Jix Oc Naj David Yin Reyal Bꞌey Israel Cꞌal Bꞌey Judá
11
Jix lawi tuꞌ xin, jix syambꞌa oc sbꞌa masanil ebꞌ Israel, catuꞌ jix too kꞌanabꞌ ebꞌ yetoj naj David bꞌey conobꞌ Hebrón. Jix yalon ebꞌ tet naj jaxca tiꞌ: Jaon tiꞌ, junne cu mam icham ja wetoj. 2 Caxcꞌal mi jaꞌ yet eyoc naj Saúl yin reyal yet yalantoj, jaach cꞌaltaꞌ jix jon ja wijbꞌa yet jix cu bꞌey cꞌaltoj cu sattaj. Yetoj cꞌal pax oj, jix yal Jehová cu Diosal ey jaach, tol jaach oj jon ja wijbꞌa, cꞌal ja woc can yin reyal cu xol jaon conobꞌ Israel jon tiꞌ, ẍi ebꞌ tet naj.3 Jaꞌ yet jix apni ebꞌ icham winaj yeoc yul conobꞌ Israel kꞌanabꞌ yetoj naj bꞌey Hebrón tuꞌ, jix swaꞌne jun swa kꞌane naj rey David yetoj ebꞌ sattaj Jehová. Jaꞌ tituꞌ jix ale can atoj aceite olivo yin sjolom naj David yet chi oc can naj yin reyal, jaxca wal jix yun ẍejle yal naj Samuel yu Jehová.
Jix Eyqꞌuey Conobꞌ Sión Yu Naj Rey David
4 Jix too naj rey David yetoj masanil ebꞌ yet Israelal bꞌey Jerusalén, jaꞌton chi yij cꞌal pax Jebús, yutol jaꞌ ebꞌ Jebuseo caan bꞌey jun lugar tuꞌ. 5 Jix yalon ebꞌ tet naj rey David jaxca tiꞌ: Jaach tiꞌ, ma skeꞌ ja woc yul jun conobꞌ tiꞌ, ẍi ebꞌ tet naj. Jaꞌ naj rey David jix skeꞌ yakꞌon eyqꞌuey conobꞌ Sión tuꞌ, yu jun tuꞌ, yuxan caw otajbꞌil tol jaꞌ sconobꞌ David tinaniꞌ. 6 Jaꞌ naj David tuꞌ jix alon jaxca tiꞌ: Jaꞌ mactxequel bꞌabꞌel oj makꞌon cam junoj ebꞌ Jebuseo tiꞌ, jaꞌ oj waoc yin syaawilal ebꞌ soldado tiꞌ. Yuxan jaꞌ mactxequel jix bꞌabꞌi, jaꞌton naj Joab, yuneꞌ ix Seruiá, yuxan jaꞌ naj jix oc yin syaawil ebꞌ soldado. 7 Jix lawi tuꞌ, jix can naj rey David bꞌey scuartel bꞌey Sión, yuxan jix yij can sbꞌi, sconobꞌ David. 8 Yu jun tuꞌ, jix swaꞌne a wanxa na naj rey David bꞌey yinlaj tuꞌ, jix too tacꞌal bꞌey jun jobꞌe mujbꞌil eloj. Jaꞌ naj Joab jix caꞌ swaꞌnen a niꞌojxa conobꞌ Jebús tuꞌ. 9 Caw jix a can yiꞌon yip yopiso naj rey David tuꞌ, yutol jaꞌ Jehová, Naj Yaaw yin Masanil, jaꞌ eyoc yetoj naj.
Jaꞌ Ebꞌ Soldado Naj Rey David Caw Jelan Ebꞌ
10 Jaꞌ ebꞌ soldado naj rey David caw jelan, jix oc ebꞌ yetoj ebꞌ yet Israelal tuꞌ, jix ale oc naj yin reyal yul masanil yet Israel, jaxca jix yun yalon Jehová, jix yiptzen jun sreyal ebꞌ conobꞌ tuꞌ.
11 Jaꞌton sbꞌi ebꞌ soldado naj rey David caw jelan tiꞌ. Jaꞌton naj Jasobeam, yicꞌaal Hacmoní, jaꞌ naj bꞌabꞌel yeoc xol cawanxa yet jelanilal tuꞌ. Jaꞌ yet junel, jix smakꞌ cam 300 ebꞌ winaj yetoj slanza. 12 Jal junxa xol ebꞌ oxwan tol yel xacꞌal jelan tuꞌ, jaꞌton naj Eleazar, scꞌaal naj Dodo, a conobꞌ Ahohíta. 13 Jaꞌ yet junel, jix ecꞌ yetoj naj rey David bꞌey Pas-damim, yet jix syambꞌan oc sbꞌa ebꞌ Filisteo yakꞌon jowal tituꞌ. Ey jun txꞌotxꞌ bꞌey awbꞌil ixim cebada. Jaꞌ yet jix el ebꞌ soldado Israel sattaj ebꞌ Filisteo tuꞌ, 14 jaꞌ bꞌey snan xol jun txꞌotxꞌ tuꞌ jix oc linan ebꞌ scawanil jix stecꞌbꞌa sbꞌa ebꞌ yin jowal; queytuꞌ jix yun yeyqꞌuey ebꞌ Filisteo tuꞌ yu ebꞌ, yuxan jix colcha can el conobꞌ Israel yu Jehová.
15 Jaꞌ yet junel, jaꞌ ebꞌ oxwan soldado caw jelan tuꞌ, jix too ebꞌ satlaj chꞌen yet chi too ẍaꞌlen sbꞌa ebꞌ yetoj naj rey David bꞌey chꞌen nachꞌen chi yij Adulam. Jal ebꞌ Filisteo, jaꞌ bꞌey sjobꞌeal Refaim, jatuꞌ bꞌulan ey ebꞌ. 16 Jal naj rey David, jatuꞌ eyecꞌ naj bꞌey chꞌen nachꞌen tuꞌ, yajbꞌan eyecꞌ jun miman bꞌulan ebꞌ soldado Filisteo bꞌey conobꞌ Belén. 17 Jix yalon naj rey David jaxca tiꞌ: ¡Tol oj wal ey mactxequel chi akꞌon jaꞌ jaꞌ ey bꞌey jaꞌ ucꞌbꞌal jaꞌ bꞌey stiꞌ conobꞌ Belén tuꞌ wuqꞌue! ẍi naj.
18 Jaꞌ ebꞌ oxwan soldado caw jelan tuꞌ, jix octoj ebꞌ bꞌey bꞌulan ey ebꞌ soldado Filisteo tuꞌ, jix bꞌet yiꞌon atej jaꞌ ebꞌ bꞌey jaꞌ ucꞌbꞌal jaꞌ bꞌey chi octoj ebꞌ bꞌey conobꞌ Belén, jix yiꞌontej jaꞌ ebꞌ tet naj rey David. Ma yoche naj David tuꞌ chi yucꞌ jaꞌ, asan tol jix sec can ey yin ofrendail tet Jehová. 19 Jix yalon naj jaxca tiꞌ: ¡Cꞌam ojabꞌ chi ẍaꞌ Dios wucꞌ jaꞌ jaꞌ tiꞌ, jaxca mi tol jaꞌ ẍiqꞌuil wan winaj tiꞌ chi wucꞌ eytoj, yutol jix bꞌejcha scꞌul ebꞌ scami yet jix bꞌet yiꞌontej jaꞌ jaꞌ ebꞌ tiꞌ! ẍi naj. Yuxan ma yuqꞌueꞌ. Jaꞌton jun tiꞌ jix yun ebꞌ oxwan tol caw bꞌinabꞌil tuꞌ.
20 Jaꞌ naj Abisai jaꞌ eyoc syaawiloj ebꞌ 30 tol caw jelan yakꞌon jowal tuꞌ. Jaꞌ yet jun tiempoal tuꞌ, jix smakꞌ cam 300 winaj yetoj slanza. Queytuꞌ jix yun yiꞌon yip yin yopiso xol ebꞌ 30 tuꞌ. 21 Yu jun tuꞌ, caw wal miman jix yun yeloc apnoj sattaj ebꞌ tuꞌ, yuxan jix oc naj syaawiloj ebꞌ, asan xin, eyto ma apnoj sjelanil yintaj ebꞌ oxwan yet sbꞌabꞌelal tuꞌ.
22 Jaꞌ naj Benaías scꞌaal Joiadá, a conobꞌ Cabseel, caw jelan jix eloc naj, ecꞌal tzet jix yunne. Jaꞌ naj tuꞌ jix smakꞌon cam cawan soldado caw jelan a conobꞌ Moab. Jaꞌ yet jun cꞌual yet caw ey sajbꞌacom, jix eytoj bꞌey jun sjolanil jun xabꞌ. Jaꞌ tituꞌ jix smakꞌ cam jun noꞌ león naj. 23 Yetoj cꞌal pax oj jix smakꞌ cam jun winaj a Egipto caw miman steel, txenxa man nan yox metro oj steel, iꞌbꞌil oc slanza caw miman yin steꞌal. Jaꞌ naj Benaías tuꞌ jix makꞌon cam yetoj jun teꞌ, jix yiꞌon ecꞌ slanza naj tuꞌ, jaꞌ yetoj jun lanza tuꞌ, jix smakꞌ camoj. 24 Jaꞌ yu jun tuꞌ, yuxan jix yiꞌ wal yip yopiso naj Benaías jaxca cꞌal yet ebꞌ oxwan bꞌinabꞌil tuꞌ. 25 Caw miman jix yun sbꞌina naj xol ebꞌ 30 tuꞌ; asan xin, eyto cꞌal ma apnoj jaxca ebꞌ oxwan yet sbꞌabꞌelal tuꞌ. Jix ale oc naj Benaías tuꞌ syaawiloj ebꞌ chi teynen naj rey David tuꞌ.
26 Jaꞌ sbꞌi ebꞌ caw jelan tuꞌ, jaꞌton ebꞌ tiꞌ: Asael, yuẍtaj naj Joab, Elhanán, scꞌaal Dodo a conobꞌ Belén, 27 Samot, a conobꞌ Harod; Heles, a conobꞌ Paltita; 28 Irá, scꞌaal Iqués a conobꞌ Tecoa; Abiézer, a conobꞌ Anatot; 29 Sibecai, a conobꞌ Usa; Ilai a conobꞌ Ahohíta; 30 Maharai, a conobꞌ Netofá; Héled, scꞌaal Baaná, a conobꞌ Netofá cꞌal pax oj. 31 Jaꞌ naj Itai scꞌaal Ribai a conobꞌ Guibeá ey yul yet Benjamín; cꞌal naj Benaías a conobꞌ Piratón. 32 Naj Hidai caan bꞌey stiꞌ jaꞌ Gaas; Abiel a conobꞌ Arbá; 33 Azmávet, a Bahurim; Eliahbá, a conobꞌ Saalbón; 34 ebꞌ scꞌaal Jasén a Gizón; Jonatán scꞌaal Sagué a conobꞌ Harar; 35 Ahiam, scꞌaal Sacar a conobꞌ Harar cꞌal pax oj; Elifal, scꞌaal Ur; 36 Héfer a conobꞌ Mequera; Ahías a conobꞌ Paltita; 37 Hesrai a conobꞌ Carmel; Naarai scꞌaal naj Esbai; 38 Joel yuẍtaj Natán; Mibhar scꞌaal Hagrai; 39 Sélec a conobꞌ Amón; Naharai a conobꞌ Berot; jaꞌ jun tuꞌ inen oc smitxꞌkꞌabꞌ naj Joab yet jowal, jaꞌton naj yuneꞌ ix Seruiá. 40 Naj Irá yetoj naj Gareb a conobꞌ Jatir ebꞌ. 41 Naj Urías, Hitita naj; Zabad scꞌaal naj Alhai; 42 Adiná scꞌaal naj Sizá yet Rubén, yaaw yeoc xol ebꞌ yicꞌaal Rubén, ey 30 ebꞌ winaj jaꞌjun yetoj. 43 Hanán, scꞌaal Maacá; Josafat, a conobꞌ Mitnita. 44 Uzías a conobꞌ Astarot; Samá yetoj naj Jehiel, scꞌaal Hotam, a conobꞌ Aroer ebꞌ. 45 Jediael yetoj Johá scꞌaal naj Simrí a conobꞌ Tiza. 46 Eliel a conobꞌ Mahanaim; Jerebai, cꞌal Josavía scꞌaal Elnáam ebꞌ, Itmá a conobꞌ Moab. 47 Eliel, Obed yetoj Jaasiel, a conobꞌ Sobá, ebꞌ.