Jix Eyqꞌuey Conobꞌ Rabá
20
Jaꞌ yet junel, jaꞌton yet stiempoal chi too ebꞌ rey yin yakꞌon jowal, jal naj rey David xin jix cancan naj bꞌey Jerusalén, jaꞌ naj Joab jix yambꞌantoj ebꞌ soldado yet Israelal yu yetneletoj xꞌotxꞌ ebꞌ Amonita yu ebꞌ. Jix too oc joyan ebꞌ yin conobꞌ Rabá, jix yakꞌon jowal ebꞌ yin, masantaꞌcꞌal jix lawi ey jun conobꞌ tuꞌ yu ebꞌ. 2 Jix lawi tuꞌ, jix apni oc naj rey David yiꞌontej scorona naj sreyal ebꞌ Amonita tol oro cꞌal eloj, caw ecꞌal chꞌen chꞌen watxꞌ yili eyoc yin, ey oxebꞌ arroba yalil. Catuꞌ jix ale oc yin sjolom naj rey David yu ebꞌ. Ecꞌal tzetyetal caw ey stool jix yiꞌeltej naj bꞌey jun conobꞌ tuꞌ. 3 Jal masanil wanxa ebꞌ ánima jix to cancan tituꞌ xin, jix iꞌle el ebꞌ yu naj, jix ale oc ebꞌ yin mulnail yetoj chꞌen serrucho, yetoj chꞌen eche, cꞌal chꞌen piocha. Jacꞌalaꞌ, jaxca tuꞌ jix yun naj rey David yetoj ebꞌ Amonita bꞌey wanxa conobꞌ. Jix lawi tuꞌ jix meltzotej yetoj masanil ebꞌ soldado bꞌey Jerusalén.Jix Oc Jowal Yetoj Ebꞌ Winaj Mimej Steel
4 Jix lawi tuꞌ, jix oc jun jowal yetoj ebꞌ Filisteo bꞌey Guézer. Jaꞌ yin jun jowal tuꞌ, jaꞌ naj Sibecai a Husá jix makꞌon cam naj Sipai, jaꞌ naj tuꞌ yicꞌaal ebꞌ winaj tol mimej steel. Queytuꞌ jix yun scancan ebꞌ Filisteo yalan ẍejbꞌanil ebꞌ Israel. 5 Jix oc junxa jowal yetoj ebꞌ Filisteo; jaꞌ yet tuꞌ, jaꞌ naj Elhanán scꞌaal Jaír, jaꞌ jix makꞌon cam naj Lahmí, yuẍtaj naj Goliat a Gat. Caw miman yin steꞌal slanza, jaxca mi yin teꞌ teꞌ bꞌey chi sbꞌacꞌle oc an txꞌal yet ebꞌ chemon kꞌap.
6 Jaꞌ bꞌey Gat jix oc junxa jowal. Ey junxa winaj caw miman steel tituꞌ, ey 12 yiximal skꞌabꞌ cꞌal 12 yiximal yajan; yicꞌaal ebꞌ mimej steel. 7 Jaꞌ jun winaj tuꞌ jix bꞌuchwa yin ebꞌ Israel, yuxan jix makꞌle cam yu naj Jonatán scꞌaal Simá, yuẍtaj naj rey David. 8 Jaꞌ wan mimej winaj tuꞌ, yicꞌaal Réfah ebꞌ, a conobꞌ Gat ebꞌ; jaꞌ ebꞌ tuꞌ jix eyqꞌuey ebꞌ yu naj rey David yetoj ebꞌ soldado yin jowal.