2 Jaach Jehová, jaxca tol jin nachꞌen jaach, jaxca tol jin cuartel jaach, jin Colomal. Wipomal jaach, jaꞌ ja win chin col jin bꞌa, jin teynemal jaach, jin Colomal jaach yutol ey ja wip; ja wu yuxan cꞌam chin michꞌcha yu ebꞌ jin cajat yin jowal.

3 Oj wal jin bꞌa ey jaach, yutol smoo sbꞌitnelei ja bꞌi, queyton tuꞌ oj yun jin colcha el yul skꞌabꞌ ebꞌ jin cajat.

4 Jaꞌ yipal camich jix oc joyan winlaj an. Jix jul xiwcꞌulal win sattaj ebꞌ ey yip chi jowi oc win.

5 Jaꞌ camich jaxca tol jix spixoc lasu win, jaxca tol jix swaꞌne ey yaal jin sattaj.

6 Jaach jin Diosal, chi wal jin bꞌa ey jaach yet ey jin oc yin somcꞌulal. Jix jin kꞌan ja colwal, jix ja wabꞌ tzet jix wal bꞌey ja templo. Jix apni oc yel waw yin ja txiquin.

7 Catuꞌ jix ecꞌ jun miman quixcabꞌ caw jow. Yelcꞌulal jix bꞌilwi yich txꞌotxꞌ mimej wonan. Jix ja tzicoꞌtane yetoj sjowal ja cꞌul.

8 Jix eltej mucꞌ yul ja txaam, jaxa yul ja tiꞌ jix eltej kꞌakꞌ tol chi cu qꞌueyle el yu. Jix eltej jul-labꞌoj stzakꞌakꞌ yul ja tiꞌ.

9 Jix jaach tit jucna bꞌey satcan, catuꞌ jix jaach eyol sat txꞌotxꞌ tiꞌ. Eyoc jun miman kꞌejin asun yalan ja wajan.

10 Ey jaach oc yibꞌan jun querubín, jix jaach too jenenoj; jix jaach too bꞌatxatxoj yibꞌan kaꞌeꞌ.

11 Jix ja webꞌa el ja bꞌa tituꞌ, bꞌey kꞌej jolinaj yili. Jix ja webꞌa el ja bꞌa xol jun kꞌejin asun nonaj el yu jaꞌ.

12 Jix eltej kopna raya yul ja tiꞌ, jix tit sajbꞌat xol asun yetoj stzakꞌakꞌ.

13 Jaach Jehová, tol asan jaach ecꞌbꞌan ja wipal yibꞌan masanil tzetyetal, jix el ja waw, jaxca wal sbꞌilwi cꞌu bꞌey satcan. Jix tit sajbꞌat yetoj stzakꞌakꞌ.

14 Jix ja waeytej ja julbꞌal, jix sajlem cantoj ebꞌ chi jowi oc ja win. Jix ja waeytej raya, jix ja julon eytej jun kꞌakꞌ jix eyol kopna xol ebꞌ, jix ujtele el ebꞌ yu.

15 Jix txeclo yich jaꞌ mar, catuꞌ jix txeclo a sbꞌatxlubꞌal yul yibꞌankꞌinal tiꞌ yu ja kaꞌeꞌ, yutol caw ip jix yun yel yaw yul ja nukꞌ.

16 Jix ja bꞌatxbꞌa eytej ja kꞌabꞌ win bꞌey satcan tuꞌ, catuꞌ jix jin ja wiꞌon atej xol jaꞌ naabꞌ jaꞌ naat yich.

17 Jix jin ja colon can el tet ebꞌ jin cajat caw ey yip, yutol cꞌam chin yoche ebꞌ, yel xacꞌal ecꞌbꞌan yip ebꞌ wintaj.

18 Jix oc bꞌulna ebꞌ win yet ey jin oc yin bꞌiscꞌulal, jaach Jehová jix jaach oc wetoj an.

19 Jix jin ja wiꞌeltej bꞌey ey jin oc xol syaꞌtajil, jix jin ja waon can oc bꞌey colan, yet watxꞌ chi wakꞌ tzalabꞌoj jin cꞌul. Jix jin ja wiꞌeltej tituꞌ, yutol chin ja camcꞌulne.

20 Jix ja wakꞌ jin pajtzebꞌal, yutol jichan cꞌal chi wute jin bꞌeybꞌal. Jix ja wakꞌon ja watxꞌcꞌulal ey jin, yutol cꞌam jin penail.

21 Jix jin jije ja chejbꞌanil, cꞌam bꞌey chi wiꞌel jin naꞌbꞌal ja win jaach jin Diosal.

22 Naꞌan cꞌal masanil ja chejbꞌanil wu, cꞌam bꞌakꞌin chi too qꞌueycꞌulal ja kꞌane wu an.

23 Watxꞌ cꞌal jin bꞌeybꞌal ja sattaj. Jix jin teyne jin bꞌa yet watxꞌ cꞌam chin eyqꞌuey yin spenail.

24 Yu jun tuꞌ, yuxan jix ja wakꞌ spajtzebꞌal jin watxꞌ bꞌeybꞌal, yutol cꞌam jin penail yul ja sat.

25 Jaach Jehová jin Diosal, cha wakꞌ eloc bꞌey cha wakꞌ ja tiꞌ tet ebꞌ jijem chi yute sbꞌa ey jaach; jaꞌ ebꞌ watxꞌ snaꞌbꞌal, watxꞌ pax cha wute ja naꞌbꞌal yin ebꞌ.

26 Watxꞌ ja bꞌeybꞌal tet mac watxꞌ sbꞌeybꞌal, jal pax yin ebꞌ chi yetne yet animail xin, chi tit sjowal ja cꞌul yin ebꞌ.

27 Yutol chach colwa tet ebꞌ yeynajil chi yute sbꞌa, catuꞌ cha tecꞌon ey ebꞌ chi smeyne sbꞌa.

28 Jaach jin Diosal, jaach ton cha wakꞌ sajkꞌinal ey jin. Jaach jix jin ja wiꞌel xol kꞌejkꞌinal.

29 Jaꞌ yetoj ja colwal jix wakꞌon jowal yetoj ebꞌ soldado chi jowi oc win, jix jin ecꞌ eltoj yibꞌan smuroal sconobꞌ ebꞌ.

30 Yel xacꞌal watxꞌ ja naꞌbꞌal jaach jin Diosal. Jaꞌ tzet albꞌilcan ja wu, smoo chi kaoc yipoj cu cꞌul, yutol chach colwa yin ebꞌ ey jaach oc yipoj scꞌul.

31 Cꞌam junojxa Dios laan ja wetoj. ¿Tumi ey junojxa comon dios chi skeꞌ scolwa jaxca jaach tiꞌ?

32 Jaach cha wakꞌ wip. Cha waꞌnen pax oc jin bꞌeybꞌal.

33 Jaxca ojabꞌ yip yajan noꞌ scꞌultajil che, quey ojabꞌ tuꞌ wip cha wakꞌ yet chin bꞌeyi. Ey ojabꞌ cꞌal wip jin bꞌeyi, yet chin ecꞌ satlaj pacꞌan.

34 Jaach chin ja cuy wakꞌon jowal, cha wakꞌon wip yet chin ja colon el tet chꞌen julbꞌal tol bronce cꞌal eloj.

35 Jaach jin Diosal teyne jin an, catuꞌ chin ja coloni. Quetz jin bꞌey yetoj ja watxꞌ kꞌabꞌ. Yu ja colwal yuxan watxꞌ oj jin elocoj.

36 Caw watxꞌ jun bꞌe bꞌey chin ja wiꞌ bꞌeyoj, yuxan cꞌam bꞌey chin telcꞌotoj.

37 Jix wujte ebꞌ chin jowi oc win, jix michꞌcha ebꞌ wu, ma jin oc tucan wakꞌon jowal, masantaꞌcꞌal jix cam ebꞌ wu.

38 Kocꞌ xacꞌal jix wute cantoj ebꞌ, yet watxꞌ manxa oj a waan ebꞌ. Jix telcꞌotoj ebꞌ xol wajan.

39 Jaach ton jix ja wakꞌ wip yet jix wakꞌ jowal. Jix ja waoc ebꞌ jin cajat yul jin kꞌabꞌ.

40 Jix el ebꞌ jin cajat jin sattaj. Yuxan jix jin qꞌueyel ebꞌ cꞌam chin ocheni.

41 Jix el yaw ebꞌ skꞌanon colwal, cꞌam junoj mactxequel jix colon el ebꞌ. Jix yal sbꞌa ebꞌ ey jaach, ma jaach takꞌwoj tet ebꞌ.

42 Caw kocꞌ xacꞌal jix yun cantoj ebꞌ wu, jaxca xacꞌal pojoj chi ijletoj yu kaꞌeꞌ. Jix jin tecꞌ can ey ebꞌ, jaxca chi yun stecꞌle ey stzokꞌom yul-laj bꞌe.

43 Jix jin ja colcan el tet sjowal scꞌul ebꞌ conobꞌ, jix jin ja waoc syaawiloj mimej conobꞌlaj. Jaꞌ ebꞌ ánima man wotaj oj, jaꞌ ebꞌ chin akꞌon servil.

44 Asan cꞌal yabꞌen ebꞌ jin kꞌanabꞌi, jijem ebꞌ ey jin. Jaꞌ ebꞌ txꞌoj conobꞌal, jix yaoc sbꞌa ebꞌ yul jin kꞌabꞌ.

45 Jaꞌ ebꞌ txꞌoj conobꞌal, caw chi xiw ebꞌ ey jin yet chi eltej ebꞌ bꞌey chi yewbꞌa el sbꞌa.

46 Jaꞌ Jehová, iquis cꞌal ecꞌoj. ¡Al-le ojabꞌ watxꞌ kꞌane tet jin Colomal! ¡Iꞌle ojabꞌ a can sbꞌi Dios, yutol jin Colomal yeocoj!

47 Chi yakꞌ spajtzebꞌal tet ebꞌ chin etneni, catuꞌ chi yaon oc wan conobꞌlaj yul jin kꞌabꞌ yet chi wakꞌon yaawilal yibꞌan ebꞌ.

48 Jaꞌ Jehová chin colon el tet sjowal scꞌul ebꞌ chi jowi oc win, yetoj tet ebꞌ pena sbꞌeybꞌal. Jaꞌ chin colon pax el yul skꞌabꞌ ebꞌ cꞌam chi okꞌ scꞌul win.

49 Yu tuꞌ xin, jaꞌ xol ebꞌ mimej conobꞌ chi wal jin watxꞌ kꞌane ey jaach, catuꞌ chin bꞌitnen ja bꞌi.

50 Yetoj ja colwal, yuxan jix eyqꞌuey mimej jowal wu jain rey jin tol sicꞌbꞌil jin oc ja wu tiꞌ. Yin ojabꞌ cꞌal camcꞌulalil chach bꞌeytoj wetoj jain David jin tiꞌ, yetoj cꞌal ebꞌ wicꞌaal.