Ocnaj David Sreyaloj Israel Cꞌal Judá
5
Jix lawi tuꞌ, masanil ebꞌ yicꞌaal Israel jix jul kꞌanabꞌ ebꞌ yetoj naj David bꞌey Hebrón. Jix yalon ebꞌ jaxca tiꞌ: Jaon tiꞌ, jaonto cꞌal oc ja wetoj. 2 Caxcꞌal yel tol jaꞌ naj Saúl jix oc cu reyaloj, jaach cꞌaltaꞌ jix ja wakꞌ ja wip jon ja wijbꞌan yin jowal. Yetoj cꞌal pax junxa, tol jaꞌ Jehová jix aloni tol jaach oj jon ja wijbꞌa, cꞌal ja woc yin reyal cu xol bꞌey cu conobꞌ tiꞌ, ẍi ebꞌ tet naj.3 Jix bꞌetecꞌ ebꞌ icham winaj yeoc yul conobꞌ Israel kꞌanabꞌ yetoj naj David bꞌey Hebrón, yu chi swaꞌnen can ye jun swa kꞌane yetoj ebꞌ, catuꞌ jix yaon can oc Jehová ebꞌ yin testigoal yin kꞌane jix yal can ebꞌ tuꞌ. Queytuꞌ jix yun yoc can naj David yin sreyalil conobꞌ Israel. 4 Jaꞌ naj David tuꞌ, ey 30 abꞌil skꞌinal yet jix ẍaꞌon el yich yoc yin reyal, cawinaj abꞌil jix yakꞌ reyal. 5 Nan swaxajebꞌ abꞌil jix yakꞌ reyal naj yibꞌan ebꞌ ánima a Judá bꞌey conobꞌ Hebrón. Jal bꞌey Jerusalén xin, ey 33 abꞌil jix yakꞌ reyal yibꞌan masanil conobꞌ Israel yetoj bꞌey Judá.
Jix Eyqꞌuey Conobꞌ Sión Yu David
6 Jix lawi tuꞌ xin, jix too naj rey David yetoj ebꞌ soldado bꞌey conobꞌ Jerusalén yu yakꞌon jowal yin ebꞌ Jebuseo. Yutol jix snaꞌ ebꞌ Jebuseo tuꞌ tol man oj skeꞌ yoc David yul sconobꞌ ebꞌ tuꞌ, yuxan jix yal ebꞌ tet jaxca tiꞌ: Jaach tiꞌ, ma skeꞌ ja woctej titiꞌ. Jaꞌ ebꞌ cꞌam chi skeꞌ yilwani cꞌal ebꞌ chi eyqꞌuey sbꞌeyi, jaꞌ ebꞌ man oj jaach chaꞌon octej titiꞌ, ẍi ebꞌ tet naj. 7 Jaxa jix yun xin, jix eyqꞌuey conobꞌ Sión tuꞌ yu naj David, yuxan jaꞌ jun tuꞌ chi yij Sconobꞌ David tinaniꞌ. 8 Jaꞌ yet junel, jix yal David tet ebꞌ soldado jaxca tiꞌ: Mac chi chaꞌon el yich jowal yetoj ebꞌ Jebuseo, oc ojabꞌtoj bꞌey jun jolan bꞌey chi kaꞌ stoo jaꞌ jaꞌ chi oc apnoj yul conobꞌ tuꞌ, catuꞌ chi smakꞌon cam masanil ebꞌ cꞌam chi skeꞌ yilwani cꞌal ebꞌ chi eyqꞌuey sbꞌeyi. Jaꞌ ebꞌ tuꞌ caw chin ya ebꞌ, ẍi naj. Jatuꞌ elnaj can yich jun kꞌane chi al-le jaxca tiꞌ: Jaꞌ ebꞌ cꞌam chi skeꞌ yilwani cꞌal ebꞌ chi eyqꞌuey sbꞌeyi cꞌam chi skeꞌ yoctoj ebꞌ yul Snail Jehová. 9 Jix lawi tuꞌ, catuꞌ jix swaꞌnen a smuroal spalacio naj rey David masantaꞌcꞌal jix octoj bꞌey yul cuartel bꞌey jun conobꞌ tuꞌ, jix yakꞌon yij sbꞌi, Sconobꞌ David, catuꞌ jix oc cꞌal ian swaꞌnen a wan na yinlaj tuꞌ, chi too tacꞌal bꞌey Milo, chi apni taꞌcꞌal oc bꞌey spalacio naj rey. 10 Jaꞌ Jehová Dios, Naj Yaaw yibꞌan Masanil, jaꞌ eyoc yetoj naj David, yuxan yel xacꞌal jix a can yetoj sjelanil.
Jaꞌ Naj Hiram Jix Yatoj Wan Yakꞌomal Servil Bꞌey Naj David
11 Jaꞌ naj Hiram sreyal conobꞌ Tiro, jix ẍejtoj ebꞌ smulnawom bꞌey naj David, yetoj wan ebꞌ naj josom teꞌ yetoj cꞌal ebꞌ makꞌom poꞌo chꞌen, iꞌbꞌil oc teꞌ kꞌuteꞌ yu ebꞌ, catuꞌ jix waꞌnele a sna naj David tuꞌ yu ebꞌ. 12 Queytuꞌ jix yun snaꞌcha el yu naj David, tol jaꞌcaw Jehová jix aon oc yin reyal xol conobꞌ Israel, jix iꞌle a can yin yopiso, yutol caw ochebꞌil conobꞌ Israel yu Jehová.
Wanxa Ebꞌ Scꞌaal Naj David
13 Jix lawi tuꞌ, jix el naj David bꞌey Hebrón, catuꞌ jix apni can oc bꞌey Jerusalén, eyto cꞌal ebꞌ ix ix jix oc yistiloj naj, yuxan caw ecꞌal yuninal naj jix ali yetoj ebꞌ ix. 14 Jaꞌ ebꞌ scꞌaal jix ali bꞌey Jerusalén, jaꞌton: Samúa, Sobab, Natán, Salomón, 15 Ibhar, Elisúa, Néfeg, Jafía, 16 Elisamá, Eliadá yetoj cꞌal Elifélet.
Jix Eyqꞌuey Ebꞌ Filisteo Yu David
17 Jaꞌ yet jix yabꞌen ebꞌ Filisteo tol jix oc naj David sreyaloj conobꞌ Israel, jix a nilna ebꞌ stoo yin naj David, cꞌuxan cꞌal jix yabꞌoc naj, yuxan jix too scol sbꞌa naj yul scuartel. 18 Jix apni xacꞌal oc ebꞌ Filisteo bꞌey spananil sjobꞌeal Refaim, jaꞌ tituꞌ jix swaꞌne ey bꞌulan sbꞌa ebꞌ. 19 Yuxan jix skꞌanle naj rey David tet Jehová jaxca tiꞌ:
—¿Chim skeꞌ wakꞌon jowal yetoj ebꞌ Filisteo tiꞌ? ¿Chim ja waoc ebꞌ yul jin kꞌabꞌ? ẍi naj rey David tet Jehová.
Jix takꞌwi Jehová tet jaxca tiꞌ:
—Asiꞌ, akꞌ jowal yetoj ebꞌ. Jain oj waoc ebꞌ yul ja kꞌabꞌ, ẍi Dios tet naj.
20 Jix apni oc naj David yetoj ebꞌ soldado bꞌey Baal-perasim. Jaꞌ tituꞌ jix eyqꞌuey ebꞌ Filisteo yu naj. Yu jun tuꞌ, jix yalon jaxca tiꞌ: Jaꞌ Jehová jix jajon jun bꞌe xol ebꞌ jin cajat tiꞌ an, jaxca wal chi yun stoo junoj jaꞌ elom jaꞌ, ẍi naj David tuꞌ. Jix yakꞌon can yij sbꞌi jun txꞌotxꞌ tuꞌ, Baal-perasim,a jix yij canoj. 21 Jaꞌ yet jix ela ebꞌ Filisteo tuꞌ, jix sbꞌejoncan bꞌulan wan sdiosal ebꞌ, catuꞌ jix yiꞌontoj wan tuꞌ naj David yetoj ebꞌ jaꞌjun yetoj.
22 Jix apni pax oc ebꞌ Filisteo bꞌey spananil sjobꞌeal Refaim junelxa. 23 Yu tuꞌ xin, jix skꞌanle pax naj rey David tet Jehová, jix takꞌwi tet jaxca tiꞌ:
—Manche jaach oc sattaj ebꞌ, jaꞌ yintaj ebꞌ chach tita. Jatuꞌ chach apni oc bꞌey ey teꞌ teꞌ bálsamo sbꞌi. 24 Jaꞌ yet oj ja wabꞌen sbꞌilwi yecꞌ xol-laj skꞌabꞌlaj teꞌ teꞌ tuꞌ, catuꞌ cha wakꞌon jowal yin ebꞌ yin eymanil, yutol jain oj jin bꞌabꞌoj ja sattaj, catuꞌ jain oj jin makꞌ cam ebꞌ Filisteo tuꞌ, ẍi Jehová.
25 Jix sjije naj rey David tzet jix yal Jehová. Yu jun tuꞌ, yuxan jix eyqꞌuey ebꞌ Filisteo tuꞌ yu naj, jix ẍaꞌel yich yujten el ebꞌ bꞌey Gabaón masantaꞌcꞌal bꞌey Guézer.