Jix Iꞌletoj Teꞌ Scaẍail Swa Kꞌane Jehová Yu Naj Rey David Bꞌey Jerusalén Yaloni
6
Jix syambꞌa ebꞌ soldado naj rey David caw jelan yakꞌon jowal xol ebꞌ Israel, ey 30,000 sbꞌisil ebꞌ. 2 Jix lawi tuꞌ, jix too naj bꞌey Baalá yul yet Judá, tzajan oc masanil ebꞌ soldado tuꞌ yintaj. Jix snaꞌoni, tol chi sqꞌuex bꞌey ey can teꞌ Scaẍail Swa Kꞌane Jehová Dios, Naj Yaaw yibꞌan masanil, jaꞌton teꞌ caẍa bꞌey chi bꞌina sbꞌi Jehová, Naj eyoc sdespacho snan ebꞌ querubín. 3 Jaꞌ bꞌey sna naj Abinadab, bꞌey jun tzalan, jaꞌ tituꞌ ey teꞌ scaẍail wa kꞌane tuꞌ. Jaꞌ yibꞌan jun carreta caw acꞌto, jatuꞌ jix yiꞌtej teꞌ caẍa tuꞌ ebꞌ. 4 Jaꞌ cawan scꞌaal naj Abinadab, jaꞌton Uzá cꞌal Ahió, jaꞌ ebꞌ a cuenta yiꞌon bꞌey teꞌ carreta tuꞌ. Jaꞌ naj Ahió bꞌabꞌel sattaj teꞌ. 5 Jaꞌ David yetoj masanil ebꞌ conobꞌ Israel, yetoj wal masanil scꞌul ebꞌ chi bꞌitni ebꞌ cꞌal ya tꞌujna ebꞌ scanalwi sattaj Jehová, lalan yoc teꞌ arpa cꞌal salterio, pandereta, castañuelas cꞌal chꞌen patxquiltaj chꞌen. 6 Jaꞌ yet jix apni oc ebꞌ yetoj teꞌ Scaẍail Swa Kꞌane Dios bꞌey stecꞌbꞌal tiriw naj chi yij Nacón, catuꞌ jix telcꞌotoj noꞌ wacax tokꞌnen oc teꞌ carreta tuꞌ, jaxa naj Uzá jix oc lacan yin teꞌ caẍa tuꞌ, yet watxꞌ cꞌam chi tit teꞌ yibꞌan teꞌ carreta tuꞌ. 7 Yu cꞌal jun tuꞌ xin, jix tit sjowal Jehová yin naj Uzá, yet cꞌal jun txolan tuꞌ jix cam naj, yutol jix oc lacan naj yin teꞌ caẍa tuꞌ.8 Jix tit sjowal naj David yutol jix makꞌle cam naj Uzá yu Jehová, yu jun tuꞌ, yuxan Peres-uzá,a jix yij can sbꞌi jun txꞌotxꞌ tuꞌ yu naj, jacꞌalaꞌ jun sbꞌi tinaniꞌ. 9 Jaꞌ yet jun cꞌual tuꞌ, caw jix xiwa naj rey David sattaj Jehová. Yu jun tuꞌ, jix yalon naj jaxca tiꞌ: ¿Tzet to wal oj yun wiꞌontoj teꞌ Scaẍail Swa Kꞌane Jehová bꞌey ey jin ecꞌ tuꞌ an? ẍi naj. 10 Jix snaꞌon sbꞌa scꞌul David xin, yuxan ma xacꞌal yiꞌtoj teꞌ Scaẍail Swa Kꞌane Jehová yul sconobꞌ tuꞌ. Yu jun tuꞌ, yuxan jix yalaꞌ tol chi iꞌle cantoj teꞌ bꞌey sna naj Obed-edom, a conobꞌ Gat. 11 Oxebꞌ xꞌaaw jix can teꞌ bꞌey sna naj tuꞌ, caw wal jix yakꞌ syaaxilal Jehová yibꞌan naj Obed-edom yetoj cꞌal ebꞌ caan yul sna yetoj.
Jix Yiꞌtej Teꞌ Scaẍail Swa Kꞌane Dios Naj David Bꞌey Jerusalén
12 Jaꞌ yet jix al-le tet naj rey David tol yu teꞌ Scaẍail Swa Kꞌane Dios tuꞌ, yuxan ey syaaxilal yibꞌan naj Obed-edom yetoj ebꞌ caan yetoj yul sna, yetoj cꞌal masanil tzetyetal ey tet, yu jun tuꞌ, yuxan jix too naj David yiꞌontej teꞌ caẍa tuꞌ bꞌey sna naj Obed-edom. Yetoj wal stzalacꞌulal David jix yiꞌontej bꞌey yul sconobꞌ. 13 Jaꞌ yet jix cꞌoli sbꞌey stoo ebꞌ inen oc teꞌ caẍa tuꞌ, jantajne mi wajebꞌoj xol ajaneal chi too ebꞌ, catuꞌ jix yakꞌon jun noꞌ achꞌe wacax yetoj cꞌal jun noꞌ meꞌ caw bꞌakꞌech yin xaambꞌalil naj rey David tet Jehová.
14 Jaxa an pichile yet ebꞌ yakꞌomal xaambꞌal tol lino cꞌal eloj jaꞌ an eyoc yu naj David, catuꞌ chi a tꞌujna scanalwi yetoj tzalacꞌulal sattaj Jehová. 15 Queyton tuꞌ jix yun naj David yetoj masanil ebꞌ conobꞌ Israel. Mimej kꞌin jix yaoc ebꞌ yet jix yiꞌontej teꞌ Scaẍail Swa Kꞌane Dios ebꞌ bꞌey Jerusalén, chi xuꞌle noꞌ cacho catuꞌ chi yaon el yaw ebꞌ yu tzalacꞌulal.
16 Jaꞌ yet jix apni oc teꞌ Scaẍail Swa Kꞌane Jehová bꞌey sconobꞌ David, tꞌanan eltej ix Mical scutzꞌin naj Saúl bꞌey yul swentanail sna, jix yiloni tol jaꞌ naj rey David tol chi a tꞌujna naj scanalwi sattaj Jehová, yu jun tuꞌ, yuxan caw cꞌam yeloc apnoj naj yul sat ix.
17 Jaꞌ yet jix apni oc teꞌ Scaẍail Swa Kꞌane Dios yu ebꞌ tuꞌ, jix yaon octoj ebꞌ yul jun kꞌap na waꞌnebꞌil a yu naj rey David. Jix lawi tuꞌ, catuꞌ jix yakꞌon tzꞌaꞌ noꞌ xaambꞌal, cꞌal noꞌ xaambꞌal yet watxꞌcꞌulal naj David sattaj Jehová. 18 Jaꞌ yet jix lawi yakꞌon wan xaambꞌal tuꞌ, catuꞌ jix yalon watxꞌ kꞌane yibꞌan ebꞌ conobꞌ Israel yin sbꞌi Jehová, Naj Chi Skeꞌ Yu Masanil. 19 Jix lawi tuꞌ, catuꞌ jix spoꞌon ecꞌ ixim pan naj David xol masanil ebꞌ Israel yaman ecꞌ tituꞌ, ebꞌ winaj cꞌal ebꞌ ix, jix yakꞌ junjun ixim pan tet ebꞌ, yetoj niꞌoj noꞌ chiꞌbꞌe cꞌal an tajin sat uva. Jix lawi tuꞌ xin, catuꞌ jix meltzo ebꞌ bꞌey sna.
20 Jacꞌalaꞌ cꞌal pax oj, jix meltzo naj rey David bꞌey sna yu yalon watxꞌ kꞌane yibꞌan ebꞌ caan yetoj yul sna. Jaꞌ yet jix apni oc naj, jix jul chaꞌle naj yu ix Mical tuꞌ, jix yalon ix tet naj jaxca tiꞌ:
—Jaꞌ tinaniꞌ jaach sreyal Israel, watxꞌ xacꞌal mi jix ja wute ja bꞌa ja naꞌoni, yet jix ja txꞌoxon ja bꞌa sattaj ebꞌ ix yakꞌomal servil ebꞌ chi mulna ja wetoj. Caw qꞌuixwiltaj xacꞌal jix ja wute ja bꞌa jaxca xacꞌal junoj comon ánima, ẍi ix tet naj.
21 Catuꞌ jix takꞌwi naj David tet ix jaxca tiꞌ:
—Yel toni, jix jin canalwi an, asan xin, jaꞌ sattaj Jehová jix jin canalwi, yutol jaꞌ jix jin sicꞌon oc yin syaawiloj conobꞌ sqꞌuexeloj naj ja mam cꞌal sqꞌuexeloj ebꞌ naj ja wican. Yu jun tuꞌ, yuxan oj jin canalwoj cꞌal sattaj Jehová. 22 Tol chi skeꞌ wiꞌon ey jin bꞌa niꞌojxa, catuꞌ chi el jin qꞌuixwil jaxca ja walon tuꞌ, jal pax ebꞌ ix ix cha wal tuꞌ, miman weloc apnoj yul sat ebꞌ ix, ẍi naj rey David tuꞌ.
23 Jaꞌ ix Mical tuꞌ, cutzꞌin naj Saúl, cꞌamxa cꞌal junoj yuneꞌ jix yilaꞌ masantaꞌcꞌal jix camtoj ix.