Naj Rey Salomón Cꞌal Ix Sreinail Conobꞌ Sabá
9
Jaꞌ ix sreinail conobꞌ Sabá, jix yabꞌ skꞌumal, tol jaꞌ naj rey Salomón yel xacꞌal bꞌinabꞌil naj yu sjelanil jix yakꞌ Jehová. Yuxan jix too ix bꞌey Jerusalén yu yakꞌon porobꞌal ix, ta chi skeꞌ spajtzen naj rey wan skꞌanlebꞌal ix yel xacꞌal yaꞌtaj snaꞌcha eloj. Ecꞌal ebꞌ yakꞌomal servil ix iꞌbꞌil oc yu, jix apni oc ix yetoj noꞌ camello, caw al ye noꞌ yetoj perfume; caw miman chꞌen oro, cꞌal wanxa chꞌen chꞌen watxꞌ yili iꞌbꞌil oc yu ix. Jaꞌ yet jix apni oc ix sattaj naj rey Salomón tuꞌ, jix skꞌanle ix jantaj tzet naꞌbꞌil yu. 2 Jix spajtze naj rey Salomón masanil skꞌanlebꞌal ix tuꞌ, cꞌam cꞌal junoj skꞌanlebꞌal ix tuꞌ tol ma naꞌcha spajtzen naj. 3 Jaꞌ yet jix yilon ix sreinail conobꞌ Sabá, jantaj sjelanil naj rey Salomón tuꞌ, tuxa cꞌal jix qꞌueycan a scꞌul ix. 4 Jix yilon oc ix, tol caw watxꞌ xacꞌal yili oc sna naj waꞌnebꞌil, cꞌal tzet chi sloꞌ naj bꞌey sat smeẍa, cꞌal sna ebꞌ yakꞌomal servil naj tol ey xacꞌal smey yili ocoj. Txꞌojxa yili cꞌal pax spichil ebꞌ yakꞌomal servil naj, cꞌal ebꞌ chi bꞌatxon eltej scopa naj, cꞌal wan xaambꞌal chi yakꞌ tzꞌaꞌ bꞌey stemplo Jehová, 5 yuxan jix yal ix tet naj rey jaxca tiꞌ: Jaꞌ tzetyetal jix wabꞌ bꞌey jin conobꞌ yu masanil tzetyetal jix ja waꞌne, cꞌal ja jelanil chi bꞌinai, caw man tucꞌal oj chi al-lei. 6 Jaꞌ yet cꞌamto chi wiloc yetoj jin sat, cꞌam chin chaꞌ wabꞌe, jaxa tinaniꞌ chi waoc yin jin cꞌul, yutol jain caw jix wiloc yetoj jin sat. Jaꞌ wan jix al-le ey jin tuꞌ ecꞌbꞌan nanto ma al-le wabꞌe. Jaꞌ ja jelanil yetoj cꞌal masanil tzetyetal ey, ey jaach, yel xacꞌal ecꞌbꞌan yintaj jaxca tzet jix wabꞌe. 7 Yel xacꞌal tzalacꞌulal yet ebꞌ ix ja wistil, yetoj ebꞌ chi mulna ja wetoj, yel xacꞌal tzalacꞌulal yet ebꞌ chach akꞌon servil yet chi yabꞌen oc ja jelanil ebꞌ. 8 Al-le ojabꞌ watxꞌ kꞌane yin Jehová ja Diosal, tol chi tzala ja wetoj yuxan jix jaach yaoc sreyaloj conobꞌ Israel tiꞌ. Yu ey cꞌaltaꞌ scamcꞌulal Jehová yin Israel, yuxan jix jaach yaoc yin reyal yet cha waꞌnen oc tzetyetal yin sjichanil, ẍi ix tet naj rey.9 Jix lawi tuꞌ xin, jix yakꞌon 87 quintal chꞌen oro ix tet naj Salomón, yetoj wan perfume, yetoj chꞌen chꞌen watxꞌ yili. Cꞌamto juneloj, catuꞌ cꞌamxa pax juneloj jix apni oc miman perfume bꞌey Israel jaxca jantaj tzet jix saꞌ ix sreinail conobꞌ Sabá, tet naj rey Salomón.
10 Txꞌoj pax ye wanxa jix tit yul sbarco naj rey Hiram, chꞌen oro jix yiꞌtej ebꞌ bꞌey conobꞌ Ofir, caw miman teꞌ sándalo jix tita, cꞌal chꞌen chꞌen txꞌojxa swatxꞌil yili. 11 Jaꞌ yetoj teꞌ sándalo tuꞌ jix swaꞌne sbarandail bꞌey yul stemplo Jehová, cꞌal yinlaj spalacio naj rey Salomón tuꞌ. Jix oc cꞌal pax teꞌ yin arpail cꞌal yin salterioal yet ebꞌ sonlom. Cꞌamxa juneloj jix akꞌle teꞌ sándalo tet ebꞌ Israel jaxca wan tuꞌ. 12 Jal pax naj rey Salomón xin, jix yakꞌ masanil tzet chi yoche scꞌul ix sreinail conobꞌ Sabá jix kꞌanaꞌ, txꞌoj pax tzetyetal jix el wal yin scꞌul naj saꞌon tet ix yu sqꞌuexeloj saꞌbꞌeal ix, jix yakꞌ tet naj. Jix lawi tuꞌ xin, jix meltzo ix bꞌey sconobꞌ yetoj ebꞌ yakꞌomal servil jaꞌjun yetoj.
Smimanbꞌilal Naj Rey Salomón Cꞌal Sbꞌeomal
13 Jaꞌ chꞌen oro chi ẍaꞌ naj rey Salomón yin junjun abꞌil, chi apni oc chꞌen yin 500 quintal. 14 Cꞌam pax stoolabꞌal ebꞌ txonwom cꞌal stoolabꞌal ebꞌ rey bꞌey Arabia cꞌal yetoj yet ebꞌ gobernador bꞌey yul yet Israel tuꞌ eyoc stzꞌajiloj. 15 Jix yakꞌon waꞌnele jun 200 jenan chꞌen mimej majbꞌal sat julbꞌal naj rey Salomón tuꞌ, ey 15 libra chꞌen oro jix oc yin junjun. 16 Jix lawi tuꞌ, jix yakꞌon waꞌnele junxa 300 niẍtej majbꞌal sat julbꞌal, txenxa man canebꞌoj libra oro jix oc yin junjun. Jaꞌ yul jun miman na chi yij Kꞌajteꞌlaj yet Líbano, jaꞌ tituꞌ jix yaoctoj. 17 Jix yakꞌon cꞌal pax waꞌnele jun miman trono yetoj wan chꞌen chi yij marfil, jix oc oro yin, caw watxꞌ xacꞌal jix yun scawxi. 18-19 Jaꞌ jun trono tuꞌ, ey wajebꞌ txol yeoc sat skꞌoochal. Jix ale oc lacawebꞌ yechel noꞌ león yin, wajebꞌ yin jun pacꞌ jun kꞌooch tuꞌ, wajebꞌ bꞌey jun pacꞌxa. Xoyan yeoc skꞌelubꞌ yichin, ey skꞌabꞌ bꞌey junjun spacꞌul; jaꞌ bꞌey junjun spacꞌul tuꞌ eyoc junjun yechel noꞌ león yin. Cꞌam junojxa rey jix swaꞌne strono jaxca jun tuꞌ. 20 Jaꞌ masanil scopa naj rey tuꞌ, oro cꞌal eloj, yetoj cꞌal jantaj ẍalu cꞌal xi chi kꞌanle bꞌey jun miman na chi yij sbꞌi, Kꞌajteꞌlaj yet Líbano. Cꞌam junoj mitxꞌkꞌabꞌe tuꞌ tol plata eyoc yin, yutol jaꞌ yul stiempoal naj rey Salomón tuꞌ, jaꞌ chꞌen plata tuꞌ man mimanoj yeloc apnoj chꞌen yul sat ebꞌ ánima; 21 yutol ey wan mimej barco yet naj rey Salomón chi too bꞌey Tarsis yetoj ebꞌ smulnawom naj rey Hiram. Yin oxox abꞌil chi yun sjul ebꞌ bꞌey Israel, iꞌbꞌil oc oro, plata, marfil, noꞌ maax cꞌal noꞌ pavo real yu ebꞌ.
22 Queytuꞌ jix yun ya cꞌal can naj rey Salomón yintaj wanxa ebꞌ rey bꞌey yul yibꞌankꞌinal tiꞌ yu sjelanil cꞌal yu sbꞌeomal. 23 Masanil xacꞌal ánima bꞌey yul yibꞌankꞌinal tiꞌ, chi yoche ebꞌ chi yilaꞌ cꞌal yabꞌen sjelanil Dios jix yakꞌ tet naj rey tuꞌ. 24 Masanil ebꞌ ánima chi yiꞌtej saꞌbꞌeal yin junjun abꞌil tet naj; jaꞌton chꞌen plata, chꞌen oro, an pichile caw ey stool, chꞌen julbꞌal, cꞌal tzetyetal tol sukꞌukꞌi yoc sabꞌ, yetoj noꞌ caballo cꞌal noꞌ mula che.
Jix Manwi Carruaje Cꞌal Che Ebꞌ Xonwom Naj Salomón
25 Ey 4,000 spat noꞌ ẍe naj rey Salomón tuꞌ, yetoj 12,000 noꞌ che chi ijon ecꞌ ebꞌ soldado. Ey carruaje cꞌal noꞌ che eyecꞌ bꞌey wan conobꞌlaj tol yet cꞌaltaꞌ naj yeocoj. Ey cꞌal pax wanxa carruaje tuꞌ eyecꞌ yetoj ebꞌ soldado chi teynen naj rey bꞌey Jerusalén. 26 Jaꞌ naj rey Salomón tuꞌ jix yakꞌ yaawil yibꞌan wanxa ebꞌ rey chi too tacꞌal bꞌey jaꞌ miman Éufrates, masantaꞌcꞌal bꞌey yul sconobꞌal ebꞌ Filisteo, chi apni taꞌcꞌal bꞌey smoonal yet Egipto. 27 Jaꞌ bꞌey Jerusalén, jaꞌ chꞌen plata jaxca xacꞌal comon chꞌen yeoc chꞌen yu naj. Jaxa teꞌ kꞌuteꞌ laan xacꞌal jix yun teꞌ jaxca teꞌ yichlajil teꞌ higo chi chꞌibꞌ bꞌey yichlaj wonan bꞌey txꞌotxꞌ Judá. 28 Jaꞌ noꞌ ẍe naj rey Salomón tuꞌ, jatuꞌ jix manletej noꞌ bꞌey Egipto, cꞌal bꞌey wanxa nacionlaj.
Scamichal Naj Rey Salomón
29 Jaꞌ yet yichbꞌanil cꞌal yet slawubꞌal skꞌaneal naj rey Salomón tiꞌ, jatuꞌ tzꞌibꞌebꞌilcan yul an yuunal yet naj Natán, naj ẍejabꞌ Dios, cꞌal yul yet skꞌaneal Ahías ẍejabꞌ Dios a Siló, cꞌal bꞌey tzꞌibꞌebꞌilcan ey skꞌaneal naj ẍejabꞌ Dios chi yij Iddo yin Jeroboam scꞌaal Nabat. 30 Ey 40 abꞌil jix yakꞌ reyal naj Salomón bꞌey Jerusalén cꞌal xol conobꞌ Israel, 31 jaꞌ yet jix cam naj xin, jix muji naj bꞌey sconobꞌ David, jaꞌton smam. Jix lawi tuꞌ, jaxa jun scꞌaal chi yij Roboam, jix oc can yin reyal sqꞌuexeloj.