Jix Waꞌnele A Templo Yu Salomón
3
Jix ẍaꞌel yich swaꞌnele a stemplo Jehová yu naj rey Salomón bꞌey Jerusalén, jaꞌton bꞌey sjolom wonan chi yij Moria, bꞌey jix xꞌox sbꞌa Jehová tet naj David, smam naj Salomón, jaꞌton jun txꞌotxꞌ tuꞌ yet templo yeoc yu naj rey David, chi yal yeloc apnoj jaꞌton bꞌey stecꞌbꞌal tiriw naj Ornán, a conobꞌ Jebús. 2 Jix ẍaꞌel yich mulnail tuꞌ, yet scaabꞌ cꞌu yet scaabꞌ xꞌaaw, yet canebꞌ abꞌil xa yoc naj yin reyal.3 Jaꞌ yechel xeꞌ yich templo jix yal naj Salomón tol chi ale eytoj, jaꞌ jun yechel tuꞌ; ey 27 metro skꞌatil, bꞌalonebꞌ metro sat. 4 Jal pax yul stiꞌ templo tuꞌ xin, ey bꞌalonebꞌ metro skꞌatil, laan cꞌal yetoj sat templo tuꞌ. Jaxa yea steel, bꞌalonebꞌ metro. Jix ale oc oro yul stiꞌ templo tuꞌ yu naj Salomón. 5 Jaꞌ teꞌ chemteꞌ jix el yin teꞌ ta, jaꞌ teꞌ jix ale octoj yul templo tuꞌ. Jix lawi tuꞌ, jix yaon oc oro caw watxꞌ yili yinlaj, catuꞌ jix oc yechel teꞌ palma cꞌal yechel chꞌen cadena yinlaj sat. 6 Jix ale oc chꞌen chꞌen caw watxꞌ yili yelawiloj. Jaꞌton chꞌen oro caw watxꞌ titnaj bꞌey Parvaim. 7 Jix ale oc chꞌen oro yin satlaj teꞌ chemteꞌ bꞌey masanil yul templo tuꞌ, masanil yinlaj spatzabꞌil cꞌal yin smarcoal spuertail, yetoj cꞌal pax yin spuertail. Jix oc cꞌal pax yechel wan querubín yin satlaj teꞌ chemteꞌ tuꞌ.
8 Jix waꞌnele cꞌal pax jun cuarto tol Asan Jehová Ey Yet. Ey bꞌalonebꞌ metro skꞌatil, laan yetoj sat templo tuꞌ, bꞌalonebꞌ metro cꞌal pax sat. Jix lawi tuꞌ, jix yaon oc oro yin, chꞌen caw watxꞌ yili. Jaꞌ tituꞌ jix oc junoj 500 quintal chꞌen. 9 Jaꞌ chꞌen lawuẍ oro cꞌal eloj jix oc yin, ey 20 onza yalil junjun chꞌen. Jix oc cꞌal pax oro yul-laj wan cuarto naat eyaoj.
10 Jaꞌ bꞌey yul jun lugar tol Asanne Dios Ey Yet Xꞌojli, jix waꞌnele caabꞌ teꞌ yechel querubín, jaꞌ wan tuꞌ jix oc cꞌal pax oro yinlaj. 11-13 Jaꞌ steel xicꞌ caabꞌ yechel querubín tuꞌ, ey bꞌalonebꞌ metro yin scanebꞌal; jenan el xicꞌ junjun. Ey caabꞌ metro yetoj 25 centímetro junjun xicꞌ. Chi apni tacꞌal oc jenan junjun xicꞌ bꞌey satlaj yul na tuꞌ, jaxa junjunxa, chi ẍaꞌle sbꞌa bꞌey snan yul. Linan oc wan querubín tuꞌ, catuꞌ tꞌanan cantoj bꞌey jun cuarto snan yul. 14 Jix waꞌnele cꞌal pax jun an cortina lino cꞌal eloj, tol jaꞌ an kꞌejweinaj kꞌap, cꞌal an cajin eyoc yelawiloj. Jix oc cꞌal pax yechel wan querubín yin an kꞌap tuꞌ.
Wan Caabꞌ Mimej Oy
15 Jaꞌ naj rey Salomón tuꞌ, jix yakꞌ waꞌnele caabꞌ mimej oy, tol bronce cꞌal eloj, ey 16 metro steel. Jaꞌ wan tuꞌ, jix oc bꞌey sattaj templo. Caabꞌ metro yetoj 25 centímetro yea spimal smajil junjun oy tuꞌ. 16 Jix swaꞌne cꞌal pax oc cadena jaxca yili txim, jaꞌton jun tuꞌ jix oc yin smajil sjolom chꞌen oy tuꞌ; catuꞌ jix swaꞌnen cꞌal pax oc 100 yechel sat teꞌ granada, jix yaon oc yin wan yechel txim tuꞌ. 17 Jix yaon oc wan mimej oy bꞌey sattaj templo, jun bꞌey yetcꞌulal sur, junxa bꞌey yetcꞌulal norte. Jaꞌ jun yetcꞌulal sur, jix yakꞌ yij sbꞌi Jaquín, jal junxa bꞌey yetcꞌulal norte jix yakꞌ yij sbꞌi Boaz.