—Ilaꞌ tinaniꞌ, tol ey jin octej yul jun jin palacio tol kꞌuteꞌ cꞌal eloj, jal pax teꞌ Scaẍail Swa Kꞌane Jehová xin, jaꞌ yul Kꞌap Na eyoctoj teꞌ, ẍi naj.

2 Catuꞌ jix takꞌwi Natán tet naj jaxca tiꞌ:

—Chi skeꞌ ja waꞌnen masanil tzet chi yoche ja cꞌul yutol eyoc Dios ja wetoj.

3 Jaꞌ yet jun akꞌbꞌal tuꞌ, jix kꞌanabꞌ Dios tet naj Natán, jix yalon jaxca tiꞌ: 4 Asiꞌ, catuꞌ cha walon tet David, naj jin chejabꞌ, tol jain Jehová jin chi walaꞌ: Man jaach oj ja waꞌne a junoj templo bꞌey oj jin caey ecꞌoj. 5 Yet tax cꞌal jix jex wiꞌon eltej bꞌey Egipto, cꞌam cꞌal bꞌey jix jin caey ecꞌ yul junoj templo, asan cꞌal yul-laj Kꞌap Na chin caey ecꞌ satlaj txꞌotxꞌ. 6 Masanil cꞌal bꞌey jix jin ecꞌ cꞌal je yetoj, cꞌam cꞌal bꞌey jix jin kꞌan tet ebꞌ jix waoc je yaawiloj tol jaꞌ yul junoj templo chin caey ecꞌoj. Cꞌam bꞌey jix wal tet ebꞌ tol chi swaꞌne a junoj templo ebꞌ ey jin tol kꞌuteꞌ cꞌal eyoc yin bꞌey chin caey ecꞌoj. 7 Jain jix jaach wiꞌel yintaj noꞌ meꞌ yet watxꞌ chach oc can syaawiloj jin conobꞌ Israel. 8 Jix jin oc cꞌal ja wetoj bꞌey jix jaach ecꞌabꞌi, jix jin qꞌueyel masanil ebꞌ ja cajat jix jul ja sattaj, catuꞌ oj jaach wakꞌon bꞌina bꞌey masanil yul yibꞌankꞌinal tiꞌ. 9 Yetoj cꞌal pax oj, tuxa jix jin waꞌne bꞌey oj can jin conobꞌ Israel. Jaꞌ tituꞌ oj wakꞌcan ebꞌ yin junelne, cꞌamxa mactxequel oj tenon ebꞌ, cꞌal yetnele ebꞌ, jaxca jix yun ebꞌ yet yalantoj, 10 yet jix waon oc ebꞌ jix jex ijbꞌani, jain oj wiꞌel masanil ebꞌ je cajat tuꞌ; catuꞌ chi wakꞌon ja wotajne eloj tol oj wakꞌ cꞌal ja wopiso xol ebꞌ ja wicꞌaal. 11 Jaꞌ yet oj lawoj apnoj ja kꞌinal, oj jaach camoj; jain oj waoc junoj ja cꞌaal yin reyal ja qꞌuexeloj, catuꞌ oj wakꞌon cꞌal yip yin yopiso. 12 Yuxan jaꞌ jun ja cꞌaal tuꞌ oj waꞌnen a junoj templo ey jin an. 13 Jaxca wal junoj mame yetoj scꞌaal, queytuꞌ oj wute. Man oj wiꞌel jin camcꞌulal yin; man oj wintajne el jaxca jix wute naj Saúl, tol jix wiꞌel naj jin sattaj. 14 Oj wakꞌ cꞌal yopiso jun ja cꞌaal tuꞌ bꞌey jin conobꞌ. Jaꞌ yopiso tuꞌ oj bꞌey cꞌaltoj yin yicꞌaal ẍi Jehová tet naj Natán.

15 Yuxan jix yal naj Natán masanil wan tiꞌ tet naj rey David, jaxca jix yun yabꞌeni. 16 Yuxan jix octoj naj rey David kꞌanabꞌ sattaj Jehová, jix yalon jaxca tiꞌ: Jaach Jehová jin Diosal, ¿tzet weloc apnoj jain tiꞌ, cꞌal tzet yeloc apnoj jin mam cꞌal ebꞌ wichmam, yuxan miman ja watxꞌcꞌulal cha wakꞌ ey jin? 17 Jaꞌ jun tuꞌ jaxca tol txenne yeoc yul ja sat; ilaꞌ, lalanxa ja wakꞌon ja tiꞌ ey jin yin ebꞌ wicꞌaal yet yatoj tuꞌ. Laan xacꞌal oj jin ja wute jaxca ebꞌ mimej winaj chi bꞌina sat txꞌotxꞌ tiꞌ. 18 ¿Tzet to wal chi skeꞌ walon ey jaach yu wopiso cha wakꞌa? Jaach jin Diosal, ja wotaj tzet weocoj. 19 Jaach Jehová jin Diosal, masanil wan opiso tol qꞌueyubꞌtaj xacꞌal yoc jix ja wakꞌ ey jin tiꞌ, jatacꞌalaꞌ bꞌey chi el yin ja cꞌul, yet cha wakꞌon wotajne eloj. 20 Jaach Jehová jin Diosal, cꞌam junojxa dios laan ja wetoj; cꞌam bꞌey chi kabꞌ junojxa jaxca jaach tiꞌ. 21 Jal pax jaon ja conobꞌ Israel jon tiꞌ, cꞌam junojxa conobꞌ laan ketoj bꞌey sat txꞌotxꞌ tiꞌ jon. Ilaꞌ tol jaach jix jon ja coloꞌ, yet chi cu oc can ja conobꞌoj, yel xacꞌal miman jix yun sbꞌina ja bꞌi cu jon, yutol ey tzetyetal qꞌueyubꞌtaj xacꞌal yoqui. Jaach jix ja wiꞌel wanxa nacionlaj sattaj ja conobꞌ yet jix jon ja colon can eltej bꞌey Egipto. 22 Yutol jaach jix ja waoc conobꞌ Israel tiꞌ yin ja conobꞌoj yin junelne. Jaach Jehová, jaach ton cu Diosal jaach.

23 Yu tuꞌ xin, yun ojabꞌ bꞌey jix ja wakꞌcan ja tiꞌ ey jin, cꞌal yin ebꞌ wicꞌaal. Yun ojabꞌ tzet jix ja walaꞌ, 24 yet watxꞌ chi iꞌle a can ja bꞌi, catuꞌ oj al-leoj tol Jehová jaach, yaaw jaach yin masanil, cu Diosal jaach pax jaon Israel jon tiꞌ. Ta jaxca tuꞌ, caw junelne oj eecꞌ ebꞌ wicꞌaal yin yopiso ja sattaj. 25 Jaach jin Diosal, jix ja wakꞌ wotajne eloj, tol oj eecꞌ cꞌal ebꞌ wicꞌaal yin yopiso. Yu tuꞌ xin, jaach Jehová jin Diosal, caxcꞌal ja chejabꞌ weocoj, caw chin tecꞌbꞌa jin bꞌa jin txali ey jaach. 26 Jaach Jehová, Dios jaach toni, jix ja wakꞌcan ja tiꞌ ja wunen jun miman watxꞌcꞌulal tiꞌ ey jin. 27 Jaꞌ tinaniꞌ xin, chi el wal yin ja cꞌul ja wakꞌon ja watxꞌcꞌulal tet ebꞌ wicꞌaal, jain ja chejabꞌ jin tiꞌ, yet watxꞌ ey cꞌal ecꞌ ebꞌ ja sattaj. Jaach oj ja wakꞌ ja watxꞌcꞌulal tet ebꞌ, yuxan oj ẍaꞌ cꞌal ja yaxilal ebꞌ, ẍi naj rey David.