2 Yuxan, masanil ebꞌ Israel tuꞌ jix el ebꞌ yintaj naj rey David, jaxa yintaj naj Sebá jix oc tzajan ebꞌ. Jaxa pax ebꞌ soldado yin yicꞌaal Judá xin, tzajan cꞌal oc ebꞌ yintaj naj rey David, jix tit tacꞌal ebꞌ ey bꞌey stiꞌ jaꞌ Jordán masantaꞌcꞌal bꞌey Jerusalén.

3 Jaꞌ yet jix apni oc naj rey David junelxa bꞌey spalacio bꞌey Jerusalén, jix yiꞌontoj laonwan ebꞌ scaabꞌ yistil ey can oc steynemaloj spalacio tuꞌ, jix ale can octoj ebꞌ ix yu bꞌey yul jun na. Tuxa cꞌal jix loꞌtzele ebꞌ ix yu naj tituꞌ, cꞌamxa cꞌal bꞌey jix wey naj yetoj ebꞌ ix. Jaꞌ tituꞌ jix majchele can octoj ebꞌ ix yu jaxca xacꞌal ebꞌ ix ix tol camnajxa yichamil, masantaꞌcꞌal jix cam ebꞌ ix.

4 Jix lawi tuꞌ jix yalon naj rey David tet naj Amasá jaxca tiꞌ:

—Awte masanil ebꞌ naj soldado yet Judá, catuꞌ chach jul yetoj ebꞌ naj yet caabꞌe jin cꞌatan an, ẍi naj rey tet naj.

5 Yu jun tuꞌ, jix too naj Amasá syambꞌan oc ebꞌ, caw jix ecꞌ pax tiempo yu ebꞌ naj, ma apnoj oc ebꞌ jaxca wal scꞌual jix yun yal-le tet naj. 6 Catuꞌ jix yalon naj rey David tet naj Abisai jaxca tiꞌ:

—Tejan yel xacꞌal oj cu yetne naj Sebá tiꞌ yintaj jaxca jix yun naj Absalón. Yuxan jaꞌ tinaniꞌ ijbꞌa masanil ebꞌ soldado tiꞌ, asiꞌ tzajan yintaj naj, jaxa tala chi yunne chi too scol sbꞌa naj yul junoj conobꞌ eyoc smuroal, catuꞌ chi ela naj ey jon, ẍi naj.

7 Yuxan masanil ebꞌ soldado yet naj Joab yetoj ebꞌ Cereteo cꞌal ebꞌ Peleteo, jaꞌton ebꞌ eyoc steynemaloj naj rey tuꞌ, yetoj wanxa ebꞌ soldado caw jelan yin jowal, jix el ebꞌ bꞌey Jerusalén, jix too ebꞌ yetoj naj Abisai, jix too tzajan ebꞌ yintaj naj Sebá tuꞌ. 8 Jaꞌ yet jix apni oc ebꞌ bꞌey scawilal jun miman nachꞌen bꞌey Gabaón, jaꞌ tituꞌ jix eltej naj Amasá ẍaꞌon ebꞌ. Jaxa naj Joab eyoc spichil yet jowal, kꞌalbꞌil snan yetoj jun miman sat kꞌalile. Jaxa bꞌey yin scꞌul tuꞌ, jaꞌ tituꞌ jejan eytoj jun chꞌen josbꞌal yul stzꞌuumal. Jaꞌ yet jix eltej naj ẍaꞌoni cꞌal yakꞌle scawil scꞌul naj Amasá tuꞌ jix atej kꞌotna chꞌen yul stzꞌuumal, catuꞌ jix sicꞌon aoj. 9 Jix oc mitxꞌan naj Joab tuꞌ yin xil stiꞌ naj Amasá yetoj swatxꞌ kꞌabꞌ yet jix stzꞌubꞌon el stiꞌ yu yakꞌlen scawil scꞌul ebꞌ, jix yalon tet jaxca tiꞌ:

—¿Watxꞌ mi cꞌal ja cꞌul jaach wuẍtaj? ẍi naj.

10 Jaꞌ naj Amasá tuꞌ cꞌam chi snaꞌ naj yu chꞌen espada iꞌbꞌil oc yu naj Joab tuꞌ, yu jun tuꞌ, yuxan yin eymanil jix yun stejon octoj chꞌen josbꞌal naj Joab tuꞌ yul scꞌul naj. Junocne jix yakꞌ naj Joab tuꞌ, jix ey secna yul scꞌul naj sat txꞌotxꞌ, catuꞌ jix cam naj. Jix lawi tuꞌ xin, jix too naj Joab yetoj jun yuẍtaj chi yij Abisai yintaj naj Sebá, scꞌaal naj Bicrí. 11 Ey jun soldado naj Joab jix oc linan scawilal bꞌey eey smimanil naj Amasá tuꞌ, jix yalon jaxca tiꞌ:

—Jaꞌ mactxequel eyoc yetoj naj Joab cꞌal yetoj naj rey David, oc ojabꞌ tzajan ebꞌ yintaj naj Joab tuꞌ, ẍi naj.

12 Jal naj Amasá tuꞌ xin, jix can cꞌal can telan smimanil naj xol ẍiqꞌuil bꞌey snan yul bꞌe tuꞌ. Jaꞌ yet jix yilon jun soldado tuꞌ tol masanil xacꞌal ánima chi ecꞌ tituꞌ chi oc tucan ebꞌ yiloni, yuxan jix sjitzel naj stiꞌ bꞌe tuꞌ, jix yaontoj jun kꞌap yibꞌan. 13 Jaꞌ yet jix yiꞌcan el naj bꞌey stiꞌ bꞌe tuꞌ, catuꞌ jix lawi ecꞌtoj masanil ebꞌ chi too tzajan yintaj naj Joab, yet chi too seyle ecꞌ naj Sebá tuꞌ yu ebꞌ.

14 Jaꞌ naj Sebá tuꞌ jix ecꞌ syambꞌa a ebꞌ soldado xol masanil ebꞌ yicꞌaal Israel masantaꞌcꞌal jix apni oc naj bꞌey Abel-Bet-maacá. Jaꞌ masanil ebꞌ yicꞌaal Bicrí jix yamcha oc yu, tzajan oc ebꞌ yintaj yet jix octoj ebꞌ yul conobꞌ tuꞌ. 15 Jaꞌ yet jix apni oc ebꞌ soldado naj Joab bꞌey Abel-bet-maacá, jix oc joyan ebꞌ yin conobꞌ tuꞌ, catuꞌ jix swaꞌnen a jun txꞌotxꞌ yet chi oc swalubꞌoj ebꞌ yinlaj smuroal conobꞌ tuꞌ, yet chi yakꞌon jowal ebꞌ. Masanil ebꞌ soldado tuꞌ jix oc ebꞌ smakꞌon ey smuroal jun conobꞌ tuꞌ. 16 Jaꞌ tituꞌ ey jun ix ix caw ey snaꞌbꞌal jix awi eytej ix yibꞌan smuroal conobꞌ tuꞌ, jix yalon ix jaxca tiꞌ:

—Abꞌwej, abꞌwej tzet chi walaꞌ. Alwej tet naj Joab tol chi sjitztej sbꞌa naj jin cꞌatan an, yutol ey tzet oj wal tet naj, ẍi ix.

17 Jaꞌ yet jix jul naj Joab scawilal tuꞌ, catuꞌ jix skꞌanlen jun ix ix tuꞌ tet naj jaxca tiꞌ:

—¿Jaach mi Joab jaach tiꞌ? ẍi ix tet naj.

—Jain toni, ẍi naj tet ix.

Jix yalon ix tet naj jaxca tiꞌ:

—Abꞌ tzetyetal oj wal jain ja wakꞌomal servil jin tiꞌ, ẍi ix tet naj.

—Lalan wabꞌen tzet cha walaꞌ, ẍi naj Joab, tet ix.

18 Catuꞌ jix yalon ix ix tuꞌ jaxca tiꞌ:

—Jaꞌ yet peyxa chi al-le jaxca tiꞌ: Jaꞌ mactxequel chi yoche chi yotajne junoj tzetyetal, skꞌanle ojabꞌ yabꞌ tet conobꞌ Abel, ẍi ix; jaxca tuꞌ chi yun swaꞌxi yeoc junoj kꞌane. 19 Jaꞌ jun cu conobꞌ tiꞌ jon, caw watxꞌ cꞌal chi yun kiꞌon bꞌey cu bꞌa jaon conobꞌ Israel jon tiꞌ, jaꞌton jun conobꞌ tol jijem catuꞌ miman yeloc apnoj yul sat Dios. Jal jaach chi yoche ja cꞌul tol cha wakꞌ lawoj eloj. ¿Tzet yuxan chi yoche ja cꞌul cha wakꞌ lawoj el masanil tzetyetal tol yet Jehová yeocoj? ẍi ix tet naj.

20 Jix yalon naj Joab tet ix jaxca tiꞌ:

—Jaꞌ jun tuꞌ cꞌam chin naꞌ ta tol chi wakꞌ lawoj el jun conobꞌ tiꞌ. 21 Manaj jun tuꞌ chi cu naꞌ jon, yutol ey jun winaj chi yij Sebá, yuninal naj Bicrí caan bꞌey txꞌotxꞌ tzalquiltaj txꞌotxꞌ yul yet Efraín, jaꞌ jun tuꞌ jix oc scajatoj naj rey David. Asan jun tuꞌ che yaoc yul cu kꞌabꞌ, catuꞌ chi cu el bꞌey jun conobꞌ tiꞌ jon, ẍi naj tet ix.

—Oj cu kꞌojeytoj sjolom naj ey jaach bꞌey yibꞌan smuroal conobꞌ tiꞌ xin, ẍi ix ix tuꞌ tet naj Joab.

22 Jix lawi tuꞌ xin, catuꞌ jix too ix smonten masanil ebꞌ ánima yetoj sjelanil snaꞌbꞌal, catuꞌ jix tzokꞌle el sjolom naj Sebá tuꞌ yu ebꞌ, jix kꞌojon eytej ebꞌ tet naj Joab. Jix lawi tuꞌ xin, jix yalon naj Joab tol chi xuꞌle noꞌ cacho yet chi el ebꞌ yin jun conobꞌ tuꞌ, queytuꞌ jix yun spaxtoj junjun ebꞌ soldado bꞌey sna, jix meltzo cantoj naj Joab kꞌanabꞌ yetoj naj rey bꞌey Jerusalén.

23 Queytuꞌ jix yun yoc can naj Joab yin syaawiloj masanil ebꞌ soldado yet Israel, jal pax naj Benaías scꞌaal naj Joiadá xin, jaꞌ naj yaaw yeoc xol ebꞌ Cereteo cꞌal xol ebꞌ Peleteo. 24 Jal pax naj Adoram chi ilon smulna jantaj ebꞌ chi mulnai, jal pax naj Josafat scꞌaal Ahilud, tzꞌibꞌlom yeoc naj yu naj rey. 25 Jal pax naj Sevá, jaꞌ chi tzꞌibꞌen skꞌaneal tzet chi yun naj rey. Jal pax naj Sadoc yetoj naj Abiatar, jaꞌ ebꞌ eyoc yin yakꞌomaloj xaambꞌal. 26 Jal pax naj Irá, a conobꞌ Jaír, jaꞌ jun tuꞌ yakꞌomal xaambꞌal naj rey David yeoc naj.