—Akꞌ niꞌoj ja txꞌotxꞌ tuꞌ ey jin an, catuꞌ oj wawon niꞌoj wita an, yutol caw wal scꞌatan xacꞌal jin na eyocoj. Jaxa junojxa txꞌotxꞌ caw watxꞌ chi wakꞌ sqꞌuexeloj ey jaach, ma xin tol chin man txꞌotxꞌ ey jaach, ẍi naj.

3 Jix takꞌwi naj Nabot tet naj rey Ahab jaxca tiꞌ:

—Ma ẍaꞌ scꞌul Dios ta chin txon el jun jin majul txꞌotxꞌ jix yakꞌ can naj jin mam ey jin an.

4 Caw wal eyoc naj Ahab tuꞌ yin taccꞌulal, catuꞌ jix paxtoj naj bꞌey spalacio. Txꞌojxa wal chi a scꞌul yu taccꞌulal yu tzet jix yal Nabot tuꞌ tet. Jix cꞌal apni oc naj bꞌey sna tuꞌ xin, catuꞌ jix atoj telan sat xꞌat, catuꞌ jix too tꞌanan yich na, cꞌam chi yal scꞌul chi lowi. 5 Jix lawi tuꞌ, jix apni oc ix Jezabel scꞌatan, jaꞌton ix yistil naj, jix skꞌanlen ix tet naj jaxca tiꞌ:

—¿Tzet yuxan caw chi tac ja cꞌul, catuꞌ cꞌam cha chaꞌ low ja bꞌa? ẍi ix tet naj.

6 Jix takꞌwi naj Ahab tet ix jaxca tiꞌ:

—Tol jix jin kꞌanabꞌ yetoj naj Nabot a conobꞌ Jezreel, ta chi xon niꞌoj xꞌotxꞌ naj ey jin bꞌey stiꞌ jin txꞌotxꞌ tuꞌ an, ma xin chi wakꞌ junojxa txꞌotxꞌ sqꞌuexeloj tet naj, caw ma yal pax scꞌul naj jix yakꞌ ey jin, ẍi naj.

7 Jix takꞌwi ix Jezabel tet naj jaxca tiꞌ:

—¿Tzet yuxan chi tac ja cꞌul yu jun tuꞌ? ¿Tumi man sreyaloj jaach Israel xin? Cꞌam tzet cha naꞌ yu jun tuꞌ. Aan waanoj, catuꞌ chach lowi. Jain oj wiꞌecꞌ jun txꞌotxꞌ tuꞌ tet naj Nabot tuꞌ catuꞌ oj wakꞌon txꞌotxꞌ ey jaach, ẍi ix tet naj.

8 Jix lawi tuꞌ, jix swaꞌnen jun an carta ix yin sbꞌi naj rey Ahab, catuꞌ jix ale oc sello naj rey tuꞌ yin an carta tuꞌ yu ix. Jix yaontoj ix tet ebꞌ icham winaj yeoc yul conobꞌ bꞌey caan naj Nabot tuꞌ. 9 Jix yalontoj ix tet ebꞌ yul an carta tuꞌ jaxca tiꞌ: Alwej tol chi oc junoj yambꞌabꞌail yu ebꞌ ánima, catuꞌ che chotbꞌan ey naj Nabot sattaj ebꞌ ánima tuꞌ. 10 Catuꞌ che chotbꞌan ey naj sattaj cawanoj ebꞌ winaj pena snaꞌbꞌal chi oc yin lekꞌtiꞌ testigoal yin. Chi yalon ebꞌ tol pena tzet jix yal naj Nabot tuꞌ yin Dios cꞌal yin naj rey. Chi lawi tuꞌ xin, catuꞌ che yiꞌon eltoj naj Nabot tuꞌ bꞌey stiꞌel conobꞌ, catuꞌ chi kꞌojchꞌennele camoj, ẍi toj ix yin an carta tuꞌ.

11 Masanil ebꞌ yet conobꞌ naj Nabot cꞌal ebꞌ icham winaj yeoc yul conobꞌ tuꞌ, jix sjije ebꞌ jaxca jix yun yalontoj ix Jezabel yin an carta tuꞌ. 12 Jix yalon el ebꞌ xol masanil ánima tol chi yijle nocha sbꞌa ebꞌ, jix chejle ey chotan naj Nabot sattaj ebꞌ ánima. 13 Jaꞌ yet jun txolan tuꞌ, jix apni oc cawan ebꞌ lekꞌtiꞌ testigo jix yalon ebꞌ sattaj masanil ánima jaxca tiꞌ: Jaꞌ naj Nabot tiꞌ, caw chi bꞌuchwa naj yin Dios cꞌal yin naj rey. Jix lawi tuꞌ jix iꞌle eltoj naj stiꞌel conobꞌ yu ebꞌ, catuꞌ jix kꞌojchꞌennele cam naj yu ebꞌ. 14 Eyman jix yatoj kꞌane ebꞌ tet ix Jezabel tol jix cam naj Nabot.

15 Jix cꞌal yabꞌoc ix Jezabel tuꞌ, catuꞌ jix yalon ix tet naj rey Ahab jaxca tiꞌ:

—Jaꞌ tinaniꞌ oc ojabꞌ can txꞌotxꞌ xꞌotxꞌ naj Nabot a Jezreel ja wetoj, jaꞌton txꞌotxꞌ ma yoche naj jix xonel ey jaach, tuxa jix cam naj tinaniꞌ, ẍi ix tet naj.

16 Jaꞌ yet jix yabꞌen naj Ahab tol jix cam naj Nabot tuꞌ, jix bꞌet swaꞌnen xacꞌal oc sbꞌa sat txꞌotxꞌ txꞌotxꞌ tuꞌ. 17 Jix lawi tuꞌ xin, jix yalon Jehová tet naj Elías a conobꞌ Tisbé jaxca tiꞌ: 18 Asiꞌ scꞌatan naj Ahab, sreyal conobꞌ Samaria. Jatuꞌ ey naj bꞌey Jezreel bꞌey xꞌotxꞌ naj Nabot tinaniꞌ, jun txꞌotxꞌ txꞌotxꞌ jix yiꞌecꞌ naj. 19 Catuꞌ cha walon tet naj jaxca tiꞌ: Jaꞌ Jehová jix jin chejontej yet chi jul walon ey jaach, yutol jix ja makꞌ cam naj Nabot, catuꞌ jix ja wiꞌon can ecꞌ tzetyetal ey tet naj. Yu cꞌal jun tuꞌ, jaꞌ bꞌey jix lecꞌle a ẍiqꞌuil naj Nabot tuꞌ yu noꞌ txꞌiꞌ, jaꞌ tituꞌ oj lecꞌle cꞌal pax ja chiqꞌuil yu noꞌ, ẍi Jehová, ja chi tet naj.

20 Jaꞌ yet jix apni oc naj Elías, jix yalon naj Ahab jaxca tiꞌ:

—Jaach jin cajat Elías, lalan ja jul pax jin cꞌatan junelxa.

Jix takꞌwi naj Elías jaxca tiꞌ:

—Jaaꞌ, yel toni, tuxa jix jaach chaꞌlo wu an, yutol jix ja wakꞌ xacꞌal ja wip ja wunen tzetyetal tol man watxꞌoj sattaj Jehová. 21 Yu jun tuꞌ, yuxan jix yal Jehová jaxca tiꞌ: Oj wiꞌtej cuscꞌulal ja wibꞌan, catuꞌ oj wakꞌon qꞌueyel masanil ebꞌ winaj xol ebꞌ ja wicꞌaal, ebꞌ winaj tol caw bꞌinabꞌil, cꞌal ebꞌ yakꞌomal servil yeoc xol conobꞌ Israel tiꞌ. 22 Jaxca wal jix yun jin qꞌueyon can el ebꞌ yicꞌaal naj Jeroboam scꞌaal Nabat cꞌal yicꞌaal naj Baasá scꞌaal Ahías, queytuꞌ oj wute ebꞌ ja wicꞌaal, yutol jix ja txꞌemtej sjowal jin cꞌul, yutol jix ja wijbꞌatoj ebꞌ conobꞌ Israel tiꞌ yin yaon oc spenail ebꞌ jin sattaj, ẍi Jehová. 23 Jacꞌalaꞌ queytuꞌ jix yun yalon pax Jehová yin ix Jezabel jaxca tiꞌ: Tol oj chiꞌletoj ẍiꞌbꞌeal ix bꞌey yul conobꞌ Jezreel yu noꞌ txꞌiꞌ, ẍi Jehová. 24 Jaꞌ jantaj ebꞌ ja wicꞌaal, oj cam ebꞌ bꞌey yul junoj conobꞌ, oj chiꞌletoj smimanil ebꞌ yu noꞌ txꞌiꞌ. Jaxa mactxequel ebꞌ oj cam bꞌey yinlaj conobꞌ xin, jaꞌ noꞌ miij oj chiꞌontoj smimanil ebꞌ, ẍi naj Elías.

25 (Caw yel cꞌam junojxa rey jix ecꞌbꞌan xacꞌaltoj yunen spenail sattaj Jehová jaxca jix yute sbꞌa naj rey Ahab tuꞌ, yutol jaꞌ ix Jezabel, ix yistil naj, jaꞌ ix jix ijbꞌan xacꞌaltoj naj yin spenail. 26 Caw wal yaabꞌetaj jix yute sbꞌa naj, tol jix oc naj yin eyilal tet wan comon dios jaxca jix yute sbꞌa ebꞌ Amorreo, wan ebꞌ jix iꞌle el sattaj conobꞌ Israel yu Jehová.)

27 Jaꞌ yet jix yabꞌen naj Ahab tzet jix yal naj Elías tuꞌ, jix stzilontoj snukꞌ spichil. Jix yaon oc jun tujan an eel pichile jaxca coẍtal. Jix yijle nocha sbꞌa, catuꞌ jix wey yetoj spichil tuꞌ. Caw cuscꞌulal ye yet chi eqꞌui. 28 Yu jun tuꞌ, yuxan jix yal Jehová tet naj Elías jaxca tiꞌ: 29 ¿Jix mi ja wil yoc naj Ahab yin eyilal jin sattaj? Yu cꞌal tol jix oc naj yin eyilal jin sattaj, yuxan man oj watoj junoj uchlebꞌail tuꞌ yibꞌan ebꞌ yicꞌaal yet iquisto ecꞌ naj. Jato yet eyoc junoj scꞌaal naj yin reyal, catuꞌ oj waontoj syaꞌilal yibꞌan ebꞌ yicꞌaal tuꞌ, ẍi Jehová tet naj Elías.