4 Jix lawi tuꞌ xin, jaxa naj rey Salomón jix yakꞌ xaambꞌal yetoj masanil ebꞌ conobꞌ tet Jehová. 5 Jix yakꞌ 22,000 noꞌ wacax yetoj 120,000 noꞌ meꞌ jix yakꞌ naj yin xaambꞌalil.

Queytuꞌ jix yun yaon can oc jun templo tuꞌ yul skꞌabꞌ Dios.

6 Linan cꞌal oc masanil ebꞌ Israel tuꞌ, jal ebꞌ yakꞌomal xaambꞌal xin, ey cꞌal octoj ebꞌ bꞌey chi yil yopiso tuꞌ, jix xuon strompeta ebꞌ. Jaxa ebꞌ Levita chi bꞌitni ebꞌ, chi stenon wan mitxꞌkꞌabꞌe yet bꞌit ebꞌ, wan waꞌnebꞌil can yu naj rey David, tol yet Jehová yeocoj. Chi yalon ebꞌ jaxca tiꞌ: Jaꞌ scamcꞌulal Jehová, ey cꞌal yin tobꞌalkꞌinal, ẍi ebꞌ.

7 Jix ale can oc yopiso jun yamakꞌil sattaj eltoj stiꞌ stemplo Jehová yu naj rey Salomón, jaꞌ tituꞌ chi akꞌle tzꞌaꞌ xaambꞌal, cꞌal yakꞌle tzꞌaꞌ ẍepuꞌal noꞌ xaambꞌal yet watxꞌcꞌulal, yutol jaꞌ jun yet xaambꞌal tol bronce cꞌal eloj, cꞌam chi yabꞌ bꞌey chi atoj masanil wan xaambꞌal tuꞌ, cꞌal ofrenda yin ixim tiriw, cꞌal ẍepuꞌal noꞌ noꞌ.

8 Jaꞌ yet jun tiempoal tuꞌ, jaꞌ naj rey Salomón yetoj cꞌal ebꞌ yet Israelal, ey jujebꞌ cꞌual jix yaoc skꞌinal wan pat waꞌnebꞌil a yetoj skꞌabꞌlaj teꞌ yu ebꞌ. Jun miman bꞌulan ebꞌ jix tit tacꞌal bꞌey chi octoj bꞌey Hamat, bꞌey moon yetcꞌulal norte, masantaꞌcꞌal bꞌey chi ecꞌ eltoj jaꞌ jaꞌ yul yet Egipto bꞌey moon yetcꞌulal sur. 9 Jujebꞌ cꞌual jix yaoc kꞌin ebꞌ bꞌey sattaj jun yet xaambꞌal tuꞌ, yet chi ale can oc yul skꞌabꞌ Jehová, jal jujebꞌxa cꞌual xin, jix oc skꞌinal wan pat waꞌnebꞌil a yetoj skꞌabꞌlaj teꞌ yu ebꞌ. Jal yet slawubꞌ cꞌual xin, jix oc junxa miman kꞌin yu ebꞌ. 10 Jaꞌ yet 23 yoc yet sjuj xꞌaaw, jix yalon cantoj sbꞌa naj rey Salomón tet ebꞌ, catuꞌ jix spoꞌolen can sbꞌa naj yetoj ebꞌ conobꞌ, jix pax cantoj ebꞌ bꞌey sna yin tzalacꞌulal yu masanil swatxꞌcꞌulal Jehová jix yakꞌ tet ebꞌ, yetoj cꞌal tet naj David, cꞌal tet naj Salomón.

11 Jaꞌ yet jix lawi swaꞌxi jun stemplo Jehová yetoj spalacio naj rey Salomón, yetoj cꞌal masanil tzettaj yetal jix snaꞌ naj tol chi waꞌnelei, 12 jix xꞌoxon sbꞌa Jehová tet yet akꞌbꞌalil, jix yalon tet jaxca tiꞌ: Jix wabꞌ ja txa, jix jin sicꞌon pax can el jun lugar tiꞌ yin jin templo bꞌey chi akꞌle tzꞌaꞌ xaambꞌal ey jin an. 13 Yu tuꞌ xin, ta ey bꞌakꞌin cꞌamxa chi yakꞌ nabꞌ ma chi jul noꞌ kochiꞌ noꞌ yakꞌon lawoj el je yawo, ma junoj syaꞌilal chi watej je yibꞌan jaex jin conobꞌ jex tiꞌ, 14 ta jaex jin conobꞌ tol chi bꞌina jin bꞌi je yin tiꞌ, ta chex txali cꞌal ey jin, catuꞌ chin je seyon ecꞌoj, che bꞌejon can je pena bꞌeybꞌal, oj wabꞌen bꞌey satcan jantaj tzet oj je yal yin je txa, oj wakꞌon tan je penail je yibꞌan, catuꞌ oj waontej jin yaxilal yibꞌan je txꞌotxꞌ tuꞌ. 15 Jaꞌ tinaniꞌ cꞌal yet cu sattajto, oj wabꞌ cꞌal jantaj txa oj oc jin sattaj bꞌey jun jin templo tiꞌ, 16 yutol sicꞌbꞌilxa el jun templo tiꞌ wu, jaxca tol oj jin kaey ecꞌoj. Jaꞌ jun tiꞌ oj jin teyne, catuꞌ naꞌan cꞌal wu. 17 Jaꞌ tinaniꞌ xin, ta tol oj je bꞌeybꞌalne cꞌal masanil tzet chi walaꞌ, jaxca wal jix yun ja mam, catuꞌ oj ja jijen jin ley cꞌal jin chejbꞌanil, 18 oj wakꞌ cꞌal jun ja wopiso tiꞌ, jaxca wal jix yun wakꞌon can jin tiꞌ tet naj ja mam, jaꞌton yet jix waloni, tol yin junelne ey jun ja wicꞌaal oj oc can yin yaawil yibꞌan conobꞌ Israel tiꞌ. 19 Ta jaex tiꞌ, man oj je jije jin ley, cꞌal jin chejbꞌanil jix wakꞌcanoj, jaxa tala che yunne, jaxa tet wan comon dios chex oc yin eyilal, 20 jaxa jex wiꞌon el bꞌey jun txꞌotxꞌ jix wakꞌcan ey jex tiꞌ, jaꞌ jun templo jix oc wetoj tuꞌ an, oj wiꞌel jin sattaj, jaxa jin bꞌejon canoj, catuꞌ oj wakꞌon bꞌuchle yu masanil nacionlaj. 21 Jaꞌ jun templo txꞌojxa swatxꞌil yili tiꞌ, tuxa cꞌal oj ey can wejan spoꞌoil. Yal cꞌal mactxequel oj ecꞌ bꞌey scawilal, tuxa cꞌal oj qꞌueya scꞌul ebꞌ yilon ocoj, catuꞌ oj skꞌanlen ecꞌ ebꞌ. ¿Tzet yuxan queytuꞌ jix yun Jehová yin jun templo tiꞌ? ẍi xacꞌal ebꞌ. 22 Jaxa oj yun stakꞌwi ebꞌ ánima tet ebꞌ: Yutol jix bꞌejlecan Jehová yu ebꞌ, jaꞌton sDiosal smam icham ebꞌ, Naj jix iꞌon eltej ebꞌ bꞌey txꞌotxꞌ Egipto, yutol jaxa wan comon dios jix yakꞌ servil ebꞌ. Yu cꞌal jun tuꞌ, yuxan jix tit jun miman syaꞌilal tiꞌ yibꞌan ebꞌ, ẍi xacꞌal mi ebꞌ, ẍi Jehová tet naj rey Salomón.