—Ecꞌan xol masanil junjun tujan ebꞌ ket Israelal, chi tit tacꞌal bꞌey Dan masantaꞌcꞌal bꞌey conobꞌ Beerseba, catuꞌ cha wiꞌon a sbꞌisil ebꞌ tol smoo yoc yin soldadoal, queytuꞌ oj yun wotajnen eloj jantaj ebꞌ yin masanil, ẍi naj.

3 Catuꞌ jix takꞌwi Joab tet naj jaxca tiꞌ:

—Jaach rey, jaꞌ ojabꞌ Jehová cu Diosal chi iꞌon a can sbꞌisil ebꞌ ánima tiꞌ, cien tujan ojabꞌ to ecꞌbꞌan ebꞌ yintaj tinaniꞌ, catuꞌ oj to ja wilaꞌ tzet oj elocoj, yu tuꞌ xin, ¿tzet wal yuxan cha woche cha wiꞌa sbꞌisil ebꞌ ánima tiꞌ? ẍi naj Joab tuꞌ.

4 Caw jix yakꞌ xacꞌal yip naj rey David yalon tet naj Joab tol chi too yetoj syaawil ebꞌ soldado tuꞌ, tol sowalil chi iꞌle a sbꞌisil ebꞌ ánima tuꞌ. Yu tuꞌ xin, jix eltej ebꞌ sattaj naj rey, jix yaon oc ebꞌ yin scꞌul tzet jix al-le tuꞌ. 5 Jix kꞌaxbꞌo ecꞌtoj ebꞌ yul jaꞌ Jordán, jix swaꞌne a skꞌap na ebꞌ bꞌey Aroer bꞌey spananil sjobꞌeal ecꞌtoj conobꞌ Gad, jix lawi tuꞌ catuꞌ jix too ebꞌ bꞌey conobꞌ Jazer. 6 Jix lawi tuꞌ jix too ebꞌ bꞌey Galaad cꞌal bꞌey kꞌaxnal txꞌotxꞌ chi yij Cadés. Jix lawi tuꞌ, catuꞌ jix too ebꞌ bꞌey Dan, catuꞌ jix meltzo ebꞌ bꞌey stiꞌlaj yet Sidón. 7 Jix too pax ebꞌ bꞌey miman conobꞌ Tiro, bꞌey sconobꞌ ebꞌ Heveo, yetoj cꞌal bꞌey sconobꞌ ebꞌ Cananeo. Jix lawi tuꞌ, jix too ebꞌ bꞌey conobꞌ Beerseba bꞌey Négueb yul yet Judá. 8 Bꞌalonebꞌ xꞌaaw yetoj juncꞌal cꞌu jix yakꞌ ebꞌ yiꞌon a jun bꞌisbꞌal tuꞌ, jix lawi tuꞌ, catuꞌ jix meltzotej ebꞌ bꞌey Jerusalén. 9 Jix yaontoj sbꞌisil ebꞌ ánima bꞌey junjun conobꞌ naj Joab tet naj rey David: Ey 800,000 ebꞌ winaj a Israel tol stiempo yoc yin jowal, ey pax 500,000 ebꞌ naj a Judá.

10 Jix lawi tuꞌ, catuꞌ jix snaꞌon sbꞌa scꞌul naj rey David tuꞌ. Jix oc naj yin sbꞌiscꞌulal, catuꞌ jix yalon naj tet Jehová jaxca tiꞌ:

—Caw miman jun spenail jix wun tiꞌ an. Jaꞌ tinaniꞌ chi wal ey jaach tol cha wakꞌ mimancꞌulal wibꞌan yu jun jin penail tiꞌ, jaxca wal junoj ánima tol cꞌam snaꞌbꞌal, queytuꞌ jix wute jin bꞌa chi wabꞌe, ẍi naj rey David tuꞌ.

11 Jaꞌ yet jix a waan naj rey David yet jix sajbꞌi a yet junxa cꞌu, jix yalon Jehová tet Gad naj yakꞌomal xaambꞌal, catuꞌ yakꞌomal pax naꞌbꞌale yeoc naj yu naj rey tuꞌ. 12 Asiꞌ, al tet naj David, yutol jain Jehová jin chi walaꞌ: Ey oxebꞌ tzetyetal oj waltej ey jaach, catuꞌ oj ja sicꞌlen bꞌeytet junoj oj ja woche, catuꞌ oj wakꞌon ey jaach, ẍi Jehová, ja chi.

13 —Catuꞌ jix too naj Gad tuꞌ yalon tet naj rey David jaxca tiꞌ:

—¿Chim ẍaꞌ ja cꞌul chi jul jujebꞌoj abꞌil wail bꞌey yul ja conobꞌ tiꞌ? ¿Ma chi ẍaꞌ ja cꞌul tol chach ela oxebꞌoj xꞌaaw tet ebꞌ ja cajat? ¿Ma jaꞌ oxebꞌoj cꞌual syaꞌilal yet chi cam ebꞌ ánima yul ja conobꞌ tiꞌ? Naꞌ wal sicꞌlebꞌil, catuꞌ oj ja waloni. Oj lawoj tuꞌ, catuꞌ oj toj walon pax tet Jehová, yutol jaꞌ Naj jix jin chejontej, ẍi naj.

14 Catuꞌ jix yalon naj rey David tet naj Gad jaxca tiꞌ:

—Caw wal chi somcha a jin naꞌbꞌal tinaniꞌ yu tzet chi wute waloni. Watxꞌ mi tol chi cu can yul skꞌabꞌ Jehová, yutol chi okꞌ scꞌul naj kin, man ojabꞌ jaꞌ oj yul skꞌabꞌ ebꞌ ánima chi cu eyqꞌueyi, ẍi naj.

15 Yu tuꞌ xin, yet xacꞌal jun skꞌinibꞌal tuꞌ, jix aletej jun miman syaꞌilal yibꞌan ebꞌ conobꞌ Israel yu Jehová, masantaꞌcꞌal jix tzꞌajna wan scꞌual jix al-le tuꞌ. Jaꞌ yet tuꞌ jix cam 70,000 ebꞌ ánima bꞌey yul masanil nación tuꞌ, jix tit tacꞌal bꞌey Dan masantaꞌcꞌal bꞌey conobꞌ Beerseba. 16 Jaꞌ yet jix yaontoj skꞌabꞌ jun yángel Jehová bꞌey yibꞌan Jerusalén tuꞌ, yet chi yakꞌon lawoj el ebꞌ ánima tuꞌ yaloni, caw jix cus scꞌul Jehová yu tzet jix yun tuꞌ, yuxan jix yal tet jun ángel tuꞌ jaxca tiꞌ: Kꞌojbꞌilxa tuꞌ, ocan tucanoj, ẍi Jehová.

Jaꞌ yet tuꞌ, jaꞌ bꞌey stecꞌbꞌal tiriw naj Arauna, Jebuseo. Jaꞌ tituꞌ eyecꞌ jun ángel tuꞌ. 17 Jaꞌ yet jix yilon naj rey David jun ángel chi ecꞌ akꞌon lawoj el conobꞌ tuꞌ, jix yalon naj David tet Jehová jaxca tiꞌ:

—Jain jix oc jin penail, ¿man jaꞌ oj ebꞌ ánima tiꞌ jix oc spenail? Chin kꞌan ey jaach tol jaꞌ ojabꞌ wibꞌan yetoj cꞌal ebꞌ wicꞌaal chi tit can jun miman syaꞌilal tiꞌ, ẍi naj.

18 Jaꞌ yet jun cꞌual tuꞌ, jix jul naj Gad yalon tet naj David:

—Aantoj bꞌey stecꞌbꞌal tiriw naj Arauna, Jebuseo, catuꞌ cha waꞌnen a junoj yet xaambꞌal sattaj Jehová,^a ẍi tet naj.

19 Catuꞌ jix too naj David jaxca jix yun yalon Jehová tet naj Gad tuꞌ. 20 Jix yilontej naj Arauna tol lalan yapni oc naj rey yetoj ebꞌ yakꞌomal servil tol tꞌinan stoo ebꞌ bꞌey eyecꞌ naj tuꞌ, jix tit chaꞌle naj rey tuꞌ yu, jix ey noan naj sat txꞌotxꞌ sattaj naj. 21 Jix yalon naj Arauna jaxca tiꞌ:

—¿Jaach rey, tzet wal yuxan chach jul jin cꞌatan? ẍi naj.

Jix takꞌwi naj rey jaxca tiꞌ:

—Tol chi jul jin man niꞌoj txꞌotxꞌ txꞌotxꞌ bꞌey ja tecꞌbꞌal tiriw tiꞌ, yutol jaꞌ titiꞌ oj jin waꞌne a junoj yet xaambꞌal tet Jehová, yet watxꞌ oj oc tucan scam ebꞌ ánima bꞌey yul conobꞌ tiꞌ, ẍi naj David tuꞌ.

22 Jix yalon naj Arauna tet naj rey David jaxca tiꞌ:

—Yun ojabꞌ jaxca ja walon tuꞌ jaach rey, waꞌne a catuꞌ cha wakꞌon ja xaambꞌal tet Jehová, jaxca wal chi yoche ja cꞌul. Ey noꞌ wacax chi skeꞌ ja wakꞌon yin xaambꞌal tuꞌ; ey teꞌ makꞌbꞌal tiriw cꞌal teꞌ chi oc yin yucꞌaꞌ noꞌ wacax, chi skeꞌ yoc teꞌ yin siꞌal. 23 Jain tiꞌ chi wakꞌ masanil wan tiꞌ ey jaach. ¡Tol ojabꞌ wal chi ẍaꞌ scꞌul Jehová tzet oj ja wunne! ẍi naj.

24 Jix yalon naj rey tet naj Arauna jaxca tiꞌ:

—Cꞌamaj, tol chin man masanil wan tuꞌ ey jaach an, yutol ma skeꞌ wakꞌon tet Jehová cu Diosal tzetyetal tol cha saꞌ ey jin, ẍi naj David tuꞌ.

Yuxan jix sman jun txꞌotxꞌ tuꞌ naj David, yetoj cꞌal noꞌ wacax tuꞌ yin 50 siclo plata chꞌen tumin. 25 Jix swaꞌne can a jun yet xaambꞌal naj David tet Jehová tituꞌ, catuꞌ jix yakꞌon tzꞌaꞌ xaambꞌal cꞌal wan xaambꞌal yet watxꞌcꞌulal tet Dios. Catuꞌ jix yabꞌen Jehová tzet jix skꞌan naj David yu camich lalan yoc yul conobꞌ Israel tuꞌ, catuꞌ jix oc tucan jun jow yaꞌ jolom tuꞌ.