Slawubꞌal Skꞌane Naj Rey David
23
Jaꞌton wan slawubꞌ skꞌane naj rey David tiꞌ.Jaꞌ naj David tuꞌ, scꞌaal naj Jesé, jix iꞌle a can yu Dios. Jaꞌton jun rey tol sicꞌbꞌil el yu Dios xol ebꞌ yicꞌaal Jacob, caw wal watxꞌ sbꞌitni naj xol ebꞌ yet Israelal. Jaꞌ chi alon jaxca tiꞌ:
2 Jaꞌ Yespíritu Jehová chi kꞌanabꞌ el win an. Jaꞌ skꞌane Naj eyoc yul jin tiꞌ.
3 Jaꞌ Jehová cu Diosal jaon Israel jon tiꞌ, jaꞌ cu Colomal yeocoj, jaꞌ jix alon ey jin jaxca tiꞌ: Jaꞌ mactxequel chi akꞌon yaawil xol ebꞌ ánima yin sjichanil, jaxca wal chi yoche jin cꞌul, jain Jehová jin tiꞌ,
4 laan wal yili ebꞌ jaxca chi yun kilon stit sajil yichcan yet chi sajbꞌi eloj, laan wal ebꞌ jaxca yet chi ey scꞌaxanil yajan cꞌu yet cꞌam asun eyocoj, jaꞌ yajan cꞌu tuꞌ chi akꞌon chꞌibꞌ teꞌ teꞌ yet chi lawi yakꞌon nabꞌ, ẍi Dios ey jin an, ẍi naj David.
5 Quey cꞌal pax tuꞌ oj yun yakꞌon swatxꞌcꞌulal Dios yibꞌan ebꞌ wicꞌaal yet bꞌakꞌin. Oj yun cꞌal bꞌey jix yakꞌ can stiꞌ Dios ey jin an, tol cꞌam bꞌakꞌin oj lawoj eloj. Jaꞌ Dios oj colwa cꞌal wetoj, yuxan watxꞌ cꞌal chi yun yiꞌon sbꞌa masanil tzetyetal chi woche.
6 Jal pax masanil ebꞌ penawom xin, laan oj yun yeloc ebꞌ jaxca teꞌ qꞌuix jokꞌbꞌil tajoj, cꞌam junoj mactxequel chi skeꞌ yoc mitxꞌan yin.
7 Ta ey junoj mactxequel chi yoche chi oc mitxꞌan yin teꞌ, sowalil chi skꞌan junoj chꞌen chꞌen ma junoj steꞌal lanza yet chi skeꞌ yaontoj xol kꞌakꞌ, queytuꞌ chi yun stzꞌaꞌcantoj teꞌ yin junelne, ẍi naj David yin slawubꞌal sbꞌit tuꞌ.
Jaꞌ Wan Soldado Naj Rey David Caw Wal Jelan Yin Jowal
8 Jaꞌ ebꞌ soldado caw jelan xol wanxa ebꞌ soldado naj rey David, ey oxwan ebꞌ: Jun bꞌabꞌel, jaꞌton naj Is-bóset a Hacmón, jaꞌton sat yaaw yeoc xol ebꞌ oxwan tol jelan tuꞌ. Jaꞌ yet junel jix smakꞌ cam 800 winaj yetoj slanza. 9 Jal naj yet scaabꞌ xol ebꞌ oxwan tuꞌ, jaꞌton naj Eleazar scꞌaal Dodo, a conobꞌ Ahohíta. Jaꞌ jix eecꞌal ecꞌ yetoj naj David bꞌey Pas-damim, yet jix yambꞌan sbꞌa ebꞌ Filisteo yet jix yakꞌon jowal ebꞌ, jal wanxa ebꞌ Israel eyecꞌ tituꞌ, jix el ebꞌ. 10 Jaꞌ yet tuꞌ, caw wal jix stecꞌbꞌa sbꞌa naj Eleazar tuꞌ, jix makꞌle cꞌal cam ebꞌ Filisteo yu naj, masantaꞌcꞌal jix cꞌuumbꞌi el skꞌabꞌ, jix can xacꞌal lakꞌan yespada tuꞌ yul skꞌabꞌ. Jaꞌ yet jun cꞌual tuꞌ jix kꞌanbꞌalnele naj yu Jehová yin yakꞌon eyqꞌuey jun jowal tuꞌ. Jix lawi tuꞌ jix oc tzajan masanil ebꞌ soldado Israel yintaj naj Eleazar tuꞌ, jix too yiꞌon can ecꞌ masanil tzetyetal ebꞌ tet wan scajat jix cam yu tuꞌ.
11 Jal naj yet yox, jaꞌton naj Samá, scꞌaal Agué a conobꞌ Arar. Jaꞌ yet jix syambꞌa oc sbꞌa ebꞌ Filisteo yin ebꞌ Israel bꞌey Lehi, jaꞌ tituꞌ awbꞌil ey wan an ubꞌal chi yij lenteja. Jaꞌ yet jix yilon ebꞌ soldado Israel tol eyecꞌ ebꞌ Filisteo tituꞌ, jix el ebꞌ. 12 Jal pax naj Samá xin, jix stecꞌbꞌa sbꞌa naj sattaj ebꞌ Filisteo bꞌey snan xol jun awo tuꞌ, yu scolon el ebꞌ yet Israelal. Jix makꞌle cam ebꞌ Filisteo tuꞌ yu naj. Jaꞌ jix kꞌanbꞌalnele yu Jehová yin yakꞌon eyqꞌuey jun jowal tuꞌ.
13-14 Jaꞌ yet junel, stiempoal wal syambꞌale a sat awo, ja ebꞌ oxwan sat yaaw yeoc xol ebꞌ 30 soldado caw jelan tuꞌ, jix too ebꞌ bꞌey eyecꞌ naj David bꞌey chꞌen nachꞌen yul yet Adulam. Jal pax ebꞌ Filisteo tuꞌ xin, jatuꞌ bꞌulan ey ebꞌ bꞌey spananil sjobꞌeal yul yet Refaim. Jaꞌ bꞌey Belén, jaꞌ tituꞌ bꞌulan ey jun tujan soldado ebꞌ Filisteo tuꞌ. 15 Jaꞌ yet tuꞌ, jix yalon naj David tzet jix yoche scꞌul jaxca tiꞌ: Tol oj wal ey mactxequel chi akꞌon jaꞌ ucꞌbꞌal jaꞌ ey bꞌey spuertail conobꞌ Belén tuꞌ wuqꞌue, ẍi naj.
16 Jal ebꞌ oxwan soldado caw wal jelan tuꞌ, jix octoj ebꞌ bꞌey bꞌulan ey ebꞌ Filisteo tuꞌ, cꞌam mac jix ilon ebꞌ yet jix bꞌet yiꞌontej jaꞌ jaꞌ ebꞌ tuꞌ bꞌey spuertail conobꞌ Belén, catuꞌ jix yiꞌontej jaꞌ ebꞌ tuꞌ tet naj rey David. Ma yal scꞌul naj chi yuqꞌueꞌ, tucꞌal jix sec ey naj sat txꞌotxꞌ jaxca junoj ofrenda chi akꞌle tet Jehová. 17 Jix yalon naj jaxca tiꞌ: Jaach Jehová, ¿man oj wucꞌ jun jaꞌ jaꞌ tiꞌ an? Ta chi wucꞌ eytoj jaxca wal tol jaꞌ ẍiqꞌuil wan ánima tiꞌ chi wucꞌ eytoj, yutol jix sbꞌejoc sbꞌa ebꞌ naj yul skꞌabꞌ camich yet jix yiꞌon can oc jun jaꞌ jaꞌ ebꞌ tiꞌ, ẍi naj David. Yuxan ma yal scꞌul naj jix yucꞌ eytoj.
Jaꞌ ebꞌ oxwan soldado caw wal jelan tuꞌ, jaꞌ ebꞌ jix uten jun tuꞌ.
18 Jaꞌ naj Abisai yuẍtaj naj Joab, yuneꞌ ix Seruiá ebꞌ, jaꞌ eyoc syaawiloj jun 30 ebꞌ soldado tol caw jelan yakꞌon jowal tuꞌ. Jaꞌ yet junel jix makꞌ cam jun 300 winaj yetoj slanza, queytuꞌ jix yun yiꞌle a can naj yin yopiso jaxca ebꞌ oxwan tuꞌ. 19 Yel xacꞌal miman jix yun yiꞌle a can xol ebꞌ yet soldadoal tuꞌ, yuxan jix oc can naj yin syaawiloj ebꞌ, asan xin, eyto wal ma apnoj yintaj ebꞌ oxwan yet sbꞌabꞌelal tuꞌ.
20 Jal pax naj Benaías scꞌaal naj Joiadá a conobꞌ Cabseel, jaꞌ jun tuꞌ caw wal jelan naj, ecꞌal tzetyetal jix yunne. Jaꞌ jix makꞌon cam cawan ebꞌ soldado caw wal jelan a Moab. Jaꞌ yet junel, cꞌuxan wal ey chꞌen sajbꞌacom, jix eytoj naj yul jun jolan. Jaꞌ tituꞌ jix smakꞌ cam jun noꞌ bꞌalam naj. 21 Jix smakꞌon cꞌal pax cam jun a Egipto tol caw wal miman steel. Jaꞌ jun tuꞌ iꞌbꞌil oc jun slanza. Jaꞌ naj Benaías tuꞌ jix too naj yetoj jun teꞌ, jix iꞌle ecꞌ slanza jun tuꞌ yu naj. Jaꞌ yetoj slanza tuꞌ jix smakꞌon camoj. 22 Jaꞌ yu tzet jix yun naj Benaías scꞌaal Joiadá tuꞌ, yuxan jix iꞌle a can naj yin yopiso xol ebꞌ 30 soldado tol jelan yakꞌon jowal tuꞌ. 23 Caxcꞌal caw ey yeloc apnoj naj xol ebꞌ, asan eyto cꞌaltaꞌ ma apnoj naj yintaj ebꞌ oxwan yet sbꞌabꞌelal tuꞌ, yuxan jix ale oc naj yin syaawiloj xol ebꞌ chi teynen naj rey David.
24 Jaꞌ xol ebꞌ 30 jelan yakꞌon jowal tuꞌ, jatuꞌ eyoc naj Asael, yuẍtaj naj Joab, yetoj Elhanán, scꞌaal naj Dodo, a conobꞌ Belén; 25 naj Samá yetoj naj Elicá a conobꞌ Harod ebꞌ. 26 Naj Heles a conobꞌ Paltí, Irá scꞌaal Iqués a conobꞌ Tecoa. 27 Abiézer a Anatot; Sibecai a Husah. 28 Salmón a conobꞌ Ahohíta, Maharai, a Netofá, 29 yetoj naj Héled, scꞌaal Baaná, a conobꞌ Netofá ebꞌ. Itai scꞌaal Ribai, a Guibeá yul yet Benjamín. 30 Benaías a Piratón; Hidai caan bꞌey stiꞌlaj jaꞌ jaꞌ bꞌey yul yet Gaas. 31 Abí-albón a Arbá. Azmávet a Bahurim. 32 Eliahbá a Saalbón, jaꞌton ebꞌ scꞌaal Jasén, Jonatán scꞌaal 33 Samá, yetoj Ahiam, scꞌaal Sarar, a conobꞌ Harod cꞌal pax ebꞌ. 34 Elifélet, scꞌaal Ahasbai a Maacá, Eliam scꞌaal Ahitófel a Guiló. 35 Hesrai, a Carmel. Paarai, a Arbá. 36 Igal scꞌaal Natán a Sobá. Baní a Gad. 37 Sélec a Amón, Naharai a Beerot, jaꞌton naj yijomal ecꞌ smitxꞌkꞌabꞌ yet jowal naj Joab yuneꞌ ix Seruiá. 38 Irá a Jatir. Gareb a Jatir cꞌal pax oj, 39 cꞌal Urías Hitita. Ey 37 ebꞌ yin masanil.