Wan Mitxꞌkꞌabꞌe Yet Templo
4
Jaꞌ naj rey Salomón tuꞌ, jix yakꞌ waꞌxoj jun yet xaambꞌal, chꞌen bronce cꞌal eloj, ey bꞌalonebꞌ metro jix yun skꞌatil, bꞌalonebꞌ pax metro sat, nan sjoꞌ metro jix a steel. 2 Jix swaꞌnen cꞌal pax jun miman pila yet jaꞌ, chꞌen bronce cꞌal eloj. Jaꞌ jun tuꞌ tol xoyan ye jix yunne, nan sjoꞌ metro chi too bꞌey jun pacꞌ stiꞌ, chi apni bꞌey jun pacꞌxa. Jaxa steel, ey caabꞌ metro yetoj 25 centímetro, 13 metro yetoj nanxa yeel joyanoj. 3 Jaꞌ bꞌey yalan stiꞌ bꞌey yinlaj jun pila tuꞌ, eyoc caabꞌ txol yechel icham wacax yelawiloj. Laonebꞌ wan yechel icham wacax yin 45 centímetro, junne cꞌal yeoc wan tuꞌ yetoj jun pila tuꞌ. 4 Jal pax lacawebꞌ mimej yechel icham wacax tol chꞌen bronce cꞌal eloj, jaꞌ eyoc sbꞌatxlubꞌoj jun pila tuꞌ. Jaꞌ wan tuꞌ, oxebꞌ tꞌanantoj bꞌey yetcꞌulal norte, oxebꞌ bꞌey yetcꞌulal sur, oxebꞌ yetcꞌulal bꞌey chi aol cꞌu, oxebꞌ yetcꞌulal bꞌey chi too cꞌu. Jaꞌ yajan bꞌey yintaj, eyoctoj yalan. Jaꞌ yibꞌan wan tuꞌ bꞌatxan ey jun pila tuꞌ. 5 Ey waxajebꞌ centímetro spimal jun pila tuꞌ. Xoyan yeel stiꞌ jaxca yel petan junoj xumac teꞌ yet an lirio. Cꞌuxan chi eytoj 17,500 galón jaꞌ yul.6 Jix swaꞌnen cꞌal pax laonebꞌ yaliẍ pila chꞌen bronce cꞌal jix oc yin, bꞌey chi txꞌale masanil tzetyetal chi kꞌanbꞌalnele yet chi akꞌle tzꞌaꞌ xaambꞌal. Joebꞌ jix yaoc bꞌey yetcꞌulal sur, joebꞌxa bꞌey yetcꞌulal norte, jaxa bꞌey jun miman pila tuꞌ, jatuꞌ chi xꞌael sbꞌa ebꞌ naj yakꞌomal xaambꞌal.
7 Jix swaꞌne cꞌal pax laonebꞌ sbꞌatxlubꞌal tzejtebꞌal oro cꞌal eloj, jaxca cꞌaltaꞌ jix yun xꞌoxle tet. Jix lawi tuꞌ, jix yaon octoj bꞌey yul templo, joebꞌ bꞌey yetcꞌulal sur, joebꞌ bꞌey yetcꞌulal norte. 8 Jix swaꞌne cꞌal pax laonebꞌ meẍa, jix yaon octoj bꞌey yul templo, joebꞌ bꞌey yetcꞌulal sur, joebꞌ cꞌal pax bꞌey yetcꞌulal norte. Jix swaꞌne cꞌal pax 100 mimej vaso oro cꞌal eloj.
9 Jix swaꞌne cꞌal pax jun yamakꞌil eltoj stiꞌ na tuꞌ, yet ebꞌ yakꞌomal xaambꞌal cꞌal junxa yul spilaliẍal na tuꞌ. Jix oc cꞌal chꞌen bronce yin smajil bꞌey snan xol caabꞌ stiꞌ na tuꞌ. 10 Jaꞌ bꞌey yetcꞌulal sur, jatuꞌ jix yaoctoj jun miman pila, bꞌey yul xiquin yetcꞌulal bꞌey chi aol cꞌu.
11 Jaꞌ naj Hiram tuꞌ, jix swaꞌnen wan ẍalu, chꞌen pala yetoj chꞌen mimej vaso, jaxca tuꞌ jix yun swaꞌxi mulnail yin stemplo Dios yu naj rey Salomón. 12 Jaꞌ yin jun mulnail tuꞌ, jix ale oc caabꞌ mimej oy, jix ale oc caabꞌ smajil sjolom wan oy tuꞌ tol xoyan yeocoj, ey cꞌal pax oc wan chꞌen cadena yinlaj caabꞌ smajil sjolom wan oy tuꞌ. 13 Ey 400 yechel sat teꞌ granada eyoc yechel yin wan cadena tuꞌ, caabꞌ txol yeoc yin junjun cadena. 14 Laonebꞌ yaliẍ pila, laonebꞌ cꞌal pax sbꞌatxlubꞌal yalan eyocoj, 15 jaꞌ jun miman pila yet jaꞌ, cꞌal lacawebꞌ yechel icham wacax eyoc yalan, 16 yetoj cꞌal pax wan xi, cꞌal chꞌen pala yetoj wan mimej lutxbꞌal.
Masanil wan mitxꞌkꞌabꞌe tuꞌ jix swaꞌne naj Hiram, jaꞌton naj tol cuywinaj yin swaꞌnen masanil tzetyetal. Jaꞌ wan tuꞌ jix swaꞌne naj Hiram, yu naj Salomón yet chi oc bꞌey stemplo Jehová, jaꞌ yetoj chꞌen bronce chi kopopi jix waꞌnele oc yin masanil. 17 Jaꞌ smolteal masanil chꞌen bronce cꞌal eloj, jix swaꞌne ey ebꞌ yul txꞌotxꞌ ixcabꞌ txꞌotxꞌ ey bꞌey stiꞌlaj jaꞌ Jordán, bꞌey snan xol Sucot cꞌal Saretán. 18 Caw ecꞌal mitxꞌkꞌabꞌe jix swaꞌne naj Salomón, tol chꞌen bronce cꞌal eloj, yuxan ma xa skeꞌ yechele jantaj yalil chꞌen yin masanil.
19 Jix yakꞌon waꞌxoj wanxa tzetyetal naj rey Salomón bꞌey stemplo Dios: Jaxca yet xaambꞌal tol oro xacꞌal eloj, cꞌal wan meẍa bꞌey chi ale ey ixim pan chi akꞌle tet Jehová, 20 yetoj wan sbꞌatxlubꞌal tzejtebꞌal oro cꞌal eloj, yetoj cꞌal wan tzejtebꞌal chi ale oc sattaj bꞌey jun lugar tol Asanne Jehová Ey Yet, yet chi oc skꞌakꞌal, jatacꞌalaꞌ yalon chejbꞌanile. 21 Jix swaꞌne cꞌal pax wan yechel xumac teꞌ, cꞌal tzejtebꞌal, cꞌal wan chꞌen chi nakꞌon a wan tzetyetal, oro cꞌal el masanil, 22 cꞌal chꞌen iꞌbꞌal el staanil tzejtebꞌal, cꞌal chꞌen mimej vaso, yetoj chꞌen mimej lutxbꞌal, cꞌal sneetal wan sukꞌukꞌi sabꞌ. Jaꞌ masanil wan tuꞌ, oro cꞌal eloj. Eyoc oro yin spuertail bꞌey chi octoj yul templo tuꞌ. Ey cꞌal pax oc oro yin junxa spuertail jun lugar tol Asan Dios Ey Yet.