Jix Yal Jun Swa Kꞌane Naj Rey Salomón Yetoj Naj Hiram
5
Jaꞌ yet jix yabꞌen naj Hiram sreyal conobꞌ Tiro, tol jaꞌ naj Salomón jix oc yin reyal sqꞌuexeloj smam, eyman jix yatej wan yakꞌomal servil yet chi kꞌanabꞌ ebꞌ yetoj naj Salomón, yutol caw swatxꞌil ánima sbꞌa naj Hiram tuꞌ yetoj naj camom David. 2 Yu tuꞌ xin, jix yalontoj jun kꞌane naj rey Salomón tet ebꞌ ẍejabꞌ naj Hiram, jix yaltoj jaxca tiꞌ: 3 Jaach tiꞌ, caw ja wotaj yeoc jun kꞌane tiꞌ, tol jaꞌ naj jin mam ma skeꞌ swaꞌnen can a junoj templo yet Jehová cu Diosal jon, yutol naatil jix yakꞌ jowal, masantaꞌcꞌal jix ale oc ebꞌ scajat yul skꞌabꞌ yu Jehová. 4 Jaꞌ tinaniꞌ xin, tuxa jix yakꞌ swatxꞌcꞌulal Jehová cu nan cu xol jaon Israel jon tiꞌ, cꞌamxa mac chi jowi oc kin jon, yuxan cꞌamxa bꞌey chi cu xiw tinaniꞌ jon. 5 Yuxan jix jin naꞌ tol chin waꞌne a junoj stemplo Jehová jin Diosal, jaxca jix yun yalon can tet naj jin mam David, yutol jaꞌ junoj scꞌaal chi oc can sqꞌuexeloj bꞌey sdespacho, jaꞌ chi waꞌnen a junoj templo bꞌey chi oc eyilal tet. 6 Yu tuꞌ xin, chin kꞌan ey jaach, tol ojabꞌ cha chaꞌ kꞌuple el steꞌal, jaꞌton teꞌ kꞌuteꞌ ey bꞌey Líbano. Oj watoj ebꞌ naj chi mulna wetoj tiꞌ yet chi colwa yetoj ebꞌ naj ja mulnawom tuꞌ, oj wakꞌ stool scꞌu ebꞌ naj jatacꞌalaꞌ jantaj cha kꞌanaꞌ, yutol ja wotaj tol jaon tiꞌ jon cꞌam junoj jon kotaj chi cu kꞌup teꞌ jaxca jex a Sidonio tuꞌ, ẍi toj naj Salomón tet naj Hiram tuꞌ.7 Jaꞌ yet jix yabꞌen oc naj Hiram jun kꞌane jix yaltoj naj Salomón tuꞌ, caw jix tzala a naj. Jix yalon naj jaxca tiꞌ: Al-le ojabꞌ watxꞌ kꞌane yin Jehová, yutol jix akꞌle jun scꞌaal naj David yu Dios, jun caw wal ey snaꞌbꞌal jix oc can sqꞌuexeloj yet chi yijbꞌan jun miman conobꞌ tiꞌ, ẍi naj.
8 Yin eymanil jix yun spajtzele skꞌane naj Salomón yu naj Hiram tuꞌ, jix yalontej jaxca tiꞌ: Tuxa jix jin chaꞌ ja kꞌane jix ja waltej tiꞌ, tiꞌ chin sey ebꞌ naj oj kꞌupon el teꞌ kꞌuteꞌ yetoj teꞌ kꞌuꞌta jaxca jix yun ja walontej tuꞌ, catuꞌ oj waontoj teꞌ ey jaach tituꞌ. 9 Jaꞌ ebꞌ naj jin mulnawom tiꞌ oj iꞌon eytej teꞌ bꞌey sjolom wonan bꞌey Líbano, catuꞌ oj ey apnoj teꞌ bꞌey stiꞌ jaꞌ mar. Junne xa oj yun yoc teꞌ yibꞌan jaꞌ, queytuꞌ oj yun yapni oc teꞌ bꞌey chi yoche ja cꞌul tuꞌ. Jaꞌ tituꞌ oj je chaꞌ yecꞌ apnoj teꞌ, jaxa je yiꞌontoj teꞌ tuꞌ, asan xin, jaach oj ja watej jin loꞌbꞌe yetoj ebꞌ chi mulna wetoj yul jin palacio tiꞌ, ẍi naj Hiram tuꞌ.
10 Queyton tuꞌ jix yun yakꞌle teꞌ kꞌuteꞌ cꞌal teꞌ kꞌuꞌta yu naj Hiram yet chi oc teꞌ yin yopiso yu naj Salomón, 11 catuꞌ jix akꞌle jantaj tzet chi sloꞌ naj Hiram bꞌey spalacio yin junjun abꞌil yu naj Salomón: Jix akꞌ 75,000 quintal ixim tiriw cꞌal 115,000 galón aceite chi el yin teꞌ olivo yin junjun abꞌil.
12 Queytuꞌ jix yun yakꞌle jelanil snaꞌbꞌal naj Salomón yu Jehová, jaxca jix yun yalon canoj. Catuꞌ jix swaꞌnen can jun swa kꞌane naj Hiram yetoj naj Salomón tuꞌ, jix yamigone ey sbꞌa ebꞌ; queyton tuꞌ jix yun yoc can watxꞌcꞌulal snan xol ebꞌ.
13-14 Jix yalon naj rey Salomón, tol chi al-le tet masanil ebꞌ conobꞌ Israel, tol sowalil chi too ebꞌ mulnawom yet chi too iꞌle eytej teꞌ bꞌey Líbano. Jaꞌ sbꞌisil ebꞌ tuꞌ ey 30,000 ebꞌ winaj yin masanil. 10,000 ebꞌ chi chejletoj mulna yin junjun xꞌaaw, jun xꞌaaw chi bꞌet ebꞌ mulna bꞌey Líbano; caabꞌ xꞌaaw chi bꞌetecꞌ ebꞌ naj bꞌey sna. Jaꞌ naj Adoniram eyoc syaawiloj ebꞌ naj 30,000 tuꞌ. 15 Ey pax 70,000 ebꞌ naj chi bꞌelomtej ijatz, catuꞌ ey 80,000 ebꞌ chi makꞌom poꞌo chꞌen chꞌen bꞌey sjolomlaj wonan yul yet Israel. 16 Catuꞌ txꞌoj pax ye 3,300 ebꞌ eyoc yin yakꞌon cuenta ebꞌ chi mulna tuꞌ. 17 Jix yalon naj rey Salomón tol chi smakꞌle eltej chꞌen mimej chꞌen tol watxꞌ chi yun yeltej, yet chi eycantoj chꞌen yichoj xeꞌ stemplo Jehová, yetoj cꞌal chꞌen patxquiltaj chi yun sjosle eyoj. 18 Jaꞌ ebꞌ smulnawom naj Salomón, yetoj cꞌal ebꞌ smulnawom naj Hiram, cꞌal ebꞌ caan bꞌey Guebal, jaꞌ ebꞌ jix kꞌupon el teꞌ teꞌ cꞌal sjoson chꞌen chꞌen ebꞌ jix oc yin stemplo Jehová.