4 Jix takꞌwi naj rey Ahab tet ebꞌ jaxca tiꞌ: Yun ojabꞌ jaxca yalon naj rey tuꞌ. Jain tiꞌ yetoj masanil tzetyetal ey, ey jin yet cꞌal el naj, ẍi naj Ahab tuꞌ.

5 Jix yaon pax tej ebꞌ ẍejabꞌ bꞌey naj rey Ahab junelxa, jix yalon pax ebꞌ jaxca tiꞌ: Queytuꞌ yalon naj Ben-adad jaxca tiꞌ: Tuxa jix waltoj ey jaach tol oj ja wakꞌ masanil ja bꞌeomal ey jin yetoj cꞌal ebꞌ ix ja wistil yetoj cꞌal ebꞌ ja wuninal. 6 Yetoj cꞌal pax oj, yabꞌ jaxca tiꞌ yet yecal, chin chejtoj ebꞌ syaawil jin soldado tiꞌ yet chi too il-le ecꞌ masanil tzet ey yul ja palacio, cꞌal yul-laj snaꞌ ebꞌ ja wet yaawilal. Jaꞌ masanil jantaj tzetyetal tol oj yoche oc ebꞌ, oj yiꞌtej ebꞌ, ẍi naj, ẍi ebꞌ yakꞌomal servil naj tuꞌ.

7 Yuxan jix awtele masanil ebꞌ icham winaj yeoc yul conobꞌ Israel yu naj rey Ahab, jix yalon naj tet ebꞌ jaxca tiꞌ:

—¿Tzet chi yun je naꞌon yin jun winaj tiꞌ jaex tiꞌ? Tol jaꞌ naj rey Ben-adad chi yoche xacꞌal naj chin yetne an, tol chi yoche naj chi watoj ebꞌ ix wistil cꞌal ebꞌ wuninal tiꞌ tet, caxcꞌal mi xax jin takꞌe jin tiꞌ tet naj, ẍi naj Ahab.

8 —Jaꞌ jun tuꞌ manche ja chaꞌ ja wabꞌe, tam wal cha waoc yin ja cꞌul, ẍi ebꞌ naj icham winaj tuꞌ yetoj masanil ebꞌ conobꞌ tet naj.

9 Jix lawi tuꞌ, jix yalon naj rey Ahab tet ebꞌ yakꞌomal servil naj Ben-adad jaxca tiꞌ:

—Alwej tet naj je yaawil tuꞌ tol oj jin jije jaxca masanil tzetyetal jix yal naj yet sbꞌabꞌelal, jaxa tzet che yal ey jin yet scaelal tiꞌ ma skeꞌ jin jijeni, ẍi toj naj rey Ahab.

Catuꞌ jix meltzotoj ebꞌ chejabꞌwom tuꞌ, catuꞌ jix too ebꞌ yalon tet naj Ben-adad. 10 Jix ẍejon pax tej wanxa ẍejabꞌ naj Ben-adad tuꞌ junelxa, jix yalon ebꞌ tet naj rey Ahab jaxca tiꞌ: ¡Jaꞌ ojabꞌ wan ja diosal tiꞌ chi aon oc jin yaꞌilal, ta tol cꞌam chi wiꞌtoj mimanoj soldado yet cꞌam chi yabꞌ spojojal conobꞌ Samaria yet chi yiꞌontej junjun wotzan yet ebꞌ jin soldado tiꞌ yul skꞌabꞌ! ẍi naj.

11 Jaxa naj Ahab sreyal Israel jix alontoj tet naj Ben-adad jaxca tiꞌ: Man smoo oj chi smeyne sbꞌa mactxequel tol lalanto stoo yin jowal jaxca mactxequel tol lalanxa meltzotej, ẍi toj naj tet.

12 Lalan yucꞌwi an naj Ben-adad yetoj wanxa ebꞌ rey, yet jix yabꞌen naj yalon ebꞌ chejabꞌwom tuꞌ spajtzebꞌal jun kꞌane tuꞌ, jix yalon naj tet syaawil ebꞌ soldado jaxca tiꞌ: Akꞌwej jowal. Yuxan jix yakꞌ lista sbꞌa masanil ebꞌ yet chi too yakꞌon jowal ebꞌ yin conobꞌ tuꞌ.

13 Yajbꞌan tuꞌ, ey jun ẍejabꞌ Dios jix jul sattaj naj rey Ahab, sreyal Israel, jix yalon jaxca tiꞌ:

—Tuxa jix yal Jehová jaxca tiꞌ: Caxcꞌal ey junoj miman bꞌulan ebꞌ ja cajat chi jul ja win, jain oj waoc ebꞌ yul ja kꞌabꞌ, yet watxꞌ cha wotajne eloj tol jain ton Jehová Dios jin, ẍi Jehová, ẍi jun ẍejabꞌ Dios tuꞌ.

14 —¿Mac yu, yuxan oj oc ebꞌ yul jin kꞌabꞌ tinaniꞌ? ẍi naj rey Ahab.

—Jaꞌ Jehová jix aloni tol jaꞌ ebꞌ achꞌe winaj eyoc yalan ẍejbꞌanil ebꞌ gobernador bꞌey cha wakꞌ yaawil tiꞌ. Jaꞌ ebꞌ oj colwa ja wetoj, yuxan oj ja wakꞌ eyqꞌuey jun jowal tuꞌ, ẍi jun ẍejabꞌ Dios tuꞌ.

—¿Asan xin, mac pax txequel oj yakꞌ jowal tuꞌ yin sbꞌabꞌelal? ẍi naj rey Ahab.

—Jaach toni, ẍi jun ẍejabꞌ Dios tuꞌ.

15 Catuꞌ jix bꞌisle masanil ebꞌ naj achꞌe ey bꞌey yul scuenta tuꞌ, jaꞌton ebꞌ naj chi colwa yetoj ebꞌ gobernador. Jaꞌ ebꞌ naj tuꞌ ey 232 ebꞌ, yetoj 7,000 ebꞌ soldado Israel yin masanil. 16-17 Chuman wal cꞌu jix eltoj ebꞌ, bꞌabꞌel stoo ebꞌ naj achꞌe tuꞌ, yajbꞌan jaꞌ naj Ben-adad yetoj ebꞌ 32 rey tuꞌ jix yakꞌ stiꞌ yet chi colwa ebꞌ yetoj naj, jix oc cꞌal ian yucꞌwi an ebꞌ bꞌey yul-laj wan skꞌap na ebꞌ tituꞌ. Jix al-le tet naj Ben-adad yu ebꞌ soldado jix ẍejtoj yiloni, tol ey wan winaj jix eltej bꞌey yul conobꞌ Samaria. 18 Jix yalon naj tet ebꞌ jaxca tiꞌ: Ta tol tucꞌal chi eltej ebꞌ jaxca tuꞌ ma yin jowal xin, asan tucꞌal che mitxꞌtej ebꞌ yin yiquisal, ẍi naj tet ebꞌ.

19 Jaꞌ ebꞌ chi colwa yetoj ebꞌ gobernador tuꞌ, jix eltoj ebꞌ, tzajan oc masanil ebꞌ soldado yintaj ebꞌ. 20 Junjun cꞌal ebꞌ jix smakꞌ cam junjun scajat, jaxa ebꞌ a Siria tuꞌ jix ela ebꞌ. Catuꞌ jix oc tzajan ebꞌ Israel yintaj ebꞌ. Jaxa naj Ben-adad xin, jix oc naj yibꞌan ẍe yetoj wanxa ebꞌ soldado, jix ela ebꞌ yet chi scolon sbꞌa ebꞌ tet jowal. 21 Queytuꞌ jix yun yiꞌon can oc noꞌ che cꞌal carruaje yet jowal ebꞌ Israel. Caw miman ebꞌ a Siria jix eyqꞌuey yet jun cꞌual tuꞌ. 22 Jix lawi tuꞌ xin, jix jul pax naj ẍejabꞌ Dios sattaj naj sreyal Israel junelxa, jix yalon jaxca tiꞌ:

—Jaꞌ tinaniꞌ chi cam wal ja naꞌoni cꞌal ja waon oc stzꞌajil ebꞌ soldado tiꞌ, yutol jaꞌ yet junxa abꞌil, chi jul yakꞌ jowal ebꞌ Sirio tiꞌ ja wetoj junelxa, ẍi naj.

23 Jaxa ebꞌ syaawil soldado ebꞌ Sirio jix alon jaxca tiꞌ:

—Jaꞌ sdiosal ebꞌ Israel, jaꞌton wan sdiosal txꞌotxꞌ tzalquiltaj txꞌotxꞌ. Yu jun tuꞌ, yuxan jix cu eyqꞌuey yu ebꞌ. Jaxa tinaniꞌ xin, ta tol jaxa bꞌey pananlaj chi kakꞌwej jowal yetoj ebꞌ, caw yel oj eyqꞌuey ebꞌ ku. 24 Jaꞌ tzet sowalil chi kunwej tinaniꞌ jaach rey, tol chi kiꞌel masanil wan rey tuꞌ, jaxa ebꞌ syaawil ebꞌ cu soldado tiꞌ chi oc can sqꞌuexeloj ebꞌ, 25 catuꞌ cha waon oc junojxa bꞌulan soldado jaxca ebꞌ jix eyqꞌuey tuꞌ, laan cꞌal chi yun sbꞌisil noꞌ che, cꞌal carruaje yet jowal jaxca yet sbꞌabꞌelal, catuꞌ chi cu oc cꞌal ian kakꞌon jowal yetoj ebꞌ bꞌey pananlaj tuꞌ, yet watxꞌ oj eyqꞌuey ebꞌ ku, ẍi ebꞌ tet naj rey Ben-adad.

Jaꞌ naj Ben-adad jix ẍaꞌ yabꞌ jaxca jix yun yalon ebꞌ tuꞌ. 26 Jaꞌ yet jix lawi ecꞌ jun abꞌil tuꞌ, catuꞌ jix sbꞌison ebꞌ soldado a Sirio naj Ben-adad, catuꞌ jix jul ebꞌ bꞌey conobꞌ Afec, jix yakꞌon jowal ebꞌ tituꞌ. 27 Jacꞌalaꞌ cꞌal pax ebꞌ Israel jix sbꞌis pax soldado ebꞌ, jix akꞌle masanil smitxꞌkꞌabꞌ ebꞌ. Queytuꞌ jix yun stoo ebꞌ yakꞌon jowal sattaj ebꞌ Sirio tuꞌ. Jaꞌ bꞌey sattaj ebꞌ tuꞌ, jix swaꞌne a skꞌap na ebꞌ naj. Laan xacꞌal chꞌan yili ebꞌ jaxca caabꞌoj bꞌulan noꞌ chiw, jal pax ebꞌ soldado a Sirio xin, caw nonaj xacꞌal el sat acꞌal tuꞌ yu ebꞌ. 28 Jaꞌ yet jun cꞌual tuꞌ, jix jul jun ẍejabꞌ Dios sattaj naj Ahab sreyal Israel, jix yalon jaxca tiꞌ:

—Jaꞌ Jehová jix alon jaxca tiꞌ: Yutol jix yal ebꞌ a Sirio tuꞌ tol jain tiꞌ asan bꞌey txꞌotxꞌ tzalquiltaj txꞌotxꞌ Dios jin, catuꞌ man Dios oj jin bꞌey txꞌotxꞌ pananlaj yalon ebꞌ, yuxan jaꞌ tinaniꞌ oj waoc jun miman bꞌulan ánima tuꞌ yul ja kꞌabꞌ, queytuꞌ oj yun ja wotajne eloj tol asan jin Jehová jin, ẍi Dios, ẍi jun ẍejabꞌ Dios tuꞌ.

29 Jujebꞌ cꞌual tucꞌal eyecꞌ ebꞌ soldado Israel sattaj ebꞌ soldado a Sirio tuꞌ, jaxa yet sjujebꞌ cꞌual xin, jix oc jowal yu ebꞌ. Jaꞌ yet jun cꞌual tuꞌ jix cam 100,000 soldado yet ebꞌ a Sirio yu ebꞌ Israel, jaꞌton ebꞌ tucꞌal chi bꞌeyi. 30 Jaxa wanxa ebꞌ soldado tuꞌ, jix too yewbꞌa el sbꞌa ebꞌ yul conobꞌ Afec. Jaxa smuroal conobꞌ tuꞌ jix eyqꞌuey bꞌulna yibꞌan ebꞌ 27,000 soldado jix ela tuꞌ, catuꞌ jix cam can ebꞌ. Jaxa naj Ben-adad jix elaoj, jix apni oc naj bꞌey yul conobꞌ tuꞌ, catuꞌ jix too yewbꞌa el sbꞌa bꞌey junoj na.

31 Jix yalon ebꞌ yakꞌomal servil tet jaxca tiꞌ:

—Jix kabꞌe tol jaꞌ ebꞌ sreyal Israel watxꞌ snaꞌbꞌal ebꞌ, ta chi ẍaꞌ ja cꞌul chi kaoc an eel pichile yet cuscꞌulal jon, catuꞌ chi kaon oc lasu yin cu nukꞌ jon, catuꞌ chi cu too sattaj naj sreyal Israel tuꞌ, tala cꞌuxan chi yakꞌ mimancꞌulal naj ja win, ẍi ebꞌ tet naj.

32 Catuꞌ jix yaon oc an eel pichile yet cuscꞌulal ebꞌ, cꞌal yaon oc lasu ebꞌ yin snukꞌ, catuꞌ jix too ebꞌ sattaj naj sreyal Israel, jix yalon ebꞌ jaxca tiꞌ:

—Jaon yakꞌomal servil naj Ben-adad tiꞌ jon, caw chi cu oc tean ja win jaach rey, tol cha wakꞌ mimancꞌulal yin naj, ẍi ebꞌ tet naj. Jix takꞌwi naj rey Ahab tet ebꞌ jaxca tiꞌ:

—¿Tumi iquisto ecꞌ naj tinaniꞌ xin? Jaꞌ yul jin sat jain tiꞌ, laan wal tol wuẍtaj jin bꞌa yetoj naj, ẍi naj.

33 Caw wal watxꞌ skꞌanabꞌ naj rey tuꞌ jix yabꞌ wan winaj tuꞌ, yuxan jix yal ebꞌ jaxca tiꞌ: Jaꞌ naj ja wuẍtaj Ben-adad tuꞌ iquisto ecꞌ naj, jaach rey, ẍi ebꞌ tet naj.

—Asiꞌ iꞌwejtej naj xin, ẍi naj rey Ahab tet ebꞌ naj.

Jix lawi tuꞌ, catuꞌ jix jul naj Ben-adad sattaj naj rey Ahab, jix yaon atoj naj rey Ahab tuꞌ yul scarruaje. 34 Jix lawi tuꞌ, jix yalon naj Ben-adad tet naj Ahab jaxca tiꞌ:

—Jaꞌ tinaniꞌ chi wakꞌ meltzo wan conobꞌ iꞌbꞌil ecꞌ yu jin mam yul skꞌabꞌ naj ja mam. Chi skeꞌ chi too ebꞌ naj ja txonwom txonwoj bꞌey conobꞌ Damasco jaxca jix yun ebꞌ xonwom naj jin mam bꞌey conobꞌ Samaria, ẍi naj Ben-adad tuꞌ.

—Ta jaxca tuꞌ xin, chach jin jajeloj, ẍi naj rey Ahab tet naj.

Queyton tuꞌ jix yun swaꞌnen jun swa kꞌane naj Ahab yetoj naj Ben-adad. Jix lawi tuꞌ jix paxtoj naj.

35 Ey jun winaj xol ebꞌ ẍejabꞌ Dios, jix alon tet jun jaꞌjun yetoj, jatacꞌalaꞌ tzet jix yun yalon Jehová tet, jix yalon jaxca tiꞌ:

—Yuwal dios ey jaach, makꞌ jin yasoj niꞌoj jin kꞌanaꞌ, ẍi tet.

Jaꞌ jun tuꞌ ma yal scꞌul jix yunne. 36 Jaxa jun ẍejabꞌ Dios tuꞌ jix alon tet jaxca tiꞌ:

—Yutol ma ja jije tzet jix yal Jehová, yuxan ey jun noꞌ león oj jaach makꞌon cam yet oj jaach toj jin cꞌatan tiꞌ.

Jaꞌ yet jix el naj scꞌatan jun ẍejabꞌ Dios tuꞌ, eyman jix elol lemna jun noꞌ león, catuꞌ jix makꞌle cam naj yu noꞌ.

37 Jix lawi tuꞌ, jix ẍaꞌlen sbꞌa jun ẍejabꞌ Dios tuꞌ yetoj junxa winaj, jix yalon pax tet tol chi makꞌle yasoj niꞌoj yu. Jaꞌ jun winaj tuꞌ jix makꞌwa yin, catuꞌ jix yakꞌon yasoj. 38 Jix lawi tuꞌ, jix too jun ẍejabꞌ Dios tuꞌ yechbꞌanen yecꞌtoj naj rey bꞌey yul bꞌe. Jix sqꞌuexon el sbꞌa, majan sat yetoj jun kꞌap. 39 Jaxa yet jix ecꞌtoj naj rey tuꞌ, jix a yaw jun ẍejabꞌ Dios tuꞌ, jix yaloni yin ipeal:

—Jaach rey, jain ja wakꞌomal servil jin tiꞌ, jix jin to yin jowal. Ey junoj ebꞌ soldado tuꞌ jix eltej, catuꞌ jix yiꞌontej jun ebꞌ eyoc preso, jix yalon ey jin tol chin teyne jun winaj tuꞌ. Jix yalon ey jin ta tol chin jajeloj, jain xa chin can sqꞌuexeloj, ma xin, sowalil chin wakꞌ oxebꞌoj arroba chꞌen plata yu stooloj smul jun winaj tuꞌ. 40 Queyton tuꞌ yeoc jun tuꞌ jaach rey, yajbꞌan ey niꞌoj tzet lalan jin waꞌneni, catuꞌ jix el lemna naj eyoc yin presowomal tuꞌ yul jin kꞌabꞌ, ẍi naj.

Jix takꞌwi naj Ahab sreyal Israel jaxca tiꞌ:

—Jaach cꞌal oc jix ja walatej ja penail tuꞌ, yet oj walon tzet smoo oj ja wunne, ẍi naj Ahab tuꞌ.

41 Jix lawi tuꞌ, jix yiꞌon el smajil sat jun ẍejabꞌ Dios tuꞌ eyocoj. Catuꞌ jix yilon naj rey tol jaꞌ junoj ebꞌ ẍejabꞌ Dios. 42 Catuꞌ jix yalon jun ẍejabꞌ Dios tuꞌ jaxca tiꞌ: Jaxca wal tiꞌ yalon Jehová: Tol jaach tiꞌ jix a jajtoj jun winaj jix walaꞌ tol sowalil chi cami, yuxan jaach oj jaach cam sqꞌuexeloj jun tuꞌ, jaxa ebꞌ ja wet conobꞌ oj cam sqꞌuexeloj sconobꞌ naj, ẍi Jehová, ẍi jun ẍejabꞌ Dios tuꞌ.

43 Jix lawi tuꞌ xin, jix paxtoj naj sreyal Israel bꞌey conobꞌ Samaria, caw cusiltaj xacꞌal yoc sat. Catuꞌ caw chi jowbꞌi scꞌul, yet jix octoj yul spalacio.