3 Jaꞌ yet jun cꞌual tuꞌ, ey jun txꞌoxbꞌanile jix xꞌox jun ẍejabꞌ Dios tuꞌ. Jix yalon jaxca tiꞌ: Jaꞌton jun txꞌoxbꞌanile tiꞌ chi yal Jehová: Tol jaꞌ jun yet xaambꞌal tiꞌ oj poꞌotoj, jaxa masanil jantaj stikꞌakꞌil taan ey yibꞌan, oj pujcan eyoj, ẍi Jehová, ẍi naj.

4 Jaꞌ yet jix yabꞌen naj rey Jeroboam masanil tzet jix yal jun ẍejabꞌ Dios yin jun yet xaambꞌal tuꞌ, jata cꞌal bꞌey jun yet xaambꞌal tuꞌ jix yatej skꞌabꞌ yin jun ẍejabꞌ Dios tuꞌ, jix yalon jaxca tiꞌ: Mitxꞌwej ey jun winaj tiꞌ, catuꞌ che yiꞌontoj naj preso. Jaꞌ jun skꞌabꞌ jix yatoj yin jun ẍejabꞌ Dios tuꞌ, tuxa cꞌal jix caw loqueloj, ma xacꞌal skeꞌ yiꞌon meltzo jun skꞌabꞌ tuꞌ. 5 Jaꞌ yet jun txolan tuꞌ jix poꞌo xacꞌal cantoj jun yet xaambꞌal tuꞌ, jaxa jantaj chꞌen taan eey yibꞌan jix pujcan ey chꞌen. Jix eloc jaxca wal jix yun yalon jun ẍejabꞌ Dios tuꞌ. 6 Jix lawi tuꞌ, jix yalon naj rey tet jun ẍejabꞌ Dios tuꞌ jaxca tiꞌ:

—Chin kꞌan ey jaach tol chach txali tet Jehová ja Diosal wu, yet watxꞌ chi waꞌxi can jin kꞌabꞌ tiꞌ, ẍi naj.

Jix txali naj ẍejabꞌ Jehová tuꞌ, yet cꞌal jun txolan tuꞌ jix waꞌxi pax can skꞌabꞌ naj rey tuꞌ junelxa, jaxca cꞌaltaꞌ yeocoj.

7 Jix lawi tuꞌ, jix yalon jun rey tuꞌ tet jun ẍejabꞌ Dios tuꞌ jaxca tiꞌ:

—Toon wetoj bꞌey jin na, oj jaach wakꞌ lowoj, yajbꞌan chin waꞌne junoj jin saꞌbꞌeal oj wakꞌ ey jaach, ẍi naj.

8 Catuꞌ jix takꞌwi jun ẍejabꞌ Dios tuꞌ tet naj rey jaxca tiꞌ:

—Caxcꞌal mi cha wakꞌ nanoj tzetyetal ey yul ja kꞌabꞌ tuꞌ ey jin, ma cꞌal jin too ja wetoj, tam wal jin loꞌon ixim pan, tam wal wuqꞌuen jaꞌ, ẍi naj. 9 Yutol jaxca tuꞌ jix yun yalon Jehová ey jin jaxca tiꞌ: Cꞌam cꞌal pan oj ja loꞌ tituꞌ, tam wal ja wuqꞌuen jaꞌ, tam wal chach meltzo yul ja bꞌe junelxa, ẍi ey jin an, ẍi naj ẍejabꞌ Dios tuꞌ.

10 Txꞌojxa junxa bꞌe bꞌey jix meltzo jun ẍejabꞌ Dios tuꞌ, manxa jaꞌ oj yul jun bꞌe jix yiꞌ yet jix apni oc bꞌey conobꞌ Betel.

11 Jaꞌ yet jun tiempoal tuꞌ ey jun ẍejabꞌ Dios caw icham winajxa, caan bꞌey conobꞌ Betel. Jaꞌ ebꞌ scꞌaal jix alon tet yu tzetyetal jix yun jun ẍejabꞌ Dios bꞌey Betel yet jun cꞌual tuꞌ, jaꞌton jun jix tit bꞌey Judá. Jix yalon cꞌal pax ebꞌ tet smam yu tzetyetal jix yal naj tet naj rey. 12 Jix skꞌanlen el smam ebꞌ tuꞌ tet jaxca tiꞌ:

—¿Tzet bꞌeal bꞌey jix kakꞌ stooc naj jix je yilaꞌ? ẍi naj icham winaj tuꞌ.

Jix yalon ebꞌ scꞌaal tuꞌ tet tzet bꞌeal bꞌey jix kakꞌ stoocoj. 13 Jix yalon tet ebꞌ scꞌaal tuꞌ jaxca tiꞌ:

—Awej oc stzꞌuum noꞌ jin bꞌuru, ẍi naj tet ebꞌ scꞌaal tuꞌ.

Jix lawi yale oc stzꞌuum noꞌ che tuꞌ yu ebꞌ, catuꞌ jix oc naj ẍejabꞌ Dios tuꞌ yibꞌan che, 14 jix too tzajan naj yintaj jun ẍejabꞌ Dios a Judá tuꞌ. Jix apni oc yintaj, chotan ey naj yich jun teꞌ jii. Jix skꞌanlen tet jaxca tiꞌ:

—¿Jaach mi tiꞌ ẍejabꞌ jaach Dios jix tit bꞌey Judá? ẍi naj tet.

—Jain toni, ẍi naj.

15 —Toon wetoj bꞌey jin na an xin, yet watxꞌ oj jaach lowoj, ẍi naj icham winaj tet naj ẍejabꞌ Dios tuꞌ.

16 Catuꞌ jix takꞌwi jun ẍejabꞌ Dios jix tit bꞌey Judá tuꞌ, jix yaloni:

—Cꞌam chi skeꞌ jin too ja wetoj, tam wal jin lowi, cꞌal wuqꞌuen jaꞌ ja wetoj, 17 yutol jaꞌ Jehová jix alon ey jin jaxca tiꞌ: Man oj jaach lowoj tam wal ja wuqꞌuen jaꞌ tituꞌ, tam wal oj jaach meltzo bꞌey yul bꞌe bꞌey jix jaach tita, ẍi ey jin, ẍi naj.

18 Caw jix oc cꞌal tean naj icham winaj tuꞌ yin naj, jix yalon jaxca tiꞌ:

—Jain tiꞌ ẍejabꞌ jin pax Dios jaxca jaach tiꞌ. Jaꞌ jun ángel yet Jehová jix alon ey jin tol chach wiꞌtoj lowoj cꞌal ja wuqꞌuen jaꞌ bꞌey jin na, ẍi naj tet.

Jaꞌ naj icham winaj tuꞌ, lekꞌtiꞌal cꞌal kꞌane jun chi yal naj tuꞌ, man yeloj. 19 Queytuꞌ jix yun stoo jun ẍejabꞌ Dios a Judá tuꞌ yetoj bꞌey sna, jix lowi cꞌal yuqꞌuen jaꞌ. 20 Chotan wal oc ebꞌ low yin meẍa, catuꞌ jix kꞌanabꞌ Jehová tet jun icham winaj tuꞌ, naj jix bꞌet iꞌon meltzotej jun ẍejabꞌ Dios a Judá tuꞌ yul bꞌe, 21 caw wal ip jix yun yalon naj icham winaj tuꞌ tet jaxca tiꞌ:

—Jix yal Jehová tol yu cꞌal ma ja jije tzet jix yal ey jaach, 22 yutol jix jaach meltzotej lowoj cꞌal ja wuqꞌuen jaꞌ bꞌey jix yal Dios tol cꞌam cha wunne, yuxan manaj bꞌey mujan ebꞌ ja wichmam, oj mujle ja mimanil.

23 Jaꞌ yet jix lawi slowi cꞌal yuqꞌuen jaꞌ jun ẍejabꞌ Dios jix tit bꞌey Judá tuꞌ, jaxa naj icham winaj ẍejabꞌ Dios tuꞌ xin, jix yaoc stzꞌuum jun noꞌ sbꞌuru. 24 Catuꞌ jix too jun ẍejabꞌ Dios jix tit bꞌey Judá tuꞌ, jaxa yul-laj bꞌe jix eltej jun noꞌ león yin naj, jix makꞌle cam naj yu noꞌ. Jaꞌ tituꞌ jix cancan telan smimanil, jaxa noꞌ sbꞌuru naj tuꞌ xin, yetoj noꞌ león tuꞌ jix cancan noꞌ bꞌey scꞌatan jun mimanile tuꞌ. 25 Jaxa yet tuꞌ jix ecꞌtoj wan ebꞌ winaj tituꞌ, jix yilon ebꞌ tol telan ey jun mimanile bꞌey yul bꞌe tuꞌ, jaxa noꞌ león tuꞌ eyecꞌ noꞌ scꞌatan. Jaꞌ yet jix apni oc ebꞌ bꞌey conobꞌ bꞌey caan naj icham winaj tuꞌ, jix yalon ebꞌ tzetyetal jix yil ebꞌ yul bꞌe tuꞌ. 26 Jaꞌ yet jix yabꞌen naj ẍejabꞌ Dios tuꞌ, naj jix bꞌet iꞌon meltzo bꞌey yul bꞌe tuꞌ, jix yalon jaxca tiꞌ: Jaꞌton wal jun ẍejabꞌ Dios tuꞌ ma sjije tzet jix yal Jehová, yu jun tuꞌ yuxan, jix ale oc naj yul skꞌabꞌ jun noꞌ león, jix tzil-le cantoj naj yu noꞌ. Queyton wal tiꞌ chi yun yeloc tzet jix yal can Dios tet naj, ẍi naj icham winaj tuꞌ.

27 Jix lawi tuꞌ xin, jix yalon tet ebꞌ scꞌaal tol chi oc stzꞌuum junoj noꞌ bꞌuru, jix sjijen ebꞌ tzet jix yalaꞌ. 28 Catuꞌ jix too naj icham winaj ẍejabꞌ Dios tuꞌ, jix apni oc naj bꞌey telan ey jun mimanile yul bꞌe tuꞌ. Jaꞌ scꞌatan tuꞌ, jatuꞌ eyecꞌ noꞌ bꞌuru cꞌal noꞌ león tuꞌ. Jaꞌ noꞌ león tuꞌ cꞌam tocꞌal niꞌoj jun mimanile tuꞌ chi ẍiꞌeytoj noꞌ, tam wal jix kocꞌtzilneletoj noꞌ bꞌuru tuꞌ yu noꞌ. 29 Jix lawi tuꞌ xin, jix iꞌle a smimanil jun ẍejabꞌ Dios jix tit bꞌey Judá tuꞌ yu naj icham winaj ẍejabꞌ Dios tuꞌ, jix yaon atoj yibꞌan noꞌ bꞌuru tuꞌ, catuꞌ jix meltzotej bꞌey sconobꞌ tuꞌ, yet chi oc yin cuscꞌulal yu, cꞌal smujon jun mimanile tuꞌ. 30 Jaꞌ tituꞌ jix smujeytoj bꞌey yul jun smujbꞌanil camom watxꞌ xa ye yu, jix okꞌ wal naj sicꞌlebꞌil yu, chi yalon jaxca tiꞌ: ¡Ay, jaach wuẍtaj, caw okꞌbꞌalcꞌule jix yun ja cami! ẍi naj.

31 Jaꞌ yet tuxa chi lawi smujon can eytoj, jix yalon tet ebꞌ scꞌaal jaxca tiꞌ:

—Jaꞌ yet oj jin camoj, jaꞌ titiꞌ oj jin je mujeytoj bꞌey jix mujle smimanil jun ẍejabꞌ Dios tiꞌ, junne oj je yakꞌ jin mimanil yetoj yet jun tiꞌ, 32 yutol sowalil oj eloc jaxca tzet jix yun yalon can Jehová yin jun yet xaambꞌal bꞌey Betel tiꞌ, yetoj cꞌal yin wan wonan bꞌey yul yet Samaria bꞌey chi oc ebꞌ ánima yin eyilal, ẍi naj.

33 Caxcꞌal mi jix yun jaxca tuꞌ, ma cꞌaltaꞌ sbꞌejcan wan pena bꞌeybꞌale naj rey Jeroboam tuꞌ. Jaꞌ jun jix yunne tol jaꞌ ebꞌ comon ánima jix yaoc naj yin yakꞌomaloj xaambꞌal bꞌey wan wonan bꞌey chi oc ebꞌ ánima yin eyilal. Yal cꞌal mactxequel chi yoche chi oc yin yakꞌomaloj xaambꞌal chi cꞌal yaoc naj. 34 Queyton tuꞌ jix yun yoc cꞌal spenail naj Jeroboam yetoj masanil ebꞌ yicꞌaal, jaꞌ yu jaxca tuꞌ, yuxan jix qꞌueyle el masanil ebꞌ.