Ebꞌ Eyoc Yopiso Yetoj Naj Salomón
4
Jix oc naj Salomón yin reyal xol masanil ebꞌ yet Israelal. 2 Jaꞌ ebꞌ miman yeloc apnoj yin yopiso yetoj naj, jaꞌton ebꞌ tiꞌ: Azarías, scꞌaal naj Sadoc, eyoc yin yakꞌomaloj xaambꞌal; 3 Elihóref yetoj cꞌal Ahías, scꞌaal Sisá, jaꞌton ebꞌ chi tzꞌibꞌen skꞌaneal tzet chi yun naj rey tuꞌ. Jaxa Josafat, scꞌaal Ahilud, stzꞌibꞌlom naj rey yeoc naj. 4 Benaías scꞌaal Joiadá, jaꞌ eyoc syaawiloj ebꞌ soldado; jaxa naj Sadoc yetoj cꞌal Abiatar, yakꞌomal xaambꞌal yeoc ebꞌ; 5 Azarías scꞌaal Natán, jaꞌ yaaw yeoc xol ebꞌ eyoc yin gobernadoral; jaxa naj Zabud scꞌaal naj chi yij Natán, yakꞌomal xaambꞌal yeocoj, catuꞌ chi yakꞌon pax naꞌbꞌale tet naj rey. 6 Jaxa naj Ahisar, jaꞌ jun tuꞌ chi ilon tzet yeoc bꞌey spalacio naj rey, jal naj Adoniram scꞌaal Abdá, jaꞌ naj chi ilon ebꞌ mulnawom tol sowalil chi mulnai.7 Jaꞌ naj rey Salomón tuꞌ ey lacawan ebꞌ eyoc yin gobernadoral yul masanil yul yet Israel, jaꞌ yopiso wan tuꞌ, tol junjun ebꞌ chi iꞌontej sloꞌbꞌe naj rey yetoj ebꞌ yuninal bꞌey sna yin junjun xꞌaaw yul abꞌil. 8 Jaꞌ sbꞌi ebꞌ lacawan eyoc yin gobernadoral tuꞌ, jaꞌton ebꞌ tiꞌ:
Ben-Hur naj ey bꞌey txꞌotxꞌ tzalquiltaj yul yet Efraín.
9 Naj Ben-déquer jaꞌ a cuenta yiꞌontej bꞌey wanxa conobꞌ tiꞌ: Macás, Saalbim, Bet-semes, Elón cꞌal Bet-hanán.
10 Ben-hésed, bꞌey Arubot yetoj cꞌal pax bꞌey Socó cꞌal bꞌey masanil yul yet Héfer;
11 Ben-abinadab, bꞌey masanil yul yet Dor; jaꞌ yistil naj tuꞌ jaꞌton ix Tafat, scutzꞌin naj Salomón;
12 Baaná, scꞌaal Ahilud, bꞌey Taanac, Meguido yetoj cꞌal masanil yul yet Bet-seán; jaꞌ jun tuꞌ junne ey yetoj Saretán, bꞌey yalan eytej Jezreel, chi too tacꞌal bꞌey Bet-seán masantaꞌcꞌal chi apni oc bꞌey Abel-meholá bꞌey sattajto Jocmeam.
13 Ben-guéber, bꞌey Ramot yul yet Galaad, jaꞌton jun tuꞌ chi ilon masanil wan aldea yul yet Galaad, jaꞌton wan tuꞌ yet naj Jaír scꞌaal Manasés, cꞌal yul yet Argob; jaꞌ tituꞌ ey cꞌal pax yul yet txꞌotxꞌ Basán. Jaꞌ tituꞌ ey 60 mimej conobꞌ eyoc smuroal yinlaj, catuꞌ jaꞌ chꞌen bronce eyoc yul oj spuertail;
14 cꞌal naj Ahinadab, scꞌaal naj Idó jaꞌ eyoc yin gobernadoral bꞌey Mahanaim,
15 cꞌal naj Ahimaas; jaꞌ naj eyoc yin gobernadoral bꞌey yul yet Neftalí, jaꞌton naj tuꞌ jix nupi yetoj ix Basemat, scutzꞌin naj Salomón.
16 Cꞌal naj Baaná, scꞌaal Husai, eyoc yin gobernadoral bꞌey yul yet Aser, cꞌal bꞌey Alot;
17 jaxa naj Josafat, scꞌaal Parúah, eyoc yin gobernadoral bꞌey yul yet Isacar;
18 naj Simí, scꞌaal Elá, eyoc yin gobernadoral bꞌey yul yet Benjamín;
19 naj Guéber, scꞌaal Urí, eyoc yin gobernadoral bꞌey yul yet Galaad, jaꞌton bꞌey sconobꞌ naj Sihón sreyal Amorreo, cꞌal naj Og sreyal Basán.
Asan jun tuꞌ yaaw yeoc bꞌey wan conobꞌ tuꞌ.
Jaꞌ Sjelanil Cꞌal Sbꞌeomal Naj Salomón
20 Jaꞌ ebꞌ a Judá yetoj ebꞌ Israel cꞌamxa chi bꞌischa jantaj ánima ey yul wan conobꞌ tuꞌ, laan xacꞌal jaxca yarenail bꞌey stiꞌlaj jaꞌ mar. Caw tzꞌajan cꞌal tzet chi sloꞌ ebꞌ cꞌal tzet chi yucꞌ ebꞌ, yuxan caw chi tzala scꞌul ebꞌ sicꞌlebꞌil. 21 Jaꞌ naj Salomón tuꞌ, rey yeoc naj yibꞌan masanil wan conobꞌlaj tuꞌ: Chi tit tacꞌal bꞌey jaꞌ Éufrates masantaꞌcꞌal chi jul bꞌey sconobꞌ ebꞌ Filisteo cꞌal bꞌey smoonal yet Egipto. Masanil ánima tuꞌ, jix yakꞌ stoolabꞌal ebꞌ tet naj Salomón yet iquis ecꞌ naj. 22 Jaꞌ tzet chi sloꞌ naj Salomón yin junjun cꞌu, ey 70 quintal ixim jarina caw koonaj sicꞌlebꞌil. Ey pax junxa 140 quintal wanxa ixim comon jarina, 23 yetoj laoncꞌon noꞌ icham wacax caw wal bꞌakꞌech, yetoj 20 noꞌ icham wacax jix bꞌet tit yul potrero, cꞌal 100 noꞌ meꞌ, txꞌoj pax cꞌal yel noꞌ scꞌultajil che, yetoj cꞌal wanxa tujan noꞌ tzꞌiquin tol caw wal bꞌakꞌech. 24 Jix yakꞌ yaawil naj rey Salomón yul yet txꞌotxꞌ Éufrates bꞌey spacꞌulal yetcꞌulal bꞌey chi too cꞌu, chi tit tacꞌal bꞌey Tífsah masantaꞌcꞌal bꞌey Gaza. Yaaw yeoc naj yibꞌan masanil wan sreyal junjun conobꞌ tuꞌ, catuꞌ cꞌam cꞌal jowal snan xol cꞌal yul-laj smoonal wan conobꞌ tuꞌ.
25 Jaꞌ yet iquis ecꞌ naj Salomón tuꞌ, masanil ánima bꞌey yul yet Judá cꞌal yul yet Israel, chi tit tacꞌal bꞌey Dan masantaꞌcꞌal bꞌey conobꞌ Beerseba, yin cꞌal tzalacꞌulal ey ebꞌ masanil, junjun cꞌal ebꞌ ey yawo cꞌal teꞌ awbꞌeal teꞌ chi yakꞌ sat awbꞌil yu ebꞌ yinlaj sna. 26 Jaꞌ naj Salomón tuꞌ, ey cꞌal pax 4,000 spat ẍe bꞌey chi wey noꞌ che chi tokꞌon ecꞌ wan carruaje yet jowal. Ey cꞌal pax 12,000 ebꞌ soldado chi oc yibꞌan che. 27 Jaxa ebꞌ gobernador chi iꞌontej sloꞌbꞌe naj rey Salomón yetoj masanil mactxequel eyecꞌ yetoj yin junjun xꞌaaw. Chi cam wal yilon ebꞌ ta cꞌam bꞌey chi lawi a sloꞌbꞌe naj rey tuꞌ. 28 Jaꞌ ebꞌ eyoc yin xolilal yu yiꞌontej loꞌbꞌe tuꞌ, chi yiꞌtej ixim cebada cꞌal yan noꞌ che chi juxton ecꞌ carruaje tuꞌ, yetoj cꞌal wanojxa noꞌ che chi kꞌanle yalan ijatz.
29 Cꞌamxa chi alcha jantaj sjelanil naj Salomón jix akꞌle yu Dios. 30 Jaꞌ sjelanil naj Salomón tuꞌ, yel xacꞌal ecꞌbꞌan yintaj yet ebꞌ a Egipto cꞌal yintaj ebꞌ bꞌey chi aol cꞌu. 31 Cꞌamxa junojxa winaj laan sjelanil yetoj naj. Yel xacꞌal jelan yintaj naj Etán, yicꞌaal Zérah, yintaj naj Hemán, yintaj naj Calcol cꞌal yintaj naj Dardá, jaꞌton ebꞌ scꞌaal naj Mahol. Jix bꞌeytoj skꞌumal bꞌey masanil nacionlaj joyan oc yinlaj tuꞌ. 32 Jix yal can el naj Salomón 3,000 cuybꞌanile yet jelanilal, jix swaꞌnen cꞌal pax 1,005 skꞌaneal wan bꞌit naj. 33 Jix yaltej skꞌaneal yin teꞌ teꞌ cꞌal yin awo. Jix ẍaꞌel yich skꞌanabꞌ yin teꞌ kꞌuteꞌ ey bꞌey Líbano masantaꞌcꞌal yinlaj an hisopo chi chꞌibꞌa yichlaj na. Jix kꞌanabꞌ cꞌal pax naj yin noꞌ noꞌ jaxca yin noꞌ tzꞌiquin, yin noꞌ chi sjutx sbꞌa sat txꞌotxꞌ, cꞌal yin noꞌ ey yul-laj jaꞌ jaꞌ. 34 Jaꞌ bꞌey masanil nacionlaj bꞌey jix abꞌle skꞌumal naj Salomón yetoj sjelanil, jix yatej ẍejabꞌ ebꞌ rey yet chi jul smajon ebꞌ yilaꞌ cꞌal yabꞌen sjelanil naj ebꞌ.