Jix Poꞌochatoj Nación Israel
10
Jix too naj Roboam bꞌey conobꞌ Siquem, yutol jaꞌ tituꞌ jix syambꞌa oc sbꞌa masanil ebꞌ yicꞌaal Israel yet chi ale oc naj Roboam yin reyal yu ebꞌ. 2 Jix apni oc skꞌaneal jun tuꞌ tet naj Jeroboam scꞌaal Nabat yet eyecꞌ naj bꞌey txꞌotxꞌ Egipto, yutol jix ela naj tet naj rey Salomón yet yalantoj. 3 Jix awteletej naj Jeroboam tuꞌ yu ebꞌ yet Israelal. Jaꞌ yet jix jul naj, jix kꞌanabꞌ masanil ebꞌ yet Israelal yetoj naj Roboam tuꞌ. Jix yalon ebꞌ tet naj jaxca tiꞌ:4 —Jaꞌ naj ja mam caw ecꞌal tujan mulnail jix cu waꞌne yu naj. Yuxan chi koche tol cha wiꞌel niꞌoj wan mulnail ey can oc kibꞌan tiꞌ jon, ta jaxca tuꞌ oj ja wute, oj jaach kꞌakꞌ servil, ẍi ebꞌ ánima tuꞌ tet naj.
5 Jix takꞌwi naj Roboam tet ebꞌ jaxca tiꞌ:
—Jaꞌ tinaniꞌ paxanwejtoj, yet to caabꞌe chex jul jin cꞌatan, ẍi naj tet ebꞌ.
Catuꞌ jix paxtoj ebꞌ ánima tuꞌ. 6 Jix lawi tuꞌ, jix skꞌanlen snaꞌbꞌal naj rey Roboam tet ebꞌ icham winaj yeoc yul conobꞌ jix mulna yetoj camom smam, jaꞌton Salomón, jix skꞌanlen naj tet ebꞌ jaxca tiꞌ:
—¿Tzet junoj naꞌbꞌale che yakꞌ ey jin, yet oj jin spajtzen skꞌane ebꞌ ánima tuꞌ? ẍi naj tet ebꞌ. 7 Jix takꞌwi ebꞌ jaxca tiꞌ:
—Ta tol chi yoche ja cꞌul cha wijbꞌa jun conobꞌ tiꞌ, watxꞌ cha wute kꞌanabꞌ ja bꞌa tet ebꞌ, yet watxꞌ oj jaach yakꞌ servil ebꞌ yin junelne, ẍi ebꞌ tet naj.
8 Ma ẍaꞌ yabꞌ naj tzet jix yal ebꞌ icham winaj yeoc yul conobꞌ tuꞌ, jaxa tet ebꞌ yet achꞌeal yaman jix yun ẍꞌibꞌ yetoj, jaꞌ tet ebꞌ jix skꞌanle snaꞌbꞌal, jaꞌton ebꞌ eyoc yin yopiso yetoj. 9 Jix yalon tet ebꞌ jaxca tiꞌ:
—¿Tzet naꞌbꞌaleal chi skeꞌ je yakꞌon ey jin, yu tzet oj yun jin spajtzen skꞌane ebꞌ ánima tuꞌ? Chi yoche ebꞌ tol chi wiꞌel niꞌoj mulnail ey can oc yibꞌan ebꞌ yu naj jin mam, ẍi naj tet ebꞌ.
10 Jix takꞌwi ebꞌ achꞌe tuꞌ tet naj jaxca tiꞌ:
—Jaꞌ ebꞌ ánima chi alon tol cha wiꞌel niꞌoj mulnail ey can oc yibꞌan ebꞌ yu naj ja mam tuꞌ, al tet ebꞌ jaxca tiꞌ: Ta caw yaꞌtaj mulnail ey can oc je yibꞌan yu naj jin mam, jal jin jain tiꞌ yel xacꞌal oj ecꞌbꞌantoj sbꞌisil mulnail oj waoc je yibꞌan. 11 Ta al jix yute je yijatz naj jin mam tuꞌ, jain tiꞌ ecꞌbꞌantoj yalil oj wute yalil je yijatz. Ta asan tzꞌuum jix skꞌan naj jin mam yet jix yakꞌon je yijaꞌ, jal jin jain tiꞌ oj waoc chꞌen yin xaam noꞌ tzꞌuum, catuꞌ oj wakꞌon je yijaꞌ, ja chi tet ebꞌ, ẍi ebꞌ achꞌe tuꞌ tet naj. 12 Jaꞌ yet jix tzꞌajna oxebꞌ cꞌual tuꞌ, catuꞌ jix apni oc naj Jeroboam yetoj masanil ebꞌ conobꞌ Israel scꞌatan naj Roboam jaxca jix yun yalon can ebꞌ. 13 Caw yel xacꞌal pena spajtzebꞌal skꞌane jix yalaꞌ, yutol ma ẍaꞌ yabꞌ tzet jix yal ebꞌ icham winaj tuꞌ. 14 Jaꞌ tzet jix yal ebꞌ achꞌe, jaꞌ jix yal naj tet ebꞌ jaxca tiꞌ: Ta miman syaꞌtajil jix yaoc naj jin mam je yibꞌan, jaxa jin jain tiꞌ yel xacꞌal miman syaꞌtajil oj waoc je yibꞌan yintaj tzet jix yaoc naj jin mam tuꞌ. Ta asan tzꞌuum jix skꞌan naj jin mam yet jix yakꞌon je yijaꞌ, jal jin jain tiꞌ oj waoc chꞌen yin xaam noꞌ tzꞌuum, catuꞌ oj wakꞌon je yijaꞌ, ẍi naj tet ebꞌ ánima tuꞌ. 15 Ma ẍaꞌ yabꞌ naj rey tzet jix yal ebꞌ conobꞌ Israel, yutol jaxca tuꞌ naꞌbꞌil yu Jehová yunen el tzet yalnaj can naj Ahías a Siló, naj ẍejabꞌ Dios, yet jix yalon tet Jeroboam, scꞌaal Nabat. 16 Jaꞌ yet jix yilon ebꞌ Israel tol cꞌam chi ẍaꞌ yabꞌ tzet chi yal ebꞌ, jix yalon ebꞌ jaxca tiꞌ:
¡Cꞌam kalon ket yin yicꞌaal David naj yicꞌaal Jesé! ¡Paxojonwejtoj bꞌey cu na! ¡Yil xacꞌal sbꞌa naj Roboam tiꞌ tzet chi yunne! ẍi ebꞌ conobꞌ tuꞌ.
Queytuꞌ jix yun spaxtoj ebꞌ Israel bꞌey sna. 17 Jix yakꞌ cꞌal yaawil naj Roboam xol ebꞌ yet Israelal ey yul yet Judá. 18 Jix yaontoj jun ẍejabꞌ naj Roboam tuꞌ, jaꞌton naj Adoram, yet chi too kꞌanabꞌ yetoj ebꞌ Israel, yutol eyoc yopiso naj yijbꞌan ebꞌ mulnawom; jix oc bꞌulna ebꞌ Israel yin naj, catuꞌ jix kꞌojchꞌennele cam naj yu ebꞌ. Jaxa yet jix yabꞌen naj Roboam jun tuꞌ, catuꞌ jix oc naj yul scarruaje jix el lemna naj bꞌey conobꞌ Jerusalén. 19 Queyton tuꞌ jix yun yiꞌon el sbꞌa ebꞌ Israel yul skꞌabꞌ ebꞌ yicꞌaal David; masantaꞌcꞌal tinaniꞌ.