3 Jaꞌ Salomón caw wal ey scamcꞌulal yin Jehová, catuꞌ chi sjijen cꞌal wan chejbꞌanile albꞌilcan yu smam jaꞌton, David, yuxan jix yakꞌ xaambꞌal cꞌal yakꞌon tzꞌaꞌ teꞌ incienso tet Jehová bꞌey txꞌotxꞌ tzalquiltaj txꞌotxꞌ, 4 catuꞌ jix bꞌet yakꞌon cꞌal pax xaambꞌal bꞌey Gabaón. Jun mil noꞌ jix yakꞌ tzꞌaꞌ yin xaambꞌal tituꞌ yutol caw bꞌinabꞌil jun txꞌotxꞌ tuꞌ.

5 Jaꞌ yet jun akꞌbꞌal yet eyecꞌ naj Salomón bꞌey Gabaón tuꞌ, jaꞌ tituꞌ jix xꞌox sbꞌa Jehová tet yin weyicheal. Jix yalon jaxca tiꞌ: Yal cꞌal tzet oj ja kꞌan ey jin an, oj wakꞌ ey jaach, ẍi Jehová tet naj.

6 Jix takꞌwi naj Salomón jaxca tiꞌ: Jaach jin Diosal, caw wal ey ja camcꞌulal yin naj camom jin mam, jaꞌton David, yutol jijem cꞌal jix yute sbꞌa naj ey jaach, catuꞌ watxꞌ cꞌal jix yun yakꞌon yaawil. Yetoj cꞌal pax oj, tol jix el yin ja cꞌul tol jain scꞌaal naj tiꞌ, tol chin ey chotan bꞌey sdespacho, jaxca ton wal chi wun tinaniꞌ. 7 Jaach Jehová jin Diosal, jix el wal yin ja cꞌul jix jin ja waon oc yin reyal sqꞌuexeloj naj jin mam, yutol cꞌamto wal jin jelanil walon tzet chi yun ebꞌ conobꞌ, ilaꞌ tol achꞌe winaj jin to. 8 Jaꞌ tinaniꞌ xin, jain oj jin oc yilomaloj ja conobꞌ jix a sicꞌ can el tiꞌ. Jaꞌ jun ja conobꞌ tiꞌ caw wal miman yeocoj, cꞌamxa chi bꞌischa jantaj ebꞌ ánima ey yul jun conobꞌ tiꞌ. 9 Yuxan chin kꞌan ey jaach tol cha wakꞌ jin jelanil yet chi skeꞌ wijbꞌan ebꞌ, cꞌal snaꞌcha el wu tzet yeoc swatxꞌil cꞌal spenail. ¿Tzet wal oj yun wakꞌon cuenta ebꞌ ja conobꞌ tiꞌ, ta man oj ja wakꞌ jin jelanil? ẍi naj Salomón.

10 Caw jix ẍaꞌ scꞌul Jehová tzet jix kꞌan naj Salomón tuꞌ 11 Jix yalon Jehová jaxca tiꞌ: Yutol jaꞌ ja jelanil jix ja kꞌanaꞌ yet cha wotajne el sjichanil, manaj ja kꞌinal, ma ja bꞌeomal, tam wal scamichal ebꞌ ja cajat jix ja kꞌanaꞌ. 12 Yu jun tuꞌ xin, oj wakꞌ tzet jix ja kꞌan tuꞌ. Oj wakꞌ ja naꞌbꞌal cꞌal ja jelanil, cꞌam junojxa ecꞌbꞌan sjelanil jaxca jaach tiꞌ. Cꞌam pax junojxa oj pitzcꞌu a yet oj jaach ecꞌ eloj. 13 Man asanne oj ja jelanil oj wakꞌa, oj wakꞌ cꞌal pax ja bꞌeomal, miman oj yun ja welocoj, caw oj jaach bꞌinale ecꞌoj, caxcꞌal ma ja kꞌan wan tiꞌ ey jin an, oj wakꞌ cꞌal ey jaach. Chi yal yeloc apnoj tol cꞌam junojxa rey oj tzajlo sbꞌeomal jaxca jaach tiꞌ. 14 Ta oj ja jije cꞌal tzet chi yoche jin cꞌul, catuꞌ oj ja jije cꞌal jin chejbꞌanil jaxca jix yun sjijen naj ja mam, oj wakꞌ naatbꞌoj ja kꞌinal, ẍi Dios.

15 Jaxa yet jix el sweyan naj rey Salomón tuꞌ, jix snaꞌon naj tol weyich chi yunne. Jix lawi tuꞌ, catuꞌ jix too naj bꞌey conobꞌ Jerusalén, jix too naj scꞌatan teꞌ Scaẍail Swa Kꞌane Jehová, catuꞌ jix yakꞌon xaambꞌal chi tzꞌaꞌi, cꞌal xaambꞌal yet watxꞌcꞌulal yetoj Dios. Jix lawi tuꞌ, catuꞌ jix yawten low masanil ebꞌ eyoc yin yopiso yetoj.

16 Jayebꞌ jix to wal cꞌu tuꞌ xin, ey cawan ebꞌ ix amul ix jix apni oc yet chi swaꞌnen yeoc jun skꞌane ebꞌ ix sattaj naj rey Salomón tuꞌ. 17 Jix yalon jun ix tet naj jaxca tiꞌ:

—Jaach rey, jain tiꞌ yetoj junxa ix wet ixal tiꞌ, junne nail ke jon. Jaꞌ yet jix aapnoj scꞌual, jix ali jun wuneꞌ. 18 Scaabꞌial wal tuꞌ, catuꞌ jix ali pax yuneꞌ junxa ix tiꞌ. Asan jon cu cawanil yul na tuꞌ, cꞌam junojxa. 19 Jaꞌ yet akꞌbꞌalil jix ẍeme cam jun yuneꞌ ix tiꞌ, yet caw qꞌueynaj el scꞌul ix sweyi. 20 Jaxa yet chuman akꞌbꞌal xin, jix el sweyan ix, catuꞌ jix jul stelbꞌan can ey jun yuneꞌ jix cam tuꞌ jin cꞌatan, jaxa jun wuneꞌ tol iquis tuꞌ, jix yiꞌtoj ix scꞌatan sqꞌuexeloj jun yet tuꞌ. 21 Jaxa yet jix sajbꞌi a xin, catuꞌ jix wakꞌon yim wuneꞌ tuꞌ waloni, jaxa jix wiloni tol camnajxa jun unin tuꞌ. Jaxa yet caw jix sajbꞌi xacꞌal el xin, catuꞌ jix wiloni tol man wetoj jun unin tuꞌ, ẍi ix.

22 Jix lawi tuꞌ jix yalon yet junxa ix tuꞌ:

—Cꞌamaj, jaꞌ jun unin iquisto tiꞌ wet an, jaꞌ jun camnajxa tuꞌ ja wet, ẍi junxa ix tuꞌ.

Jix yalon pax ix bꞌabꞌel tuꞌ jaxca tiꞌ:

—Cꞌamaj, jaꞌ jun camnajxa tuꞌ ja wet, jaꞌ jun iquisto tiꞌ wet an, ẍi ix.

Quey cꞌal tuꞌ jix yun steelen cꞌal sbꞌa ebꞌ ix sattaj naj rey tuꞌ. 23 Catuꞌ jix yalon naj rey jaxca tiꞌ: Jaꞌ jun ix tiꞌ chi yal ix: Wet jun unin iquisto tiꞌ, jaꞌ jun camnajxa tuꞌ ja wet, ẍi ix. Jacꞌalaꞌ junxa ix tuꞌ quey cꞌal tuꞌ chi yun yalon pax ix tet ix bꞌabꞌel jix alon tuꞌ, ẍi naj rey. 24 Yu tuꞌ xin jix yalon naj rey jaxca tiꞌ:

—Iꞌwejtej junoj chꞌen espada ey jin an, ẍi naj.

Jaꞌ yet jix apni oc chꞌen espada tuꞌ, 25 jix yalon naj jaxca tiꞌ:

—Tzokꞌwej ey snan jun yaliẍ unin iquisto tiꞌ, catuꞌ che yakꞌon nan nanoj yet junjun ebꞌ ix, ẍi naj.

26 Jaꞌ ix ey yet jun yaliẍ unin iquisto tuꞌ, jix oc pitzꞌan cuscꞌulal yin ix, jix yalon ix tet naj rey jaxca tiꞌ:

—El ojabꞌ yin ja cꞌul jaach rey, cꞌam ojabꞌ chi tzokꞌle cam jun unin tiꞌ, akꞌle ojabꞌ tet ix tiꞌ, ẍi ix. Jix yalon pax junxa ix tuꞌ jaxca tiꞌ:

—Cꞌam chi can wetoj, tam wal yetoj ix tuꞌ, tzokꞌle ojabꞌ ey snan, ẍi ix.

27 Jix lawi tuꞌ, jix yalon naj rey jaxca tiꞌ:

—Manche je makꞌ cam jun unin tuꞌ, akꞌle ojabꞌ tet ix cꞌam chi yal scꞌul chi makꞌle cam tuꞌ, yutol yel chi yal ix, tol jaꞌ ix ey yet jun unin tiꞌ, ẍi naj rey.

28 Masanil conobꞌ Israel jix abꞌen ocoj, yu tzet jix yun swaꞌnen yeoc jun kꞌane naj rey tuꞌ, caw wal miman yeloc apnoj naj yul sat ebꞌ ánima, yuxan jix naꞌcha el yu ebꞌ tol jix akꞌle sjelanil naj yu Dios, yet jix swaꞌne yeoc jun jowal naj tuꞌ.