3 Jix lawi tuꞌ, jix yalontoj naj rey Salomón tet naj Hiram, sreyal Tiro jaxca tiꞌ: Chim skeꞌ cha wakꞌ teꞌ kꞌuteꞌ ey jin jaxca jix ja wun yetoj naj jin mam David yet jix swaꞌnen a spalacio bꞌey jix caey ecꞌoj. 4 Ilaꞌ tol oj jin waꞌne a jun templo yet Jehová cu Diosal, bꞌey oj cu oc yin eyilal tet, yu wakꞌon tzꞌaꞌ wan sukꞌukꞌi yoc sabꞌ, yu wiꞌon a can sbꞌi, cꞌal yey txolan ixim pan sattaj, cꞌal yu yakꞌle tzꞌaꞌ xaambꞌal yet skꞌinibꞌalil, cꞌal yet yeycꞌualil, jacꞌalaꞌ cꞌal pax yet scꞌual xewilal, yetoj yet kꞌin yet chi ali xꞌaaw, yetoj cꞌal wanxa kꞌin chi oc cꞌaltaꞌ, yu kiꞌon a can sbꞌi Jehová cu Diosal, jatacꞌalaꞌ chejbꞌanile akꞌbꞌil ey jon jaon Israel jon tiꞌ. 5 Jaꞌ jun templo oj jin waꞌne a tuꞌ, sowalil tol miman oj yunne, yutol jaꞌ cu Diosal jon, yel xacꞌal miman yeloc apnoj yintaj masanil wan comon dios. 6 Yu tuꞌ xin, ¿mactxequel wal junoj oj skeꞌ swaꞌnen a junoj templo tuꞌ? Yutol jaꞌ satcan, miman yeocoj; cꞌam chi yabꞌ pax bꞌey chi caey ecꞌoj. Yu jun tuꞌ, tumi oj skeꞌ jin waꞌnen a junoj templo bꞌey chi skeꞌ skaey ecꞌ Jehová; asanne mi junoj bꞌey chi akꞌle tzꞌaꞌ incienso sattaj Naj, chi skeꞌ jin waꞌneni. 7 Yu jun tuꞌ xin, chi skeꞌ ja waontej junoj winaj jelan smulna yin chꞌen oro, yin chꞌen plata, yin chꞌen bronce, yin chꞌen hierro, cꞌal yin an púrpura kꞌap, an cajin kꞌap, yetoj an kꞌejweinaj kꞌap, tol chi skeꞌ cꞌal pax swaꞌnen oc yelawil yal cꞌal tzettaj yetal. Jaꞌ oj colwa yetoj ebꞌ tol cuywinaj yin wan tuꞌ, ebꞌ ey bꞌey Judá, cꞌal bꞌey Jerusalén tiꞌ. Jaꞌ ebꞌ tuꞌ, eyecꞌ ebꞌ wetoj titiꞌ, jaꞌton ebꞌ tuꞌ jix sicꞌle can oc yu jin mam. 8 Catuꞌ cha waon cꞌal pax tej teꞌ teꞌ ey bꞌey Líbano ey jin an, jaꞌton teꞌ kꞌuteꞌ, teꞌ qꞌuisis, cꞌal teꞌ sándalo, yutol wotaj tol jelan ebꞌ naj ja mulnawom yin kꞌajo ey teꞌ bꞌey Líbano. Jaxa ebꞌ naj jin mulnawom tiꞌ, oj colwa yetoj ebꞌ yu syambꞌan oc mimanoj teꞌ teꞌ ebꞌ. 9 Yutol jaꞌ jun templo oj jin waꞌne a tuꞌ, caw miman oj yunne, txꞌojxa oj yun yili. 10 Oj watoj 60,000 quintal ixim tiriw, quey cꞌal pax tuꞌ ixim cebada, 110,000 galón yal uva; yetoj cꞌal pax aceite olivo oj skꞌanbꞌalne ebꞌ ja mulnawom tuꞌ, ẍi toj naj Salomón tuꞌ.

11 Jix lawi tuꞌ xin, jix yaontej jun an carta naj Hiram sreyal Tiro, tet naj Salomón bꞌey chi yal jaxca tiꞌ: Jaach Salomón, jaꞌ Jehová jix jaach aon oc yin reyal bꞌey Israel tuꞌ, yutol caw ey scamcꞌulal yin sconobꞌ. 12 Yuxan al-le ojabꞌ watxꞌ kꞌane yin Jehová sDiosal Israel, jaꞌton Naj jix waꞌnen satcan, cꞌal txꞌotxꞌ txꞌotxꞌ tiꞌ, yutol jaꞌ jix jaach sicꞌon el xol ebꞌ ja wuẍtaj, jex tol scꞌaal jex naj rey David, yutol caw jelan ja naꞌbꞌal, cuywinaj jaach yin jelanil, tol jaach oj ja waꞌne a jun stemplo Jehová yetoj junoj ja palacio. 13 Yuxan chin chejtoj jun winaj tol caw jelan ey jaach tuꞌ, caw ey snaꞌbꞌal naj, jaꞌton: Hiram tol cuywinaj. 14 Jaꞌ naj tuꞌ, yuneꞌ jun ix titnaj yin yicꞌaal Dan, a conobꞌ Tiro smam naj. Jaꞌ jun tuꞌ, caw jelan smulna yin chꞌen oro, yin chꞌen plata, yin chꞌen bronce, yin chꞌen hierro, cꞌal yin wanojxa chꞌen chꞌen; chi skeꞌ cꞌal pax smulna yin joso teꞌ. Caw jelan naj swaꞌnen oc masanil yelawil an kꞌejweinaj kꞌap, an yaxin kꞌap, cꞌal yin an cajin kꞌap, yetoj cꞌal an lino. Chi naꞌcha cꞌal pax el yu tzet chi yun swaꞌxi junoj mulnail, yal cꞌal tzet chi al-le tet naj. Jaꞌ naj oj eecꞌ yetoj ebꞌ naj ja mulnawom tol jelan tuꞌ, jaꞌton ebꞌ chi mulna yetoj naj ja mam, naj tol miman yeloc apnoj yul jin sat. 15 Yu jun tuꞌ xin, chi wal ey jaach tol cha watej ixim tiriw tuꞌ ey jon, ixim cebada, yetoj aceite olivo cꞌal yal uva jix ja walaꞌ tol oj ja wakꞌa. 16 Yajbꞌan tuꞌ, jaon tiꞌ jon, oj kiꞌel teꞌ teꞌ bꞌey Líbano jantaj teꞌ tol oj oc yopiso ja wu, catuꞌ oj cu kꞌalon ey teꞌ, oj kaontoj teꞌ yibꞌan jaꞌ mar, masantaꞌcꞌal chi apni oc teꞌ bꞌey conobꞌ Jope. Jaach oj ja wiꞌtoj teꞌ bꞌey Jerusalén, ẍi naj Hiram sreyal Tiro tet Salomón.

17 Jix lawi tuꞌ xin, jix iꞌle a sbꞌisil masanil ebꞌ txꞌoj conobꞌal yu naj Salomón, ebꞌ caan bꞌey conobꞌ Israel tuꞌ, jaxca jix yun sbꞌisle ebꞌ Israel yu smam. Jaꞌ sbꞌisil ebꞌ tuꞌ, ey 153,600 ebꞌ yin masanil. 18 Jix oc jun 70,000 ebꞌ yin bꞌelo ecꞌ ijatz, yetoj 80,000 ebꞌ josom chꞌen bꞌey txꞌotxꞌ tzalquiltaj txꞌotxꞌ, cꞌal 3,600 ebꞌ caporal, jaꞌton ebꞌ chi ijbꞌan ebꞌ mulnawom tuꞌ.