—Caw cha wilaꞌ, tol kꞌuteꞌ cꞌal el masanil teꞌ eyoc yin jin na tiꞌ an, jaxa pax teꞌ Scaẍail Swa Kꞌane Dios xin, asan cꞌal chꞌan yul kꞌap na eyoctoj teꞌ, ẍi naj rey David.

3 Yu jun tuꞌ xin, jix yalon naj Natán tet naj jaxca tiꞌ:

—Yun ojabꞌ cꞌal tzet chi ẍaꞌ ja cꞌul cha wunne, yutol chi colwa cꞌal Jehová ja wetoj, ẍi Natán tet naj.

4 Jaꞌ yet jun akꞌbꞌal tuꞌ jix kꞌanabꞌ Jehová tet naj Natán, jix yalon jaxca tiꞌ: 5 Asiꞌ, ani al tet naj jin chejabꞌ David tuꞌ an, tol jain Jehová jin chi walaꞌ: ¿Tumi jaach oj ja waꞌne a junoj templo bꞌey oj jin caey ecꞌoj? 6 Yet tax cꞌal jix cꞌoli jex wiꞌon eltej jaex Israel jex tiꞌ bꞌey txꞌotxꞌ Egipto masantaꞌcꞌal tinaniꞌ, cꞌam cꞌal bꞌey jix jin caey ecꞌ yul junoj na. Ilaꞌ tol asan cꞌal yul-laj kꞌap na jix jin eyecꞌoj. 7 Jaꞌ yet jix jin bꞌeycꞌaltej, cꞌam juneloj jix wal tet ebꞌ icham winaj yeoc yul je conobꞌ, tol chi swaꞌne a junoj templo ebꞌ tol kꞌuteꞌ cꞌal eyoc yin bꞌey chin caey ecꞌoj, ja chi tet naj. 8 Cha walon cꞌal tet naj jin chejabꞌ tuꞌ jaxca tiꞌ: Jain caw Jehová, yaaw jin yibꞌan masanil chi walaꞌ: Yutol jain jix jaach wiꞌel yin ilo meꞌ, catuꞌ jix jaach waon can oc syaawiloj jin conobꞌ Israel tiꞌ. 9 Yal cꞌal bꞌeytuꞌ chach eqꞌui, ey jin cꞌal ecꞌ ja wetoj. Jix jin qꞌueyel masanil ebꞌ chi jowi oc ja win, catuꞌ jix wiꞌon a can ja mimanbꞌilal jaxca ebꞌ mimej winaj bꞌey yul yibꞌankꞌinal tiꞌ. 10 Yetoj cꞌal pax oj, jix wakꞌ jun je txꞌotxꞌ bꞌey oj jex caey ecꞌ jaex jin conobꞌ jex tiꞌ. Cꞌamxa mactxequel oj jex ujten el sat txꞌotxꞌ; cꞌamxa ebꞌ pena snaꞌbꞌal oj jex etnen jaxca yet yalantoj, 11 catuꞌ jix waon can oc ebꞌ yaaw yet chi yiꞌon bꞌey jin conobꞌ ebꞌ. Jain oj wiꞌel masanil ebꞌ chi jowi oc ja win. Jain Jehová jin chi walaꞌ, tol ey cꞌal ebꞌ ja wicꞌaal oj oc yin reyal. 12 Jaxa yet oj aapnoj stiempoal ja cam xin, jain oj wa can oc junoj ebꞌ ja cꞌaal yin reyal ja qꞌuexeloj, catuꞌ oj waon can oc masanil tzetyetal yul skꞌabꞌ. 13 Jaꞌ junoj oj waoc tuꞌ, jaꞌ oj waꞌnen a jin templo, catuꞌ oj waon cꞌal oc jun opiso tiꞌ yul skꞌabꞌ. 14 Jain oj jin oc sMamoj naj, catuꞌ jin cꞌaal oj yun oc naj. Ta ey bꞌey oj oc spenail naj, oj waoc syaꞌilal yin jaxca wal chi yun yale oc syaꞌilal yin junoj mactxequel chi oc spenail. 15 Asan xin, man oj wiꞌel jin camcꞌulal yin naj an, man jaxca oj jix yun wiꞌon el jin camcꞌulal yin naj Saúl, ilaꞌ tol jix wiꞌel yin yopiso, jaach jix jaach wa can oc sqꞌuexeloj naj. 16 Jain oj jin oc cꞌal ja wetoj, yet oj jaach bꞌey cꞌaltoj yin ja wopiso, catuꞌ oj oc cꞌal ebꞌ ja wicꞌaal yin reyal yin junelne, ja chi tet, ẍi Dios tet Natán.

17 Jaxca wal jix yun yalon Jehová, queytuꞌ jix yun yalon Natán tet naj rey David. 18 Jaꞌ yet jix yabꞌen jun kꞌane tuꞌ naj, jix oc ian yalon tet Jehová jaxca tiꞌ: Jaach Jehová, jaach jin Diosal, toj ey niꞌoj weloc apnoj, cꞌam pax yeloc apnoj ebꞌ wichmam. ¿Mac jin txequel, yuxan miman wopiso jix ja wakꞌa? 19 ¿Jaach Jehová, jin Diosal, tumi txenne wal yeoc jun tiꞌ cha naꞌ, yuxan jix ja walaꞌ tzet oj yun yeloc ebꞌ wicꞌaal yet bꞌakꞌin? Tumi wal jaxca sbꞌeybꞌal ebꞌ ánima ja bꞌeybꞌal tiꞌ. 20 ¿Tzet to wal junojxa watxꞌ walon ey jaach? Jaach Jehová jin Diosal, ja wotaj tzet yili jin naꞌbꞌal jain ja chejabꞌ jin tiꞌ. 21 Masanil wan kꞌane tol qꞌueyubꞌtaj xacꞌal yoqui, jaach jix ja wakꞌ wotajne eloj, yutol jaxca tiꞌ jix el yin ja cꞌul. 22 Yu jun tuꞌ xin, jaach jin Diosal cꞌamxa chi alcha jantaj ja jelanil, yutol cꞌam junoj ánima laan ja wetoj. Cꞌam junoj dios laan ja wetoj, cꞌam junojxa dios jaxca jaach tiꞌ, asanne jaach Dios jaach, jatacꞌalaꞌ chi yun kabꞌen ocoj. 23 Queyton tuꞌ ebꞌ ja conobꞌ Israel tiꞌ, cꞌam junojxa conobꞌ laan yetoj ebꞌ. Yutol asanne wal jun nación bꞌey sat txꞌotxꞌ tiꞌ, jix ja colcan el yul skꞌabꞌ ebꞌ chi jowi oc yin, yu yoc can ja conobꞌoj. Yu ja camcꞌulal yin, yuxan caw qꞌueyubꞌtaj jix ja wunne, jix ja wiꞌon eltej ja conobꞌ tuꞌ bꞌey txꞌotxꞌ Egipto, catuꞌ jix ja wiꞌon pax can el wan nación cꞌal wan comon dios sattaj ebꞌ yul-laj bꞌe. Yu jun tuꞌ, caw chi bꞌinale ja bꞌi yu ebꞌ conobꞌ, 24 yutol jaach jix jon ja waoc ja conobꞌoj, jaach jix jaach oc can cu Diosaloj.

25 Yu tuꞌ xin, jaach Jehová, jin Diosal, yun ojabꞌ cꞌal tzetyetal jix ja wal ey jin ja chejabꞌ jin tiꞌ, yetoj cꞌal yibꞌan masanil ebꞌ wicꞌaal. 26 Yet watxꞌ miman ojabꞌ yeloc apnoj ja bꞌi, catuꞌ chi yalon ebꞌ ánima tol Jehová Dios jaach, yaaw jaach yin Masanil, jaach ton cu Diosal jaon Israel jon tiꞌ. Jaxca ebꞌ wicꞌaal, caw tecꞌan oj yute sbꞌa ebꞌ ja sattaj yet oj oc ebꞌ yin reyal. 27 Jaach Jehová, jin Diosal Yaaw Jaach yibꞌan Masanil, cu Diosal jaach, jaach cha wakꞌ wotajne eloj tol oj oc cꞌal ebꞌ wicꞌaal yin yaawil. Yuxan chin tecꞌbꞌa jin bꞌa walon jun tiꞌ ey jaach an. 28 Jaach Jehová, Dios ton jaach, caw yel cꞌal tzet cha walaꞌ, caw watxꞌ tzet bꞌey jix ja wakꞌcan ja tiꞌ ey jin ja chejabꞌ jin tiꞌ. 29 El ojabꞌ yin ja cꞌul tol cha wakꞌ ja yaxilal yibꞌan ebꞌ wicꞌaal, yet watxꞌ chi stecꞌbꞌa cꞌal sbꞌa ebꞌ ja sattaj. Jaach jix ja wal can jun tiꞌ, jaach Jehová, jin Diosal, yu ton ja watxꞌcꞌulal, yuxan watxꞌ cꞌal oj yun yecꞌ yu ebꞌ wicꞌaal, ẍi naj David.