Jix Oc Kꞌin Yu Yoc Can Yopiso Templo
6
Jix lawi tuꞌ, jix yalon naj rey Salomón jaxca tiꞌ:Jaach Jehová jin Diosal, jaach jix ja walaꞌ tol ey jaach ecꞌ bꞌey xol kꞌej jolinaj asun.a
2 Yu jun tuꞌ, yuxan jain jix jin waꞌne a jun templo caw sakꞌal yili tiꞌ, yet chach caey ecꞌ yul, jaꞌton jun lugar bꞌey oj jaach eecꞌ yin tobꞌalkꞌinal, ẍi naj rey Salomón tet Dios.
3 Jix lawi tuꞌ, jix too pax tꞌanan naj rey bꞌey linan oc masanil ebꞌ yet Israelal. Jix yalon watxꞌ kꞌane naj yibꞌan ebꞌ. 4 Jix yalon jaxca tiꞌ: Al-le ojabꞌ watxꞌ kꞌane yin Jehová cu Diosal, jaon Israel jon tiꞌ, yutol jix yun tzet jix yakꞌ can stiꞌ tet jin mam David, yet jix yalon can jaxca tiꞌ: 5 Yet tax cꞌal jun cꞌual yet jix wiꞌon eltej jin conobꞌ bꞌey Egipto, cꞌam juneloj jix wal tet ebꞌ conobꞌ Israel tol chin sicꞌ el jun conobꞌ bꞌey chi waꞌxi a junoj templo bꞌey chi iꞌle a can jin bꞌi. Cꞌam pax junoj winaj jix jin sicꞌ el yet chi yijbꞌan jin conobꞌ Israel tiꞌ. 6 Jal tinaniꞌ xin, jix jin sicꞌ el conobꞌ Jerusalén, yet chi bꞌinale jin bꞌi tituꞌ. Catuꞌ jix jin sicꞌon el naj David yet chi yijbꞌan jin conobꞌ Israel, ẍi Jehová tet jin mam. 7 Jaꞌ jin mam jix yoche scꞌul jix swaꞌne a junoj templo yu yiꞌon a can sbꞌi Jehová, cu Diosal jaon Israel jon tiꞌ. 8 Yu jun tuꞌ, yuxan jix yalon can Jehová, jaxca tiꞌ: Caw watxꞌ tzet jix ja naꞌ tuꞌ, yutol jix ja naꞌ ja waꞌnen a junoj jin templo, 9 asan xin, manaj jaach oj ja waꞌne aoj, yutol ey jun ja cꞌaal, jaꞌ oj waꞌnen a jun jin templo tuꞌ, ẍi Jehová Dios.
10 Jaxa tinaniꞌ xin, tuxa jix eloc tzet jix yakꞌ can stiꞌ Jehová. Jaxca jix yun yalon can tuꞌ, queytuꞌ jix yun woc can sqꞌuexeloj jin mam tuꞌ yin reyal. Catuꞌ jix jin ey chotan bꞌey spalacio tiꞌ, tuxa jix jin waꞌne a jun stemplo Jehová cu Diosal. 11 Jix waon can octoj teꞌ caẍa bꞌey eeytoj swa kꞌane Jehová jix swaꞌne can ketoj jaon Israel jon tiꞌ, ẍi naj Salomón.
12 Jix lawi tuꞌ xin, jix oc linan naj rey Salomón sattaj jun yet xaambꞌal yet Jehová yetoj cꞌal sattaj masanil conobꞌ Israel, jix yiꞌon a skꞌabꞌ. 13 Jatuꞌ eyatoj bꞌey yibꞌan jun bꞌatxlubꞌ chꞌen bronce cꞌal eloj, jun jix waꞌnele snan xol sattaj eltoj stiꞌ stemplo Dios, ey caabꞌ metro yetoj 25 centímetro skꞌatil. Jal pax sat, jun metro yetoj 35 centímetro yea steel. Sattaj wal ebꞌ conobꞌ Israel tuꞌ jix ey kaanoj, catuꞌ jix yiꞌon a skꞌabꞌ satcan, catuꞌ jix txali. 14 Jix yalon jaxca tiꞌ: Jaach Jehová, cu Diosal jaon Israel jon tiꞌ: Tumi ey junojxa Dios bꞌey satcan, cꞌal bꞌey sat txꞌotxꞌ tiꞌ laan ja wetoj. Jaach tiꞌ chi yun bꞌey jix ja wakꞌcan ja tiꞌ, catuꞌ cha txꞌoxon ja camcꞌulal yin mactxequel chach akꞌon servil yetoj masanil scꞌul. 15 Tuxa jix yun bꞌey jix ja wakꞌcan ja tiꞌ tet jin mam. Jaꞌ tinaniꞌ, tzꞌajan jix ja wun tzet bꞌey jix ja wakꞌcan ja tiꞌ, tet David, naj jin mam. 16 Yu tuꞌ xin, jaach jin Diosal, yun ojabꞌ junxa bꞌey jix ja wakꞌcan ja tiꞌ tet naj ja chejabꞌ David, jaxca jix yun ja walon can tet naj: Tol cꞌam junoj ja wicꞌaal man oj oc yin reyal xol conobꞌ Israel jin sattaj, ta tol watxꞌ cꞌal oj yute sbꞌeybꞌal ebꞌ, catuꞌ oj sjijen jin chejbꞌanil ebꞌ jaxca jix yun ja jijeni, ja chi tet jin mam. 17 Yu tuꞌ xin, jaach Jehová jin Diosal, yun ojabꞌ bꞌey jix ja wakꞌcan ja tiꞌ tet naj jin mam, jaꞌton naj ja chejabꞌ chi yij David.
18 Asan xin, ¿chim wal skeꞌ ja caey ecꞌ yetoj ebꞌ ánima bꞌey sat txꞌotxꞌ tiꞌ? Yutol jaꞌ satcan, yel xacꞌal miman yeocoj, cꞌam pax chi yabꞌ bꞌey chach caey ecꞌoj, jajxa tam wal chꞌan jun templo jix jin waꞌne a tiꞌ. 19 Jaach jin Diosal, caxcꞌal mi jaxca tuꞌ yeocoj, chaꞌ ja wabꞌ tzet chi wal yin jin txa. Abꞌ cꞌal yet chi a waw jain ja chejabꞌ jin tiꞌ yu jin kꞌanon ja watxꞌcꞌulal. 20 Manche ja wiꞌel ja sat yin jun templo tiꞌ yet cꞌualil, cꞌal yet akꞌbꞌalil, jaꞌton bꞌey jun lugar tol jix ja walaꞌ tol ey jaach cꞌal ecꞌoj. Yu jun tuꞌ, yuxan abꞌ cꞌal jin txa jain ja chejabꞌ jin tiꞌ. 21 Abꞌ cꞌal tzet chi kal yin cu txa, yetoj ebꞌ wet conobꞌ Israel tiꞌ, yet chi cu txali ey jaach bꞌey jun lugar tiꞌ. Yutol jaꞌ bꞌey satcan tuꞌ ey jaach ecꞌoj, cha wabꞌen cꞌal tzet chi cu kꞌan ey jaach, catuꞌ cha wakꞌon mimancꞌulal yin cu penail jon.
22 Ta tol ey junoj mactxequel chi abꞌcha ocoj, tol ey spenail chi oc tet yet animail, catuꞌ chi akꞌle pural sjul yakꞌon can stiꞌ sattaj jun yet xaambꞌal bꞌey jun ja templo tiꞌ, 23 cha wabꞌ cꞌal eytej bꞌey satcan tuꞌ, catuꞌ cha waꞌnen el yin sjichanil yibꞌan ebꞌ ja chejabꞌ. Cha wakꞌon spajtzebꞌal jaxca wal smooalil tet jun mactxequel jix oc spenail tuꞌ, chi oc syaꞌilal yibꞌan yu spenail tuꞌ, catuꞌ cha jajon can el mactxequel cꞌam spenail, jatacꞌalaꞌ tzet utbꞌil yeocoj.
24 Ta chi cu eyqꞌuey yu ebꞌ chi jowi oc kin jaon ja conobꞌ Israel jon tiꞌ yu cu penail chi oc ja sattaj, ta oj snaꞌ sbꞌa cu cꞌul jon, catuꞌ oj jaach kakꞌon bꞌina yin cu txa bꞌey ja templo tiꞌ, 25 tol ojabꞌ cha chaꞌ ja wabꞌ cu txa bꞌey satcan tuꞌ, catuꞌ cha wakꞌon tan cu penail jon, jaxa jon ja wakꞌon meltzo bꞌey cu conobꞌ jix ja wakꞌ tet ebꞌ kichmam tuꞌ jon.
26 Ta yu cu penail chi oc ey jaach, yuxan cꞌamxa chi yakꞌ nabꞌ catuꞌ cha waontej syaꞌilal kibꞌan jon. Ta chi snaꞌ sbꞌa cu cꞌul jon, catuꞌ chach kakꞌon bꞌina yin cu txa, chach tit tꞌanan kin bꞌey kaan jon tiꞌ. 27 Cha wabꞌen eytej cu txa bꞌey satcan tuꞌ, catuꞌ cha wakꞌon mimancꞌulal yin cu penail jaon ja chejabꞌ jon tiꞌ, yetoj cꞌal yibꞌan ebꞌ ja conobꞌ, catuꞌ cha txꞌoxon watxꞌ bꞌeybꞌale yet chi cu bꞌeybꞌalne jon. Chi lawi tuꞌ, cha waon eytej nabꞌ yibꞌan txꞌotxꞌ txꞌotxꞌ jix ja wakꞌcan yul cu kꞌabꞌ jaon ja conobꞌ jon tiꞌ.
28 Ta ey wail ma syaꞌilal chi jul bꞌey cu conobꞌ tiꞌ, ma chi tzꞌaꞌtoj cu awo yu kꞌakꞌ, ma chi jul junoj yaꞌbꞌil yin kawo tiꞌ jon, ma chi jul noꞌ kochiꞌ noꞌ yin, ma junojxa tujan noꞌ noꞌ chi akꞌon lawoj ey kawo tiꞌ jon, ma xin, chi jul junoj bꞌulan ebꞌ pena snaꞌbꞌal yin junoj tujan cu conobꞌ tiꞌ jon, ma yal cꞌal tzet chi cu iꞌon jon, 29-30 tol oj wal chi el yin ja cꞌul ja wabꞌen tzet chi yal mactxequel oj txaloj ey jaach, cꞌal cu masanil jaon ja conobꞌ jon tiꞌ, jaꞌ yet oj kilon tol ey jon oc yin syaꞌilal. Ta oj cu moobꞌa atoj cu kꞌabꞌ ey jaach bꞌey jun ja templo tiꞌ, oj ja wabꞌen tzet chi kal yin cu txa bꞌey satcan bꞌey caan jaach ecꞌoj, jaxa ja wakꞌon tan cu penail tuꞌ. Pajtze cu txa junjun jon, jatacꞌalaꞌ tzet chi cu bꞌeybꞌalne jon, yutol ja wotaj tzet yili cu naꞌbꞌal jon, cꞌal tzet chi ecꞌ yul cu cꞌul junjun jon. 31 Yet watxꞌ miman ojabꞌ yeloc apnoj yul cu sat cꞌal cu jijen ey jaach yajbꞌan iquis jon ecꞌ bꞌey jun txꞌotxꞌ jix ja wakꞌcan tet ebꞌ kichmam jon.
32 Yetoj cꞌal pax oj, ta ey junoj ebꞌ txꞌoj conobꞌal chi tit bꞌey junojxa conobꞌ caw naat, yutol jix yabꞌ ebꞌ tol caw miman ja weloc apnoj, catuꞌ miman yeoc ja wipal, bꞌejan cꞌal ja cꞌul ja chaꞌon mactxequel chi jul txaloj bꞌey jun templo tiꞌ, 33 el ojabꞌ yin ja cꞌul, catuꞌ cha wabꞌen tacꞌal bꞌey satcan, bꞌey caan jaach ecꞌ tuꞌ. Akꞌ masanil tzetyetal oj skꞌan ebꞌ ey jaach, yet watxꞌ chach yotajne el masanil nacionlaj bꞌey yul yibꞌankꞌinal tiꞌ, catuꞌ chi yiꞌon a can ja bꞌi ebꞌ jaxca chi yun kiꞌon a can ja bꞌi jaon ja conobꞌ Israel jon tiꞌ. Catuꞌ oj yotajne el ebꞌ, tol jaꞌ bꞌey jun templo jix jin waꞌne can tiꞌ, jatuꞌ chi oc ebꞌ yin eyilal ey jaach.
34 Jaꞌ yet oj cu eltoj jaon ja conobꞌ jon tiꞌ, yet oj kakꞌon jowal yetoj ebꞌ cu cajat jon, yal cꞌal bꞌeytuꞌ oj jon ja chejtoj, ta tol oj cu txaloj ey jaach bꞌey yetcꞌulal jun lugar jix ja sicꞌ can el tiꞌ, jaꞌton bꞌey jun templo jix jin waꞌne a tiꞌ an, 35 eloj yin ja cꞌul tol cha wabꞌ tzet chi kal yin cu txa, catuꞌ oj jaach colwa ketoj jon.
36 Ta chi oc cu penail ey jaach xin, (yutol cꞌam junoj mactxequel tol cꞌam chi oc spenail,) jaxa stit sjowal ja cꞌul kin tuꞌ, yuxan subꞌotaj chi yun sjul ebꞌ cu cajat kin jon, catuꞌ chi cu eyqꞌuey yu ebꞌ, jaxa kiꞌletoj yin yakꞌomaloj servil bꞌey junojxa txꞌoj conobꞌal, ta naat ma cawil. 37 Ta jaꞌ bꞌey jun conobꞌ bꞌey chi cu toocan tuꞌ, jaꞌ tituꞌ chi snaꞌ sbꞌa cu cꞌul jon, catuꞌ chi kaon oc cu naꞌbꞌal ja win, catuꞌ chi cu txali ey jaach, chi kalon cu bꞌa ey jaach tol jix oc cu penail, ma chi kotajne eloj tol man watxꞌoj tzet jix el kunen jon. 38 Ta chi cu meltzo yin masanil cu cꞌul, cꞌal yetoj masanil cu naꞌbꞌal ey jaach, yet ey jon ecꞌ bꞌey jun conobꞌ bꞌey chi cu iꞌletoj yin yakꞌomal servil tuꞌ, jaxa cu txali ey jaach bꞌey yetcꞌulal jun txꞌotxꞌ bꞌey jix ja wakꞌcan tet ebꞌ kichmam jon, bꞌey jun conobꞌ sicꞌbꞌil el ja wu, cꞌal bꞌey yetcꞌulal jun templo jix jin waꞌne a tiꞌ, 39 oj ja wabꞌen cu txa bꞌey satcan bꞌey ey jaach ecꞌ tuꞌ, colwaan cꞌal ketoj jon, akꞌ mimancꞌulal yin cu penail jaon ja conobꞌ jon tiꞌ.
40 Jaach jin Diosal, aoc ja txiquin yin tzet chi kal yin cu txa, bꞌey jun lugar tiꞌ.
41 Jaach cu Diosal, aan waanoj, catuꞌ chach octoj xew bꞌey jun lugar tiꞌ, yetoj teꞌ Scaẍail Ja Wa Kꞌane chi txꞌoxon el ja wipalil. Jaach jin Diosal, colel ebꞌ yakꞌomal xaambꞌal chach akꞌon servil, jaxa ebꞌ ja wet yeocoj, tzala ojabꞌ ebꞌ yu ja watxꞌcꞌulal.
42 Manche jin ja wintajne el jain rey jin tol sicꞌbꞌil jin el ja wu. Naꞌtej ja camcꞌulal yin jin mam, jaꞌton naj ja chejabꞌ David, ẍi naj rey Salomón yin xa.