4 —Jaꞌ naj ja mam caw ecꞌal tujan mulnail jix cu waꞌne yu naj jon. Yuxan chi koche tol cha wiꞌel niꞌoj wan mulnail eyoc kibꞌan tiꞌ jon, ta jaxca tuꞌ oj ja wute, oj jaach kꞌakꞌ servil, ẍi ebꞌ ánima tuꞌ tet naj.

5 Jix takꞌwi naj Roboam jaxca tiꞌ:

—Jaꞌ tinaniꞌ paxanwejtoj, caabꞌeto chex jul jin cꞌatan, ẍi naj tet ebꞌ.

Catuꞌ jix paxtoj ebꞌ ánima tuꞌ. 6 Jix lawi tuꞌ, jix skꞌanlen snaꞌbꞌal naj rey Roboam tet ebꞌ icham winaj yeoc yul conobꞌ jix mulna yetoj camom smam, jaꞌton Salomón, jix skꞌanlen tet ebꞌ jaxca tiꞌ:

—¿Tzet wal junoj naꞌbꞌale che yakꞌ ey jin, yet oj jin spajtzen skꞌane ebꞌ ánima tuꞌ? ẍi naj tet ebꞌ. 7 Jix takꞌwi ebꞌ jaxca tiꞌ:

—Ta tol chi yoche ja cꞌul cha wijbꞌa jun conobꞌ tiꞌ, watxꞌ cha wute kꞌanabꞌ ja bꞌa tet ebꞌ, yet watxꞌ oj sjije ebꞌ ey jaach, ẍi ebꞌ tet naj.

8 Caw ma ẍaꞌ naj yabꞌ tzet jix yal ebꞌ icham winaj yeoc yul conobꞌ tuꞌ, jaxa tet ebꞌ achꞌe winaj yaman jix yun ẍꞌibꞌ yetoj. Jaꞌ tet ebꞌ jix skꞌanle snaꞌbꞌal naj, jix kꞌanabꞌ naj yetoj ebꞌ. 9 Jix yalon tet ebꞌ jaxca tiꞌ:

—¿Tzet junoj naꞌbꞌale chi skeꞌ je yakꞌon ey jin, yu tzet oj yun jin spajtzen skꞌane ebꞌ ánima tuꞌ? Chi yoche ebꞌ tol chi wiꞌel niꞌoj mulnail ey can oc yibꞌan ebꞌ yu naj jin mam, ẍi naj tet ebꞌ.

10 Jix takꞌwi ebꞌ naj achꞌe tuꞌ jaxca tiꞌ tet naj:

—Jaꞌ chi yun ja spajtzen tet ebꞌ jix alon tol chi el niꞌoj mulnail ey can oc yibꞌan ebꞌ yu naj ja mam tuꞌ, al tet ebꞌ jaxca tiꞌ: Ta caw yaꞌtaj mulnail bꞌey ey jex can oc yu naj jin mam tuꞌ, jaxa jin jain tiꞌ yel xacꞌal oj ecꞌbꞌantoj mulnail oj waoc je yibꞌan. 11 Ta al jix yute je yijatz naj jin mam tuꞌ, jain tiꞌ ecꞌbꞌantoj yalil oj wute je yijatz. Ta asan tzꞌuum jix skꞌan jin mam tuꞌ yet jix yakꞌon je yijaꞌ, jain tiꞌ oj waoc chꞌen chꞌen yin xaam noꞌ tzꞌuum, catuꞌ oj wakꞌon je yijaꞌ, ja chi tet ebꞌ, ẍi ebꞌ achꞌe tuꞌ tet naj. 12 Jaꞌ yet jix tzꞌajna oxebꞌ cꞌual tuꞌ, catuꞌ jix apni oc naj Jeroboam yetoj masanil ebꞌ conobꞌ Israel scꞌatan naj Roboam, jaxca jix yun yalon can ebꞌ. 13 Caw yel xacꞌal pena spajtzebꞌal jix yakꞌa, yutol ma ẍaꞌ yabꞌ tzet jix yal ebꞌ icham winaj tuꞌ. 14 Jaꞌ tzet jix yal ebꞌ naj achꞌe tuꞌ, jaꞌ jix yal naj tet ebꞌ jaxca tiꞌ: Ta miman syaꞌilal jix yaoc naj jin mam je yibꞌan, caw yel xacꞌal miman syaꞌtajil oj waoc yintaj yet naj jin mam tuꞌ. Ta asan tzꞌuum jix skꞌan naj jin mam yet jix yakꞌon je yijaꞌ, jaxa jin jain tiꞌ oj waoc chꞌen chꞌen yin xaam noꞌ tzꞌuum tuꞌ, catuꞌ oj wakꞌon je yijaꞌ, ẍi naj tet ebꞌ ánima tuꞌ. 15 Ma ẍaꞌ yabꞌ naj rey tzet jix yal ebꞌ conobꞌ Israel, yutol jaxca tuꞌ naꞌbꞌil yu Jehová yunen el tzet jix yal naj Ahías a Siló, naj ẍejabꞌ Dios, yet jix yalon tet Jeroboam scꞌaal Nabat. 16 Jaꞌ yet jix yilon ebꞌ Israel tol cꞌam chi ẍaꞌ yabꞌ tzet chi yal ebꞌ, jix yalon ebꞌ jaxca tiꞌ:

Queytuꞌ jix yun spaxtoj ebꞌ Israel bꞌey sna. 17 Jix to yakꞌ yaawil naj Roboam tuꞌ xol ebꞌ Israel ey bꞌey yul yet Judá. 18 Jix yaontoj jun ẍejabꞌ naj Roboam tuꞌ jaꞌton naj Adoram, yet chi too kꞌanabꞌ yetoj ebꞌ Israel, yutol eyoc yopiso naj yijbꞌan ebꞌ mulnawom; jix oc bꞌulna ebꞌ Israel yin naj, catuꞌ jix kꞌojchꞌennele cam naj yu ebꞌ. Jaxa yet jix yabꞌen naj Roboam jun tuꞌ, catuꞌ jix oc naj yul scarruaje, jix el lemna bꞌey conobꞌ Jerusalén. 19 Queyton tuꞌ jix yun yiꞌon el sbꞌa ebꞌ Israel yul skꞌabꞌ ebꞌ yicꞌaal David; jaxca tuꞌ yeoc tinaniꞌ.

20 Jaꞌ yet jix yabꞌen oc ebꞌ Israel tol eyxa ecꞌ naj Jeroboam yul conobꞌ tuꞌ, jix awtele yu ebꞌ conobꞌ Israel, catuꞌ jix ale oc sreyaloj conobꞌ tuꞌ yu ebꞌ; cꞌamxa junoj icꞌaale jix toocan yetoj ebꞌ yicꞌaal David, asanxane Judá jix can yetoj.

21 Jix cꞌal apni oc naj Roboam bꞌey Jerusalén, catuꞌ jix syambꞌan oc 180,000 ebꞌ soldado caw wal jelan yin akꞌo jowal xol ebꞌ yicꞌaal Judá cꞌal xol ebꞌ yet Benjamín, yu yakꞌon jowal ebꞌ yetoj ebꞌ Israel, catuꞌ chi meltzotej ebꞌ yalan yopiso junelxa yaloni.

22 Jix yalon Jehová tet jun ẍejabꞌ chi yij Semaías jaxca tiꞌ: 23 Al tet naj Roboam scꞌaal Salomón, sreyal Judá, cꞌal tet masanil ebꞌ yicꞌaal Judá, cꞌal tet ebꞌ yicꞌaal Benjamín, yetoj cꞌal tet masanil wanxa ebꞌ eyecꞌ tituꞌ: 24 Jaꞌ Jehová chi alon jaxca tiꞌ: Manche je yakꞌ jowal yetoj ebꞌ je yet conobꞌ Israel tiꞌ, yutol jain jix el yin jin cꞌul tol queytuꞌ chi yun ebꞌ, paxanwejtoj bꞌey je na, ẍi Jehová, ja chi tet ebꞌ.

Jaꞌ yet jix yabꞌen ebꞌ, catuꞌ jix meltzo ebꞌ jaxca jix yun yalon Jehová.

25 Jaꞌ naj Jeroboam jix scaꞌ waꞌne a conobꞌ Siquem bꞌey txꞌotxꞌ tzalquiltaj txꞌotxꞌ yul yet Efraín, jaꞌ tituꞌ jix caey ecꞌoj, jix scaꞌ waꞌne a conobꞌ Penuel. 26 Eyman jix snaꞌ Jeroboam jaxca tiꞌ: Jaꞌ tinaniꞌ tejan oj meltzotoj ebꞌ ánima tiꞌ yetoj ebꞌ yicꞌaal David. 27 Ta tol chi too ebꞌ ánima tiꞌ yakꞌ xaambꞌal bꞌey stemplo Jehová bꞌey Jerusalén, tejan oj yaoc snaꞌbꞌal ebꞌ yin naj Roboam sreyal Judá, jaxa mi jin smakꞌon cam ebꞌ tuꞌ bꞌian, catuꞌ chi oc can naj Roboam yin reyal yu ebꞌ, ẍi naj Jeroboam.

28 Jix lawi skꞌanabꞌ yetoj ebꞌ eyoc yetoj tuꞌ, catuꞌ jix yakꞌon waꞌxoj caabꞌ yechel achꞌe wacax oro cꞌal eloj, jix yalon tet masanil ebꞌ conobꞌ jaxca tiꞌ: Jex wet conobꞌ Israel, cꞌamxa chex too bꞌey Jerusalén. Yutol caw yaꞌtaj je toi, jaꞌ tinaniꞌ ti ey jun cu diosal jix cu iꞌon eltej bꞌey Egipto, ẍi naj tet ebꞌ conobꞌ tuꞌ. 29 Jix lawi tuꞌ, catuꞌ jix can jun yechel wacax tuꞌ bꞌey Betel yetoj junxa bꞌey Dan. 30 Jaꞌ yu jun tuꞌ, yuxan jix oc spenail ebꞌ ánima tuꞌ, yutol jix too tacꞌal ebꞌ bꞌey conobꞌ Dan yu yoc ebꞌ yin eyilal tet wan echele tuꞌ. 31 Jix swaꞌne a snail sdiosal naj Jeroboam tuꞌ bꞌey jun tzalan, catuꞌ jix ale oc wan ebꞌ comon ánima yu naj yin yakꞌomaloj xaambꞌal, tol man yicꞌaal Levita ebꞌ. 32 Jix lawi tuꞌ, jix yaon oc jun kꞌin yet 15 yoc yet swaxajebꞌ xꞌaaw yet junjun abꞌil, jaxca chi yun yoc kꞌin bꞌey Judá. Jix yakꞌon xaambꞌal bꞌey jun yet xaambꞌal bꞌey Betel, bꞌey wan yechel wacax jix swaꞌne tuꞌ. Jacꞌalaꞌ bꞌey Betel tuꞌ jix ale cꞌal pax oc ebꞌ yakꞌomal xaambꞌal tuꞌ yu naj, yet chi teynenele snail sdiosal jix swaꞌne bꞌey txꞌotxꞌ tzalquiltaj txꞌotxꞌ tuꞌ. 33 Jix yaon oc jun kꞌin yet 15 yoc yet swaxajebꞌ xꞌaaw tuꞌ, jix yakꞌon xaambꞌal bꞌey jun yet xaambꞌal jix swaꞌne bꞌey conobꞌ Betel. Jix yaoc jun kꞌin jaxca wal chi yoche scꞌul; jix yaloni tol jaꞌton skꞌin ebꞌ Israel tuꞌ; jaꞌ yet jun cꞌual tuꞌ jix yakꞌ tzꞌaꞌ incienso sukꞌukꞌi sabꞌ sattaj jun yet xaambꞌal tuꞌ.