5 Tuxa wal ja wotajxa tzet jix jin yute naj Joab, naj yuneꞌ ix Seruiá, jix smakꞌ cam cawan syaawil soldado ebꞌ ket Israelal: Jaꞌton naj Abner scꞌaal Ner, yetoj cꞌal Amasá scꞌaal Jéter. Jaꞌ yet cꞌam jowal eyocoj catuꞌ jix makꞌle cam ebꞌ yu naj, jaxca tol xol jowal jix makꞌle cam ebꞌ, tol jix bꞌonchatoj scꞌalil cꞌal xanabꞌ yu ẍiqꞌuil ebꞌ. 6 Yu tuꞌ xin, caw jelan ojabꞌ cha wute ja bꞌa, tol man oj cam Joab tuꞌ yin jaxca cꞌal tuꞌ. 7 Jal pax ebꞌ naj scꞌaal Barzilai a Galaad, cha camcꞌulne cꞌal ebꞌ jin kꞌanaꞌ, cha wawte low ebꞌ ja wetoj. Jaꞌ ebꞌ naj tuꞌ jix colwa ebꞌ wetoj yet jix jin el tet naj ja wuẍtaj Absalón. 8 Jal pax Simí eyecꞌ naj titiꞌ, jaꞌton scꞌaal Guerá, a conobꞌ Bahurim yet yicꞌaal Benjamín, caw wal pena tzet jix yal naj tuꞌ win yet ey jin oc yul jin bꞌe bꞌey Mahanaim, jix apni oc naj jin ẍaꞌon bꞌey jaꞌ Jordán. Jix oc tean naj win tol chi wakꞌ mimancꞌulal yin, yuxan yin sbꞌi Jehová jix wakꞌon jin tiꞌ tol cꞌam chin makꞌ camoj. 9 Jaꞌ naj tuꞌ cꞌam cha wakꞌ mimancꞌulal yin. Asan xin, jaach tiꞌ caw ey ja naꞌbꞌal. Chi cam ja naꞌon tzet oj ja wute naj. Man ojabꞌ tucꞌal oj chi cam naj jaxca tuꞌ, yutol oj makꞌle cꞌaltaꞌ camoj, ẍi naj rey David.

10 Jaꞌ yet jix cam naj rey David tuꞌ, jatuꞌ jix mujle naj yul conobꞌ chi yij David. 11 Cawinaj abꞌil jix yakꞌ reyal yibꞌan conobꞌ Israel; jujebꞌ abꞌil jix yakꞌ yaawil bꞌey Hebrón, jaxa junxa 33 abꞌil xin, jaꞌ bꞌey conobꞌ Jerusalén jix yakꞌ yaawil. 12 Jaxa naj Salomón jix oc can yin reyal sqꞌuexeloj smam, caw tecꞌan jix yute sbꞌa naj yin yopiso tuꞌ.

13 Jaꞌ naj Adonías yuneꞌ ix Haguit, jix too naj yil ix Betsabé ix xutx naj Salomón. Jix skꞌanle ix tet jaxca tiꞌ:

—¿Watxꞌ mi naꞌbꞌale chi jul ja walaꞌ ma cꞌamaj? ẍi ix tet naj.

14 —Jaaꞌ, watxꞌ toni, ey wal jun jin naꞌbꞌal ja win, ẍi naj tet ix.

—Al ey jin an xin, tzet ja naꞌbꞌal tuꞌ, ẍi ix tet naj.

15 —Ja wotaj tol wet xa taꞌle yeoc jun opiso tuꞌ, masanil ebꞌ conobꞌ Israel chi echbꞌanen bꞌakꞌin chin oc yin reyal. Jaxa tinaniꞌ xin, jaꞌ naj wuẍtaj Salomón jix oc yin reyal, yutol jaxca tuꞌ jix el yin scꞌul Jehová. 16 Jaꞌ tinaniꞌ xin, ey wal jun tzet chin kꞌan ey jaach, tol cꞌam ojabꞌ cha tenecꞌoj, ẍi naj tet ix.

—Al tzet cha woche tuꞌ, ẍi ix tet naj.

17 Jix yalon naj jaxca tiꞌ:

—Chin kꞌan ey jaach tol cha wal tet naj rey Salomón, tol chi akꞌle ix Abisag a Sunem tiꞌ yet chi oc ix wistiloj an, oj sjije cꞌaltaꞌ naj tzet oj ja walaꞌ, ẍi naj tet ix.

18 —Quey ojabꞌ tuꞌ xin, oj wal tet naj tzet cha woche tuꞌ, ẍi ix tet naj.

19 Jix lawi tuꞌ, catuꞌ jix too ix Betsabé yalon tet naj Salomón yu tzet chi snaꞌ naj Adonías tuꞌ. Jix cꞌal yil naj rey yocapnoj ix, catuꞌ jix a waan naj yul ẍila tuꞌ, jix ẍaꞌon yapni xutx naj, catuꞌ jix ey noan naj sattaj ix. Jix lawi tuꞌ xin, catuꞌ jix ey chotan naj bꞌey yul sdespacho tuꞌ, jix yakꞌon bꞌet iꞌletej jun miman ẍila catuꞌ jix ey chotan ix bꞌey yetcꞌulal swatxꞌ kꞌabꞌ naj. 20 Jix yalon ix tet naj jaxca tiꞌ:

—Ey jayebꞌ bꞌelan jin kꞌane chi wal ey jaach, tol cꞌam ojabꞌ cha tenecꞌ tzet oj walaꞌ, ẍi ix tet naj.

—Al masanil tzet cha kꞌan tuꞌ xin, chicay, cꞌam cꞌal cha naꞌ ta tol chin tenecꞌoj, ẍi naj.

21 —Tol ojabꞌ cha wakꞌ ix Abisag Sunamita yistiloj naj ja wuẍtaj Adonías, ẍi ix tet naj.

22 —¿Tzet yuxan chi jul ja kꞌan ix Abisag tuꞌ yistiloj naj Adonías tuꞌ? xi naj tet xutx: ¿Jaxa cꞌal mi wopiso tiꞌ oj jul ja kꞌanecꞌ ey jin catuꞌ chi wakꞌon tet naj, yutol bꞌabꞌel winaj naj jin sattaj an, catuꞌ eyoc naj yakꞌomal xaambꞌal chi yij Abiatar cꞌal Joab yuneꞌ ix Seruiá yetoj naj? ẍi naj tet ix.

23 Jix lawi yalon naj Salomón jaxca tuꞌ, jix yakꞌon stiꞌ naj jix yalon jaxca tiꞌ: Jaꞌ ojabꞌ Jehová chi aontej syaꞌilal wibꞌan, ta cꞌam chi cam naj Adonías yu tzet chi skꞌan naj ey jin. 24 Jaꞌ Jehová jix jin aon oc yin reyal sqꞌuexeloj naj jin mam David, yet watxꞌ chi yun can el bꞌey jix yakꞌ can stiꞌ, tol jix yakꞌ jun yopiso tiꞌ ey jin cꞌal tet masanil ebꞌ wicꞌaal, yuxan chi wakꞌ jin tiꞌ sattaj Jehová, tol jaꞌ yet jun cꞌu tiꞌ oj cam naj Adonías tuꞌ, ẍi Salomón.

25 Jaꞌ yet jun txolan tuꞌ xin, jix yalon naj rey tet naj Benaías scꞌaal Joiadá tol chi too makꞌle cam naj Adonías tuꞌ, yuxan jaxca tuꞌ jix yunne. 26 Jix yalon cꞌal pax naj rey tet naj yakꞌomal xaambꞌal chi yij Abiatar: Jaꞌ tinaniꞌ chi wal ey jaach, tol chach too bꞌey ja txꞌotxꞌ bꞌey conobꞌ Anatot; jaach tiꞌ smoo chach cami, asan xin, man oj jaach jin makꞌ camoj, yutol jaach ey jaach oc yilomaloj teꞌ Scaẍail Swa Kꞌane Jehová yul stiempoal naj jin mam, catuꞌ jaach jun jix ja wetne ja cꞌul yetoj naj jin mam tuꞌ, ẍi naj Salomón. 27 Queytuꞌ jix yun yelcan naj Abiatar yin yakꞌomal xaambꞌal yu naj Salomón, catuꞌ jix yunen can el tzet albꞌilcan yu Jehová bꞌey conobꞌ Siló yin ebꞌ yicꞌaal naj Elí.

28 Jacꞌalaꞌ cꞌal pax Joab, naj jix yaoc sbꞌa yetoj Adonías, caxcꞌal ma yaoc sbꞌa yetoj naj Absalón. Yu tuꞌ xin, jaꞌ yet jix apni jix yabꞌen oc jun kꞌane naj tuꞌ, yuxan jix too yewbꞌa el sbꞌa naj bꞌey yul scalubꞌal Jehová chi yute snaꞌoni, jix oc mitxꞌan naj yin yucꞌaꞌ jun yet xaambꞌal. 29 Catuꞌ jix al-le tet naj rey Salomón yutol jix too yewbꞌa el sbꞌa naj Joab bꞌey scalubꞌal Jehová bꞌey jun yet xaambꞌal tuꞌ. Jix yalon naj Salomón tet naj Benaías jaxca tiꞌ: Asiꞌ, catuꞌ chi too ja makꞌon cam naj Joab tuꞌ. 30 Jix too naj xin, jix yalon tet jaxca tiꞌ:

—Tuxa jix yal naj rey tol chach eltej tituꞌ, ẍi tet naj.

Catuꞌ jix takꞌwi naj Joab jaxca tiꞌ:

—Cꞌamaj, jaꞌ titiꞌ chi skeꞌ jin cami, ẍi naj.

Jix too pax naj Benaías yalon tet naj rey Salomón tzet jix yute takꞌwoj sbꞌa naj Joab tuꞌ. 31 Jix yalon naj rey jaxca tiꞌ:

—Cam ojabꞌ naj tituꞌ xin, yun ojabꞌ jaxca tzet chi yoche naj, cha mujon can eytoj naj yet watxꞌ cꞌamxa chi bꞌina ecꞌ sbꞌi naj xol ebꞌ yicꞌaal jin mam, cꞌal yu ebꞌ ánima cꞌam spenail jix smakꞌ cam naj Joab tuꞌ. 32 Jaꞌ ojabꞌ Jehová, chi akꞌon ijtzan naj Joab tuꞌ yu scamichal naj, yutol man yotaj oj naj jin mam David yet jix makꞌle cam naj Abner scꞌaal Ner yu naj, naj syaawil ebꞌ soldado Israel, cꞌal naj Amasá scꞌaal Jéter syaawil ebꞌ soldado Judá. Jaꞌ ebꞌ cawan tuꞌ caw wal watxꞌ ebꞌ naj, jijem jix yute sbꞌa ebꞌ naj tuꞌ. 33 Jaꞌ yu scamichal ebꞌ tuꞌ, oc ojabꞌ can smuloj Joab yetoj ebꞌ yicꞌaal. Jaxa pax kibꞌan jaon yicꞌaal jon rey David tiꞌ xin, jaꞌ ojabꞌ swatxꞌcꞌulal Jehová chi yakꞌ ey jon, yet chi cu ey cꞌal chotan bꞌey sdespacho tiꞌ, ẍi naj Salomón.

34 Jix lawi tuꞌ, catuꞌ jix too naj Benaías smakꞌon cam Joab. Jaꞌ yet jix lawi smakꞌon cam tuꞌ xin, catuꞌ jix mujle can eytoj naj bꞌey sna bꞌey txꞌotxꞌ cusiltaj txꞌotxꞌ. 35 Jaxa naj Benaías jix ale can oc naj yin syaawiloj ebꞌ soldado sqꞌuexeloj naj Joab yu naj rey, cꞌal naj yakꞌomal xaambꞌal chi yij Sadoc jix oc can sqꞌuexeloj naj Abiatar. 36 Jix lawi tuꞌ, catuꞌ jix yakꞌon naj rey yu stoo iꞌletej naj Simí, jix yalon tet jaxca tiꞌ:

—Waꞌne a junoj ja na bꞌey Jerusalén tiꞌ bꞌey chach caey ecꞌoj, junelne chach can titiꞌ. 37 Ta tol chach el titiꞌ, catuꞌ chach ecꞌtoj bꞌey skꞌaxepal sjobꞌeal Cedrón tuꞌ, cꞌam chi ecꞌtoj ja cami. Jaꞌ ja camichal tuꞌ, cꞌam walon wet yin an, ẍi naj. 38 Jix takꞌwi naj Simí jaxca tiꞌ:

—Yun ojabꞌi, oj jin jije cꞌal tzet cha wal tuꞌ jaach rey, ẍi naj.

Naatil jix caey ecꞌ naj Simí tuꞌ bꞌey Jerusalén. 39 Jaxa yet yox abꞌil tuꞌ, catuꞌ jix elcan cawan ebꞌ chi akꞌon servil yintaj, jaxa yintaj naj Aquís scꞌaal Maacá, eyoc sreyal conobꞌ Gat jix apni oc ebꞌ. Jaxa yet jix al-le tet naj Simí tol jaꞌ tituꞌ eyecꞌ ebꞌ naj yakꞌomal servil bꞌey Gat bꞌey caan naj Aquís, 40 eyman jix yaoc stzꞌuum noꞌ sbꞌuru yet chi too seyon ebꞌ yakꞌomal servil tuꞌ bꞌey conobꞌ Gat, bꞌey ey naj Aquís. Jaxa yet jix meltzo yetoj ebꞌ yakꞌomal servil tuꞌ, 41 jix yabꞌen naj Salomón tol jaꞌ naj Simí jix bꞌetecꞌ bꞌey conobꞌ Gat, asan xin xax meltzo pax tej naj bꞌey Jerusalén. 42 Jix ẍejon naj rey yu stoo tit naj Simí, jix yalon tet jaxca tiꞌ:

—¿Tumi ma wal ey jaach an, tol jix ja wakꞌcan ja tiꞌ sattaj Jehová tol cꞌam chi skeꞌ ja weltoj bꞌey yul conobꞌ Jerusalén tiꞌ, jix cam walon ey jaach ta ey bꞌey chach too bꞌey junojxa conobꞌ cꞌam chi ecꞌtoj ja cami? ¿Tumi ma jaach takꞌwoj yet jix walon ey jaach tuꞌ, jix ja waloni tol oj ja jije tzet jix walaꞌ? 43 ¿Tzet yuxan ma ja jije bꞌey jix ja wakꞌcan ja tiꞌ sattaj Jehová tuꞌ, catuꞌ ma ja jije tzet jix walaꞌ? 44 Naꞌtej tinaniꞌ jantaj spenail jix ja wun tet naj jin mam. Jaꞌ tinaniꞌ jaꞌ Jehová oj jaach aon oc yin syaꞌtajil, jaxca syaꞌtajil jix ja waoc yibꞌan naj jin mam. 45 Jaxa pax jin jain tiꞌ, jaꞌ ojabꞌ syaaxilal Jehová chi yakꞌ wibꞌan. Jaxa ebꞌ yicꞌaal jin mam, oj yakꞌ yaawilal ebꞌ bꞌey sdespacho, ẍi naj rey tuꞌ.

46 Jix lawi tuꞌ xin, jix yalon naj rey tet naj Benaías scꞌaal Joiadá tol chi too makꞌle cam naj Simí tuꞌ. Queytuꞌ jix yun scawxi can oc naj Salomón yin yopiso.