Jaach jin Diosal, jaxca tol jin nachꞌen jaach, jaxca tol jin cuartel ja weocoj, catuꞌ jin Colomal jaach.

3 Jaach jin Diosal, jaꞌ win chi wiꞌ wip, jaꞌ ja win chin col jin bꞌa. Jin teynemal ja weocoj, jin Colomal jaach yutol ey ja wipalil. Yu ja colwal win, yuxan cꞌam chin michꞌcha yu ebꞌ jin cajat. Jaach jin Colomal, jaach jix jin ja colel yul skꞌabꞌ ebꞌ jix ochen chin qꞌueyon eloj.

4 Caw smoo ton wal chin bꞌitni ey jaach. Jaꞌ yet chi walon jin bꞌa ey jaach, yin eymanil chin ja colel yul skꞌabꞌ ebꞌ jin cajat.

5 Jaꞌ camich joyan xacꞌal oc winlaj. Manxa jantajoj syaꞌilal jix jul win yet chin qꞌueyle el yu.

6 Jaxca tol jix kꞌal-le oc lasu win yu camich, catuꞌ jix swaꞌne ey yaal jin sattaj yet chin telcꞌotoj yu.

7 Jaach Jehová jin Diosal, chi wal jin bꞌa ey jaach yet ey jin oc xol jin taccꞌulal. Jaach jin Diosal jix jin kꞌan ja colwal. Jaꞌ bꞌey ja calubꞌal jix ja wabꞌ tzet jix walaꞌ. Jix apni oc tzet jix wal yin txa yin ja txiquin.

8 Catuꞌ jix ecꞌ jun miman quixcabꞌ caw jow. Yelcꞌulal jix bꞌilwi sbꞌatxlubꞌal satcan. Jix ja stzikoꞌtane yetoj sjowal ja cꞌul.

9 Jix eltej mucꞌ yul ja txaam, jaxa yul ja tiꞌ jix eltej kꞌakꞌ tol jow skꞌakꞌal. Jix eltej jul-labꞌoj stzakꞌakꞌ yul ja tiꞌ.

10 Jix jajcha satcan, catuꞌ jix jaach eyoloj. Eyoc jun miman kꞌejin asun yalan ja wajan.

11 Jix jaach oc yibꞌan jun querubín, catuꞌ jix too jupupoj, jix jaach too bꞌatxatxoj yibꞌan kaꞌeꞌ.

12 Jaxa kꞌejkꞌinal jix oc ja weneloj. Jix ja webꞌa el ja bꞌa xol jun kꞌejin asun tol nonaj el yu jaꞌ.

13 Yu skopopial ja tzejejial jix chaw skꞌakꞌal wan stzakꞌakꞌ xol asun, cꞌal smakꞌwa cꞌu.

14 Jaach Jehová, caw miman ja weloc apnoj, chi el ja waw bꞌey satcan tuꞌ, jaxca wal chi yun sbꞌilwi cꞌu.

15 Jix ja waontej ja julbꞌal, queytuꞌ jix yun sajlem cantoj ebꞌ jin cajat. Jix ja julontej jun raya jix ey kopna xol ebꞌ, jix qꞌueyle el ebꞌ yu.

16 Jaach jin Diosal, yetoj ja wipalil yuxan jix ja watej jun miman kaꞌeꞌ jix txeclo a yich jaꞌ mar. Catuꞌ jix txeclo pax a xeꞌ jun yul yibꞌankꞌinal tiꞌ.

17 Jaꞌ bꞌey satcan tuꞌ jix ja bꞌatxbꞌa eytej ja kꞌabꞌ wibꞌan an, jaxca tol jix jin ja wiꞌon atej bꞌey yich jaꞌ naabꞌ jaꞌ.

18 Jix jin ja colon can el yul skꞌabꞌ ebꞌ caw ey yip, cꞌal yul skꞌabꞌ ebꞌ tol cꞌam chin ocheni, cꞌal tet ebꞌ yel xacꞌal jelan wintaj an.

19 Caw jix oc bꞌulna ebꞌ win yet caw ey jin oc yin syaꞌtajilal, jaach tiꞌ jix jaach oc cꞌal wetoj an.

20 Jix jin ja wiꞌeltej an, catuꞌ jix jin ja waon can octoj bꞌey jun lugar caw wal watxꞌ, yutol chin ja camcꞌulne.

21 Jaach jix ja pajtze jin watxꞌ bꞌeybꞌal, yutol cꞌam jin penail.

22 Yutol chin jije ja chejbꞌanil, cꞌam bꞌey jix wiꞌel jin naꞌbꞌal yin, cꞌam pax bꞌey chi wun junoj spenail.

23 Ey cꞌal ecꞌ masanil ja chejbꞌanil yin jin naꞌbꞌal, catuꞌ cꞌam cꞌal bꞌey chi wiꞌel jin naꞌbꞌal yin ja kꞌane.

24 Watxꞌ cꞌal jix wute jin bꞌeybꞌal ja sattaj. Jix jin teyne cꞌal jin bꞌa yet cꞌam chin eyqꞌuey yin junoj spenail.

25 Yu tuꞌ xin, jix wakꞌ spajtzebꞌal ey jin an, jatacꞌalaꞌ jin watxꞌ bꞌeybꞌal, yutol cꞌam jin penail yul ja sat.

26 Jaach Jehová, caw chi eloc jaxca bꞌey jix ja wakꞌcan ja tiꞌ tet ebꞌ jijem chi yute sbꞌa ey jaach. Jaꞌ mactxequel watxꞌ snaꞌbꞌal, watxꞌ cꞌal pax cha wute ja naꞌbꞌal yin ebꞌ.

27 Watxꞌ cha wute ja bꞌa tet mactxequel watxꞌ sbꞌeybꞌal, catuꞌ cha txꞌoxon pax ja jelanil tet ebꞌ jelan yetnen ánima.

28 Yutol cha colel ebꞌ yeynajil chi yute sbꞌa, catuꞌ cha wintajne can el ebꞌ mimejtaj chi yute sbꞌa.

29 Jaach Jehová, jaxca sajkꞌinal ja weoc win. Jaach jin Diosal, jaach chin ja wiꞌ can eltej xol kꞌejkꞌinal.

30 Jaach jin Diosal, yetoj ja colwal yuxan chi skeꞌ wakꞌon jowal yetoj ebꞌ soldado chi jowi oc win, catuꞌ chin ecꞌ eltoj yibꞌanlaj smuroal conobꞌ.

31 Jaach Jehová jin Diosal, yel xacꞌal watxꞌ ja bꞌeybꞌal. Jaꞌ tzet ja walnaj canoj, smoo wal chi kaoc yin cu cꞌul. Catuꞌ chach colwa cꞌal yin mactxequel tol chi yaoc yipoj scꞌul yin tzet cha walaꞌ.

32 Cꞌam junojxa Dios laan sjelanil jaxca jaach. Cꞌam junojxa comon dios chi skeꞌ scolwa jaxca chi yun ja colwa tiꞌ.

33 Jaach jin Diosal, jaach cha wakꞌ cꞌal wip. Jaach chin ja wijbꞌa yin watxꞌ bꞌeybꞌale.

34 Jaxca sbꞌey junoj noꞌ scꞌultajil che, queytuꞌ chi yun jin bꞌey ja wu. Jaach cha wakꞌ wip yet chin ecꞌ atoj satlaj pacꞌan.

35 Jaach chin ja wijbꞌa yet chi wakꞌon jowal, catuꞌ cha wakꞌon wip yet chin makꞌon kꞌatoj chꞌen julbꞌal tol chꞌen bronce cꞌal eloj.

36 Jaach Jehová, jaach chin ja teyne, catuꞌ chin ja coloni, chin ja wiꞌon bꞌey yetoj ja watxꞌ kꞌabꞌ. Jaꞌ yu ja watxꞌcꞌulal win, yuxan watxꞌ oj jin elocoj.

37 Caw watxꞌ jun bꞌe bꞌey chin ja wiꞌ bꞌeyoj, yet watxꞌ cꞌam chin telcꞌotoj.

38 Jix wujte ecꞌ ebꞌ chi jowi oc win, jix michꞌcha ebꞌ wu, ma jin oc cꞌal tucanoj masantaꞌcꞌal jix cam ebꞌ wu an.

39 Kocꞌ xacꞌal jix wute cantoj ebꞌ. Jix eyqꞌuey ebꞌ xol wajan an, yet watxꞌ cꞌamxa chi a waan ebꞌ.

40 Jaach jix ja wakꞌ wip yet jix wakꞌon jowal tuꞌ. Jaꞌ ebꞌ chi jowi oc win tuꞌ jix yiꞌey sbꞌa ebꞌ jin sattaj.

41 Jaꞌ ebꞌ jin cajat jix el ebꞌ jin sattaj. Queytuꞌ jix yun jin qꞌueyon can el ebꞌ cꞌam chin ocheni.

42 Jix yoche ebꞌ tol ey mac chi colwa yetoj; cꞌam pax junoj mactxequel jix colwa yetoj ebꞌ. Jaach jin Diosal, jix yal sbꞌa ebꞌ ey jaach, ma cꞌal jaach takꞌwoj tet ebꞌ.

43 Pilan jix jin qꞌueycan el ebꞌ, jaxca wal pojoj chi ijletoj yu kaꞌeꞌ. Jix jin tecꞌ can ey ebꞌ, jaxca wal chin yun stecꞌle ey txꞌotxꞌ stzokꞌom yul-laj bꞌe.

44 Jix jin ja colcan el yul skꞌabꞌ ebꞌ txꞌoj conobꞌal, jix jin ja waoc syaawiloj mimej conobꞌ. Jaꞌ ebꞌ ánima man wotaj oj, jaꞌ ebꞌ chin akꞌon servil.

45 Jaꞌ yet chi yabꞌen jin kꞌumal ebꞌ, jijem cꞌal chi yute sbꞌa ebꞌ ey jin an. Jaꞌ ebꞌ txꞌoj conobꞌal, chi yaoc sbꞌa ebꞌ yul jin kꞌabꞌ.

46 Jaꞌ ebꞌ txꞌoj conobꞌal tuꞌ chi xiwa ebꞌ, caw chi bꞌilwi a ebꞌ yet chi eltej ebꞌ bꞌey eyoctoj.

47 Jaach Jehová, iquis jaach cꞌaltaꞌ ecꞌoj. ¡Al-le ojabꞌ watxꞌ kꞌane ja win! ¡Iꞌle ojabꞌ a can ja bꞌi jaach cu Diosal, yutol cu Colomal jaach!

48 Jaach jin Diosal, jaach cha pajtze tet ebꞌ chin etneni, catuꞌ cha wiꞌontej ebꞌ conobꞌ yet chi wakꞌon yaawil yibꞌan ebꞌ.

49 Chin ja colon el yul skꞌabꞌ ebꞌ chi jowi oc win, yetoj tet ebꞌ pena snaꞌbꞌal. Jaach Jehová, jaach chin ja colel tet mac chi chichon oc scꞌul win an.

50 Yu tuꞌ xin, chi wal jin watxꞌ kꞌane ey jaach xol wan mimej conobꞌ tiꞌ, catuꞌ chin bꞌitni ey jaach an.

51 Ja wu, yuxan jix eyqꞌuey mimej jowal wu jain rey jin tiꞌ, yutol jaach jix jin ja waoc yin wopiso. Txꞌox cꞌal ja watxꞌcꞌulal win jain David jin tiꞌ, yetoj cꞌal yibꞌan ebꞌ wicꞌaal yet bꞌakꞌin, ẍi naj David.