jaxa yet oj jin apnoj walon tet naj rey Ahab tuꞌ, catuꞌ oj tit naj jaach jul yiloni; ta cꞌamxa jaach ey jaach ecꞌ titiꞌ, jaxam jin makꞌle cam yu naj. Jain ja wakꞌomal servil jin tiꞌ, yin tax cꞌal wachꞌeal jix jin oc cꞌal ian woc eyilal tet Jehová. 13 ¿Tumi cꞌamto mactxequel chi alon ey jaach tzet jix yun jin colon ebꞌ ẍejabꞌ Dios yul skꞌabꞌ ix Jezabel yet lalan smakꞌle cam ebꞌ yu ix? Jix webꞌa el jun 100 ebꞌ bꞌey yul caabꞌ chꞌen nachꞌen, cincuentataj jix wute octoj ebꞌ, jix wakꞌon tzet jix sloꞌ ebꞌ cꞌal tzet jix yucꞌ ebꞌ. 14 Catuꞌ cha walon pax oj tol chi wal tet naj rey tol ey jaach ecꞌ titiꞌ, asan mi tol chin makꞌle cam yu, ẍi naj Abdías.

15 Jix yalon naj Elías tet naj jaxca tiꞌ:

—Sattaj Jehová cu Diosal, Naj Yaaw yin masanil, Naj ey jin ẍejabꞌ, chi wal ey jaach tol oj jin apnoj oc sattaj naj rey Ahab yet jun cꞌu tiꞌ, ẍi naj.

16 Jix lawi tuꞌ, catuꞌ jix too naj Abdías yalon tet naj Ahab. Jaꞌ yet jix yabꞌen ocoj, catuꞌ jix too il-le naj Elías tuꞌ yu naj Ahab. 17 Jaxa yet jix il-le oc yin Elías yu naj, jix yalon jaxca tiꞌ:

—A… ¿Tumi yel jaach jun lalan ja wetnen el conobꞌ Israel tiꞌ? ẍi naj Ahab tet naj.

18 Jix takꞌwi naj Elías:

—Jain tiꞌ, man lalan oj wetnen el jun conobꞌ tiꞌ, ja wu jaach tiꞌ yetoj masanil ebꞌ ja wican, yuxan jaxca tuꞌ chi yunne, yutol cꞌamxa che jije ẍejbꞌanil Jehová, jaxa tet jun comon dios chi yij Baal, chex oc eyilal. 19 Yuxan jaꞌ tinaniꞌ, chejtoj yiꞌomal masanil ebꞌ ket conobꞌ Israel, catuꞌ chi too ebꞌ bꞌey sjolom txꞌotxꞌ wonan Carmelo, yetoj ebꞌ 450 yakꞌomal servil Baal yetoj cꞌal 400 ebꞌ yakꞌomal servil ix dios Aserá, ebꞌ chi akꞌle sgasto yu ix Jezabel. Jaꞌ tituꞌ oj jin chaꞌle jin bꞌa yetoj ebꞌ, ẍi naj Elías.

20 Jix yalon naj Ahab tol chi yambꞌale oc masanil ebꞌ conobꞌ Israel, yetoj masanil ebꞌ yakꞌomal servil comon dios bꞌey sjolom wonan chi yij Carmelo. 21 Jix lawi tuꞌ xin, jix sjitzontoj sbꞌa naj Elías scꞌatan ebꞌ ánima tuꞌ, jix yalon naj tet ebꞌ jaxca tiꞌ:

—¿Bꞌakꞌin wal oj sbꞌej somlabꞌi je naꞌbꞌal tuꞌ? Ta tol jaꞌ Jehová, Dios toni, asanne ojabꞌ tet Naj chex oc yin eyilal, ta tol jaꞌ Baal tuꞌ Dios xin, asanne ojabꞌ cꞌal pax tet chex oc yin eyilal, ẍi naj tet ebꞌ.

Cꞌam cꞌal ebꞌ ánima tuꞌ chi takꞌwi tet naj. 22 Jix yalon pax naj Elías tet ebꞌ jaxca tiꞌ:

—Jaꞌ xol masanil ebꞌ ẍejabꞌ Dios, asanxane jin iquis jin xol ebꞌ, jal pax ebꞌ chi akꞌon servil dios Baal xin, ey 450 ebꞌ. 23 Yu tuꞌ xin, iꞌwejtej cacꞌonoj noꞌ achꞌe wacax, catuꞌ chi sicꞌlen el ebꞌ yakꞌomal servil Baal tuꞌ junoj yet, catuꞌ chi skocꞌ tzokꞌnetoj ebꞌ, chi yaon atoj ebꞌ yibꞌan teꞌ siꞌ, cꞌam cꞌal mac chi aon oc kꞌakꞌ yalan. Jain xa xin, chin waꞌne junxa wet, catuꞌ oj waon atoj noꞌ yibꞌan teꞌ siꞌ, jacꞌalaꞌ cꞌam kꞌakꞌ oj waoc yalan. 24 Chi lawi tuꞌ xin, catuꞌ che yawten je dios Baal tuꞌ, jacꞌalaꞌ jin pax jain tiꞌ oj wawte Jehová jin Diosal. Jaꞌ mactxequel oj aontej kꞌakꞌ yibꞌan jun xaambꞌal tiꞌ, jaꞌ ojabꞌ jun tuꞌ oj oc cu Diosaloj, ẍi naj Elías tet ebꞌ.

—Yun ojabꞌ jaxca tuꞌ xin, ẍi ebꞌ conobꞌ tuꞌ masanil.

25 Jix lawi tuꞌ, jix yalon naj Elías tet ebꞌ yakꞌomal servil dios Baal jaxca tiꞌ:

—Sicꞌlewej junoj noꞌ je wacax, catuꞌ che waꞌnen atoj noꞌ yibꞌan teꞌ siꞌ, jaex bꞌabꞌel che waꞌne can je yet yutol ecꞌal jex. Chi lawi tuꞌ che yawten je diosal tuꞌ, cꞌam cꞌal che yaoc kꞌakꞌ yalan, ẍi naj tet ebꞌ.

26 Jix smakꞌon cam noꞌ wacax tuꞌ ebꞌ, catuꞌ jix yaon atoj ebꞌ yibꞌan teꞌ siꞌ tuꞌ. Yet tax jix kꞌinibꞌi masantaꞌcꞌal yet jix oc chuman cꞌu, jacꞌalaꞌ cꞌal yawi oc ebꞌ yin jun dios Baal tuꞌ, chi yalon ebꞌ jaxca tiꞌ: Takꞌwan ey jon jaach Baal, ẍi ebꞌ. Chi a tꞌujlabꞌoj ebꞌ, catuꞌ chi ecꞌ joyoyoj ebꞌ yinlaj jun xaambꞌal jix swaꞌne ebꞌ tuꞌ, cꞌam cꞌal mactxequel jix takꞌwi tet ebꞌ. 27 Jaꞌ yet jix oc chuman cꞌu xin, tucꞌal chi tzee naj Elías yin ebꞌ, jix yalon naj tet ebꞌ:

—Caw ip chi yun el je yaw, tutun tol dios xin, ey mi tzet lalan snaꞌoni, ma xin, eytoj txuloj, ma xin, ey bꞌey eytoj yakꞌ junoj ẍejbꞌanil, ma xin, tol chi weyi, yuxan awanwej cꞌal tet, jaxta wal oj el sweyan, ẍi naj tet ebꞌ.

28 Jix oc cꞌal ian yel yaw ebꞌ, jix cꞌoli skꞌupontoj sbꞌa ebꞌ yetoj nawax cꞌal yetoj chꞌen tejbꞌal cam wacax, jaxca taꞌ sbꞌeybꞌal ebꞌ, chicꞌtaj xacꞌal jix yutetoj sbꞌa ebꞌ, 29 cꞌam cꞌal mac chi takꞌwi tet ebꞌ yet jix ecꞌtoj chuman cꞌu, jacꞌalaꞌ cꞌal yel yaw ebꞌ, chi a cꞌal tꞌujlabꞌoj ebꞌ, masantaꞌcꞌal jix oc yorail jaxca cꞌaltaꞌ chi yun yakꞌle xaambꞌal tet Jehová, cꞌam cꞌal niꞌoj jix takꞌwi tet ebꞌ. 30 Jix lawi tuꞌ, jix yalon naj Elías tet ebꞌ ánima tuꞌ jaxca tiꞌ: Titanwej jin cꞌatan an, ẍi naj.

Catuꞌ jix sjitzon oc sbꞌa masanil ebꞌ ánima tuꞌ scꞌatan naj, jix oc ian naj scaꞌ swaꞌnen a jun yet xaambꞌal yet Jehová ecꞌnaj uchna oj. 31 Jix oc ian naj syambꞌan oc lacawebꞌ chꞌen chꞌen jaxca sbꞌisil ebꞌ yicꞌaal Jacob, naj jix yal Jehová tol Israel chi yij can sbꞌi. 32 Jix swaꞌnen jun yet xaambꞌal tet Jehová, jix sjoton atej jun sbꞌe jaꞌ yinlaj jun xaambꞌal tuꞌ. Chim eytoj canebꞌoj galón jaꞌ jaꞌ yul sbꞌe jaꞌ tuꞌ. 33 Jix lawi tuꞌ, catuꞌ jix swaꞌnen ey teꞌ siꞌ naj, jix oc ian stzokꞌontoj noꞌ wacax naj tuꞌ, catuꞌ jix yaon atoj yibꞌan teꞌ siꞌ tuꞌ. 34 Jix yalon naj jaxca tiꞌ:

—Akꞌwej no canebꞌoj mooc jaꞌ, catuꞌ che secon ey yibꞌan jun xaambꞌal tuꞌ cꞌal yibꞌan teꞌ siꞌ, ẍi naj tet ebꞌ. Jix lawi tuꞌ xin, jix yalon pax naj tet ebꞌ tol chi yiꞌtej jaꞌ ebꞌ yet scaelal, jix secontoj ebꞌ yibꞌan jun xaambꞌal tuꞌ, jix yalon cꞌal pax naj tol chi yiꞌtej jaꞌ jaꞌ ebꞌ yet yoxelal. 35 Caw wal chi bꞌey jaꞌ yinlaj jun xaambꞌal tuꞌ, jix noel yul sbꞌe jaꞌ tuꞌ yu jaꞌ. 36 Jaxa yet jix oc yorail jaxca cꞌaltaꞌ chi yun yakꞌle xaambꞌal, jix sjitzon oc sbꞌa naj Elías sattaj jun yet xaambꞌal tuꞌ, jix yalon naj jaxca tiꞌ: Jaach Jehová, jin Diosal jaach yetoj naj Abraham, Isaac, cꞌal Israel, tinaniꞌ otajnele ojabꞌ eloj tol cu Diosal jaach jaon Israel jon tiꞌ, catuꞌ ja chejabꞌ weoc an, catuꞌ tol jaach jix ja chej wun wan tiꞌ an. 37 Takꞌwan ey jin an, jaach Jehová, yet watxꞌ chi yotajne el wan ánima tiꞌ tol asanne jaach Dios jaach, catuꞌ chi yoche ja cꞌul tol chi meltzo snaꞌbꞌal wan ánima tiꞌ ja win junelxa, ẍi naj Elías.

38 Yet wal jun txolan tuꞌ jix eyol kopna kꞌakꞌ bꞌey satcan yu Jehová catuꞌ jix tzꞌaꞌtoj teꞌ siꞌ cꞌal noꞌ xaambꞌal tuꞌ, chꞌen chꞌen cꞌal pojoj, jix tantoj jaꞌ jaꞌ ey bꞌey yul sbꞌe jaꞌ tuꞌ. 39 Jaꞌ yet jix yilon ebꞌ ánima jaxca tuꞌ, jix ey noan ebꞌ masanil sat txꞌotxꞌ, jix yalon ebꞌ jaxca tiꞌ: Asanne Jehová tiꞌ Dios, ẍi xacꞌal ebꞌ masanil.

40 Jix lawi tuꞌ xin, jix yalon naj Elías tet ebꞌ jaxca tiꞌ:

—Mitxꞌwej ey ebꞌ yakꞌomal servil Baal tuꞌ, cꞌamxa junoj che jajeloj, ẍi naj tet ebꞌ.

Jix mitxꞌle ey ebꞌ yu ebꞌ ánima tuꞌ, jix iꞌletoj ebꞌ bꞌey stiꞌ jaꞌ jaꞌ chi yij Quisón. Jaꞌ tituꞌ jix makꞌle cam ebꞌ.

41 Jix lawi tuꞌ xin, jix yalon naj Elías tet naj Ahab jaxca tiꞌ:

—Asiꞌ lowoj, tuxa chi jul jun miman yaxnabꞌ chi wabꞌe, ẍi naj.

42 Jix sjijen naj Ahab tzet chi yal naj, jix too lowoj.

Jaxa naj Elías jix atoj bꞌey sjolom wonan bꞌey Carmelo tuꞌ, jix ey kaanoj, catuꞌ jix ey noan txaloj masantaꞌcꞌal jix eyqꞌuey sat bꞌey snan xol sjolom spenec. 43 Jix yalon naj tet jun yakꞌomal servil jaxca tiꞌ:

—Aantoj, catuꞌ chach too tꞌanan yibꞌan jaꞌ mar, ẍi naj.

Catuꞌ jix too naj, jix too tꞌanan naj yibꞌan jaꞌ mar. Jix lawi tuꞌ, catuꞌ jix meltzotej bꞌey naj Elías, jix yalon jaxca tiꞌ:

—Cꞌam wal niꞌoj tzet jix wilaꞌ, ẍi naj tet.

—Asiꞌ junelxa, ẍi naj, catuꞌ jix too naj.

44 Jujel jix ẍejtoj jun yakꞌomal servil naj Elías tuꞌ, jix yalon naj jaxca tiꞌ:

—Ey wal chꞌan niꞌan asun bꞌey yibꞌan jaꞌ mar, cꞌuxan chi majcha el yu cu kꞌabꞌ chi kilaꞌ, ẍi jun yakꞌomal servil tuꞌ.

Jix lawi tuꞌ, jix yalon naj Elías tet jun yakꞌomal servil tuꞌ jaxca tiꞌ:

—Asiꞌ al tet naj Ahab tuꞌ tol chi yaoc noꞌ che yin scarruaje catuꞌ chi meltzotoj naj, jaxa tala chi yunne, ma xa taꞌ la skeꞌ yapni oc naj bꞌey sna yu nabꞌ, ẍi naj.

45 Jix atoj naj Ahab yul scarruaje jix too naj bꞌey conobꞌ Jezreel. Lalantocꞌal wal stoo naj catuꞌ jix kꞌej jolel satcan yu asun, jix tit jun jow kaꞌeꞌ jaxa sjul jun miman yaxnabꞌ tuꞌ. 46 Jaxa pax naj Elías xin, jix akꞌle yip naj yu Jehová. Eyman jix jitza sjojan spichil, jix skꞌalon snan, catuꞌ jix too jininoj. Jix bꞌabꞌi ecꞌ sattaj naj Ahab masantaꞌcꞌal jix apni oc ebꞌ naj bꞌey conobꞌ Jezreel.