4 Yu tuꞌ xin, jix yalon naj Hanún tuꞌ, tol chi mitxꞌle ey ebꞌ ẍejabꞌ naj rey David tuꞌ. Jix tzujle el xil stiꞌ ebꞌ, catuꞌ jix tzil-letoj spichil ebꞌ masantaꞌcꞌal jix txeclo ẍop ebꞌ. Jix lawi tuꞌ xin, jix chejle meltzo ebꞌ. 5 Jaꞌ yet jix bꞌet al-le tet naj rey David yu tzet jix utele wan ẍejabꞌ tuꞌ, jix yaontoj ẍaꞌomal ebꞌ, yutol caw chi qꞌuixwi ebꞌ naj. Yu tuꞌ xin, jix yalontoj naj tol chi can ebꞌ bꞌey Jericó masantaꞌcꞌal chi chꞌibꞌ xil stiꞌ ebꞌ, catuꞌ chi tit ebꞌ junelxa.

6 Jix snaꞌon ebꞌ Amonita tuꞌ, tol caw jix tit sjowal naj rey David, yu jun tzet jix utele wan ẍejabꞌ tuꞌ yu ebꞌ. Yuxan jix yatoj Hanún, yetoj ebꞌ Amonita jun 660 quintal chꞌen plata yet chi oc stooloj carruaje yet jowal, cꞌal ebꞌ soldado yetoj noꞌ che chi tit bꞌey Mesopotamia, bꞌey Siria, bꞌey Maacá cꞌal bꞌey Sobá. 7 Jix toolane ebꞌ yet jix tit 32,000 carruaje yet jowal, cꞌal naj sreyal Maacá, yetoj ebꞌ soldado. Jix cancan bꞌulan ebꞌ bꞌey scawilal conobꞌ Medebá. Jix el cꞌal pax tej ebꞌ Amonita yul-laj sconobꞌ, yet chi jul yakꞌon jowal ebꞌ yin conobꞌ Israel. 8 Jaꞌ yet jix yabꞌen naj rey David jun tuꞌ, jix ẍejontoj Joab yetoj masanil ebꞌ soldado caw jelan yakꞌon jowal. 9 Jaxa ebꞌ Amonita jix bꞌabꞌi swaꞌnen sbꞌa yet chi too ebꞌ sattaj bꞌey chi octoj bꞌey yul sconobꞌ ebꞌ tuꞌ, jaꞌ ebꞌ rey jaꞌjun yetoj ebꞌ tuꞌ, jix cancan ebꞌ bꞌey jun acꞌal. 10 Jaꞌ yet jix yilon naj Joab, tol eyecꞌ wan scajat ebꞌ tuꞌ sattaj, cꞌal bꞌey yintaj, jix sicꞌle el ebꞌ soldado caw jelan yakꞌon jowal, yet chi yakꞌon jowal ebꞌ yin ebꞌ Sirio tuꞌ. 11 Jal wanxa ebꞌ soldado jix cancan yul skꞌabꞌ jun yuẍtaj chi yij Abisai, jix chejletoj yakꞌ jowal ebꞌ yetoj ebꞌ Amonita. 12 Jix yalon naj Joab jaxca tiꞌ: Ta tol yel xacꞌal oj skeꞌ yu ebꞌ Sirio tiꞌ wintaj an, eyman oj jaach tit colwa wetoj; ta tol jaꞌ ebꞌ Amonita yel xacꞌal oj skeꞌ yu ebꞌ ja wintaj, jain xa oj jin toj colwa ja wetoj. 13 Kakꞌwej kip, tecꞌan chi kute cu bꞌa yu cu colon el ebꞌ ket conobꞌ, jaꞌton ebꞌ sconobꞌ cu Diosal; yun ojabꞌ tzet chi el yin scꞌul Jehová, ẍi naj Joab.

14 Jix lawi tuꞌ xin, jix too naj Joab yetoj ebꞌ soldado yu yakꞌon jowal yin ebꞌ Sirio. Jaxa jix yunne, tol jix el ebꞌ sattaj ebꞌ. 15 Jaꞌ yet jix yilon ebꞌ Amonita tol jix ela ebꞌ Sirio tuꞌ, catuꞌ jix el cꞌal pax ebꞌ sattaj naj Abisai, jaꞌton yuẍtaj Joab; jix octoj ebꞌ Amonita tuꞌ scolon sbꞌa yul sconobꞌ ebꞌ. Jix lawi tuꞌ, jix meltzo naj Joab yetoj ebꞌ soldado bꞌey Jerusalén.

16 Jaꞌ yet jix yilontej ebꞌ Sirio tol jix eyqꞌuey ebꞌ yu ebꞌ Israel, jix yaontoj wan ẍejabꞌ ebꞌ scꞌatan wan yet conobꞌ ebꞌ eyecꞌ bꞌey junxa skꞌaxepal jaꞌ Éufrates. Jaꞌ naj Sofac, jaꞌ eyoc syaawiloj ebꞌ soldado naj rey Hadad-ézer tuꞌ. 17 Jaꞌ yet jix al-le wan tuꞌ tet naj rey David, catuꞌ jix syambꞌa oc masanil ebꞌ Israel junelxa, jix kꞌaxbꞌo ecꞌtoj ebꞌ yul jaꞌ Jordán, yet jix apni oc ebꞌ tituꞌ, catuꞌ jix yakꞌon jowal ebꞌ yetoj ebꞌ tuꞌ. Jix swaꞌne oc ebꞌ soldado naj rey David sattaj ebꞌ Sirio, queytuꞌ jix yun yakꞌlen jowal yetoj ebꞌ. 18 Jaxa jix yun xin, jix ela ebꞌ Sirio sattaj ebꞌ Israel tuꞌ. Ey 40,000 ebꞌ soldado chi bꞌeyi jix cami, cꞌal 7,000 ebꞌ eyoc yul carruaje jix cami. Jix cam cꞌal pax naj Sofac syaawilal ebꞌ soldado tuꞌ. 19 Jaꞌ yet jix yilon ebꞌ eyoc yetoj naj rey Hadad-ézer, tol jix eyqꞌuey ebꞌ yu ebꞌ Israel, jix yaon oc sbꞌa ebꞌ yin watxꞌcꞌulal yetoj naj rey David tuꞌ, jix yaoc sbꞌa ebꞌ yin yakꞌomaloj servil yul skꞌabꞌ naj. Jatax cꞌal yet tuꞌ ma xa yal scꞌul ebꞌ Sirio chi colwa yetoj ebꞌ Amonita.