Jaꞌ yet jix lawi swaꞌxi a stemplo Jehová yu naj rey Salomón, yetoj cꞌal spalacio yetoj jantaj tzettaj yetal jix swaꞌne, 2 jix xꞌoxon sbꞌa Jehová yet scaelal tet naj, jaxca jix yun xꞌoxon sbꞌa tet bꞌey conobꞌ Gabaón. 3 Jix yalon Jehová jaxca tiꞌ: Jix wabꞌ tzet jix ja wal yin ja txa cꞌal masanil tzet jix ja kꞌanaꞌ; jix waon can oc jun templo jix ja waꞌne tiꞌ wetoj, yet watxꞌ jaꞌ tituꞌ oj oc eyilal ey jin, yutol ey jin cꞌal ecꞌ tituꞌ, oj jin teyne cꞌal pax oj. 4 Yu tuꞌ xin, ta watxꞌ cꞌal oj ja wute ja bꞌa jaxca jix yute sbꞌa naj ja mam David, ta yetoj masanil ja naꞌbꞌal chin ja waon oc yin ja cꞌul, catuꞌ jichan cꞌal cha wute ja bꞌa, cha jijen cꞌal masanil tzet jix wakꞌ ja wunne, catuꞌ cha jijen jin ley cꞌal jin chejbꞌanil, 5 ta jaxca tuꞌ, junelne chach waoc yin ja wopiso xol conobꞌ Israel tiꞌ jaxca jix yun walon can tet naj ja mam David, tol ey cꞌal yicꞌaal oj oc sreyaloj conobꞌ Israel tiꞌ. 6 Ta jaxa chi yunna xin, cha wetnetoj ja naꞌbꞌal ma chach elcan wintaj an, ma ebꞌ ja wicꞌaal oj yiꞌcan el sbꞌa ebꞌ wintaj an, ta man oj je jije jin chejbꞌanil cꞌal jin ley jix wal can ey jex tol sowalil che jije, ta jaxa tet comon dios oj jex oc yin eyilal, cꞌal je yaon oc je cꞌul yin, 7 oj jex wiꞌel bꞌey sat jun txꞌotxꞌ akꞌbꞌil can wu ey jex tiꞌ, catuꞌ oj jin bꞌejon can jun templo jix ja waꞌne a tiꞌ, jaxa je bꞌuchle yu masanil nacionlaj. 8 Jaꞌ jun templo jix oc can wetoj tiꞌ, caxcꞌal mi tol ochebꞌil tinaniꞌ, jaxa tala chi yun yet tuꞌ, jaꞌ mactxequel ebꞌ oj ecꞌ scꞌatan ma stiꞌ oj tzee ebꞌ yet oj yilon oc ebꞌ, catuꞌ oj yalon ebꞌ tet junjun jaxca tiꞌ: ¿Tzet la yuxan jaxca tuꞌ jix yute Jehová jun nación tiꞌ cꞌal jun templo tiꞌ? ẍi xacꞌal mi ebꞌ. 9 Catuꞌ oj takꞌwoj ebꞌ ánima tuꞌ, oj yalon ebꞌ jaxca tiꞌ: Yutol jix yiꞌel sbꞌa ebꞌ conobꞌ Israel tiꞌ yintaj Jehová sDiosal. Jaꞌ Naj jix iꞌon eltej yichmam ebꞌ bꞌey Egipto, jaxa pax comon dios jix yaoc ebꞌ yin scꞌul cꞌal yoc ebꞌ yin eyilal tet, yuxan jix aletej jun uchlebꞌail yibꞌan ebꞌ yu Dios, ẍi xacꞌal mi ebꞌ, ẍi Naj.