2 Yu jun tuꞌ, yuxan jix awtele ebꞌ a Gabaón tuꞌ yu naj rey David yet chi kꞌanabꞌ yetoj ebꞌ. (Jaꞌ ebꞌ a Gabaón tuꞌ man Israeloj ebꞌ, yutol ey jun bꞌulan ebꞌ Amorreo jix cancan bꞌey jix yakꞌ can stiꞌ ebꞌ Israel tol cꞌam chi qꞌueyle el ebꞌ yu ebꞌ. Jal pax naj Saúl xin, jix akꞌle qꞌueyel ebꞌ yu swatxꞌiloj ebꞌ Israel cꞌal Judá yaloni.) 3 Jix skꞌanlen naj David tet ebꞌ jaxca tiꞌ:

—¿Tzet watxꞌ chi wun je yetoj? ¿Tzet wal chi yun jin pajtzen ey jex yu bꞌey jix jex etexi, yet watxꞌ chi yakꞌ swatxꞌcꞌulal Jehová yibꞌan cu conobꞌ tiꞌ? ẍi naj.

4 Jix takꞌwi ebꞌ a Gabaón tet naj jaxca tiꞌ:

—Jaꞌ jun jowal cu xol yetoj naj Saúl yetoj cꞌal ebꞌ yicꞌaal tuꞌ, jaꞌ jun tuꞌ cꞌam swaꞌxubꞌal, man pax tumin oj chi koche jon, catuꞌ cꞌam pax chi yoche cu cꞌul tol ey mactxequel chi cam bꞌey conobꞌ Israel tiꞌ, ẍi ebꞌ naj.

Jix yalon pax naj rey David tet ebꞌ jaxca tiꞌ:

—Alwej ey jin an xin, tzetyetal che yoche chi wun je yetoj, ẍi naj tet ebꞌ.

5 Jix takꞌwi ebꞌ tet naj jaxca tiꞌ:

—Chi koche che yaoc jujwanoj yicꞌaal naj Saúl yul cu kꞌabꞌ jon, jaꞌton naj jix yoche tol jix cu yakꞌ lawoj eloj, jix snaꞌ naj tzet chi yun cu qꞌueyle eloj yet watxꞌ cꞌamxa chi cu caey ecꞌ bꞌey yul je conobꞌ jaex Israel jex tiꞌ. 6 Jaꞌ ebꞌ jujwan tuꞌ oj cu makꞌ cam ebꞌ jon, catuꞌ oj cu locbꞌa a ebꞌ sattaj Jehová bꞌey Guibeá, bꞌey sconobꞌ naj Saúl tuꞌ, jaꞌton naj sicꞌbꞌil el yu Jehová, ẍi ebꞌ naj.

Yuxan jix stakꞌe stiꞌ naj rey yakꞌon ebꞌ jujwan tuꞌ tet ebꞌ. 7 Ma ale oc naj Mefi-bóset yul skꞌabꞌ ebꞌ, yutol scꞌaal naj Jonatán, yitxiquin naj Saúl, yutol yakꞌnaj can stiꞌ naj rey David tet naj Jonatán sattaj Jehová yu naj. 8 Yuxan jaꞌ cawan yuneꞌ ix Rispá ix scutzꞌin Aiá, jaꞌ ebꞌ jix mitxꞌle ey yu naj rey tuꞌ, jaꞌton wan yuneꞌ ix yetoj naj Saúl, jaꞌton ebꞌ chi yij Armoní cꞌal Mefi-bóset. Jix smitxꞌon cꞌal pax ey jowan ebꞌ yuneꞌ ix scutzꞌin naj Saúl, ix chi yij Merab jaꞌton ebꞌ yuneꞌ ix yetoj naj Adriel, jaꞌton naj tuꞌ scꞌaal naj Barzilai, a conobꞌ Meholá. 9 Jix ale oc ebꞌ yul skꞌabꞌ ebꞌ a Gabaón tuꞌ. Jaꞌ ebꞌ jujwan tuꞌ jix locbꞌale a yu ebꞌ sattaj Jehová bꞌey sjolom wonan Guibeá. Queytuꞌ jix yun scam ebꞌ jujwan tuꞌ yet stiempoal wal yel yich skꞌuple a ixim cebada.

10 Jaꞌ ix Rispá tuꞌ, scutzꞌin naj Aiá, jix yaon oc an pichile ix yet cuscꞌulal yet chi xꞌoxon eloj tol eyoc ix yin cuscꞌulal, catuꞌ jix swaꞌnen a jun spat bꞌey sjolom jun chꞌen chꞌen tuꞌ ix, bꞌey eyecꞌ smimanil ebꞌ camnaj tuꞌ. Jaꞌ tituꞌ jix cancan ix yet jix el yich skꞌuple a ixim cebada, masantaꞌcꞌal yet jix oc nabꞌilkꞌinal. Cꞌam chi ẍaꞌoc noꞌ miij ix yin wan mimanile tuꞌ yet chi ecꞌ cꞌu, tam wal noꞌ xol-laj teꞌal noꞌ chi ẍaꞌoc ix yin yet chi ecꞌ akꞌbꞌal.

11 Jaꞌ yet jix al-le tet naj rey David yu tzet chi yun ix Rispá tuꞌ, jaꞌton ix scaabꞌ yistil naj Saúl, 12 yu jun tuꞌ, yuxan jix yatoj wan ẍejabꞌ naj yet chi too iꞌletej sbꞌajil naj camom Saúl yetoj scꞌaal chi yij Jonatán bꞌey conobꞌ Jabés yul yet Galaad. Yutol jaꞌ ebꞌ a conobꞌ Jabés jix bꞌet iꞌontej bꞌey scawilal txombꞌal bꞌey Bet-sán, bꞌey jix slocbꞌa a ebꞌ Filisteo, yet jix makꞌle cam ebꞌ yet jix oc jowal bꞌey Gilboa. 13 Jix ẍejon naj rey yiꞌletoj sbꞌajil Saúl yetoj yet Jonatán, catuꞌ chi iꞌletoj sbꞌajil ebꞌ jujwan jix a locan tuꞌ. 14 Jix mujle can eytoj sbꞌajil naj camom Saúl yetoj yet Jonatán yetoj cꞌal ebꞌ jujwan tuꞌ, bꞌey mujan naj Quis, smam Saúl tuꞌ, bꞌey Selá yul yet Benjamín. Jix yun ebꞌ jaxca jix yun yalon naj rey David tuꞌ. Jix lawi masanil wan tuꞌ xin, jix ẍaꞌ scꞌul Dios tzet jix kꞌan naj rey yu swatxꞌiloj ebꞌ conobꞌ.

15 Jix yakꞌon pax jowal ebꞌ Filisteo yetoj ebꞌ Israel junelxa, yuxan jix too naj rey David yetoj ebꞌ soldado yin jowal tuꞌ, asan xin, caw chi cꞌuumbꞌi naj rey David tuꞌ sicꞌlebꞌil. 16 Ey jun winaj chi yij Isbí-benob, yicꞌaal ebꞌ naj mimej steel, jaꞌ jun tuꞌ chi yoche chi makꞌon cam naj rey tuꞌ. Jaꞌ chꞌen slanza chi skꞌanbꞌalne yin jowal ecꞌbꞌan jujebꞌ libra yalil chꞌen, jatuꞌ jejan eytoj jun chꞌen acꞌ espada yin jun miman sat kꞌalile eyoc yu naj. 17 Jaꞌ naj Abisai yuneꞌ ix Seruiá, jaꞌ naj jix colon el naj rey David tuꞌ, catuꞌ jix makꞌle cam jun Filisteo tuꞌ yu naj, yuxan jix yakꞌ can stiꞌ ebꞌ soldado tuꞌ tet naj rey David, jix yalon ebꞌ jaxca tiꞌ: Watxꞌ tol cꞌamxa chach eltoj ketoj yin akꞌo jowal tuꞌ, yet watxꞌ cꞌam chach qꞌueyle eloj, yutol jaach ey jaach oc yipoj cu cꞌul jaon Israel jon tiꞌ, ẍi ebꞌ tet naj.

18 Jix lawi tuꞌ xin, jix oc pax junxa jowal yetoj ebꞌ Filisteo bꞌey Gob. Jaꞌ yet jun tiempoal tuꞌ, jaꞌ naj Sibecai a Husá jix makꞌon cam naj chi yij Saf. Jaꞌton jun tuꞌ yicꞌaal ebꞌ mimej steel. 19 Jix bꞌey cꞌaltoj jayebꞌoj cꞌu, catuꞌ jix oc pax junxa jowal yetoj ebꞌ Filisteo bꞌey conobꞌ Gob. Jaꞌ naj Elhanán scꞌaal Jaír a Belén, jaꞌ jix makꞌon cam jun yuẍtaj Goliat jun a conobꞌ Gat. Jaꞌ steꞌal lanza naj tuꞌ laan yin jaxca teꞌ teꞌ bꞌey chi oc an txꞌal yin chembꞌal.

20 Jix lawi tuꞌ jix oc cꞌal pax junxa jowal bꞌey conobꞌ Gat. Jaꞌ tituꞌ ey jun winaj caw miman steel, yicꞌaal ebꞌ mimej winaj. Jaꞌ jun tuꞌ ey wajebꞌ yiximal junjun skꞌabꞌ, ey cꞌal pax wajebꞌ yiximal junjun yajan. 21 Caw wal jix bꞌuchwa naj yin ebꞌ soldado Israel, yuxan jaꞌ naj Jonatán scꞌaal Simá yuẍtaj naj rey David, jaꞌ jix makꞌon camoj. 22 Jaꞌ canwan ebꞌ mimej winaj tuꞌ yicꞌaal Réfah ebꞌ, jaꞌton naj a Gat, jix eyqꞌuey cꞌal pax ebꞌ yu naj rey David yetoj ebꞌ soldado.