Ocnaj Cꞌal Naj Rey David Yin Jowal
8
Jix lawi tuꞌ xin, jix yakꞌon jowal naj David yetoj ebꞌ Filisteo, jix eyqꞌuey ebꞌ yu naj, jix oc can ebꞌ yalan ẍejbꞌanil naj rey David. 2 Jacꞌalaꞌ, jix eyqꞌuey cꞌal pax ebꞌ Moabita yu. Jix chejle ey latzꞌan masanil ebꞌ sat txꞌotxꞌ, catuꞌ jix yechen naj yetoj jun txꞌan echbꞌal. Jaꞌ jantaj mactxequel chi cancan bꞌey yul caabꞌ txꞌanil chi cami, jaxa mactxequel chi cancan yul yet yox txꞌanil xin, cꞌam chi cami. Queytuꞌ jix yun scancan ebꞌ Moabita yalan ẍejbꞌanil naj rey David. Jix oc can ebꞌ yakꞌon stoolabꞌal tet naj.3 Jix yakꞌon pax jowal naj rey David yetoj naj sreyal conobꞌ Sobá, jaꞌton Hadad-ézer, scꞌaal naj Rehob, jaꞌ yet lalanto wal yiꞌon ecꞌ smajul txꞌotxꞌ naj Hadad-ézer tuꞌ bꞌey jaꞌ miman jaꞌ Éufrates. 4 Jix yiꞌtej naj rey David jun 1,700 ebꞌ soldado yin presowomal, jaꞌton ebꞌ eyoc yibꞌan che, yetoj cꞌal pax 20,000 ebꞌ tucꞌal chi bꞌeyi. Jix skꞌupon cꞌal pax toj xꞌanil yajan noꞌ che tokꞌnen oc carruaje yet jowal, asanxane noꞌ tol sowalil chi kꞌanle yin junoj 100 carruaje jix cancan yu.
5 Eyman jix apni oc ebꞌ a Sirio jix tit bꞌey Damasco colwa yetoj naj Hadad-ézer tuꞌ, jix eyqꞌuey cꞌal pax ebꞌ Sirio tuꞌ yu naj rey David, jix cam jun 22,000 ebꞌ yu naj. 6 Eyman jix yaoc ebꞌ soldado naj rey David steynemaloj bꞌey yul sconobꞌ ebꞌ tuꞌ, queytuꞌ jix yun yoc can ebꞌ Sirio yalan ẍejbꞌanil naj rey David, jix yakꞌon stoolabꞌal ebꞌ tet naj David. Queyton tuꞌ jix scolwa Jehová yetoj naj, yal cꞌal bꞌeytuꞌ jix too naj yin jowal jix eyqꞌuey cꞌal ebꞌ yu.
7 Jix lawi tuꞌ, jix yiꞌon can ecꞌ naj David, wan chꞌen smajbꞌal sat julbꞌal tol oro cꞌal eloj, yet ebꞌ soldado naj Hadad-ézer, jix yiꞌontej naj bꞌey Jerusalén. 8 Caw miman chꞌen bronce jix yiꞌ cꞌal pax can ecꞌ bꞌey conobꞌ Bétah cꞌal bꞌey Berotai, jaꞌton wan conobꞌ tuꞌ eyoc yalan ẍejbꞌanil naj Hadad-ézer.
9 Jaxa naj Toi, naj sreyal conobꞌ Amat, jix yabꞌoc naj tol jix lawi el masanil ebꞌ soldado naj Hadad-ézer, yu naj rey David. 10 Yuxan jix ẍejtoj jun scꞌaal naj chi yij Joram bꞌey naj rey David, jix yaontoj chꞌen plata, chꞌen oro, yetoj cꞌal bronce, yu yakꞌle scawil scꞌul naj, cꞌal yu yal-le watxꞌ kꞌane tet, yutol jix eyqꞌuey naj Hadad-ézer yu naj, yutol jaꞌ naj chi yij Toi, yakꞌnaj jowal yetoj. 11 Jaꞌ masanil wan chꞌen jix ẍaꞌ naj David tet naj Toi tuꞌ, jix yakꞌ naj rey David tet Jehová, yetoj cꞌal chꞌen oro cꞌal chꞌen plata jix tit bꞌey masanil wanxa conobꞌ jix eyqꞌuey yu: 12 Jaꞌton bꞌey conobꞌ Edom, bꞌey Moab, bꞌey ebꞌ Amonita, bꞌey ebꞌ Filisteo, bꞌey ebꞌ Amalecita, cꞌal chꞌen jix ecꞌ can yet jix oc jowal yetoj naj Hadad-ézer, scꞌaal naj Rehob, jaꞌton naj sreyal Sobá.
13 Caw wal jix bꞌinale naj rey David sicꞌlebꞌil. Jaꞌ yet jix meltzotej yin yakꞌon jowal yin ebꞌ Edomita, ey 18,000 ebꞌ jix eyqꞌuey yu bꞌey jun acꞌal bꞌey ey atzꞌam. 14 Yin eymanil tuꞌ, catuꞌ jix oc ebꞌ naj soldado steynemaloj conobꞌ Edom. Masanil ebꞌ Edomita jix cancan ebꞌ yalan ẍejbꞌanil naj rey David. Jaꞌ Jehová jix colwa yetoj naj, yal cꞌal bꞌey chi too oc naj yin jowal.
Ebꞌ Soldado Naj Rey David
15 Jaꞌ naj rey David jix yakꞌ reyal yibꞌan masanil ebꞌ yet Israelal, yin sjichanil cꞌal yin swatxꞌilal. Watxꞌ jix yute sbꞌa yin yopiso bꞌey yul sconobꞌ tuꞌ. 16 Jaxa ebꞌ jix yakꞌ yaawil yetoj, jaꞌton ebꞌ tiꞌ: Naj Joab yuneꞌ ix Seruiá, jaꞌ naj eyoc syaawiloj ebꞌ soldado, jaxa naj Josafat, scꞌaal Ahilud, jaꞌ chi tzꞌibꞌen tzet chi swaꞌne naj rey. 17 Jal pax naj Sadoc scꞌaal Ahitub, yetoj Ahimélec scꞌaal Abiatar, jaꞌ ebꞌ tuꞌ yakꞌomal xaambꞌal yeoc ebꞌ. Jaxa naj Seraías xin, jaꞌ jix tzꞌibꞌen skꞌaneal tzettaj yetal jix yun naj rey tuꞌ. 18 Jal pax naj Benaías scꞌaal Joiadá, yaaw yeoc yibꞌan ebꞌ soldado chi teynen naj rey, jaꞌton ebꞌ Quereteos cꞌal ebꞌ Peleteo, jaxa ebꞌ scꞌaal naj rey David, sat yaaw yeoc xol ebꞌ yaaw tuꞌ.