3 Jix eyqꞌuey cꞌal pax naj Hadad-ézer, sreyal conobꞌ Sobá, yu naj, jatuꞌ ey yetcꞌulaltoj conobꞌ Hamat. Jix yakꞌ jowal naj rey David, yutol jaꞌ jun rey tuꞌ lalan smajbꞌan oc sbꞌa yin txꞌotxꞌ txꞌotxꞌ, masantaꞌcꞌal bꞌey jaꞌ Éufrates. 4 Jix eyqꞌuey ebꞌ yu naj. Ey mil carruaje jix michꞌcha yu, yetoj 7,000 ebꞌ soldado eyoc yibꞌan che, yetoj cꞌal pax 20,000 ebꞌ chi bꞌeyi. Jix makꞌle can poꞌo yajan masanil noꞌ che tokꞌnen oc wan carruaje yet jowal tuꞌ, asanxane noꞌ sowalil chi kꞌanle yu junoj 100 carruaje jix cancanoj.

5 Eyman jix apni oc ebꞌ soldado a Sirio bꞌey Damasco colwa yetoj naj Hadad-ézer, sreyal conobꞌ Sobá tuꞌ, jaxa jix yunne jix eyqꞌuey cꞌal pax ebꞌ Sirio tuꞌ yu naj rey David, jix cam 22,000 ebꞌ yu naj. 6 Jix lawi tuꞌ, jix ale can oc jun miman bꞌulan ebꞌ soldado xol ebꞌ Sirio a Damasco yu naj. Queytuꞌ jix yun yoc can ebꞌ a Sirio tuꞌ yul skꞌabꞌ naj, jix yakꞌon stoolabꞌal ebꞌ tet naj. Queytuꞌ jix yun yeyqꞌuey ebꞌ scajat tuꞌ yetoj scolwal Jehová, yal cꞌal bꞌeytuꞌ jix yakꞌ jowal. 7 Jix lawi tuꞌ, jix yiꞌon cꞌal pax can oc chꞌen chi majon sat julbꞌal tol oro cꞌal eloj, wan chi skꞌan ebꞌ syaawil soldado naj rey Hadad-ézer, jix yiꞌontej naj bꞌey Jerusalén. 8 Queytuꞌ jix yun yiꞌon cꞌal pax jun miman bꞌulan chꞌen bronce bꞌey Tibhat, cꞌal bꞌey conobꞌ Cun, jaꞌton wan conobꞌ tuꞌ majbꞌiltaꞌ a yu naj rey Hadad-ézer. Jaꞌton yetoj wan chꞌen bronce tuꞌ, jix swaꞌne jun miman pila naj rey Salomón, wan mimej oy, yetoj cꞌal masanil mitxꞌkꞌabꞌe tol bronce cꞌal eloj, jix kꞌanbꞌalnele bꞌey stemplo Jehová.

9 Jaꞌ yet jix yabꞌen naj Toi, sreyal conobꞌ Hamat, tol jix eyqꞌuey masanil ebꞌ soldado naj Hadad-ézer, sreyal conobꞌ Sobá tuꞌ yu naj rey David, 10 jix ẍejontej jun scꞌaal chi yij Adoram, jix yiꞌtej oro, plata, cꞌal bronce, yet chi akꞌle scawil scꞌul naj rey David cꞌal yalon watxꞌ kꞌane yin, yutol jix eyqꞌuey naj rey Hadad-ézer, sreyal conobꞌ Sobá tuꞌ, yutol jaꞌ naj Toi tuꞌ jix yakꞌle jowal yetoj naj rey Hadad-ézer tuꞌ yet yalantoj. 11 Jix yakꞌon naj rey David masanil wan tuꞌ tet Jehová. Junne jix yun yakꞌon yetoj chꞌen oro cꞌal chꞌen plata jix bꞌet yiꞌcan ecꞌ naj bꞌey wan nacionlaj tuꞌ: Jaꞌton tet ebꞌ Edomita, tet ebꞌ Moabita, tet ebꞌ Amonita, tet ebꞌ Filisteo cꞌal tet ebꞌ Amalecita.

12 Yetoj cꞌal pax naj Abisai, yuneꞌ ix Seruiá, syaawil jun tujan ebꞌ soldado naj rey David, jix yakꞌ eyqꞌuey 18,000 soldado ebꞌ Edomita bꞌey spananil sjobꞌeal txꞌotxꞌ Atzꞌam. 13 Jix lawi tuꞌ, jix yaon oc jun miman bꞌulan ebꞌ soldado naj rey David bꞌey conobꞌ Edom; yu jun tuꞌ, masanil ebꞌ Edomita jix yaoc sbꞌa ebꞌ yalan ẍejbꞌanil naj rey David, yutol jaꞌ Jehová jix colwa yetoj yal cꞌal bꞌeytuꞌ jix yakꞌ jowal naj.

14 Jaꞌ naj David jix yakꞌ reyal yibꞌan conobꞌ Israel, jix sbꞌeybꞌalne swatxꞌil, yin cꞌal sjichanil jix yun swaꞌne yeoc junoj kꞌane xol ebꞌ conobꞌ. 15 Jaꞌ syaawil ebꞌ soldado, jaꞌton naj Joab, yuneꞌ ix Seruiá. Jal pax naj Josafat, scꞌaal Ahilud, jaꞌ eyoc stzꞌibꞌlomoj naj rey. 16 Jal pax naj Sadoc scꞌaal Ahitob, cꞌal Ahimélec, scꞌaal Abiatar, yakꞌomal xaambꞌal yeoc ebꞌ. Jaꞌ naj Savsá, tzꞌibꞌlom yeoc yintaj naj rey. 17 Jal pax naj Benaías scꞌaal Joiadá, yaaw yeoc xol ebꞌ Cereteo cꞌal ebꞌ Peleteo, jaꞌton ebꞌ chi teynen naj rey. Jaꞌ ebꞌ scꞌaal naj rey David yaaw yeoc ebꞌ yetoj smam yet chi colwa ebꞌ yetoj.