Yin Elilal Jix Yun Yel Naj Elías Bꞌey Jezreel, Catuꞌ Jix Too Naj Bꞌey Wonan Horeb
19
Jix yalon naj rey Ahab tet ix Jezabel yu tzet jix yun naj Elías cꞌal tzet jix yun smakꞌle cam ebꞌ yakꞌomal servil jun comon dios Baal yu naj. 2 Yu jun tuꞌ, yuxan jix yatoj ẍejabꞌ ix Jezabel bꞌey naj Elías, jix yalon ebꞌ jaxca tiꞌ: Tit ojabꞌ sjowal scꞌul ebꞌ jin diosal win, ta cꞌamto chach cam wu yet yecal jaxca jix yun ja makꞌon cam ebꞌ yakꞌomal servil jin diosal tuꞌ, ẍi ix tuꞌ.3 Jaꞌ yet jix yabꞌen oc naj Elías jun tuꞌ tol ey smey yeocoj, catuꞌ jix sbꞌoson el sbꞌa naj yet watxꞌ cꞌam chi cami, yuxan jix too naj bꞌey conobꞌ Beerseba, yul yet Judá. Jaꞌ tituꞌ jix yakꞌ can jun yakꞌomal servil. 4 Jal naj xin, jix too naj bꞌey txꞌotxꞌ cusiltaj txꞌotxꞌ, jun cꞌu jix bꞌey naj. Caw jix cꞌuumbꞌi a naj, catuꞌ jix xew naj yich jun teꞌ teꞌ. Jaꞌ tituꞌ jix yoche xacꞌal chi cami. Jix yalon jaxca tiꞌ: Jaach Jehová, kꞌojbꞌilxa tiꞌ. Akꞌ jin xacꞌal camoj, yutol man yeloj xacꞌal watxꞌ jin yintaj ebꞌ wichmam, tol tax jix cam ebꞌ, jaxca tam jin jain tiꞌ, ẍi naj.
5 Jix ey telan naj yich jun teꞌ teꞌ tuꞌ, jix weya naj. Jaxa jix yun xin, ey jun ángel jix jul tenon el sweyan naj, jix yalon jaxca tiꞌ: Aan waanoj catuꞌ chach lowi, ẍi tet naj.
6 Catuꞌ jix yilon naj tol bꞌatxan ey jun ixim pan kꞌanbꞌinaj xol stzakꞌakꞌ yetoj jun ẍalu jaꞌ bꞌey sjolomtaj naj tuꞌ. Jix ey chotan naj, catuꞌ jix lowi cꞌal yuqꞌuen jaꞌ. Jix lawi tuꞌ jix ey pax telan naj junelxa weyoj. 7 Jix jul pax jun ángel tuꞌ junelxa scꞌatan naj, jix yalon jaxca tiꞌ: Aan waanoj, lowan, yet watxꞌ cꞌam chach cꞌuumbꞌi aoj, yutol naat to stoo bꞌey oj jaach apnoj ocoj, ẍi tet naj.
8 Jix a pax waan naj, catuꞌ jix lowi. Caw jix oc yip yu tzet jix sloꞌ tuꞌ. Cawinaj cꞌu cawinaj akꞌbꞌal jix bꞌey naj, catuꞌ jix apni oc naj bꞌey wonan Horeb bꞌey xꞌoxnaj sbꞌa Jehová tet. 9 Jaꞌ yet jix apni oc naj tituꞌ, jix octoj yul jun chꞌen nachꞌen. Jaꞌ tituꞌ jix ecꞌ akꞌbꞌal yu naj. Catuꞌ jix kꞌanabꞌ Jehová tet naj, jix yaloni: ¿Tzet cha wun titiꞌ jaach Elías? ẍi Jehová.
10 Jix takꞌwi naj jaxca tiꞌ: Jaach Jehová, yaaw jaach yibꞌan masanil, caw wal jix tit sjowal jin cꞌul yu tzet chach utele yu ebꞌ wet conobꞌ Israel tiꞌ, yutol jix sbꞌejcan ja wa kꞌane ebꞌ, jix yuchon ecꞌ bꞌulna jun yet xaambꞌal ebꞌ, jix makꞌle pax cam ebꞌ naj ja chejabꞌ yu ebꞌ. Asanxane jin jix jin colcha can eloj, ilaꞌ tol lalan jin seyle pax ecꞌ yu ebꞌ yet chin makꞌle cam yu ebꞌ yaloni, ẍi naj.
11 Jix yalon Jehová tet naj jaxca tiꞌ: Elantoj bꞌey ewan jaach octoj tuꞌ, catuꞌ chach oc linan jin sattaj bꞌey sjolom jun wonan tiꞌ, yutol oj jin ecꞌtoj tituꞌ, ẍi Jehová.
Jix yaontej Jehová jun miman kaꞌeꞌ tol chi poꞌo xacꞌaltoj chꞌen chꞌen yu bꞌey jun wonan tuꞌ, jix poꞌotoj chꞌen mimej chꞌen sattaj Jehová, ma pax jix xꞌox sbꞌa Jehová xol jun kaꞌeꞌ tuꞌ. Jix lawi yecꞌtoj jun miman kaꞌeꞌ tuꞌ, catuꞌ jix yakꞌon jun quixcabꞌ, ma pax jix xꞌox sbꞌa Jehová xol jun quixcabꞌ tuꞌ. 12 Jix lawi yecꞌtoj jun quixcabꞌ tuꞌ, jix tit pax jun kꞌakꞌ, ma pax jix xꞌox sbꞌa Jehová xol jun kꞌakꞌ tuꞌ. Yet jix lawi yecꞌ cantoj jun kꞌakꞌ tuꞌ, yin xacꞌal cꞌuancꞌulalil jix yun yabꞌen naj Elías yoc jun kꞌane. 13 Jaꞌ yet jix yabꞌen naj tuꞌ, jix yaon oc sjojan pichil yeneloj sat, jix eltej naj, jix oc linan naj bꞌey stiꞌ chꞌen nachꞌen tuꞌ, catuꞌ jix yabꞌen naj yoc jun kꞌane, jix yalon jaxca tiꞌ: ¿Jaach Elías, tzet cha wun titiꞌ? ẍi Jehová.
14 Jix takꞌwi naj jaxca tiꞌ: Jaach Jehová, yaaw jaach yibꞌan masanil, caw wal jix tit sjowal jin cꞌul yu tzet chach utele yu ebꞌ wet conobꞌ Israel tiꞌ, yutol jix sbꞌejcan ja wa kꞌane ebꞌ. Jix yuchon ecꞌ bꞌulna jun yet xaambꞌal ebꞌ, jix makꞌle cam ebꞌ naj ja chejabꞌ yu ebꞌ. Asanxane jin, jix jin colcha can eloj, ilaꞌ tol lalan cꞌal jin seyle ecꞌ yu ebꞌ yet chin makꞌle cam yu ebꞌ yaloni, ẍi naj.
15 Jix yalon Jehová tet naj jaxca tiꞌ: Asiꞌ, paxantoj yul ja bꞌe bꞌey cusiltaj txꞌotxꞌ catuꞌ chach too bꞌey conobꞌ Damasco, yet cha waon oc naj Hazael yin reyal bꞌey Siria, 16 catuꞌ cha waon oc naj Jehú yicꞌaal Nimsí sreyaloj Israel, cꞌal naj Eliseo scꞌaal Safat a Abel-meholá, jaꞌ cha waoc jin chejabꞌoj ja qꞌuexeloj. 17 Jaꞌ mactxequel chi colcha can el yul skꞌabꞌ naj Hazael, jaxa Jehú oj makꞌon camoj, jaxa mactxequel chi colcha can el yul skꞌabꞌ Jehú, jaxa naj Eliseo oj makꞌon camoj. 18 Chi walon ey jaach an, tol eyto junxa 7,000 ebꞌ Israel sicꞌbꞌil can el wu an, ebꞌ tol ma cꞌaltaꞌ oc yin eyilal tet Baal, ebꞌ ma tzꞌubꞌon el stiꞌ, ẍi Jehová.
Yawtebꞌal Naj Eliseo
19 Jix meltzo naj Elías tuꞌ, catuꞌ jix apni oc bꞌey eyecꞌ naj Eliseo scꞌaal Safat. Lalan kꞌuwi txꞌotxꞌ naj, yetoj jaywanxa ebꞌ chi mulna yetoj, ey lacawcꞌon moan swacax chi kꞌuwi txꞌotxꞌ, jaꞌ naj inen oc jun moan noꞌ ey can slawubꞌal yintaj. Jaxa naj Elías jix apni oc scꞌatan naj Eliseo, eyman jix yatoj jun sjojan pichil naj Elías yibꞌan naj. 20 Jaꞌ yet jun txolan tuꞌ, jix sbꞌejon xacꞌal can noꞌ wacax naj Eliseo tuꞌ, catuꞌ jix oc tzajan yintaj naj Elías, jix yalon jaxca tiꞌ:
—Chaꞌ jin toj junojxa txolan, yet chi walon cantoj jin bꞌa tet jin mam cꞌal jin txutx catuꞌ chin tzꞌubꞌon can el stiꞌ ebꞌ. Chi lawi tuꞌ xin, chin too xacꞌal can ja wetoj, ẍi naj Eliseo.
—Chi skeꞌ ja too xin, asan xin cha naꞌtej jun tzet jix wun ja wetoj tiꞌ, ẍi naj Elías.
21 Jix too naj Eliseo tuꞌ xin, jix smakꞌon cam cacꞌon noꞌ wacax tuꞌ. Jaꞌ yetoj teꞌ teꞌ kꞌalan oc yin yucꞌaꞌ noꞌ wacax tuꞌ, jaꞌ yibꞌan jix sbꞌol noꞌ chiꞌbꞌe tuꞌ, catuꞌ jix yakꞌon low ebꞌ ánima chi mulna yetoj. Jix lawi tuꞌ jix too tzajan yintaj naj Elías.