3 Yuxan jix aletoj seyomal junoj ix kꞌopo yu ebꞌ bꞌey masanil yul yet Israel, jix ilcha oc jun kꞌopo ix yu ebꞌ, chi yij Abisag, a conobꞌ Sunem. Jix iꞌletej ix tet naj rey David yu ebꞌ. 4 Caw watxꞌ yili ix Abisag tuꞌ. Jaꞌton ix jix teynen naj rey David tuꞌ, catuꞌ jix wey pax ix yetoj naj, asan xin cꞌam cꞌal tzet jix yun naj yetoj ix.

5 Jaꞌ naj Adonías scꞌaal naj David yetoj ix Haguit, jix yaoc sbꞌa naj yin reyal yul yet xꞌojli. Jix yiꞌontoj wan carruaje yet jowal, yetoj cꞌal wan ebꞌ soldado eyoc yibꞌan che, yetoj 50 ebꞌ soldado jix yiꞌoc yetoj. 6 Yet tax cꞌal jix chꞌibꞌa naj Adonías tuꞌ, cꞌam cꞌal bꞌey jix akꞌle cuenta naj yu smam, cꞌam cꞌal bꞌey jix akꞌle snaꞌbꞌal cꞌal tzet xolilal chi yute sbꞌeybꞌal. Caw wal watxꞌ yili naj Adonías tuꞌ, jaꞌton naj tiꞌ tzunan xa jix ali tet naj Absalón, caw wal laan cꞌal yili ebꞌ scawanil. 7 Jaꞌ naj Joab tuꞌ, yuneꞌ ix Seruiá, jix swa al-lne yetoj naj yakꞌomal xaambꞌal chi yij Abiatar, yuxan jix yaoc sbꞌa ebꞌ yetoj naj Adonías tuꞌ. 8 Jaxa pax naj yakꞌomal xaambꞌal chi yij Sadoc, cꞌal Benaías scꞌaal Joiadá, yetoj Natán naj ẍejabꞌ Dios, Simí, Rei yetoj cꞌal ebꞌ soldado chi teynen naj rey David tuꞌ, ma yaoc sbꞌa ebꞌ yetoj naj Adonías tuꞌ.

9 Jaꞌ yet jun tiempoal tuꞌ, jix swaꞌne jun miman loꞌbꞌe naj Adonías bꞌey yich jun chꞌen chꞌen chi yij Zohelet scawilal bꞌey chi aol jaꞌ jaꞌ bꞌey Roguel. Caw ecꞌal noꞌ meꞌ, noꞌ icham wacax, yetoj cꞌal noꞌ achꞌe wacax caw bꞌakꞌech jix yakꞌ yin xaambꞌalil, catuꞌ jix yawten ebꞌ yuẍtaj, jaꞌton ebꞌ scꞌaal naj rey David yetoj masanil ebꞌ a Judá chi mulna yetoj naj rey tuꞌ. 10 Jal naj ẍejabꞌ Dios chi yij Natán, ma awtele naj yu. Ma cꞌal pax awtele naj Benaías, yetoj ebꞌ soldado chi teynen naj rey David, cꞌal tet yuẍtaj chi yij Salomón. 11 Jix lawi tuꞌ, catuꞌ jix too Natán yalon yabꞌ ix Betsabé jaꞌton ix xutx naj Salomón, jix yalon tet ix jaxca tiꞌ:

—¿Tumi cꞌamto tzet cha wabꞌoc xin, tol jaꞌ naj Adonías yuneꞌ ix Haguit, jix yaoc sbꞌa naj yin reyal yin ewantajil, man yotaj oj naj rey David? 12 Yuxan, jaꞌ tinaniꞌ ey jun naꞌbꞌale chi wal ey jaach an, yet watxꞌ, man oj jaach cam yetoj naj ja wuneꞌ Salomón tuꞌ. 13 Asiꞌ sattaj naj rey David, catuꞌ cha walon tet naj jaxca tiꞌ: Jaach rey, jix ja wakꞌcan ja tiꞌ ey jin tol jaꞌ naj wuneꞌ Salomón tiꞌ, oj oc can naj yin reyal ja qꞌuexeloj, jaꞌ naj oj oc cantoj yul ja despacho. ¿Tzet yuxan jaꞌ naj Adonías eyxa oc yin reyal? ja chi tet naj. 14 Jaꞌ yet lalan ja kꞌanabꞌ yetoj naj rey tuꞌ catuꞌ oj jin apni ocoj. Jain xa oj walaꞌ tol yel jun tzet cha wal tuꞌ, ẍi Natán tet ix.

15 Yu tuꞌ xin, jix too ix Betsabé sattaj naj rey David bꞌey eyecꞌ tuꞌ; caw icham winajxa naj David tuꞌ. Jaꞌ ix Abisag Sunamita tuꞌ, chi teynen naj. 16 Jaꞌ yet jix apni oc ix Betsabé sattaj naj rey David tuꞌ, jix ey noan ix yu yakꞌle scawil scꞌul naj rey tuꞌ yu ix, jix yalon naj tet ix jaxca tiꞌ:

—¿Tzet cha woche? ẍi naj tet ix.

17 Jix takꞌwi ix jaxca tiꞌ:

—Tol yin wal sbꞌi Jehová jix ja walaꞌ, tol jaꞌ naj wuneꞌ Salomón tiꞌ oj oc can naj ja qꞌuexeloj yin reyal. Jaꞌ naj oj oc cantoj chotan yul ja despacho. 18 Jaxa tinaniꞌ, ilaꞌ tol chi yaoc sbꞌa naj Adonías yin reyal yul yet, catuꞌ man ja wotaj oj jaach rey jaach tiꞌ. 19 Caw ecꞌal noꞌ meꞌ, noꞌ icham wacax, cꞌal noꞌ achꞌe wacax caw bꞌakꞌech jix smakꞌ cam naj yin xaambꞌalil, catuꞌ jix awtele ebꞌ ja cꞌaal yu naj, cꞌal naj yakꞌomal xaambꞌal chi yij Abiatar, cꞌal naj Joab eyoc syaawil ebꞌ soldado bꞌey jun loꞌo jix swaꞌne naj tuꞌ, ma pax awtele naj ja cꞌaal Salomón yu naj. 20 Yu tuꞌ xin, masanil ebꞌ conobꞌ Israel lalan yechbꞌanen ebꞌ tzet ja chi yin jun tuꞌ, mactxequel oj ja wa can oc yin reyal ja qꞌuexeloj. 21 Yutol ta cꞌamto cha wun jun tiꞌ catuꞌ chach cami, jaxam jin makꞌle cam yetoj naj wuneꞌ Salomón tuꞌ, ẍi ix tet naj.

22 Lalanto wal skꞌanabꞌ ix yetoj naj rey David tuꞌ, catuꞌ jix apni oc naj Natán, naj ẍejabꞌ Dios. 23 Jix al-le tet naj rey David tol jix apni oc naj Natán, jix awtele octoj naj, catuꞌ jix ey noan sattaj naj rey tuꞌ. 24 Jix skꞌanle tet naj rey David jaxca tiꞌ:

—¿Tumi jaach jix ja walaꞌ tol chi oc can naj Adonías ja qꞌuexeloj yin reyal? 25 Ilaꞌ tinaniꞌ, caw ecꞌal noꞌ meꞌ cꞌal noꞌ icham wacax, yetoj cꞌal noꞌ achꞌe wacax jix smakꞌ cam naj yin xaambꞌalil; jix yawten naj ebꞌ ja cꞌaal, cꞌal masanil ebꞌ naj eyoc yin syaawiloj ebꞌ ja soldado, cꞌal naj Abiatar naj yakꞌomal xaambꞌal. Jaꞌ tinaniꞌ tol chi low ebꞌ naj masanil, catuꞌ chi el yaw ebꞌ, chi yalon ebꞌ jaxca tiꞌ: Viva naj rey Adonías, ẍi xacꞌal ebꞌ naj. 26 Jaxa jin jain tiꞌ ma jin yawte ebꞌ, yetoj cꞌal naj yakꞌomal xaambꞌal chi yij Sadoc, cꞌal naj Benaías scꞌaal Joiadá, ma cꞌal pax awtele naj ja cꞌaal Salomón yu naj. 27 ¿Tumi yul cꞌal ja wet cha waꞌnen ey jun ti? ¿Tumi ma ja wal niꞌoj ey jon, mactxequel oj oc can ja qꞌuexeloj yin reyal? ẍi naj Natán tuꞌ.

28 Jix lawi tuꞌ xin, jix yalon naj rey David tol chi awtele pax ix Betsabé. Jaꞌ yet jix apni oc ix sattaj naj rey tuꞌ, 29 jix yalon naj tet ix jaxca tiꞌ:

—Chi wakꞌcan jin tiꞌ tet Jehová jin Diosal, Naj jix jin colon tet ebꞌ jin cajat, 30 jaꞌ tinaniꞌ, sattaj wal Jehová cu Diosal, tol oj wakꞌ eloc bꞌey jix wakꞌcan jin tiꞌ ey jaach, tol jaꞌ naj ja wuneꞌ Salomón tuꞌ oj oc can yin reyal jin qꞌuexeloj, ẍi naj rey David tuꞌ.

31 Jix lawi cꞌal yabꞌen ix Betsabé jaxca tuꞌ, catuꞌ jix ey noan ix sat txꞌotxꞌ sattaj naj, jix yalon ix jaxca tiꞌ:

—Jaach rey, tol ojabꞌ ey jaach cꞌal ecꞌoj, ẍi ix.

32 Jaꞌ yet jix yalon naj rey David jaxca tuꞌ, catuꞌ jix awtele naj yakꞌomal xaambꞌal chi yij Sadoc yin eymanil, yetoj Natán, naj ẍejabꞌ Dios, yetoj cꞌal pax Benaías scꞌaal Joiadá. Jaꞌ yet jix apni oc ebꞌ sattaj naj rey tuꞌ, 33 jix yalon naj jaxca tiꞌ:

—Iꞌwejtoj ebꞌ naj wet yaawil eyoc yin yopiso bꞌey jin despacho tiꞌ je yetoj, che yaon atoj naj jin cꞌaal Salomón yibꞌan noꞌ jin che, catuꞌ che yiꞌontoj naj bꞌey Guihón. 34 Jaꞌ tituꞌ oj ale atoj aceite olivo yibꞌan sjolom yu naj Sadoc, naj yakꞌomal xaambꞌal, yetoj cꞌal naj Natán, yu xꞌoxle eloj tol jaꞌ naj Salomón chi oc can naj yin reyal yibꞌan cu conobꞌ tiꞌ. Che xuon cꞌal pax noꞌ je cacho, catuꞌ che yaon el je yaw, che yalon jaxca tiꞌ: Viva naj rey Salomón, je chi, ẍi naj rey tuꞌ. 35 Chi lawi tuꞌ catuꞌ chex tit pax yetoj naj titiꞌ, catuꞌ chi jul ey chotan naj bꞌey yul jin despacho tiꞌ jin qꞌuexeloj yin reyal, yutol tuxa jix walaꞌ tol jaꞌ naj chi oc can yin reyal bꞌey conobꞌ Israel cꞌal bꞌey Judá, ẍi naj rey David tuꞌ.

36 Jix takꞌwi naj Benaías scꞌaal Joiadá tet jaxca tiꞌ:

—Yun ojabꞌ jaxca tuꞌ. Jaꞌ ojabꞌ Jehová chi waꞌnen yeoc jaxca tuꞌ. 37 Jaxca wal jix yun scolwa Jehová ja wetoj, quey ojabꞌ tuꞌ oj yun scolwa yetoj naj Salomón tiꞌ, tol miman ojabꞌ oj yun yeloc naj yin yopiso, ẍi naj.

38 Jix lawi tuꞌ xin, catuꞌ jix ale atoj naj Salomón yibꞌan noꞌ ẍe naj rey David yu naj yakꞌomal xaambꞌal chi yij Sadoc, cꞌal yetoj Natán, naj ẍejabꞌ Dios, yetoj Benaías scꞌaal Joiadá, yetoj ebꞌ soldado chi teynen naj rey, jaꞌton ebꞌ chi yij Peleteo cꞌal ebꞌ Cereteo. Jix iꞌletoj ebꞌ bꞌey jaꞌ snukꞌ jaꞌ bꞌey Guihón. 39 Jaꞌ tituꞌ jix ale atoj aceite olivo yibꞌan sjolom naj bꞌey scalubꞌal Jehová. Queyton tuꞌ jix yun yoc can naj Salomón yin reyal yu ebꞌ. Jix lawi tuꞌ, catuꞌ jix xuon noꞌ scacho ebꞌ, catuꞌ jix yaon el yaw masanil ebꞌ conobꞌ: ¡Viva naj rey Salomón! ẍi xacꞌal ebꞌ. 40 Jix lawi tuꞌ catuꞌ jix oc tzajan ebꞌ ánima tuꞌ masanil yintaj naj Salomón, catuꞌ jix too bꞌey yul conobꞌ Jerusalén, chi xuon sflauta ebꞌ, cꞌamxa chi alcha jantaj tzalacꞌulal, caw chi takꞌwi yul-laj wonan yu yel yaw ebꞌ.

41 Lalanto wal slawi xew slow naj Adonías yetoj ebꞌ awtebꞌil yu tuꞌ, catuꞌ jix yabꞌen naj yoc jun aw chi oc tuꞌ. Jix yabꞌen naj Joab xuꞌle noꞌ cacho, jix yalon naj jaxca tiꞌ:

—¿Tzet ye jun aw chi wabꞌ yoc bꞌey conobꞌ tuꞌ? ẍi naj.

42 Lalanto wal skꞌanabꞌ naj tuꞌ xin, catuꞌ jix apni oc naj Jonatán scꞌaal Abiatar, jix yalon tet naj Adonías jaxca tiꞌ:

—Ocantej jaach tiꞌ, caw wal watxꞌ ja naꞌbꞌal, watxꞌ mi la tzet chi jul ja walaꞌ, ẍi naj.

43 Jix takꞌwi Jonatán tet naj Adonías jaxca tiꞌ:

—Cꞌamaj, man watxꞌoj tzet chi jul wal ey jaach. Jaꞌ tinaniꞌ tuxa jix ale oc naj Salomón yin reyal sqꞌuexeloj naj rey David. 44 Jix yaloni tol chi too naj yakꞌomal xaambꞌal chi yij Sadoc, yetoj Natán naj ẍejabꞌ Dios, cꞌal Benaías scꞌaal Joiadá, yetoj ebꞌ Cereteo cꞌal ebꞌ Peleteo yetoj Salomón. Jix ale oc naj Salomón yibꞌan noꞌ ẍe naj rey David yu ebꞌ. 45 Catuꞌ jix chejletoj naj Sadoc tuꞌ, naj yakꞌomal xaambꞌal yetoj naj ẍejabꞌ Dios chi yij Natán, yet chi too ale atoj aceite olivo yibꞌan sjolom naj bꞌey Guihón, caw wal mimej tzalacꞌulal eyoc yu ebꞌ, catuꞌ jix meltzo ebꞌ bꞌey conobꞌ, yuxan caw chi el yaw ebꞌ ánima tuꞌ chi yabꞌe. 46 Jaꞌ tinaniꞌ tuxa jix octoj chotan naj Salomón bꞌey yul sdespacho. 47 Masanil ebꞌ eyoc yin yopiso yetoj naj rey David jix bꞌet akꞌon scawil scꞌul naj; jix yalon ebꞌ tol miman ojabꞌ oj yun yeloc apnoj naj Salomón yintaj naj rey David tuꞌ, catuꞌ yelcꞌulal ojabꞌ oj iꞌle a can yin yopiso yul snación tuꞌ, yintaj yet eyoc smam naj yin reyal. Jaꞌ jun naj rey David jix ey noan tet Dios bꞌey sat xꞌat, 48 jix yalon jaxca tiꞌ: Al-le ojabꞌ watxꞌ kꞌane tet Jehová cu Diosal jaon Israel jon tiꞌ, yutol jaꞌ jix aon oc jun wuninal tiꞌ yin yopiso, yet watxꞌ jaꞌ oj ey chotan bꞌey jin despacho, caw chi wil can oc yetoj jin sat, ẍi naj rey David tuꞌ.

49 Jaxa jantaj ebꞌ awtebꞌil yu naj Adonías tuꞌ, caw jix xiwa ebꞌ, junjun xacꞌal jix yun spaxtoj ebꞌ. 50 Jix xiw cꞌal pax a naj Adonías tet naj Salomón, yuxan jix too bꞌey yul scalubꞌal Jehová. Jaꞌ tituꞌ jix too scol sbꞌa yaloni. Jix oc mitxꞌan yin jun yucꞌaꞌ yet xaambꞌal eya bꞌey xiquinlaj tuꞌ. 51 Eyman jix bꞌet al-le tet naj Salomón:

—Jaꞌ tinaniꞌ jaach rey, jaꞌ naj Adonías caw wal chi xiw naj ey jaach. Jaꞌ bꞌey yucꞌaꞌ jun yet xaambꞌal jix too scol sbꞌa naj. Chi yal tinaniꞌ tol cha wakꞌcan ja tiꞌ tet tol cꞌam cha makꞌ camoj.

52 Jix takꞌwi naj Salomón jaxca tiꞌ:

—Ta watxꞌ cꞌal oj yute sbꞌa naj, ta cꞌam cꞌal bꞌey oj spitne sbꞌa, man oj cam naj, tam wal ey junoj xil sjolom naj oj eloj. Ta ey pax spenail oj sloctej naj yibꞌan xin, cꞌam cꞌal mimancꞌulal, sowalil oj cam naj, ẍi naj Salomón.

53 Jix yalon naj Salomón tol chi iꞌle eltej Adonías tuꞌ bꞌey jun yet xaambꞌal tuꞌ. Jix lawi tuꞌ catuꞌ jix apni oc sattaj naj rey Salomón, jix ey noan sattaj naj. Jix lawi tuꞌ, jix yalon naj Salomón tet tol chi too naj bꞌey sna.