Ey Wanxa Na Jix Swaꞌne Naj Rey Salomón
7
Jix swaꞌne cꞌal pax a jun spalacio naj rey Salomón tuꞌ, ey oxlajonebꞌ abꞌil jix yakꞌ swaꞌneni. 2 Jix swaꞌnen cꞌal pax a jun miman na jix yakꞌ yij sbꞌi, teꞌ teꞌ yet Líbano. Jaꞌ jun tuꞌ ey 45 metro skꞌatil, ey 22 metro yetoj nanxa jix yun yul xiquin, ey cꞌal pax nan scanlajonebꞌ metro eya steel. Eyoc canebꞌ txol teꞌ oy kꞌuteꞌ cꞌal eloj. Jaꞌ sjolomlaj teꞌ oy tuꞌ, jaꞌ tituꞌ eyatoj teꞌ patzabꞌ kꞌuteꞌ cꞌal eloj. 3 Jaꞌ wan teꞌ patzabꞌ tuꞌ ey 45 sbꞌisil teꞌ, oxebꞌ txol jix yun yale oc teꞌ yibꞌanlaj teꞌ oy tuꞌ, ey 15 teꞌ yin junjun txol, jaꞌ teꞌ kꞌuteꞌ eyoc yibꞌan teꞌ patzabꞌ tuꞌ. 4 Oxebꞌ txol yeoc swentanail bꞌey junjun spacꞌul, oxebꞌ txol jix yun yale oc yetcꞌulal sattaj junjun wentana tuꞌ. 5 Canebꞌ xiquinlaj jix yun smarcoal spuertail cꞌal swentanail tuꞌ. Oxebꞌ spuertail eyoc bꞌey junjun yul xiquin, yetcꞌulal cꞌal junjun jix oqui. 6 Jix waꞌxi cꞌal pax jun na tol oy cꞌal jix oc yin. Ey 22 metro yetoj nanxa jix yun skꞌatil, yetoj nan scanlajonebꞌ metro yul xiquin. Jaꞌ bꞌey stiꞌ tuꞌ, tucꞌal jix oc joyan spilaliẍal, jix ale cꞌal pax a spatil. 7 Jix swaꞌne cꞌal pax junxa miman na jix oc yin sdespachoal, bꞌey chi waꞌxi yeoc junoj jowal, jaꞌ teꞌ kꞌuteꞌ jix oc cꞌal bꞌey spacꞌul yul tuꞌ, jix too tacꞌal bꞌey yich masantaꞌcꞌal jix aapnoj bꞌey spatzabꞌil.8 Jal sna naj rey Salomón bꞌey caan, jaꞌ bꞌey sattaj eltoj spalacio tuꞌ eya sna naj. Laan cꞌal scawxi jaxca jix yun wan mimej na tuꞌ. Jix waꞌnele cꞌal pax a sna ix scutzꞌin naj sreyal Egipto yu naj Salomón, jaꞌton ix tuꞌ jix oc yistiloj naj, laan cꞌal jix yun scawxi sna ix jaxca wanxa na tuꞌ. 9 Jaꞌ masanil wan na tuꞌ, jaxca cꞌal jix yun stit cimientoal yich, queytuꞌ chi yun slawi can bꞌey jix aapnoj bꞌey sjolomtaj atoj, yetoj cꞌal sattaj eltoj, jaꞌ chꞌen chꞌen tol caw watxꞌ scawxi, jaꞌ chꞌen eyoc yin, josbꞌil cꞌal chꞌen jatacꞌalaꞌ yechel junjun, jal pax chꞌen jix oc yinlaj yetoj cꞌal yul, jaꞌ chꞌen chꞌen kꞌupbꞌil jix oc yin. 10 Jacꞌalaꞌ cꞌal pax cimientoal jix eycantoj yich, jaꞌ chꞌen chꞌen caw wal watxꞌ scawxi eyoc yin, caw mimej chꞌen eyocoj. Ey chꞌen nan sjoꞌ metro steel, ey pax chꞌen oxebꞌ metro yetoj 60 centímetro. 11 Jaꞌ bꞌey yibꞌan cimientoal tuꞌ jix waꞌnele oc chꞌen chꞌen tol josbꞌil jaxca wal yechel, ey cꞌal pax oc teꞌ kꞌuteꞌ yetoj. 12 Jaꞌ bꞌey sattaj eltoj yinlaj stiꞌ na tuꞌ, eyoc oxebꞌ txol chꞌen chꞌen tuꞌ, ey cꞌal pax oc jun txol teꞌ patzabꞌ tol kꞌuteꞌ cꞌal eloj, quey cꞌal tuꞌ jix yun ya joyoyoj, yetoj cꞌal pax yinlaj sattaj eltoj stiꞌ templo tuꞌ, yetoj cꞌal jun cuarto bꞌey stiꞌ templo bꞌey chi octoj ebꞌ.
Jix Akꞌle Smulnail Naj Hiram Yu Naj Rey Salomón
13 Ey jun winaj a Tiro chi yij Hiram, jix awteletej yu naj rey Salomón. 14 Jaꞌ naj tuꞌ, yuneꞌ jun ix ix camnajxa yichamil titnaj yin yicꞌaal Neftalí. Jaꞌ smam naj Hiram tuꞌ a conobꞌ Tiro naj, caw jelan naj smulna yin swaꞌnen chꞌen bronce. Quey cꞌal pax tuꞌ naj Hiram, caw jelan snaꞌbꞌal, caw yotaj chi swaꞌne yal cꞌal tzet mulnailal yetoj chꞌen bronce tuꞌ. Jix apni oc sattaj naj rey Salomón yu yoc yin jun mulnail tuꞌ. 15 Jix swaꞌne ey caabꞌ mimej telan chꞌen bronce, waxajebꞌ metro steel junjun wan chꞌen jix swaꞌne tuꞌ, nan swaj metro sbꞌalil yin chꞌen. 16 Jix swaꞌnen cꞌal pax caabꞌ sjolom oy yetoj chꞌen bronce tuꞌ, yet jix oc bꞌey sjolom wan mimej oy tol bronce cꞌal jix waꞌxi tuꞌ. Caabꞌ metro yetoj 25 centímetro, jix yunna steel chꞌen. 17 Jaꞌ yinlaj caabꞌ chꞌen tuꞌ eyoc chꞌen cadena tol bronce cꞌal eloj jaxca yili teꞌ tzima. Jujebꞌ eyoc yin junjun chꞌen tuꞌ. 18 Jix swaꞌne cꞌal pax caabꞌ txol jaxca yechel teꞌ granada jix oc yin wan chꞌen cadena tuꞌ, yet chi oc yinlaj junjun ẍumuc chꞌen oy tuꞌ, laan cꞌal jix yun yet scaabꞌil. 19 Jaꞌ wan eyoc sjolom oy tuꞌ ey mi caabꞌoj metro eyaoj, laan yili jaxca an lirio. 20 Jaꞌ bꞌey sjolom wan oy tuꞌ, cꞌolquiẍtaj yili, jaꞌ yibꞌan tuꞌ jaꞌ tituꞌ eyoc jun smajil wan oy tuꞌ. Jaꞌ bꞌey chi eyol chꞌen cadena yinlaj jun cꞌolquiẍtaj yeoc tuꞌ, jatuꞌ eyoc jun 200 yechel teꞌ granada, caabꞌ txol yeocoj. 21 Jix yaoc naj Hiram caabꞌ oy tuꞌ bꞌey sattaj templo. Jaꞌ yet jix swaꞌnen oc naj bꞌey jix ey tuꞌ, jaꞌ jun oy jix oc bꞌey yetcꞌulal swatxꞌ kꞌabꞌ yet chi eltej ebꞌ yul templo, Jaquín jix yakꞌ yij sbꞌi,a jaxa junxa oy jix yaoc yetcꞌulal bꞌey sqꞌuexan kꞌabꞌ, Boaz jix yakꞌ yij sbꞌi. 22 Jaꞌ bꞌey ẍumuc wan oy tuꞌ laan yili jaxca xumac an chochol. Queytuꞌ jix yun swaꞌxi can el wan oy tuꞌ.
Masanil Tzetyetal Ey Bꞌey Stemplo Jehová
23 Jix lawi tuꞌ, jix swaꞌne jun miman pila naj Hiram tol bronce cꞌal eloj. Jaꞌ yul jun tuꞌ chi yambꞌale jaꞌ jaꞌ, tucꞌal joyan ye jix yunne, nan sjoꞌ metro jix yun yechel, jix tit tacꞌal bꞌey jun pacꞌ stiꞌ masantaꞌcꞌal bꞌey jun pacꞌxa. Jal pax steel xin, caabꞌ metro yetoj 25 centímetro jix yun aoj, jal pax yel xoyan stiꞌ ey nan scanlajonebꞌ metro. 24 Jaꞌ yalan stiꞌ jun pila tuꞌ, eyoc caabꞌ txol yechel sat teꞌ teꞌ jaxca yili teꞌ tzima, laonebꞌ jix oc yin junjun 45 centímetro, junne jix yun swaꞌxi yetoj jun pila tuꞌ. 25 Jaꞌ jun pila tuꞌ bꞌatxan oc yibꞌan lacawebꞌ yechel noꞌ icham wacax bronce cꞌal eloj. Ey oxebꞌ tꞌanantoj yetcꞌulal sur, jal oxebꞌxa tꞌanantoj yetcꞌulal norte, jal oxebꞌxa tꞌanantoj yetcꞌulal bꞌey chi aol cꞌu, yetoj oxebꞌxa tꞌanantoj yetcꞌulal bꞌey chi too cꞌu. Jaꞌ yajan yintaj, jaꞌ eyoctoj yalan jun pila tuꞌ, bꞌatxan oc yibꞌan yichin. 26 Ey waxajebꞌ centímetro spimal jun pila tuꞌ. Miman yeel xoyan stiꞌ jaxca yili xumac an chochol. Jaꞌ yul jun pila tuꞌ chi eytoj 44,000 litro jaꞌ jaꞌ yul.
27 Jix swaꞌne cꞌal pax laonebꞌ carreta bronce cꞌal eloj, ey jun metro yetoj 80 centímetro steel junjun, quey pax tuꞌ jix yun yechel sat, catuꞌ jun metro yetoj 35 centímetro jix yunna steel. 28 Jaꞌ wan carreta tuꞌ jix swaꞌxi ebꞌ jaxca tiꞌ: Jix oc smarcoal, majan cꞌal pax el yul-laj smarcoal tuꞌ. 29 Jaꞌ yin smajil snanlaj yul smarcoal tuꞌ, jatuꞌ eyoc yechel noꞌ león, yechel noꞌ icham wacax, cꞌal yechel querubín. Jaꞌ yibꞌan cꞌal bꞌey yalan wan yechel tuꞌ, eyoc yelawiloj yin smarcoal. 30 Junjun cꞌal wan carreta tuꞌ canebꞌ xoyan yeoc chꞌen bronce yin, cꞌatan oc junjun chꞌen bronce yul snan caabꞌcaabꞌ wan xoyan ye tuꞌ. Jaꞌ yin scanebꞌal xiquin wan carreta tuꞌ eyoc smitxꞌbꞌanil bronce cꞌal eloj, jaꞌton wan chi mitxꞌon oc linan jun yaliẍ pila tuꞌ. Jaꞌ yin wan smitxꞌbꞌanil tuꞌ eyoc yelawil. 31 Jaxa yul jun carreta tuꞌ eyoctoj jun jaxca mimej tubo, ey 45 centímetro yea yibꞌan stiꞌ wan carreta tuꞌ, ey 23 centímetro eeytoj yul carreta tuꞌ. Ey cꞌal pax oc yelawil yinlaj jun miman tubo tuꞌ, jaꞌ smajil snanlaj yul smarcoal tuꞌ, ey canebꞌ tzalan yea xiquinlaj man xoyanoj yeocoj. 32 Jaꞌ canebꞌ xoyan yeoc yalan wan smarcoal tuꞌ yetoj cꞌal smajil snanlaj yul junne cꞌal yeocoj. Ey pax wan chꞌen chi ecꞌtoj yul wan xoyan ye tuꞌ, junne cꞌal yeoc yetoj smarcoal, jaꞌ wan xoyan ye tuꞌ ey 68 centímetro yeaoj. 33 Laan scawxi wan xoyan yeoc tuꞌ jaxca yajan carruaje yet jowal. Jaꞌ wan tuꞌ bronce cꞌal eloj, catuꞌ junne cꞌal yeocoj. 34 Ey canebꞌ smitxꞌbꞌanil eyoc xiquinlaj, junne cꞌal yeoc yetoj smarcoal junjun carreta tuꞌ. 35 Jaꞌ yibꞌan wan sbꞌatxlubꞌal tuꞌ, ey junxa xoyan oc yibꞌan, ey 22 centímetro yetoj nanxa yea spimal, junne cꞌal yeoc masanil. 36 Jaꞌ yul spacꞌul smarcoal cꞌal yinlaj smajil, jix yaoc naj Hiram wan yechel querubín, yechel noꞌ león, yechel teꞌ palma, jix oc cꞌal yinlaj masanil. Ey cꞌal pax oc yelawil yinlaj junjun. 37 Quey cꞌal tuꞌ jix yun swaꞌxi laonebꞌ carreta tuꞌ, laan cꞌal jix yun swaꞌxi, laan cꞌal jix yun yale oc yechel, laan cꞌal yili masanil.
38 Jix swaꞌne cꞌal pax laonebꞌ pila tol bronce cꞌal eloj. Laan cꞌal jix yun yechel masanil, jun metro yetoj 80 centímetro yul junjun, kꞌuxan chi eytoj 880 litro jaꞌ jaꞌ yul. Junjun cꞌal jix oc yibꞌan scarretail. 39 Joebꞌ carreta jix cancan bꞌey yetcꞌulal swatxꞌ kꞌabꞌ bꞌey templo, jal joebꞌxa jix cancan bꞌey yetcꞌulal sqꞌuexan kꞌabꞌ. Jaꞌ jun miman pila tuꞌ, jatuꞌ jix cancan bꞌey swatxꞌ kꞌabꞌ yet chi eltej ebꞌ yul templo, yetcꞌulal bꞌey chi aol cꞌu.
40 Jix lawi tuꞌ xin, catuꞌ jix waꞌnele pax chꞌen pala cꞌal chꞌen mimej xi yu naj Hiram. Queytuꞌ jix yun slawi swaꞌxi masanil wan jix yal naj rey Salomón tol jix waꞌnele bꞌey stemplo Jehová. 41 Jaꞌton wan jix swaꞌne tiꞌ: Caabꞌ mimej oy, yetoj caabꞌ smajil yul ẍumuc, yetoj wanxa chꞌen cadena tol bronce cꞌal eloj waꞌnebꞌil jaxca txim eyoc yinlaj smajil ẍumuc wan oy tuꞌ; 42 yetoj cꞌal pax 400 yechel teꞌ granada eyoc yin wan chꞌen cadena tuꞌ, caabꞌ txol yeoc yinlaj smajil sjolom wan oy tuꞌ. 43 Laonebꞌ teꞌ carreta ijnen a wan laonebꞌ pila tuꞌ; 44 cꞌal jun miman pila yet jaꞌ, yetoj lacawebꞌ yechel noꞌ icham wacax eyoc yalan jun pila tuꞌ, 45 yetoj cꞌal wan chꞌen chꞌen xi, cꞌal wan chꞌen pala, yetoj cꞌal wan mimej secꞌ.
Jaꞌ masanil wan mitxꞌkꞌabꞌe tiꞌ jaꞌ naj Hiram jix waꞌnen yu naj rey Salomón, yet chi oc bꞌey stemplo Jehová. Jaꞌ wan tuꞌ chꞌen bronce cꞌal eloj, caw chi kopopi yili ebꞌ. 46 Jaꞌ naj rey Salomón jix waꞌnen ey smolteal wan mitxꞌkꞌabꞌe tuꞌ bꞌey spananil stiꞌ jaꞌ Jordán, bꞌey txꞌotxꞌ ixcabꞌ txꞌotxꞌ bꞌey snan xol txꞌotxꞌ Sucot yetoj Saretán. 47 Caw ecꞌal sbꞌisil wan chꞌen mitxꞌkꞌabꞌe bronce cꞌal eloj, yuxan ma xa skeꞌ yechen naj rey Salomón jantaj yalil chꞌen.
48 Jix yalon cꞌal pax naj rey Salomón tol chi waꞌnele masanil wanxa mitxꞌkꞌabꞌe bꞌey yul stemplo Jehová: Jun yet xaambꞌal tol oro cꞌal eloj, jun meẍa oro xacꞌal eloj bꞌey chi ale ey ixim pan sattaj Jehová, 49 cꞌal wan sbꞌatxlubꞌal tzejtebꞌal oro cꞌal eloj, jaxca yechel xumac teꞌ, jaꞌton eyoc bꞌey sattaj jun lugar tol Asan Jehová Ey Yet Xꞌojli. Ey joebꞌ yetcꞌulal bꞌey swatxꞌ kꞌabꞌ ebꞌ, jaxa joebꞌxa yetcꞌulal bꞌey sqꞌuexan kꞌabꞌ ebꞌ, jaꞌ wan tzejtebꞌal cꞌal chꞌen lotꞌbꞌal a tzetyetal tuꞌ, oro cꞌal eloj, 50 ey wan chꞌen copa, cꞌal wan chꞌen iꞌbꞌal el staanil tzejtebꞌal, wan chꞌen mimej secꞌ, wan chꞌen mimej cuchara, cꞌal wan txayibꞌ chꞌen bꞌey chi akꞌle tzꞌaꞌ incienso. Jaꞌ masanil wan tuꞌ oro cꞌal eloj. Oro cꞌal pax eyoc sbisagraoj yin spuertail jun lugar tol Asan Jehová Ey Yet, jaꞌton yul templo yetoj cꞌal bꞌey spuertail.
51 Jaꞌ yet jix swaꞌxi masanil tzet jix yal naj rey Salomón tol chi waꞌnele bꞌey stemplo Jehová, catuꞌ jix yalon naj tol chi iꞌle cantoj bꞌey cꞌuanbꞌal bꞌey templo, masanil wan chꞌen mitxꞌkꞌabꞌe oro yetoj cꞌal chꞌen plata wan jix yakꞌ can naj rey David tet Jehová.