—Jaꞌ tinaniꞌ lalan ja wiꞌon el sqꞌuixwil ebꞌ naj ja soldado jix jaach colon el yetoj ebꞌ ja wuninal yetoj cꞌal ebꞌ ix ja wistil. 6 Jaꞌ tinaniꞌ, tol lalan ja txꞌoxon eloj tol cꞌam yeloc apnoj ebꞌ ja wet yaawil cꞌal ebꞌ ja soldado tiꞌ yul ja sat, jaxca wal tol chi cus ja cꞌul yin mactxequel chach etneni, jal ebꞌ chach ocheni cꞌam yeloc apnoj ebꞌ yul ja sat. Jaꞌ tinaniꞌ naꞌcha ojabꞌ el ja wu, yel mi watxꞌ cha wabꞌe ta ma cam naj Absalón tuꞌ, yintaj tol jaon tiꞌ jix cu cam cu masanil jon. 7 Yu tuꞌ xin, elantoj tinaniꞌ, catuꞌ cha wakꞌon smimanil scꞌul masanil ebꞌ ja soldado tiꞌ, Ta man oj jaach eltoj, sattaj wal Jehová chi walon ey jaach tol cꞌamxa junoj mactxequel eyecꞌ ja wetoj yet chi kꞌinibꞌi a yet yecal. Caw yel xacꞌal pena tzet oj jul ja wibꞌan tinaniꞌ yintaj tzetyetal jix jul ja wibꞌan yet achꞌe jaachto, ẍi naj Joab tet naj.

8 Yu tuꞌ xin, jix a waan naj rey David, catuꞌ jix bꞌet ey chotan naj bꞌey stiꞌ spuertail conobꞌ tuꞌ. Jaꞌ yet jix yabꞌen oc masanil ebꞌ conobꞌ eyoc yetoj tuꞌ, catuꞌ jix apni oc ebꞌ sattaj naj.

Jal pax ebꞌ Israel eyoc yetoj naj Absalón xin, yin xa elilal jix yun spaxtoj ebꞌ bꞌey sna. 9 Masanil junjun tujan ebꞌ yicꞌaal Israel, jix yal junjun ebꞌ jaxca tiꞌ: Jaꞌ naj rey jix cu colon el yul skꞌabꞌ ebꞌ Filisteo, cꞌal tet wanxa cu cajat, jaxa tinaniꞌ xin, tol jix el naj yul sconobꞌ tiꞌ yu scꞌaal Absalón. 10 Jaxa naj Absalón caw comon cꞌal jix kaoc naj cu reyaloj, ilaꞌ tuxa jix cam naj xol jowal. ¿Tzet chi kechbꞌanewej tinaniꞌ xin, yel xacꞌal mi watxꞌ tol chi kiꞌ pax tej naj David tiꞌ cu reyaloj? ẍi ebꞌ.

11 Masanil wan kꞌane jix yal ebꞌ Israel tuꞌ, jix yabꞌ naj rey David. Yuxan jix yatoj kꞌane naj tet ebꞌ yakꞌomal xaambꞌal, jaꞌton naj Sadoc cꞌal Abiatar tol chi skꞌanle ebꞌ tet ebꞌ icham winaj yeoc yul conobꞌ Judá jaxca tiꞌ: ¿Tzet yuxan che yiꞌecꞌ stiempo ebꞌ yu jin jul yiꞌontoj ebꞌ yin sreyaloj bꞌey jin despacho? 12 Kꞌanlewej tet ebꞌ tzet yuxan ian xacꞌal cꞌam chin yiꞌ meltzo ebꞌ bꞌey jin despacho junelxa. Naꞌbꞌa xacꞌal tol wicanto jin bꞌa yetoj ebꞌ naj, je chi tet ebꞌ, ẍi David. 13 Jix yal naj David tol chi too al-le tet naj Amasá jaxca tiꞌ: Jaach tiꞌ, tol kicanto cu bꞌa ja wetoj, yuxan jaꞌ yet oj bꞌey cꞌaltoj cu sattaj tiꞌ, jaach oj jaach oc can syaawiloj ebꞌ soldado sqꞌuexeloj naj Joab. Ta cꞌam chi eloc tzet chi wal tiꞌ an, tit ojabꞌ syaꞌilal wibꞌan yu Dios, ẍi naj David.

14 Yu jun tuꞌ, yuxan caw jix tzala a scꞌul ebꞌ a Judá, tol junxane jix yute snaꞌbꞌal ebꞌ, jix yalontoj ebꞌ tet naj rey tol chi meltzotej yetoj masanil ebꞌ eyoc yin yopiso yetoj. 15 Jaꞌ yet jix apni oc jun kꞌane tuꞌ, catuꞌ jix tit naj rey David, jix apni oc naj bꞌey stiꞌ jaꞌ Jordán. Yetoj cꞌal pax ebꞌ a Judá jix apni oc ebꞌ bꞌey Guilgal yet chi chaꞌle ecꞌtej naj yu ebꞌ bꞌey yul jaꞌ Jordán tuꞌ. 16 Jacꞌalaꞌ pax naj Simí scꞌaal Guerá, yicꞌaal naj Benjamín a conobꞌ Bahurim, eyman jix oc xol ebꞌ a Judá tuꞌ, jix jul chaꞌle naj David yu ebꞌ, 17 tzajan oc jun mil soldado ebꞌ yicꞌaal Benjamín yintaj naj. Jacꞌalaꞌ cꞌal pax naj Sibá naj yakꞌomal servil yeoc xol ebꞌ yicꞌaal Saúl, tzajan oc jolajonwan scꞌaal naj yintaj, yetoj juncꞌalwan ebꞌ yakꞌomal servil, bꞌabꞌel jix apni oc ebꞌ stiꞌ jaꞌ Jordán sattaj naj rey David tuꞌ. 18 Eyman jix kꞌaxbꞌo ecꞌtoj ebꞌ yul jaꞌ tuꞌ, yet chi too iꞌle ecꞌtej ebꞌ ix yistil cꞌal ebꞌ yuninal naj rey tuꞌ yu ebꞌ, catuꞌ jix colwa ebꞌ yin naj rey yal cꞌal tzetyetal chi skꞌan naj tet ebꞌ. Jaꞌ yet tuxa wal chi kꞌaxbꞌo ecꞌtoj naj rey bꞌey yul jaꞌ Jordán tuꞌ, jix apni oc naj Simí, catuꞌ jix ey noan sattaj naj. 19 Jix yalon jaxca tiꞌ:

—Chin oc tean ja win jaach rey, tol cha wakꞌ mimancꞌulal win yu jantaj jin penail jix oc ey jaach, jain ja wakꞌomal servil jin tiꞌ yet jix jaach el bꞌey conobꞌ Jerusalén. Cꞌam ojabꞌ chi tit ja jowal win an. 20 Chi wotajne eloj tol pena jix wute jin bꞌa ey jaach an, yu jun tuꞌ yuxan jaꞌ yin masanil ebꞌ yicꞌaal José, jain bꞌabꞌel jix jin jul jaach jin chaꞌon jaach rey, ẍi naj Simí tuꞌ.

21 Yu jun tuꞌ, yuxan jix yal Abisai, naj yuneꞌ ix Seruiá jaxca tiꞌ:

—¿Caw smoo chi cam naj Simí tiꞌ, yutol caw wal pena jix yal yin naj rey tol sicꞌbꞌil el yu Jehová? ẍi naj.

22 Catuꞌ jix takꞌwi naj rey David jaxca tiꞌ:

—¿Caw cꞌam je yoc jaex yuneꞌ jex ix Seruiá tiꞌ yin jun kꞌane tiꞌ? Manche je yakꞌ somcha el jin cꞌul. Jaꞌ tinaniꞌ wotajxa an tol oj jin oc pax sreyaloj ebꞌ wet Israelal tiꞌ, yuxan cꞌam junoj mactxequel chi skeꞌ scam yul cu conobꞌ tinaniꞌ, ẍi naj rey tuꞌ. 23 Jix yalon naj rey tet naj Simí jaxca tiꞌ:

—Chi wakꞌ jin tiꞌ sattaj Jehová tol cꞌam chach cami, ẍi naj.

24 Jix chaꞌle cꞌal pax naj rey tuꞌ yu naj Mefi-bóset, yitxiquin Saúl. Yet tax cꞌal jix el naj rey tuꞌ, masantaꞌcꞌal yet jix meltzo naj yin watxꞌcꞌulal, cꞌam tocꞌal juneloj jix xꞌael yajan naj Mefi-bóset tuꞌ, cꞌam tocꞌal bꞌey chi stzujel xil stiꞌ, cꞌal sqꞌuexon el spichil. 25 Jaꞌ yet jix ẍaꞌlen sbꞌa ebꞌ bꞌey Jerusalén, jix yalon naj David tet naj Mefi-bóset jaxca tiꞌ:

—¿Tzet yuxan ma jaach too wetoj? ẍi tet naj.

26 Catuꞌ jix takꞌwi naj Mefi-bóset tet jaxca tiꞌ:

—Jaach rey, yutol cꞌam swatxꞌil wajan an, yuxan jix wal tet Sibá, naj wakꞌomal servil tol chi yaoc stzꞌuum noꞌ jin bꞌuru catuꞌ chin oc yibꞌan noꞌ, catuꞌ chin too ja wetoj tuꞌ waloni, ma jix sjije tzet jix walaꞌ. 27 ¿Tzimi jix yun xijon a naj ey jaach? Jaach tiꞌ laan jaach jaxca junoj yángel Dios. Yuxan tol ojabꞌ chi eloc jaxca tzet chi yoche ja cꞌul. 28 Caxcꞌal mi tol smoo scam masanil ebꞌ yicꞌaal ebꞌ wichmam tuꞌ, ilaꞌ tol jix jin ja wawte low ja wetoj bꞌey ja meẍa, yuxan cꞌamxa tzet watxꞌ waloni, ẍi naj Mefi-bóset. 29 Jix yalon naj rey tet naj jaxca tiꞌ:

—Cꞌamxa tzet watxꞌ kalon ja wetoj, tuxa jix jin naꞌ an, asan tol oj ja poꞌoey snan txꞌotxꞌ txꞌotxꞌ ja win yetoj naj Sibá, ẍi naj rey tuꞌ.

30 Jix takꞌwi Mefi-bóset jaxca tiꞌ:

—Can ojabꞌ can naj Sibá yin txꞌotxꞌ masanil, asan jun chi walaꞌ tuxa jix jaach meltzo junelxa yin tzalacꞌulal bꞌey ja despacho tiꞌ, ẍi naj.

31 Jal pax naj Barzilai a Galaad, jix tit tacꞌal naj bꞌey Roguelim catuꞌ jix jul naj yilon skꞌaxbꞌo can ecꞌtoj naj rey David cꞌal stakꞌelen can sbꞌa yetoj. 32 Caw icham winajxa naj Barzilai tuꞌ, eyxa 80 abꞌil skꞌinal naj. Jaꞌ yet jix eyecꞌ naj rey David bꞌey Mahanaim jix yakꞌ saꞌbꞌeal tet naj rey tuꞌ, yutol caw wal bꞌeom naj. 33 Jix yalon naj rey David tet jaxca tiꞌ.

—Toon wetoj bꞌey Jerusalén, jain oj jaach jin loꞌtze an, ẍi naj rey tet naj.

34 Jix takꞌwi naj Barzilai jaxca tiꞌ:

—Jayebꞌxane abꞌil iquis jin, catuꞌ chi to wal jin too ja wetoj bꞌey Jerusalén tuꞌ. 35 Yutol eyxa 80 abꞌil jin kꞌinal, cꞌamxa chi wabꞌ ẍiꞌal tzet chi cu loꞌ cꞌal tzet chi kuqꞌueꞌ, cꞌamxa chi skeꞌ wiloni ta watxꞌ ma cꞌamaj, catuꞌ cꞌamxa chi wabꞌ sbꞌitni ebꞌ naj chi bꞌitni cꞌal ebꞌ ix ix chi bꞌitni. Tuxa cꞌal mi chi waoc jin bꞌa yin ja bꞌiscꞌulal oj jaach rey. 36 Asanne tol chin kꞌaxbꞌo can ecꞌtoj yul jaꞌ Jordán tuꞌ catuꞌ chin too niꞌojxa ja wetoj, yet chi wilon ja toocanoj. ¿Tzet to wal yuxan cha wal ey jin tol chin too ja wetoj bꞌey Jerusalén yu spajtzebꞌaloj jin watxꞌcꞌulal jix wakꞌ ey jaach? 37 Yuxan tol oj wal chi el yin ja cꞌul, chin ja chaꞌ meltzo bꞌey jin na, asanxane tol chi wechbꞌane jin cami, catuꞌ oj jin mujle bꞌey mujan ebꞌ jin mam jin txutx. Asan xin, ey jun ja wakꞌomal servil chi skeꞌ ja wiꞌontoj jaach rey, jaꞌton naj jin cꞌaal chi yij Quimham, iꞌtoj naj ja wetoj catuꞌ cha wakꞌon ja watxꞌcꞌulal tet naj, ẍi naj Barzilai tuꞌ.

38 Jix yalon naj rey David jaxca tiꞌ:

—Toj ojabꞌ naj Quimham tuꞌ wetoj an xin, ta chi ẍaꞌ ja cꞌul. Yun ojabꞌ jaxca tuꞌ. Yal cꞌal tzet cha kꞌanaꞌ oj jin jije cꞌal ey jaach, ẍi naj.

39 Masanil ebꞌ jaꞌjun yetoj naj rey tuꞌ, jix kꞌaxbꞌo ecꞌtoj ebꞌ yul jaꞌ Jordán, jaxa yet jix kꞌaxbꞌo ecꞌtoj naj rey David tuꞌ, catuꞌ jix stakꞌele can sbꞌa yetoj naj Barzilai jix stzꞌubꞌon can el stiꞌ junjun ebꞌ catuꞌ jix paxtoj naj bꞌey sna. 40 Jix lawi tuꞌ catuꞌ jix too naj rey bꞌey Guilgal, tzajan oc naj Quimham yetoj masanil ebꞌ a Judá yintaj, catuꞌ tzajan cꞌal pax oc nanxa bꞌulan ebꞌ Israel.

41 Masanil ebꞌ conobꞌ Israel jix bꞌet ilon naj rey, jix yalon ebꞌ tet naj jaxca tiꞌ:

—¿Tzet yuxan tol asanne ebꞌ ket conobꞌ yicꞌaal Judá jix jaach iꞌontej, yet jix jaach yiꞌon ecꞌtej ebꞌ bꞌey yul jaꞌ Jordán yetoj ebꞌ ix ja wistil cꞌal yetoj ebꞌ ja wuninal, cꞌal yetoj masanil ebꞌ ja wakꞌomal servil? ẍi ebꞌ tet naj.

42 Jal ebꞌ a Judá jix takꞌwi tet ebꞌ yet Israelal jaxca tiꞌ:

—Yutol kicanto cu bꞌa yetoj naj rey tiꞌ, yuxan cꞌam chi skeꞌ chi tit je jowal kin jon. ¿Tumi yu naj rey tiꞌ catuꞌ oj cu low jon, tumi ey niꞌoj tzetyetal oj yakꞌ naj ey jon che naꞌ? ẍi ebꞌ.

43 Jix takꞌwi ebꞌ yet Israelal ebꞌ tet jaxca tiꞌ:

—Caxcꞌal mi jaxca tuꞌ, yutol ey laonebꞌ icꞌaale jon je yintaj jaex tiꞌ, yu jun tuꞌ yuxan caw ey kalon ket yin naj rey David tiꞌ je yetoj. ¿Tzet yuxan chon je yintajne can eloj? ¿Tumi man jaon oj jix bꞌabꞌi kalaꞌ tol chi meltzotej yet chi oc naj cu reyaloj? ẍi ebꞌ.

Jaxa pax ebꞌ a Judá tuꞌ yel xacꞌal pena tzet jix yal ebꞌ yintaj wanxa ebꞌ yet Israelal tuꞌ.