Jaꞌ jun libro tiꞌ jix tzꞌibꞌelecan yet abꞌil 561-538 a.C.

Man kotajoj mac jix tzꞌibꞌeni. Jaꞌ bꞌey conobꞌ Israel jix tzꞌibꞌelecanoj. Jaꞌ an bꞌabꞌel libro skꞌaneal ebꞌ rey jaxca tuꞌ sbꞌi jun libro tiꞌ. Jaꞌ yul an tzꞌibꞌebꞌilcan ey skꞌaneal conobꞌ Israel. Junne conobꞌal yeoc ebꞌ yalan ẍejbꞌanil naj rey David yet jun tiempoal tuꞌ yet caw icham winajxa naj.

Jaꞌ yet jix camtoj naj, jaꞌ jun scꞌaal chi yij Salomón jix oc can sqꞌuexeloj yin reyal, chi yal bꞌey capítulo 1 masantaꞌcꞌal bꞌey capítulo 2:12. Jaꞌ yet eyoc naj Salomón yin reyal, caw jix oc naj bꞌeomal, jatuꞌ chi yaltej bꞌey capítulo 2:13, masantaꞌcꞌal bꞌey capítulo 11:43.

Caw naat bꞌey jix apni oc smoonal smajul xꞌotxꞌ, cꞌal bꞌey jix yakꞌ yaawil. Cꞌam junojxa mac jix skeꞌ slaanbꞌane sbꞌa yetoj naj. Jaꞌ sbꞌeomal cꞌal sjelanil Salomón tuꞌ, yel xacꞌal miman jix yun sbꞌinale yet jun tiempoal tuꞌ. Jix swaꞌne a sconobꞌ, jix swaꞌne a sdespacho, jix swaꞌne pax a stemplo Jehová bꞌey Jerusalén.

Chi yalon pax tej jun libro tiꞌ, tol cꞌam stecꞌanil snaꞌbꞌal naj Salomón tuꞌ, yutol caw ecꞌal ebꞌ ix ix jix oc yistiloj naj. Jix oc naj yin eyilal tet wan sdiosal ebꞌ ix ix tuꞌ. Yuxan jix eyqꞌuey naj yin spenail, jix jul jowal cꞌal syaꞌilal yibꞌan naj. Jaꞌ yet jix camtoj naj, jix poꞌochatoj smajul bꞌey jix yakꞌ yaawil. Jaꞌ jun tiꞌ chi yal bꞌey capítulo 12 masantaꞌcꞌal bꞌey capítulo 22.

Chi yaltej tzet jix yun sbꞌey junjun tujan conobꞌ tuꞌ: Jun tujan bꞌey yetcꞌulal norte, jaꞌton Israel. Jal junxa tujan yetcꞌulal sur, jaꞌton Judá, yutol jaꞌ jun icꞌaaleal ebꞌ tuꞌ, yel xacꞌal miman yeloc apnoj ebꞌ. Jaꞌ tzet chi yun yal-le yin jun tujan ebꞌ ánima ey bꞌey yetcꞌulal norte tuꞌ, tol jix yiꞌel snaꞌbꞌal ebꞌ yin Dios. Jacꞌalaꞌ pax ebꞌ rey ey bꞌey yetcꞌulal sur, caw txꞌoj yel snaꞌbꞌal ebꞌ, ey ebꞌ watxꞌ snaꞌbꞌal, ey pax ebꞌ pena snaꞌbꞌal. Jal pax cuybꞌanile chi akꞌle tet ebꞌ xin, jaꞌton tzet chi yun sbꞌeybꞌalne swatxꞌilal ebꞌ. Jal pax eyilal tet comon dios cꞌal pitalil, chi yiꞌtej syaꞌilal. Jaꞌ yet jun tiempoal tuꞌ, caw miman yeloc apnoj yopiso ebꞌ ẍejabꞌ Dios. Jix chejle ebꞌ yu Dios yet chi tenchanele ebꞌ conobꞌ, cꞌal yakꞌle snaꞌbꞌal ebꞌ rey yu ebꞌ, yet watxꞌ cꞌam chi oc ebꞌ yin eyilal tet comon dios. Jaꞌ jun ẍejabꞌ Dios yel xacꞌal miman yeloc apnoj yul jun libro tiꞌ, jaꞌton naj Elías.