2 Jix lawi tuꞌ xin, jix yambꞌale oc masanil ebꞌ icham winaj yeoc yul conobꞌ Israel yu naj rey Salomón, yetoj masanil ebꞌ yaaw yeoc xol junjun icꞌaaleal, yetoj cꞌal ebꞌ mimej yeoc yopiso xol ebꞌ yican to sbꞌa yetoj. Jix syambꞌa oc sbꞌa ebꞌ yet chi iꞌle eltej teꞌ Scaẍail Swa Kꞌane Jehová bꞌey Sión bꞌey Sconobꞌ David. 3 Jaxa yet scꞌual kꞌin tol miman yeloc apnoj, jaꞌton yet sjuj xꞌaaw yul abꞌil, jaꞌ yet tuꞌ jix syambꞌa sbꞌa ebꞌ conobꞌ masanil yetoj naj rey Salomón. 4 Jaꞌ yet yamanxa oc masanil ebꞌ icham winaj yeoc yul conobꞌ Israel tuꞌ, jix yiꞌontej teꞌ Scaẍail Swa Kꞌane Jehová ebꞌ Levita bꞌey templo. 5 Jaꞌ ebꞌ yakꞌomal xaambꞌal, cꞌal ebꞌ Levita, jix iꞌontej jun kꞌap na bꞌey chi ẍaꞌle sbꞌa ebꞌ yetoj Dios bꞌey templo tuꞌ, yetoj cꞌal masanil mitxꞌkꞌabꞌe. 6 Jaꞌ jun naj rey Salomón yetoj masanil ebꞌ yet Israelal, jix syambꞌa oc sbꞌa yetoj naj. Eyoc ebꞌ sattaj teꞌ Scaẍail Swa Kꞌane Dios, catuꞌ jix yakꞌon tzꞌaꞌ xaambꞌal ebꞌ, jaꞌton noꞌ meꞌ yetoj noꞌ wacax; caw miman noꞌ xaambꞌal jix yakꞌ ebꞌ, yuxan cꞌamxa chi alcha jantaj sbꞌisil noꞌ noꞌ tuꞌ. 7 Jix lawi tuꞌ, jix yiꞌon octoj teꞌ Scaẍail Swa Kꞌane Jehová ebꞌ yakꞌomal xaambꞌal bꞌey yul templo, masantaꞌcꞌal bꞌey jun lugar tol Asan Jehová Ey Yet Xꞌojli, bꞌey yalan xicꞌ wan yechel querubín tuꞌ. 8 Jenantoj xicꞌ wan tuꞌ yibꞌan jun lugar bꞌey eyecꞌ teꞌ Caẍa tuꞌ, cꞌal yibꞌan sbꞌatxbꞌanil teꞌ. 9 Yutol mimej steel teꞌ sbꞌatxlubꞌal Caẍa tuꞌ, yuxan txequel kilontoj teꞌ bꞌey jun lugar tol Asan Dios Ey Yet. Queytuꞌ jix yun scan cꞌal canoj, masantaꞌcꞌal tinaniꞌ. 10 Jaꞌ bꞌey yul teꞌ Caẍa tuꞌ, asan chꞌen caabꞌ jenan chꞌen jix ya can eytoj naj Moisés bꞌey wonan Horeb, asanne chꞌen eeytoj yul teꞌ Caẍa tuꞌ, jaꞌton chꞌen bꞌey tzꞌibꞌebꞌil oc swa kꞌane Jehová, bꞌey jix yakꞌ can stiꞌ yetoj ebꞌ conobꞌ Israel yet tax jix eltej ebꞌ bꞌey txꞌotxꞌ Egipto.

11 Jix eltej ebꞌ yakꞌomal xaambꞌal bꞌey yul jun lugar tol Asan Dios Ey Yet. Jaꞌ masanil ebꞌ yakꞌomal xaambꞌal eyecꞌ tituꞌ, jix sajbꞌane sbꞌa ebꞌ, caxcꞌal cꞌam ebꞌ eyoc yin xolilal yilon yopiso. 12 Masanil ebꞌ Levita sicꞌbꞌil oc yu sbꞌitni, jaxca naj Asaf, Hemán, cꞌal Jedutún, yetoj cꞌal ebꞌ cꞌaale, cꞌal ebꞌ icane, linan oc ebꞌ scawilal jun yet xaambꞌal yetcꞌulal bꞌey chi aol cꞌu. Eyoc an pichile yu ebꞌ, an lino cꞌal eloj, iꞌbꞌil oc chꞌen platillo, chꞌen salterio cꞌal teꞌ arpa yu ebꞌ. Ey cꞌal pax 120 ebꞌ yakꞌomal xaambꞌal chi xuon chꞌen trompeta yetoj ebꞌ.

13 Junne jix yun xuon strompeta ebꞌ tuꞌ, catuꞌ jun laan xacꞌal jix yute yul snukꞌ ebꞌ sbꞌitni, cꞌal yalon watxꞌ kꞌane ebꞌ yu yalon yu diosalil ebꞌ tet Jehová. Jix xuꞌle trompeta, cꞌal stenle chꞌen platillo, yetoj cꞌal wanxa mitxꞌkꞌabꞌe jix tenlei, jaꞌ yet lalan sbꞌitni ebꞌ tuꞌ, jix yalon ebꞌ jaxca tiꞌ: Kalwej watxꞌ kꞌane tet Jehová, yutol yel xacꞌal watxꞌ Naj, tol caw ey cꞌal scamcꞌulal, ẍi ebꞌ yin jun sbꞌit tuꞌ. Jaꞌ yet jun txolan tuꞌ, jix noel yul templo yu asun. 14 Jaꞌ yu jun asun tuꞌ, yuxan ma xa skeꞌ yoc ebꞌ yakꞌomal xaambꞌal yilon yopiso, yutol jix noel yul templo yu stzejejial Jehová.