3 Jix spajtzen naj rey Salomón masanil skꞌanlebꞌal ix tuꞌ, cꞌam cꞌal junoj skꞌanlebꞌal ix tuꞌ tol ma naꞌcha el spajtzebꞌal yu naj. 4-5 Jaꞌ yet jix yilon ix sreinail conobꞌ Sabá jantaj sjelanil naj rey Salomón tuꞌ, tuxa cꞌal jix qꞌueycan a scꞌul ix. Jix yilon oc ix, tol caw watxꞌ xacꞌal yili oc sna naj waꞌnebꞌil yu, cꞌal tzet chi sloꞌ naj bꞌey sat smeẍa, cꞌal sna ebꞌ yakꞌomal servil naj ey xacꞌal smey yili ocoj. Txꞌojxa yili cꞌal pax spichil ebꞌ yakꞌomal servil naj, cꞌal ebꞌ chi bꞌatxon eltej scopa naj, cꞌal wan xaambꞌal chi yakꞌ tzꞌaꞌ bꞌey stemplo Jehová, 6 yuxan jix yal ix tet naj rey jaxca tiꞌ: Jaꞌ tzetyetal jix wabꞌ bꞌey jin conobꞌ yu masanil tzetyetal cha waꞌne, cꞌal ja jelanil chi bꞌinai, caw man tucꞌal oj chi al-lei. 7 Jaꞌ yet cꞌamto chi wiloc yetoj jin sat, cꞌam chin chaꞌ wabꞌe, jal tinaniꞌ xin, chi waoc yin jin cꞌul yutol jain caw jix wilocoj. Jaꞌ wan jix al-le ey jin tuꞌ ecꞌbꞌan nanto ma al-le wabꞌe. Jaꞌ ja jelanil yetoj cꞌal masanil tzetyetal ey, ey jaach yel xacꞌal ecꞌbꞌan yintaj jaxca tzet jix wabꞌe. 8 Yel xacꞌal tzalacꞌulal yet ebꞌ ix ja wistil, yetoj ebꞌ chi mulna ja wetoj, yel xacꞌal tzalacꞌulal yet ebꞌ chach akꞌon servil yet chi yabꞌen ebꞌ ja jelanil tiꞌ. 9 Al-le ojabꞌ watxꞌ kꞌane yin Jehová ja Diosal, tol chi tzala ja wetoj yuxan jix jaach yaoc sreyaloj conobꞌ Israel tiꞌ. Yutol ey cꞌaltaꞌ scamcꞌulal Jehová yin Israel, yuxan jix jaach yaoc yin reyal yet cha waꞌnen oc tzetyetal yin sjichanil, ẍi ix tet naj rey.

10 Jix lawi tuꞌ xin, jix yakꞌon 87 quintal chꞌen oro ix tet naj Salomón, yetoj wan perfume, yetoj chꞌen chꞌen watxꞌ yili. Cꞌamto juneloj, catuꞌ cꞌamxa pax juneloj jix apni oc miman perfume bꞌey Israel jaxca wan tzet jix saꞌ ix sreinail Sabá tet naj rey Salomón tuꞌ.

11 Txꞌoj pax ye wan jix tit yul sbarco naj rey Hiram, chꞌen oro jix yiꞌtej ebꞌ bꞌey conobꞌ Ofir, caw miman teꞌ chi yij sbꞌi sándalo jix tita, cꞌal chꞌen chꞌen txꞌojxa swatxꞌil yili. 12 Jaꞌ yetoj teꞌ sándalo tuꞌ jix waꞌnele oc sbarandail bꞌey yul stemplo Jehová yu naj rey Salomón, cꞌal yinlaj spalacio naj rey tuꞌ. Jix oc cꞌal pax teꞌ yin arpail cꞌal yin salterio yet ebꞌ sonlom. Cꞌamxa junelojxa jix akꞌle teꞌ sándalo tet ebꞌ Israel jaxca wan tuꞌ. 13 Jaxa pax naj rey Salomón xin, jix yakꞌ masanil tzet chi yoche scꞌul ix sreinail conobꞌ Sabá jix kꞌanaꞌ, txꞌoj pax tzetyetal jix el wal yin scꞌul naj saꞌon tet ix. Jix lawi tuꞌ xin, jix meltzo ix bꞌey sconobꞌ yetoj ebꞌ yakꞌomal servil jaꞌjun yetoj.

14 Jaꞌ chꞌen oro chi ẍaꞌ naj rey Salomón yin junjun abꞌil, chi apni oc chꞌen yin 500 quintal. 15 Cꞌam chꞌen stoolabꞌal ebꞌ txonwom cꞌal stoolabꞌal ebꞌ rey bꞌey Arabia cꞌal yetoj yet ebꞌ gobernador bꞌey yul yet Israel tuꞌ eyoc stzꞌajiloj. 16 Jix yakꞌon waꞌnele naj rey Salomón jun 200 chꞌen mimej jenan chꞌen majbꞌal sat julbꞌal, ey 15 libra chꞌen oro jix oc yin junjun. 17 Jix lawi tuꞌ, jix ẍejon cꞌal pax waꞌnele junxa 300 niẍtej majbꞌal sat julbꞌal, txenxa man canebꞌoj libra oro jix oc yin junjun. Jaꞌ yul jun miman na chi yij Kꞌajteꞌlaj yet Líbano, jaꞌ tituꞌ jix yaoctoj. 18 Jix yakꞌon cꞌal pax waꞌnele jun miman trono yetoj wan chꞌen chꞌen chi yij marfil, jix oc oro yinlaj, caw watxꞌ xacꞌal jix yun scawxi. 19-20 Jaꞌ jun trono tuꞌ, wajebꞌ txol yeoc sat skꞌoochal. Jix ale oc lacawebꞌ yechel noꞌ león yin, wajebꞌ bꞌey jun pacꞌ jun kꞌooch tuꞌ, wajebꞌ bꞌey jun pacꞌxa. Jaꞌ skꞌelubꞌ yichin tol xoyan yeocoj, ey skꞌabꞌ bꞌey junjun spacꞌul; jaꞌ bꞌey junjun spacꞌul tuꞌ eyoc junjun yechel noꞌ león yin. Cꞌam junojxa rey jix swaꞌne yet jaxca jun tuꞌ. 21 Jaꞌ masanil scopa naj rey tuꞌ, oro xacꞌal eloj, yetoj cꞌal jantaj ẍalu cꞌal xi chi kꞌanle bꞌey jun miman na chi yij sbꞌi, Kꞌajteꞌlaj yet Líbano. Cꞌam junoj mitxꞌkꞌabꞌe tuꞌ tol plata eyoc yin, yutol jaꞌ yul stiempoal naj rey Salomón tuꞌ, jaꞌ chꞌen plata tuꞌ man mimanoj yeloc apnoj chꞌen yul sat ebꞌ ánima; 22 yutol ey wan teꞌ mimej sbarco naj rey Salomón junne chi ecꞌ yetoj teꞌ mimej sbarco naj rey Hiram. Yin oxox abꞌil chi yun sjul ebꞌ bꞌey Israel, chi tit ebꞌ Tarsis, iꞌbꞌil oc oro, plata, marfil, noꞌ maax cꞌal noꞌ pavo real yu ebꞌ.

23 Queytuꞌ jix yun ya can sjelanil cꞌal sbꞌeomal naj rey Salomón yintaj wanxa ebꞌ rey bꞌey yul yibꞌankꞌinal tiꞌ. 24 Masanil xacꞌal ánima bꞌey yul yibꞌankꞌinal tiꞌ, chi yoche ebꞌ chi yil sjelanil Dios jix yakꞌ tet naj rey tuꞌ. 25 Masanil ánima chi yiꞌtej saꞌbꞌeal yin junjun abꞌil tet naj; jaꞌton chꞌen plata, chꞌen oro, an pichile caw ey stool, chꞌen julbꞌal, cꞌal tzetyetal tol sukꞌukꞌi yoc sabꞌ, yetoj noꞌ che cꞌal noꞌ mula.

26 Caw ecꞌal carruaje yet jowal jix syambꞌa oc naj rey Salomón tuꞌ, yetoj cꞌal noꞌ che. Ey 1,400 carruaje yetoj 12,000 noꞌ che chi ijon ecꞌ ebꞌ soldado. Ey carruaje cꞌal noꞌ che eyecꞌ bꞌey wan conobꞌlaj tol yet cꞌaltaꞌ yeocoj. Ey cꞌal pax wanxa carruaje tuꞌ eyecꞌ yetoj ebꞌ soldado chi teynen naj rey bꞌey Jerusalén. 27 Manxa jantajoj chꞌen plata jix syambꞌa oc naj rey bꞌey Jerusalén, jaxca xacꞌal comon chꞌen yeocoj, manxa jantajoj cꞌal pax teꞌ kꞌuteꞌ jaxca xacꞌal yecꞌ yichlaj steꞌal teꞌ higo bꞌey spananil yichlaj wonan queyxa cꞌal tuꞌ yeoc teꞌ. 28 Jaꞌ noꞌ ẍe naj rey Salomón, jaꞌ tuꞌ chi tit noꞌ bꞌey Egipto cꞌal bꞌey Cilicia, yutol jaꞌ ebꞌ xonwom naj rey tuꞌ chi manontej noꞌ tituꞌ. 29 Jaꞌ junoj carruaje chi manletej bꞌey Egipto, 600 siclo plata stool junjun, jaxa junoj noꞌ che, 150 stool. Jaxa pax ebꞌ sreyal Hitita cꞌal ebꞌ sreyal Sirio chi manon pax tet ebꞌ xonwom naj rey Salomón tuꞌ.