2 Junjun cꞌu, junjun akꞌbꞌal chi xꞌoxel sjelanil Dios yu jantaj tzet ey bꞌey satcan.

3 Caxcꞌal mi cꞌam junoj mactxequel chi alon el skꞌaneal, tam wal ey junoj nukꞌe chi abꞌle yoqui,

4 chi bꞌey cꞌal stoo skꞌaneal bꞌey masanil yul yibꞌankꞌinal tiꞌ, chi apni oc masantaꞌcꞌal bꞌey slawubꞌ yul yibꞌankꞌinal tiꞌ. Jaꞌ bꞌey satcan tuꞌ ey can oc cꞌu yu Dios.

5 Jaxca junoj achꞌe lalanto snupi, chi eltej yul scuarto, jaxca tuꞌ yeoc cꞌu; ma jaxca junoj winaj caw ey yip chi yakꞌ tzala scꞌul stoo yet chi yakꞌon ani.

6 Jaꞌ cꞌu chi aol bꞌey chi ẍaꞌel yich satcan, masantaꞌcꞌal chi apni oc bꞌey slawubꞌal satcan; cꞌam junoj mactxequel chi skeꞌ scolon el sbꞌa tet skꞌakꞌal yajan cꞌu.

7 Jaꞌ cuybꞌanile chi yakꞌ Jehová caw jichan toni, tol chi acꞌbꞌi can cu naꞌbꞌal yu. Jaꞌ ẍejbꞌanil caw yel, jaꞌ chi akꞌon sjelanil ebꞌ man to tzꞌajanoj snaꞌbꞌal.

8 Jaꞌ tzet chi yal Jehová, caw watxꞌ yeocoj, chi tzala cu cꞌul yu. Jaꞌ sley Jehová jichan toni, chi tzꞌajna cu naꞌbꞌal yu.

9 Jaꞌ eyilal tet Jehová caw wal watxꞌ, ey cꞌal ecꞌ yin tobꞌalkꞌinal. Jaꞌ sley Jehová caw jichan toni.

10 Yel xacꞌal tol ochebꞌil yintaj chꞌen oro caw watxꞌ scawxi. Yel xacꞌal chiꞌ yintaj noꞌ yal awcabꞌ chi ecꞌ liioj.

11 Chin stenchane cꞌal jain ja chejabꞌ jin tiꞌ; ta jijem jin, watxꞌ chin eloc yu.

12 ¿Mactxequel chi skeꞌ yilontej sbꞌa yin spenail? Jaach jin Diosal, akꞌ mimancꞌulal win yu wanxa jin penail cꞌam chi wil yoqui.

13 Cꞌam ojabꞌ chi waoc jin naꞌbꞌal jin to yin spenail. Jaꞌ wan spenail tuꞌ cꞌam ojabꞌ cha chaꞌoc ebꞌ win. Yet watxꞌ cꞌam jin penail yul ja sat.

14 Jaach jin Diosal, jin Colomal jaach, jin teynemal jaach; ochebꞌil ojabꞌ jin kꞌane cꞌal jin naꞌbꞌal ja wu.